1-3. Paano tinuya-tuya kan mga Babilonyo an mga parasamba ni Jehova, asin taano?

 IMAHINARA na saro kang maimbod na Judio na nakaistar sa siyudad nin Babilonya. Mga kabangang siglo ka nang nakadistiyero kaiba kan kapwa mo mga Judio. Arog kan kinatudan mo pag aldaw nin Sabbath, makikipaghilingan ka sa mga kapagtubod mo para sambahon si Jehova. Mantang naglalakaw ka sa matawong mga tinampo, naaagihan mo an dai mabilang na darakulaon na templo saka mga sagradong lugar. Dakul na tawo an nagpapasiring sa mga lugar na iyan para magdulot saka magkanta sa saindang mga diyos arog ni Marduk.

² Bilang sadit na grupo, naghirilingan kamo kan mga kapagtubod mo sa lugar na harayo sa kadaklan na tawo. a Nakahanap kamo nin tuninong na lugar—tibaad sa gilid kan saro sa mga salog kan siyudad—tanganing iriba kamong mamibi, magkanta, asin maghurop-hurop sa Tataramon nin Diyos. Mantang namimibi kamo, nadadangog mo an maluway na ragitnit kan mga bangkang kahoy na nakaduong sa may gilid kan salog. Maray sana ta medyo tuninong sa lugar na iyan. Naglalaom ka na mayo man lugod nin Babilonyo na makahiling sa saindo asin mangribok sa pagtiripon nindo, arog kan parati nindang ginigibo. Ano ta ginigibo ninda iyan?

 ³ Kadakul nang giyera an ginana kan Babilonya, asin naniniwala an mga Babilonyo na dahil sa mga diyos ninda kaya makusog an saindang siyudad. Para sa sainda, an biyong pagkalaglag kan Jerusalem patunay na an saindang diyos na si Marduk mas makusog ki Jehova! Huli kaiyan, tinutuya-tuya ninda an Diyos mo asin an saiyang banwaan. Kun minsan, nanunuya sinda: “Kantahon nindo sa samo an saro sa mga kanta nin Sion”! (Sal. 137:3) Dakul na salmo an manungod sa pag-ugma huli sa kapangganahan kan Sion sa mga kaiwal ni Jehova. Tibaad an mga salmong iyan an gustong-gustong tuya-tuyaon kan mga Babilonyo. Pero, an ibang mga salmo manungod mismo sa mga Babilonyo. Halimbawa, sinasabi sa sarong salmo: “Ginibo ninda an Jerusalem na magin sarong tambak na kagabaan. . . . Pigtutuya-tuya asin pigkakantiyawan kami kan mga nasa palibot mi.”—Sal. 79:1, 3, 4.

4, 5. Anong paglaom an itinao kan propesiya ni Ezekiel, asin ano an pag-uulayan ta sa kapitulong ini? (Hilingon an ritrato sa kapinunan kan kapitulo.)

⁴ Yaon man an apostatang mga Judio, na dai nag-aalangan na tuya-tuyaon an saimong pagtubod ki Jehova saka sa saiyang mga propeta. Sa ibong kan arog kaiyan na panunuya, an dalisay na pagsamba nagtatao sa saimo asin sa saimong pamilya nin karangahan. Masiramon sa pagmati an iribanan na pagpamibi asin pagkanta. Nakakapaginhawa an pagbasa kan Tataramon nin Diyos. (Sal. 94:19; Roma 15:4) Imahinara na sa aldaw na ini, an saro sa mga kapagtubod mo nagdara sa pagtiripon nindo nin sarong espesyal na bagay—sarong rolyo na igwa kan propesiya ni Ezekiel. Gustong-gusto mong madangog an panuga ni Jehova na ibabalik niya an saiyang banwaan sa sadiri nindang daga. Ugmahon ka mantang binabasa nin makusog an arog kaiyan na propesiya, asin hinuhurop-hurop mo an paglaom na sa maabot na panahon, makakapuli ka saka an saimong pamilya asin makakatabang sa nakakaugmang panahon na iyan nin pagbabalik!

⁵ An propesiya ni Ezekiel pano nin mga panuga manungod sa pagbabalik. Siyasaton ta an mga panugang iyan. Paano nautob sa mga idinistiyero an mga panugang iyan? Ano an kahulugan kan siring na mga propesiya sa presenteng mga panahon? Pag-aadalan ta man an manungod sa mga propesiya na igwa nin pangultimong kautuban sa maabot na panahon.

 6. Paano pauruutrong pinatanidan nin Diyos an saiyang rebelyosong banwaan?

⁶ Paagi ki Ezekiel, malinaw na sinabi ni Jehova sa saiyang banwaan kun paano niya sinda papadusahan huli sa pagrebelde ninda. “Madidistiyero sinda asin magigin bihag,” an sabi ni Jehova. (Ezek. 12:11) Arog kan nahiling ta sa Kapitulo 6 kan publikasyon na ini, inakto pa ngani ni Ezekiel an mga tataramon na iyan. Pero bako iyan an inot na patanid sa sainda. Kan panahon pa sana ni Moises, na haros sarong milenyo na an nakaagi bago kaini, pinatanidan na ni Jehova an saiyang banwaan na kun padagos sindang magrerebelde, madidistiyero sinda. (Deu. 28:36, 37) Nagtao man nin kaagid na mga patanid an mga propetang arog ni Isaias asin Jeremias.—Isa. 39:5-7; Jer. 20:3-6.

 7. Sa anong mga paagi pinadusahan ni Jehova an banwaan niya?

 ⁷ Makamumundo, dai dinangog kan kadaklan sa banwaan an mga patanid na iyan. Pag-abot nin panahon, nakulgan na marhay an buot ni Jehova huli sa ginibo kan saiyang banwaan na pagrebelde, pagsamba sa mga idolo, pagigin bakong maimbod, saka pagigin maati sa impluwensiya kan maraot na mga pastor. Kaya tinugutan niya sindang magsapar nin tiggutom—na sarong mamundo saka makasusupog na pangyayari huling an saindang daga “sarong daga na nagbubulos nin gatas saka tangguli.” (Ezek. 20:6, 7) Dangan, arog kan haloy nang ihinula ni Jehova, tinugutan niyang madistiyero an saiyang banwaan na matagas an payo. Kan 607 B.C.E., an Jerusalem asin an templo kaiyan lubos nang linaglag ni Nabucodonosor kan Babilonya. Ribo-ribo sa mga nakaligtas na mga Judio an idinistiyero sa Babilonya. Ginibo sa sainda duman an panunuya asin pagkontra, arog kan ilinadawan sa kapinunan kan kapitulong ini.

8, 9. Paano nagpatanid an Diyos sa Kristiyanong kongregasyon laban sa apostasya?

⁸ May nangyari man daw na arog kaiyan sa Kristiyanong kongregasyon? Igwa! Arog kan mga Judio kan suanoy na mga panahon, an mga parasunod ni Cristo patiinot nang pinatanidan. Sa kapinunan kan ministeryo ni Jesus, sinabi niya: “Magin mapagbantay kamo sa mga bakong tunay na propeta na minadiyan sa saindo na may sulot na arog kan sa karnero, pero sa laog, sinda pasluon na mga lobo.” (Mat. 7:15) Pakalihis nin mga taon, pinasabngan si apostol Pablo na magtao nin kaparehong patanid: “Aram ko na pag mayo na ako maralaog diyan sa saindo an mapang-aping mga lobo asin magigin maringis sinda sa aripumpon, saka hali mismo sa saindo igwa nin mga tawong mataram nin mga bagay na biribid tanganing irayo an mga disipulo asin pasunudon sa sainda.”—Gibo 20:29, 30.

⁹ Tinukduan an mga Kristiyano kun paano mamimidbid asin rarayuan an arog kaiyan na peligrosong mga tawo. Pinagbutan an Kristiyanong kamagurangan na halion sa kongregasyon an mga apostata. (1 Tim. 1:19; 2 Tim. 2:16-19; 2 Ped. 2:1-3; 2 Juan 10) Minsan siring, arog kan nangyari kaidto sa Israel asin Juda, dakul na Kristiyano an dai nagdangog sa mamumuton na mga patanid na iyan. Sa pagtatapos kan inot na siglo, nakagamot na an apostasya sa kongregasyon. Narisa ni Juan, an huring apostol na nabubuhay pa sa pagtatapos kan inot na siglo C.E., na an kongregasyon naaapektaran na nin apostasya saka nin lakop na rebelyon. Siya na sana an nagseserbing pang-ulang diyan. (2 Tes. 2:6-8; 1 Juan 2:18) Ano an nangyari pagkagadan ni Juan?

10, 11. Paano nautob an parabula ni Jesus manungod sa trigo asin duot puon kan ikaduwang siglo C.E.?

¹⁰ Pagkagadan ni Juan, nagpuon na mautob an parabula ni Jesus manungod sa trigo asin duot. (Basahon an Mateo 13:24-30.) Arog kan patiinot na nahiling ni Jesus, sinabwagan ni Satanas an kongregasyon nin “mga duot,” o imitasyon na mga Kristiyano, asin marikas na naramugan an kongregasyon. Siguradong nakulgan an buot ni Jehova kan mahiling niya na an kongregasyon na inestablisar kan saiyang Aki naramugan nin idolatriya, paganong mga selebrasyon saka kaugalian, asin palsong mga doktrina na hali sa mayong pagtubod sa  Diyos na mga pilosopo saka sa mga relihiyon na impluwensiyado ni Satanas! Ano an ginibo ni Jehova? Arog kan ginibo niya sa bakong maimbod na Israel, pinabayaan niyang madistiyero an saiyang banwaan. Puon kaidtong mga ikaduwang siglo C.E., masakit nang hanapon an mga arog-trigo huli sa kadakulan kan imitasyon na mga Kristiyano. An tunay na Kristiyanong kongregasyon garo man sana idinistiyero sa Dakulang Babilonya, an pambilog na kinaban na imperyo nin palsong relihiyon, asin an imitasyon na mga Kristiyano man nagin kabtang kan imperyong iyan. Mantang nagdadakul an imitasyon na mga Kristiyano, naglataw an Kakristiyanuhan.

¹¹ Durante kan mamundong mga siglong idto nin pangingibabaw kan Kakristiyanuhan, igwa nin nagkapirang tunay na mga Kristiyano, an “trigo” sa parabula ni Jesus. Arog kan mga Judiong idinistiyero na ilinadawan sa Ezekiel 6:9, nagirumduman ninda an tunay na Diyos. Kusog-buot na kinontra kan nagkapira an palsong mga doktrina kan Kakristiyanuhan. Tinuya-tuya sinda asin pinersegir. Papabayaan na lang daw ni Jehova an saiyang banwaan sa espirituwal na kadikluman na iyan? Dai! Arog kan nangyari sa suanoy na Israel, ipinahayag ni Jehova nin tama sana an saiyang kaanggutan asin sa tamang lawig nin panahon. (Jer. 46:28) Apuwera kaiyan, tinawan ni Jehova nin paglaom an saiyang banwaan. Balikan ta an mga Judiong idinistiyero  sa suanoy na Babilonya asin hilingon kun paano sinda tinawan ni Jehova nin paglaom na matatapos an pagigin bihag ninda.

12, 13. Taano ta mawawara an kaanggutan ni Jehova sa idinistiyerong banwaan niya kan panahon ni Ezekiel?

¹² Prangka si Jehova manungod sa kaanggutan niya sa saiyang banwaan, pero siniyerto man niya sa sainda na an matanos niyang kaanggutan dai magdadanay sagkod lamang. Halimbawa, risahon an pananaram na ini: “Mawawara na an kaanggutan ko; mahupa na an sakuyang grabeng kaanggutan sa sainda, asin makokontento ako. Asin pag natapos ko nang iluwas an sakuyang grabeng kaanggutan sa sainda, maaaraman nanggad ninda na ako, si Jehova, nakipag-ulay sa sainda dahil naghahagad ako nin eksklusibong debosyon.” (Ezek. 5:13) Taano daw ta mawawara an kaanggutan ni Jehova?

¹³ Kabilang sa mga bihag iyo an maimbod na mga Judio na idinistiyero kaiba kan mga bakong maimbod. Paagi ki Ezekiel, ihinula man nin Diyos na masulsol an nagkapira sa Saiyang banwaan mantang nakadistiyero. Magigirumduman kan nagbabasol na mga Judiong idto an makasusupog na mga bagay na ginibo ninda bilang pagrebelde sa Diyos ninda, asin makikimahirak sinda para sa kapatawadan asin pag-uyon ni Jehova. (Ezek. 6:8-10; 12:16) Kaiba si Ezekiel sa mga maimbod, pati man an propetang si Daniel saka su tulong kaibanan niya.  Sa katunayan, halawig an nagin buhay ni Daniel kaya nahiling niya an pagpupuon saka an pagtatapos kan pagkadistiyero. An saiyang udok sa pusong paghagad nin kapatawadan sa mga kasalan kan Israel nakarekord sa Daniel kapitulo 9. Siguradong arog man kaiyan an nagin pagmati kan ribo-ribong idinistiyero na nagmamawot na mapatawad ni Jehova asin magkamit giraray nin mga bendisyon. Nakakaugma nanggad an ipinasabong na mga isinurat ni Ezekiel manungod sa mga panuga nin pagpatalingkas asin pagbabalik!

14. Taano ta ibabalik ni Jehova an banwaan niya sa sadiri nindang daga?

¹⁴ Pero, igwang mas mahalagang dahilan sa pagpatalingkas asin pagbabalik kan banwaan ni Jehova. Matatapos an halawig na pagkadistiyero ninda, bako dahil maninigo sinda sa pagkatalingkas, kundi dahil panahon na giraray ni Jehova na pabanalon an saiyang pangaran sa atubangan kan gabos na nasyon. (Ezek. 36:22) Lubos na maaaraman kan mga Babilonyo na an sa-demonyo nindang mga diyos, arog ni Marduk, dai lamang maikukumparar sa Soberanong Kagurangnan na Jehova! Pag-ulayan ta an limang panuga na ipinasabong ni Jehova ki Ezekiel na sabihon sa mga kapwa niya idinistiyero. Inot, pag-ulayan ta kun ano an epekto kan lambang panuga sa mga maimbod na idto. Dangan, hilingon ta an mas dakulang kautuban kan mga panugang iyan.

15. Ano an mababago sa relihiyosong mga gibo-gibo kan mga mabaralik?

¹⁵ PANUGA 1. Mayo nang idolatriya o iba pang makababalding mga gibo-gibo na konektado sa palsong relihiyon. (Basahon an Ezekiel 11:18; 12:24.) Arog kan tinukar sa Kapitulo 5 kan publikasyon na ini, an Jerusalem asin an templo kaiyan naatian nin mga gibong hali sa palsong relihiyon, arog nin idolatriya. Kaya nagin maraot an mga tawo asin nagin suway ki Jehova. Sa hula na itinao ni Jehova ki Ezekiel, makakaasa an mga idinistiyero na magigibo giraray ninda an pagsamba na malinig asin daing digta. An gabos na iba pang mga bendisyon kan pagbabalik madepende sa panginot na bagay na ini: an pagbabalik kan areglo nin Diyos para sa dalisay na pagsamba.

16. Ano an ipinanuga ni Jehova manungod sa daga kan saiyang banwaan?

¹⁶ PANUGA 2. Pagbalik sa sadiri nindang daga. “Itatao ko saindo an daga nin Israel,” an sabi ni Jehova sa mga idinistiyero. (Ezek. 11:17)  Saro ining pambihirang panuga huling an mga Babilonyo, na nagtutuya-tuya sa bihag na banwaan nin Diyos, dai nanggad matugot na magbalik an banwaan nin Diyos sa namumutan nindang dagang tinubuan. (Isa. 14:4, 17) Asin kun magdadanay na maimbod an mga nagbaralik, magigin mataba saka mabunga an daga, kaya magkakaigwa sinda nin kakanon asin kapaki-pakinabang na trabaho. Dai na ninda maeeksperyensiyahan an kasusupgan asin grabeng pagsakit huli sa tiggutom.—Basahon an Ezekiel 36:30.

17. Ano an mangyayari manungod sa pagtao nin mga atang ki Jehova?

¹⁷ PANUGA 3. Pagtao giraray nin mga dulot na regalo sa altar ni Jehova. Arog kan nasambitan sa Kapitulo 2 kan publikasyon na ini, sa irarom kan Katugunan, an mga atang asin dulot mahalagang marhay na kabtang kan dalisay na pagsamba. Basta nagdadanay na masinunod asin malinig sa espirituwal an mga nagbaralik hali sa pagkadistiyero, aakuon ni Jehova an saindang mga dulot. Kaya magigibo ninda an pagbayad sa saindang mga kasalan asin makakapagdanay sindang harani sa saindang Diyos. Nanuga si Jehova: “Maglilingkod sa sako an bilog na banwaan nin Israel, gabos sinda. Mauugma ako sa sainda duman, asin hahagadon ko sa saindo an mga kontribusyon saka an mga inot na bunga sa saindong mga dulot, an gabos nindong banal na bagay.” (Ezek. 20:40) Talagang maibabalik an dalisay na pagsamba, asin magtatao ini nin mga bendisyon sa banwaan nin Diyos.

18. Paano papasturan ni Jehova an saiyang banwaan?

¹⁸ PANUGA 4. Hahalion an maraot na mga pastor. An impluwensiya kan maraot na mga nanginginot iyo an sarong panginot na dahilan kaya nakagibo nin magabat na mga sála an banwaan nin Diyos. Nanuga si Jehova na babaguhon niya iyan. Manungod sa siring na maraot na mga pastor, sinabi niya: “Hahalion ko sinda bilang pastor kan sakuyang mga karnero . . . Ililigtas ko an sakong mga karnero hali sa nguso ninda.” Asin siniyerto ni Jehova sa maimbod niyang banwaan: “Aatamanon ko an sakuyang mga karnero.” (Ezek. 34:10, 12) Paano niya gigibuhon iyan? Magamit siya nin maimbod na mga lalaki bilang mga pastor.

19. Ano an ipinanuga ni Jehova manungod sa pagkasararo?

 ¹⁹ PANUGA 5. Pagkasararo kan mga parasamba ni Jehova. Isipa na sana kun gurano kamundo an maimbod na mga parasamba na mahiling an pagkabaranga kan banwaan nin Diyos bago sinda idinistiyero. Huli sa impluwensiya kan palsong mga propeta asin maraot na mga pastor, nagrebelde an banwaan sa maimbod na mga propeta na mga representante ni Jehova; nabanga pa ngani an banwaan sa magkakontrahan na paksiyon. Kaya, an saro sa pinakanakakaugmang parte kan pagbabalik iyo an panugang ini paagi ki Ezekiel: “Tatawan ko sinda nin nagkakasararong puso, asin lalagan ko sinda nin bagong espiritu.” (Ezek. 11:19) Kun an nagbaralik na mga Judio magdadanay na kasaro kan Diyos na Jehova asin kun magdadanay sindang sararo, mayong nagkokontra an makakadaog sa sainda. Bilang sarong nasyon, makakatao giraray sinda nin kamurawayan ki Jehova imbes na katuyawan asin kawaran nin onra.

20, 21. Paano nautob an mga panuga nin Diyos sa nagbaralik na mga Judio?

²⁰ Nautob daw an limang panugang iyan sa nagbaralik na mga Judio? Girumdumon an sinabi kan maimbod na si Josue: “Mayo ni sarong tataramon sa gabos na marahay na panuga na ipinanuga sa saindo ni Jehova na saindong Diyos an dai nautob. Nangyari an gabos na iyan para sa saindo. Mayo ni sarong tataramon sa mga iyan an dai nautob.” (Jos. 23:14) Kun nangyari iyan kan panahon ni Josue,  mangyayari man iyan sa panahon kan mga Judio na nagbaralik sa sadiri nindang daga.

²¹ Ipinundo kan mga Judio an idolatriya asin an iba pang makababalding mga gibo-gibo kan palsong relihiyon na nagin dahilan para mapasuway sinda ki Jehova. Dawa garo baga imposible, nag-istar giraray sinda sa sadiri nindang daga; nagtanom sinda duman asin nagkaigwa nin makahulugan na buhay. An saro sa inot nindang ginibo iyo an pagbalik kan altar ni Jehova sa Jerusalem asin an pagtao duman nin mga dulot na inaako nin Diyos. (Esd. 3:2-6) Binendisyunan sinda ni Jehova nin marahay na espirituwal na mga pastor, arog kan maimbod na saserdote asin parakopya na si Esdras, kan mga gobernador na si Nehemias saka Zerubabel, kan Halangkaw na Saserdoteng si Josue, asin kan makusog an buot na mga propetang si Hageo, Zacarias, saka Malakias. Basta sinusunod kan banwaan an pagbuot asin paggiya ni Jehova, nakakamtan ninda an pagkasararong haloy na nindang dai naeeksperyensiyahan.—Isa. 61:1-4; basahon an Jeremias 3:15.

22. Paano ta naaraman na an inot na kautuban kan mga propesiya manungod sa pagbabalik patanaw sana kan mas dakulang mangyayari?

²² Daing duda na talagang nakakapakusog an inot na kautuban kan mga panuga ni Jehova manungod sa pagbabalik! Pero, an kautuban na iyan patanaw sana kan mas dakulang mangyayari. Paano ta iyan  naaraman? Buweno, an mga panugang iyan may kondisyon; uutubon sana ni Jehova an mga iyan kun an banwaan magdadanay na masinunod. Pag-abot nin panahon, an mga Judio nagin masinuway giraray asin rebelyoso. Pero arog kan sinabi ni Josue, an tataramon ni Jehova pirming nagkakatotoo. Kaya an mga panugang iyan magkakaigwa nin mas dakula asin mas nagdadanay na kautuban. Hilingon ta kun paano iyan nangyari.

23, 24. Kasuarin asin paano nagpuon “an mga panahon nin pagbabalik sa dati kan gabos na bagay”?

²³ Bilang mga paraadal kan Bibliya, aram ta na kan 1914, nagpuon na an huring mga aldaw kan maraot na sistemang ini nin mga bagay. Alagad, para sa mga lingkod ni Jehova, bako ining panahon para magmundo. An totoo, ipinapahiling kan Bibliya na sarong nakakaugmang panahon an nagpuon kan 1914—“an mga panahon nin pagbabalik sa dati kan gabos na bagay.” (Gibo 3:21) Paano ta iyan naaraman? Buweno, ano an nangyari sa langit kan 1914? Pinatukaw sa trono si Jesu-Cristo bilang an Mesiyanikong Hadi! Paano ta masasabi na an pangyayaring iyan kapinunan kan pagbabalik sa dati? Tandaan, nanuga si Jehova ki Hading David na magdadanay sagkod lamang an pagkahadi sa angkan niya. (1 Cron. 17:11-14) Naputol an pagkahading iyan kan 607 B.C.E. kan laglagon kan mga Babilonyo an Jerusalem asin tapuson an pamamahala kan mga hadi sa linya ni David.

²⁴ Bilang “an Aki nin tawo,” si Jesus sarong gikan ni David, kaya nagin legal na tagapagmana siya kan pagkahadi sa linya ni David. (Mat. 1:1; 16:13-16; Luc. 1:32, 33) Kan itao ni Jehova ki Jesus an langitnon na trono kan 1914, nagpuon “an mga panahon nin pagbabalik sa dati kan gabos na bagay”! Magagamit na ngunyan ni Jehova an perpektong Hading iyan tanganing ipadagos an gibuhon na pagbabalik.

25, 26.(a) Kasuarin natapos an halawig na pagkadistiyero sa Dakulang Babilonya, asin paano ta iyan naaraman? (Hilingon man an kahon na “Taano ta 1919?”) (b) Ano an nagpuon na mautob puon kan 1919?

²⁵ An saro sa inot na ginibo ni Cristo bilang Hadi iyo an pag-iba sa saiyang Ama para inspeksiyunon an areglo para sa dalisay na pagsamba digdi sa daga. (Mal. 3:1-5) Arog kan ihinula ni Jesus sa saiyang  ilustrasyon manungod sa trigo asin duot, sa halawig na panahon, masakit mamidbid an trigo sa tahaw nin mga duot, o kun sairisay an tunay na linahidan na mga Kristiyano asin kun sairisay an mga impostor. b Pero kan magpuon an panahon nin pag-ani kan 1914, nagin malinaw an pagkakaiba. Sa laog nin mga dekada bago kan 1914, ibinubuyagyag na kan maimbod na mga Estudyante sa Bibliya an grabeng mga sála kan Kakristiyanuhan, asin pinunan nindang sumuway sa raot na organisasyon na iyan. Panahon na iyan ni Jehova para lubos na ibalik an dalisay na pagsamba. Kaya sa pagpupuon kan 1919, mga pirang taon pa sana kan magpuon an panahon kan “aranihan,” an banwaan nin Diyos lubos nang napatalingkas sa pagkabihag kan Dakulang Babilonya. (Mat. 13:30) Tapos na an pagkadistiyero!

²⁶ Nagpuon nang magkaigwa nin mas dakulang kautuban an mga propesiya ni Ezekiel manungod sa pagbabalik—sarong kautuban na dai pa nahiling kan banwaan nin Diyos kan suanoy na mga panahon. Pag-ulayan ta ngunyan kun paano nagkaigwa nin mas dakulang kautuban an limang panuga na pinag-ulayan ta.

27. Paano hinali nin Diyos sa banwaan niya an idolatriya?

²⁷ PANUGA 1. Mayo nang idolatriya asin iba pang makababalding relihiyosong mga gibo-gibo. Sa pagtatapos kan ika-19 siglo asin pagpupuon kan ika-20 siglo, nagtitiripon na an maimbod na mga Kristiyano asin pinunan na nindang halion an palsong relihiyosong mga gibo-gibo. An mga katukduan manungod sa Trinidad, imortalidad kan kalag nin tawo, asin nagkakalayong impiyerno ibinilang na bakong basado sa Kasuratan asin hali sa palsong relihiyon. An paggamit nin mga imahen sa pagsamba ibinuyagyag na saro nanggad na idolatriya. Luway-luway man na nasabutan kan banwaan nin Diyos na an paggamit nin krus sa pagsamba sarong porma nin idolatriya.—Ezek. 14:6.

28. Sa paanong paagi masasabi na an banwaan ni Jehova ibinalik sa saindang daga?

²⁸ PANUGA 2. Pagbalik kan banwaan nin Diyos sa espirituwal na daga. Kan bayaan kan maimbod na mga Kristiyano an Dakulang Babilonya, napaduman sinda sa espirituwal na daga na maninigo sa sainda—sarong binendisyunan na kamugtakan na diyan nungka na nindang  maeeksperyensiyahan giraray an espirituwal na tiggutom. (Basahon an Ezekiel 34:13, 14.) Arog kan mahihiling ta pa sa Kapitulo 19 kan publikasyon na ini, binendisyunan ni Jehova an dagang iyan nin daing kaagid na suplay nin espirituwal na kakanon.—Ezek. 11:17.

29. Ano an nagpakusog sa gibuhon na paghuhulit kan 1919?

²⁹ PANUGA 3. Pagtao giraray nin mga dulot na regalo sa altar ni Jehova. Kan inot na siglo C.E., itinukdo sa mga Kristiyano na dapat sindang magdulot sa Diyos, bako nin literal na mga atang na hayop, kundi nin mas mahalagang marhay na mga regalo—an mga pag-umaw ki Jehova asin an paghuhulit manungod sa saiya. (Heb. 13:15) Sa laog nin dakul na siglo nin pagkadistiyero, mayo nin organisadong areglo para gibuhon an siring na mga pagdulot. Pero, sa pagtatapos kan pagkadistiyero, nagdudulot na an banwaan nin Diyos nin siring na mga atang nin pag-umaw. Sibot sinda sa paghuhulit, asin maugma nindang inuumaw an Diyos sa mga pagtiripon ninda. Puon 1919, tinawan nin urog na pagduduon kan “maimbod asin mapagmansay na  uripon” an gibuhon na paghuhulit asin mas lalo nindang inorganisar ini. (Mat. 24:45-47) Huli kaiyan, an altar ni Jehova biyong nagsusupay sa mga atang na itinatao kan padakul nin padakul na mga paraumaw kan saiyang banal na pangaran!

30. Ano an ginibo ni Jesus para matawan an banwaan niya nin marahay na mga pastor?

³⁰ PANUGA 4. Hahalion an maraot na mga pastor. Pinatalingkas ni Cristo an banwaan nin Diyos sa maraot asin makasadiring palsong mga pastor kan Kakristiyanuhan. An mga pastor sa aripumpon ni Cristo na guminawi na kapareho kaidtong palsong mga pastor hinarali sa saindang katungdan. (Ezek. 20:38) Bilang an Marahay na Pastor, sinigurado ni Jesus na naaataman an saiyang mga karnero. Kan 1919, ninombrahan niya an saiyang maimbod asin mapagmansay na uripon. An sadit na grupong iyan nin maimbod na linahidan na mga Kristiyano an nanginot sa pagtao nin espirituwal na kakanon, kaya naaataman na marhay an banwaan nin Diyos. Pag-abot nin panahon, nagsanay nin mga elder para tumabang sa pag-ataman sa “aripumpon nin Diyos.” (1 Ped. 5:1, 2) An ipinasabong na paglaladawan na yaon sa Ezekiel 34:15, 16 parating ginagamit para pagirumdumon an Kristiyanong mga pastor manungod sa pamantayan na itinao kan Diyos na Jehova asin ni Jesu-Cristo.

31. Paano inutob ni Jehova an propesiya sa Ezekiel 11:19?

³¹ PANUGA 5. Pagkasararo kan mga parasamba ni Jehova. Sa paglihis nin mga siglo, an Kakristiyanuhan nagkabaranga sa ribo-ribong mga relihiyon asin sekta na biyong baranga asin nagkokorontrahan. Sa kabaliktaran, makangangalas nanggad an ginibo ni Jehova sa saiyang ibinalik na banwaan. Talagang nautob an ipinanuga niya paagi ki Ezekiel: “Tatawan ko sinda nin nagkakasararong puso.” (Ezek. 11:19) Sa bilog na kinaban, milyon-milyon an parasunod ni Cristo na hali sa manlain-lain na kultura, relihiyon, asin kamugtakan sa pagbuhay saka sa sosyedad. Pero, saro sana an mga katotoohan na itinutukdo sa sainda gabos, asin lubos sindang nagkakasararo sa pagsagibo kan saro sanang gibuhon. Kan huring banggi kan buhay ni Jesus digdi sa daga, udok niyang ipinamibi na magkasararo an saiyang mga parasunod. (Basahon an Juan 17:11, 20-23.) Sa panahon niyato, mahihiling ta na sinimbag ni Jehova sa pambihirang paagi an pamibing iyan.

32. Ano an namamatian mo manungod sa kautuban kan mga propesiya manungod sa pagbabalik? (Hilingon man an kahon na “Mga Propesiya Manungod sa Pagkabihag Asin Pagbabalik.”)

³² Dai ka daw nauugma na nabubuhay ka sa maugmang panahon na ini nin pagbabalik? Nahihiling ta an kautuban kan mga propesiya ni Ezekiel sa lambang kabtang kan satong pagsamba ngunyan. Makakapagtiwala kita na nauugma na ngunyan si Jehova sa saiyang banwaan, arog kan ihinula niya paagi ki Ezekiel: “Mauugma ako sa saindo.” (Ezek. 20:41) Nasasabutan mo daw na saro nanggad na pribilehiyo na magin kabtang kan nagkakasararo asin basog sa espirituwal na banwaan na nagdudulot nin pag-umaw ki Jehova sa bilog na kinaban—sarong banwaan na nakatalingkas pakalihis nin dakul na siglo nin espirituwal na pagkadistiyero? Pero, igwa pa nin mas dakulang kautuban an pira sa mga propesiya ni Ezekiel manungod sa pagbabalik.

33-35. (a) Ano an kahulugan kan propesiya sa Ezekiel 36:35 para sa mga Judiong idinistiyero? (b) Ano an kahulugan kan propesiyang iyan para sa banwaan ni Jehova ngunyan? (Hilingon man an kahon na “An mga Panahon nin Pagbabalik sa Dati kan Gabos na Bagay.”)

³³ Arog kan nahiling ta, “an mga panahon nin pagbabalik sa dati kan gabos na bagay” nagpuon kaidtong ibalik an paghadi sa linya nin mga hadi na gikan ki David, kan patukawon sa trono si Jesus kan 1914. (Ezek. 37:24) Dangan, tinawan ni Jehova nin kapangyarihan si Cristo na ibalik an dalisay na pagsamba sa Saiyang banwaan pakalihis nin dakul na siglo nin espirituwal na pagkadistiyero. Alagad, diyan na daw natapos an gibuhon ni Cristo na pagbabalik? Dai! Magpapadagos pa iyan sa pambihirang paagi sa maabot na panahon—asin an mga propesiya ni Ezekiel nagtatao sa sato nin nakakaugmang mga detalye.

³⁴ Halimbawa, pag-isipan an ipinasabong na mga tataramon na ini: “Masarabi an mga tawo: ‘An tiwangwang na daga nagin siring sa hardin nin Eden.’” (Ezek. 36:35) Ano an kahulugan kan panugang iyan para ki Ezekiel asin sa mga kapwa niya idinistiyero? Siguradong dai man ninda inasahan an sarong literal na kautuban—na garo baga an daga magigin arog kan orihinal na hardin, o Paraiso, na ginibo mismo ni Jehova! (Gen. 2:8) Imbes, siguradong nasabutan ninda na sinisiyerto sa sainda ni Jehova na an saindang ibinalik na daga magigin magayon asin mabunga.

³⁵ Ano an kahulugan kan panugang iyan para sa sato ngunyan? Dai ta inaasahan na magkakaigwa iyan nin literal na kautuban ngunyan, sa tahaw kan maraot na kinaban na ini na pinapamahalaan ni Satanas na Diyablo. Imbes, aram ta na an mga tataramon na iyan igwa nin espirituwal na kautuban ngunyan. Bilang mga lingkod ni Jehova, nakaistar kita sa sarong ibinalik na espirituwal na daga, sarong kamugtakan kun sain mabunga kitang nakakapaglingkod asin an panginot sa sato iyo an sagradong paglilingkod sa saiya. An espirituwal na dagang ini luway-luway asin dagos-dagos na lalong nagigin siring sa paraiso. Pero kumusta man kun manungod sa maabot na panahon?

36, 37. Anong mga panuga an mauutob sa maabot na Paraiso?

³⁶ Pagkatapos kan dakulang giyera nin Armagedon, papahiwason ni Jesus an saiyang gibuhon na pagbabalik para magin sakop kaiyan pati an pisikal na daga. Durante kan saiyang Sangribong Taon na Paghadi, gigiyahan niya an katawuhan para gibuhon an planetang ini na magin arog kan hardin nin Eden, sarong paraiso, uyon sa dai nabagong katuyuhan ni Jehova para digdi! (Luc. 23:43) Dangan, magkakasararo an gabos na tawo asin aatamanon ninda an saindang istaran na daga. Mayo na nin peligro asin huma maski sain. Imahinara an panahon na mauutob maski an panugang ini: “Makikipagtipan ako sa sainda nin tipan nin katuninungan, tapos hahalion ko sa kadagaan an mga mabangis asin layas na hayop, tanganing makaistar sinda nin tiwasay sa kaawagan asin makaturog sa mga kadlagan.”—Ezek. 34:25.

³⁷ Naiimahinar mo iyan? Makakaduman ka sa maski sain na parte kan mahiwason na dagang ini na mayong ikinakatakot. Dai ka kukulgan nin ano man na hayop. Magigin matuninong an buhay mo.  Makakalakaw-lakaw ka nin solo sa kadlagan mantang ikinakaugma mo an pambihirang kagayunan kaiyan. Puwede ka pa nganing magturog diyan huling nakakasigurado ka na ligtas ka asin mayong mangyayaring maraot sa saimo!

38. Ano an namamatian mo mantang iniisip mo na nauutob na an panuga na nakarekord sa Ezekiel 28:26?

³⁸ Mahihiling ta man an kautuban kan panugang ini: “Maistar sinda [sa daga] nin tiwasay asin maturugdok nin mga harong saka magibo nin mga ubasan; maistar sinda nin tiwasay pag nagsagibo na ako nin paghukom sa gabos na nakapalibot sa sainda na nagtutuya-tuya sa sainda; asin mamimidbid nanggad ninda na ako si Jehova na saindang Diyos.” (Ezek. 28:26) Pag nawara na an gabos na kaiwal ni Jehova, makakamtan ta na an katuninungan asin katiwasayan sa bilog na daga. Mantang inaataman ta an daga, maaasikaso ta man an mga pangangaipo ta saka kan satong mga mahal sa buhay; matugdok kita nin komportableng mga harong asin magibo nin mga ubasan.

39. Taano ta makakasigurado ka na mauutob an mga propesiya ni Ezekiel manungod sa Paraiso?

³⁹ Para saimo, garo lang daw pangaturugan an mga panugang iyan? Girumdumon an mga nahiling mo na durante kan panahon na ini nin “pagbabalik sa dati kan gabos na bagay.” Sa ibong kan grabe nanggad na pagkontra ni Satanas, tinawan nin kapangyarihan si Jesus para ibalik an dalisay na pagsamba durante kan pinakamasakit na panahon na ini kan kinaban. Mapuwersang ebidensiya nanggad ini na mauutob an gabos na ipinanuga nin Diyos paagi ki Ezekiel!