Nakapagtukdo si Jesus nin mahahalagang leksiyon kan siya nagkakakan sa harong nin sarong namamayo kan mga Fariseo. Kan magpadagos si Jesus sa pagbaklay pa-Jerusalem, dakulon an nag-iba sa saiya. Taano? Talaga daw na interesado sinda na magin tunay na mga parasunod niya, ano man an magin kalabot kaiyan?

Mantang nagbabaklay, may sinabi si Jesus sa sainda na puwedeng ikinabigla kan iba: “Kun an siisay man minadulok sa sako asin dai niya ikinakaungis an saiyang ama asin ina asin agom asin mga aki asin mga tugang na lalaki asin mga tugang na babayi asin pati na an saiyang sadiring buhay, dai siya puwedeng magin disipulo ko.” (Lucas 14:26) Pero ano an buot niyang sabihon?

Dai man sinasabi ni Jesus na dapat na literal na ikaungis kan gabos na mga parasunod niya an saindang mga kapamilya. Imbes, an buot niyang sabihon iyo na dapat nindang kamutan si Jesus nin urog kisa sa saindang mga kapamilya, bakong arog kan lalaki sa ilustrasyon ni Jesus dapit sa bangkete na dai inako an importanteng imbitasyon huling bago pa sana siyang ikasal. (Lucas 14:20) Sinasabi na an apuon kan mga Judio na si Jacob namuot ki Raquel pero ‘ikinaungis’ si Lea, an buot sabihon, mas namutan niya si Raquel kisa sa tugang kaining si Lea.—Genesis 29:31.

Mangnuhon na sinabi ni Jesus na dapat na ikaungis nin sarong disipulo “pati na an saiyang sadiring buhay,” o kalag. An buot sabihon, an sarong tunay na disipulo dapat na mas namumuot ki Jesus kisa sa sadiri niyang buhay, asin andam pa ngani siyang mawara iyan kun kinakaipuhan. Malinaw na an pagigin disipulo ni Cristo sarong seryosong responsabilidad. Dai iyan dapat na isagibo nin basta sana, na dai maingat na pinag-iisipan.

An sarong disipulo puwedeng mag-agi nin kasakitan asin persekusyon, huling sinabi ni Jesus: “An siisay man na dai magpasan kan saiyang hariging pasakitan asin dai magsunod sa sako dai puwedeng magin disipulo ko.” (Lucas 14:27) Iyo, an sarong tunay na disipulo ni Jesus dapat andam na magtagal nin kasusupgan siring kan inagihan ni Jesus. Sinabi pa ngani ni Jesus na magagadan siya sa kamot kan saiyang mga kaiwal.

Kaya kaipuhan na pag-isipan na marhay kan mga tawong kaiba ni Jesus sa pagbaklay kun ano an buot sabihon kan pagigin disipulo ni Cristo. Idinuon ini ni Jesus sa sarong ilustrasyon. “Halimbawa,” an sabi niya, “siisay sa saindo na gustong magpatindog nin tore an dai nguna matukaw asin makuwenta kan gastos tanganing aramon kun baga magkakaigo an saiyang kuwarta para mahaman iyan? Ta kun dai, puwedeng mailatag niya an pundasyon kaiyan pero dai niya maipapatapos.” (Lucas 14:28, 29) Kaya, bago magin mga disipulo niya, an mga kaibanan niya pa-Jerusalem dapat na marigon nang nakapagdesisyon na lubos nindang uutubon an responsabilidad nin pagigin disipulo. Idinuon niya iyan sa saro pang ilustrasyon:

“Siisay na hadi na makikigiyera sa saro pang hadi an dai nguna matukaw asin makonsulta sa iba kun baga kakayanon ninda kan 10,000 niyang suldados na labanan an nagdadangadang na kalaban na may 20,000 na suldados? Kun talagang dai niya iyan kakayanon,  masugo siya nin mga embahador asin makikipagkatuninungan mantang harayo pa an kalaban.” Para iduon an punto, nagsabi si Jesus: “Sa kaparehong paagi, ini an sigurado, mayo nin siisay man sa saindo na dai minabaya sa gabos niyang pagsadiri an puwedeng magin disipulo ko.”—Lucas 14:31-33.

Siyempre, sinasabi iyan ni Jesus bako sana para sa mga nagsusunod sa saiya sa pagbaklay. An gabos na nakanuod manungod ki Cristo dapat na andam na gumibo kan saiyang sinasabi digdi. Nangangahulugan ini na andam sindang isakripisyo an gabos na bagay na igwa sinda—an mga pagsadiri ninda, dawa an saindang buhay—kun gusto nindang magin mga disipulo niya. Dapat iyan na pag-isipan asin ipamibi.

Pinalataw ngunyan ni Jesus an sarong bagay na sinambit niya sa Sermon sa Bukid kun sain sinabi niyang an mga disipulo niya an “asin kan daga.” (Mateo 5:13) Posibleng marhay na an buot niyang sabihon iyo na kun paanong an literal na asin nakakapreserbar, arog man kaiyan an mga disipulo; mapoprotektaran ninda an mga tawo sa espirituwal asin moral na pagkalapa. Ngunyan, mantang madali nang matapos an saiyang ministeryo, nagsabi siya: “Totoo, an asin marahay. Pero kun mawara na an asgad kan asin, paano pa ikakabalik an asgad kaiyan?” (Lucas 14:34) Aram kan mga nagdadangog na may mga asin kaidto na bakong puro, na nasalakan nin mga bagay hali sa daga kaya dai na nin serbi.

Kaya ipinapahiling ni Jesus na dai dapat pabayaan dawa kan haloy na niyang mga disipulo na mangluya an saindang determinasyon. Ta kun mangyari iyan, magigin sindang daing serbi, arog nin asin na nawaran nin asgad. Puwede sindang tuyaon kan mga tawo. Urog pa diyan, sinda magigin bakong angay sa atubangan nin Diyos, na magdadara pa ngani nin katuyawan sa saiyang ngaran. Idinuon ni Jesus na mahalagang hinguwahon na dai mangyari iyan, kaya nagsabi siya: “An may talinga magdangog.”—Lucas 14:35.