Dai nahaloy pakatapos na paumayan ni Jesus an suruguon kan opisyal nin hukbo, naghali siya sa Capernaum asin nagpasiring sa Nain, na labing 32 kilometros pa-timog-sulnupan. Dai siya nagsosolo. Kaiba niyang nagbaklay an mga disipulo saka an sarong dakulang grupo nin mga tawo. Posibleng pabanggi na kan mag-abot sinda harani sa agihan palaog sa Nain. Duman nasabatan ninda an dakul na Judio sa sarong prosisyon sa lubong. An bangkay nin sarong hoben na lalaki pigbuburuligan paluwas sa siyudad para ilubong.

An pinakamamundo sa sainda gabos iyo an ina kan hoben na lalaki. Balo na siya, asin ngunyan gadan na an kasaro-sarui niyang aki. Kan magadan an agom niya, dawa paano igwa pa siya nin namumutan na aki. Imahinara na sana kun gurano siya kadayupot digdi, huling an aki na sana niya an saiyang malalauman sagkod sa paggurang niya. Ngunyan pati an aki niya gadan na. Siisay na an makakaiba-iba niya asin masuportar sa saiya?

Kan mahiling ni Jesus an babaying ini, nahirak siyang marhay huli sa grabeng kamunduan asin masakiton na sitwasyon kaini. Tinawan niya nin paglaom an babayi paagi sa marigon pero mabuot na pagsabi: “Magpundo ka na sa paghibi.” Alagad, bako sana iyan an ginibo niya. Nagrani siya asin dinutan an tiheras na kinamumugtakan kan gadan. (Lucas 7:13, 14) Huli sa mga ginibo niyang ini, biglang nagpurundo an nagmumundong mga tawo na nakikilubong. ‘Ano an buot niyang sabihon, asin ano an gigibuhon niya?’ an siguradong inisip kan mga tawo.

Kumusta man an mga kairiba ni Jesus na nakahiling sa saiya na naggibo nin mga milagro, na nagpaumay nin dakul na klase nin hilang? Minalataw na dai pa ninda nuarin man nahiling siya na nagbuhay nin gadan. Totoo na may nangyari talagang mga pagbuhay liwat kaidto pa, pero kaya daw iyan na gibuhon ni Jesus? (1 Hadi 17:17-23; 2 Hadi 4:32-37) Nagsabi si Jesus: “Aki ko, sinasabi ko sa saimo, magbangon ka!” (Lucas 7:14) Asin iyan an nangyari. Buminangon an lalaki asin nagpuon na magtaram! Itinao siya ni Jesus sa saiyang ina na nabigla pero ugmahon na marhay. Dai na siya nagsosolo.

Kan mahiling kan mga tawo na talagang buhay na an hoben na lalaki, inumaw ninda an Paratao nin Buhay,  si Jehova, na sinasabi: “Sarong makapangyarihan na propeta an nagdatong sa satuya.” Naintindihan kan iba an kahulugan kan makangangalas na ginibo ni Jesus, kaya nagsabi sinda: “Tinawan nin atensiyon nin Diyos an saiyang banwaan.” (Lucas 7:16) An bareta mapadapit sa bagay na ini nakalakop tulos sa mga lugar sa palibot asin posibleng pati sa ginikanan na banwaan ni Jesus, sa Nazaret, na mga 10 kilometros an rayo. Nakalakop man an bareta pati na sa Judea sa timog.

Nasa presuhan pa si Juan Bautista, asin interesadong marhay na maaraman an manungod sa mga nagigibo ni Jesus. Ibinareta kan mga disipulo ni Juan sa saiya an manungod sa mga milagrong ini. Ano an nagin reaksiyon niya?