Kan maaraman ni Jesus na plano kan mga Fariseo asin mga suportador kan partido ni Herodes na gadanon siya, naghali siya asin an mga parasunod niya pasiring sa Dagat kan Galilea. Dakulon na tawo hali sa gabos na lugar an nagduruman—hali sa Galilea, sa mga siyudad nin Tiro saka Sidon na nasa may baybayon, sa sirangan kan Salog nin Jordan, sa Jerusalem sa timog, asin sa Idumea na mas timog pa. Dakul na an pinaumayan ni Jesus. Bilang resulta, an dakul sa mga may grabeng hilang nagsurusuan pasiring sa saiya. Dai na sinda naghalat pa na madutan niya kaya sinda na mismo an nagmaigot na makarani para madutan siya.—Marcos 3:9, 10.

Dakulon na marhay an tawo kaya sinabi ni Jesus sa mga disipulo na mag-andam nin sadit na sakayan na magagamit para makarayo siya sa baybayon tanganing dai siya pagsûsûon kan mga tawo. Saro pa, makakapagtukdo siya sa sainda mantang nasa sakayan o makakapasiring sa iba pang lugar sa may baybayon para tabangan an dakul pang tawo.

Isinurat kan disipulong si Mateo na an ginibo ni Jesus kautuban kan “itinaram paagi ki Isaias na propeta.” (Mateo 12:17) Anong hula an nautob?

“Uya! An sakuyang lingkod na pinili ko, an sakong namumutan, na inuuyunan ko! Ibubugtak ko sa saiya an sakong espiritu, asin ipapahiling niya nin malinaw sa mga nasyon kun ano an hustisya. Dai siya makikiiwal o makurahaw man nin makusog, dai man madadangog nin siisay man an saiyang boses sa mayor na mga tinampo. Dai niya rurunuton an lanog na tambo, asin dai niya papalsukon an mitsang madali nang maparong, sagkod na magibo niyang mangibabaw an hustisya. Tunay nanggad, sa saiyang ngaran maglalaom an mga nasyon.”—Mateo 12:18-21; Isaias 42:1-4.

Siyempre, si Jesus an namumutan na lingkod na inuuyunan nin Diyos. Ipinahiling niya nin malinaw kun ano an tunay na hustisya, na nagin malabog huli sa palsong mga tradisyon nin relihiyon. Bakong makatanusan an paagi kan mga Fariseo sa pag-utob kan Katugunan kaya dai man lamang ninda tatabangan an tawong naghihilang kun Sabbath! Para ipahiling kun ano talaga an hustisya nin Diyos asin na yaon sa saiya an espiritu nin Diyos, pinaginhawa ni Jesus an mga tawo sa nakakapagabat na mga tradisyon. Huli kaini, gusto siyang gadanon kan mga lider nin relihiyon. Marauton talaga!

Ano an buot sabihon kan “dai siya makikiiwal o makurahaw man nin makusog, dai man madadangog nin siisay man an saiyang boses sa mayor na mga tinampo”? Pag pinapaumayan niya an mga tawo, dai niya tinutugutan sinda—o an mga demonyo—na “ihayag kun siisay siya.” (Marcos 3:12) Dai niya gustong maaraman kan mga tawo an dapit sa saiya paagi sa maribok na anunsiyo sa tinampo o sa  burubaretang ipinasa-pasa na nasobrahan an pagkasabi.

Itinao man ni Jesus an saiyang nakakarangang mensahe sa mga tawong garo baga nalanog na tambo o gaho, na nabari asin natumba na. Garo sinda nagbabaga na sanang mitsa na an ultimong silyab madali nang mapalsok. Sabi ngani, dai ni Jesus rinunot an nalanog na tambo o pinalsok an nagbabaga asin nag-aaso na sanang mitsa. Imbes, paagi sa kapadangatan asin pagkamuot, may kahusayan niyang pinakusog an mga mahuyo. Tunay nanggad, si Jesus an saro na malalauman kan mga nasyon!