Kapitulo 16

Pinonan kan Gobyerno nin Dios an Pamamahala Kaiyan

1. (a) Ano an haloy nang hinalat kan mga tawo na may pagtubod? (b) Taano ta inaapod na sarong “siudad” an kahadean nin Dios?

 SA LAOG nin rinibong taon an mga tawo na may pagtubod sa gobyerno nin Dios naghalat sa panahon na iyan mapoon sa pamamahala. Halimbawa, an Biblia nagsasabi na an maimbod na si Abraham “hinahalat an siudad na may tunay na mga pundasyon, na an paratogdok asin kaggibo kan siudad na iyan iyo an Dios.” (Hebreo 11:10) An “siudad” na iyan iyo an kahadean nin Dios. Alagad taano ta inaapod iyan digdi na “siudad”? Ini huli ta kan suanoy na mga panahon  uso para sa sarong hade na mamahala sa sarong siudad. Kaya parateng iniisip nin mga tawo an sarong siudad bilang sarong kahadean.

2. (a) Ano an nagpapaheling na an Kahadean tunay para sa enot na mga disipulo ni Cristo? (b) Ano an boot nindang maaraman manongod dian?

² An kahadean nin Dios tunay para sa enot na mga parasunod ni Cristo. Ini ipinaririsa kan saindang dakulang interes sa pamamahala kaiyan. (Mateo 20:20-23) An hapot na nasa saindang isip iyo an: Noarin mapoon na mamahala si Cristo asin an saiyang mga disipulo? Sarong beses kan si Jesus magpaheling sa saiyang mga disipulo pagkabuhay nia liwat, sinda naghapot: “Kagurangnan, ibabalik mo ngonyan an kahadean sa Israel?” (Gibo 1:6) Kaya, gustong-gusto daw nindong maaraman kun noarin mapoon sa pamamahala si Cristo bilang Hade sa gobyerno nin Dios, kapareho kan mga disipulo ni Cristo?

AN GOBYERNO NA IPINAMIMIBI NIN MGA KRISTIANO

3, 4. (a) Ano an nagpapaheling na an Dios poon pa kaidto perming namamahala bilang Hade? (b) Kaya taano ta tinokdoan ni Cristo an saiyang mga parasunod na mamibi na dumatong na logod an kahadean nin Dios?

³ Tinokdoan ni Cristo an saiyang mga parasunod na mamibi sa Dios: “Dumatong logod an kahadean mo. Gibohon logod an boot mo, kun paano sa langit, siring man sa daga.” (Mateo 6:9, 10) Alagad tibaad may maghapot: ‘Bako daw na si Jehova Dios perming namamahala bilang hade? Asin kun iyo, taano ta ipamimibi na dumatong logod an saiyang kahadean?’

⁴ Totoo, inaapod kan Biblia si Jehova na “Hade na dai nin katapusan.” (1 Timoteo 1:17) Asin iyan nagsasabi: “Si Jehova mismo nagparigon kan saiyang trono sa mismong kalangitan; asin an saiyang sadiring pagkahade nagsakop sa gabos na bagay.” (Salmo 103:19) Kaya si Jehova poon pa kaidto iyo na an Supremong Hade sa gabos niang linalang. (Jeremias 10:10) Minsan siring, huli sa pagrebelde tumang sa saiyang paghade duman sa tatamnan nin Eden, an Dios nag-areglo nin sarong espesyal na gobyerno. Ini an gobyerno na kan huri itinokdo ni Jesu-Cristo sa saiyang mga parasunod na ipamibi. An katuyohan kaiyan tapuson an mga problema na naglataw kan si Satanas na Diablo asin an iba pa tumalikod sa paghade nin Dios.

5. Kun iyan kahadean nin Dios taano ta inaapod man iyan na kahadean ni Cristo asin kahadean kan 144,000?

⁵ An bagong gobyernong ini kan Kahadean minaako kan kapangyarihan asin diretso na maghade gikan sa Dakulang Hade, si Jehova Dios. Iyan saiyang kahadean. Paorootro, inaapod iyan kan Biblia na “kahadean nin Dios.” (Lucas 9:2, 11, 60, 62; 1 Corinto 6:9, 10; 15:50) Minsan siring, mantang ninombrahan ni Jehova an saiyang Aki na magin an  Poon na Hade kaiyan, iyan inaapod man na kahadean ni Cristo. (2 Pedro 1:11) Arog kan nanodan niato sa mas enot na kapitulo, an 144,000 katawo gikan sa katawohan maghahade kaiba ni Cristo sa kahadean na ini. (Kapahayagan 14:1-4; 20:6) Kaya iyan inaapod man kan Biblia na “saindang kahadean.”—Daniel 7:27.

6. Sono sa nagkapira, kasuarin nagpoon na mamahala an kahadean nin Dios?

⁶ May mga nagsasabi na an Kahadean nagpoon na mamahala kan taon na si Jesus bumuwelta sa langit. Sinasabi ninda na si Cristo nagpoon na maghade kan ibubo nia an banal na espiritu sa saiyang mga parasunod kan aldaw kan Judiong kapiyestahan nin Pentecostes kan taon 33 C.E. (Gibo 2:1-4) Alagad ta an gobyerno kan Kahadean na iinareglo ni Jehova tanganing tumapos sa gabos na problema na gikan sa pagrebelde ni Satanas dai nagpoon na mamahala kaidto. Mayo nin nagpaparisa na an ‘aking lalaki,’ na iyo an gobyerno nin Dios na si Cristo an hade, namundag kaidto asin nagpoon na mamahala. (Kapahayagan 12:1-10) Bueno, si Jesus daw sa ano man na paagi nagkaigwa nin sarong kahadean kan taon 33 C.E.?

7. Siisay an pinaghadean ni Cristo poon kan 33 C.E.?

⁷ Iyo, si Jesus nagpoon kaidto na maghade sa saiyang kongregasyon nin mga parasunod na, pag-abot nin panahon, makakaibanan nia sa kalangitan. Kaya sinasabi kan Biblia na sinda, mantang nasa daga pa, pinalaog sa “kahadean kan Aki nin pagkamoot [nin Dios].” (Colosas 1:13) Alagad ta an pamamahalang ini, o “kahadean,” sa mga Kristiano na may paglaom sa langitnon na buhay bakong an gobyerno kan Kahadean na itinokdo ni Jesus sa saiyang mga parasunod na ipamibi. Iyan kahadean sana sa 144,000 katawo na maghahade kaiba nia sa langit. Sa nag-aging mga siglo sinda sana an nagin sakop kaiyan. Kaya an paghadeng ini, o ‘kahadean kan Aki nin pagkamoot nin Dios,’ matatapos kun an pinakahuri sa mga sakop na ini na may langitnon na paglaom magadan asin makaiba na ni Cristo sa langit. Sinda magigin bako nang mga sakop ni Cristo, kundi sa panahon na iyan sinda magigin mga hade kaiba nia sa haloy nang ipinanugang gobyerno kan Kahadean nin Dios.

PAGPOPOON NIN PAMAMAHALA SA TAHAW NIN MGA KAIWAL

8. (a) Ano an nagpapaheling na pagbuhaya liwat ki Cristo magkakaigwa nin panahon nin paghalat bago sia maghade? (b) Ano an isinabi nin Dios ki Cristo kan panahon nang sia maghade?

⁸ Kan si Cristo bumalik sa langit pagkabuhay nia liwat, dai sia nagpoon kaidtong mamahala bilang Hade sa gobyerno nin Dios. Imbes, magkakaigwa nin sarong panahon nin paghalat, arog kan ipinaliliwanag ni apostol Pablo: “An tawong ini [si Jesu-Cristo] nagdolot nin  sarong atang para sa mga kasalan para sa gabos na panahon asin nagtukaw sa too nin Dios, poon kaidto naghahalat sagkod na an saiyang mga kaiwal ibugtak na magin tongtongan kan saiyang mga bitis.” (Hebreo 10:12, 13) Kan umabot na an panahon na si Cristo magpoon na maghade, sinabihan sia ni Jehova: “Mandaog ka [o, manakop ka] sa tahaw kan saimong mga kaiwal.”—Salmo 110:1, 2, 5, 6.

9. (a) Taano ta bakong gabos gusto kan kahadean nin Dios? (b) Kun an gobyerno nin Dios magpoon nang mamahala, ano an gigibohon kan mga nasyon?

⁹ Garo daw dai mapaniwalaan na may magigin kaiwal an gobyerno nin Dios? Alagad ta bakong gabos boot na mabuhay na sakop nin sarong gobyerno na naghahagad sa mga sakop kaiyan na gumibo kan tama. Kaya pakapagsabi kun paano si Jehova asin an saiyang Aki iyo na an magkakapot kan pamamahala sa kinaban, an Biblia nagsasabi, “an mga nasyon nagkaaranggot.” (Kapahayagan 11:15, 17, 18) An mga nasyon habo sa kahadean nin Dios ta dinadaya sinda ni Satanas na tumangon iyan.

10, 11. (a) Kun an gobyerno nin Dios magpoon nang mamahala, ano an mangyayari sa langit? (b) Ano an mangyayari sa daga? (c) Kaya anong mahalagang punto an boot niatong girumdomon?

¹⁰ Kun an gobyerno nin Dios magpoon nang mamahala, si Satanas asin an saiyang mga anghel nasa langit pa. Mantang sinda tumang sa Kahadean, maputok tolos an ralaban. Bilang resulta, si Satanas asin an saiyang mga anghel palalayason sa langit. Huli kaini, an sarong makosog na tingog nagsasabi: “Nangyari na an kaligtasan asin an kapangyarihan asin an kahadean kan satong Dios asin an autoridad kan saiyang Cristo.” Iyo, nagpoon na an pamamahala kan gobyerno nin Dios! Asin mantang si Satanas asin an saiyang mga anghel hinale na sa langit, nag-oogma duman. “Huli kaini mag-ogma, kamo kalangitan asin kamo na nag-eerok dian!” sabi kan Biblia.—Kapahayagan 12:7-12.

¹¹ Ini daw maogmang panahon man para sa daga? Bako! Imbes, yaon an pinakagrabeng panahon nin kasakitan na inagihan kan daga. An Biblia nagsasabi sato: “Herak man kan daga asin kan dagat, huli ta huminilig na dian saindo an Diablo, na may dakulang kaanggotan, sa pakaaram na halipot na sana an saiyang panahon.” (Kapahayagan 12:12) Kaya ini sarong mahalagang punto na dapat girumdomon: An pagpopoon kan pamamahala kan kahadean nin Dios dai nangangahulogan nin katoninongan asin seguridad tolos sa daga. An tunay na katoninongan maabot sa huri kun an kahadean nin Dios biyo nang namamahala sa daga. Ini mangyayari sa katapusan kan ‘halipot na panahon,’ kun si Satanas asin an saiyang mga anghel haleon na tanganing dai na sinda makapanribok sa siisay pa man.

12. Taano ta makakalaom kita na isasabi sato kan Biblia kun noarin mapoon na mamahala an kahadean nin Dios?

 ¹² Alagad ta noarin palalayason sa langit si Satanas, sa siring manriribok sa daga sa laog nin ‘halipot na panahon’? Noarin mapoon sa pamamahala an gobyerno nin Dios? An Biblia daw nagtatao kan simbag? Maninigong laoman niato na iyo. Taano? Bueno, huli ta haloy pa an Biblia naghula na kun noarin an Aki nin Dios enot na malataw bilang tawo sa daga tanganing magin an Mesiyas. An totoo, itinokdo kaiyan an mismong taon na sia nagin Mesiyas. Kun siring, ano man an dapit sa mas mahalaga pang pagdatong kan Mesiyas, o Cristo, tanganing pumoon sa saiyang pamamahala sa Kahadean? Tunay na lalaoman niato na sasabihon man sato kan Biblia kun noarin ini mangyayari!

13. Paano ihinula kan Biblia an mismong taon na an Mesiyas malataw sa daga?

¹³ Alagad ta tibaad ihapot nin saro: ‘Saen ihinuhula kan Biblia an mismong taon na an Mesiyas naglataw sa daga?’ An libro sa Biblia na Daniel nagsasabi: “Pagpoon sa pagluwas kan tataramon sa paghirahay asin pagtogdok giraray sa Jerusalem sagkod sa Mesiyas na Poon, maagi an pitong semana, saka anom na polo may duwang semana,” o sa kagabsan 69 semana. (Daniel 9:25) Alagad ini bakong 69 literal na semana, na bale 483 na aldaw sana, o labi sanang sarong taon. Iyan 69 semana nin mga taon, o 483 na taon. (Ikomparar an Bilang 14:34.) An pagboot na hirahayon asin itogdok giraray an mga lanob nin Jerusalem itinao kan 455 B.C.E. * (Nehemias 2:1-8) Kaya an 69 semana nin mga taon na ini natapos pakalihis nin 483 na taon, kan 29 C.E. Asin iyan mismo an taon na si Jesus nagduman ki Juan tanganing magpabautismo! Sa okasyon na idto sia linahidan kan banal na espiritu asin nagin an Mesiyas, o Cristo.—Lucas 3:1, 2, 21-23.

KUN NOARIN MAPOON SA PAMAMAHALA AN GOBYERNO NIN DIOS

14. Ano an ipinagrerepresentar kan “kahoy” sa Daniel kapitulo kuwatro?

¹⁴ Bueno, kun siring, saen ihinuhula kan Biblia an taon na si Cristo mapoon sa pamamahala bilang hade sa gobyerno nin Dios? Digdi man sana sa libro kan Biblia na Daniel. (Daniel 4:10-37) Dian an sarong higante, sukdo sa langit na kahoy ginagamit na magrepresentar ki Hadeng Nabucodonosor nin Babilonya. Sia an kaharohalangkaweng hadeng tawo kan panahon na idto. Minsan siring, si Hadeng Nabucodonosor napiritan na marealisar na may saro pang mas halangkaw na  naghahade. Ini an “Kaharohalangkawe,” o “Hade kan kalangitan,” si Jehova Dios. (Daniel 4:34, 37) Kaya, sa mas mahalagang paagi, an sukdo sa langit na kahoy na ini, nagrepresentar sa supremong paghade nin Dios, partikularmente may koneksion sa satong daga. An paghade ni Jehova sa kadikit na panahon ipinahayag paagi sa kahadean na inestablisar nia sa nasyon nin Israel. Kaya an mga hade kan tribo ni Juda na naghade sa mga Israelitas sinasabing “nagtutukaw sa trono ni Jehova.”—1 Cronica 29:23.

15. Kan an “kahoy” palodon, taano ta ginakodan iyan?

¹⁵ Sono sa tala kan Biblia sa Daniel kapitulo kuwatro, an sukdo sa langit na kahoy pinalod. Minsan siring, itinada an pungo, asin ginakodan iyan nin batbat asin tanso. Paagi kaiyan an pungo dai matubo sagkod na umabot an panahon nin Dios na haleon an gakod asin pabayaan iyan na tumubo giraray. Alagad ta paano asin kasuarin pinalod an paghade nin Dios?

16. (a) Paano asin kasuarin pinalod an paghade nin Dios? (b) Ano an isinabi sa ultimong hade nin Juda na tuminukaw sa “trono ni Jehova”?

¹⁶ Pag-abot nin panahon, an kahadean nin Juda na inestablisar ni Jehova nagin maraoton kaya tinogotan nia si Hadeng Nabucodonosor na laglagon iyan, palodon iyan. Ini nangyari kan taon 607 B.C.E. Kan panahon na idto si Zedequias, an ultimong hade nin Juda na tuminukaw sa trono ni Jehova, sinabihan: “Tangkasa an korona. . . . dai iyan magigin sadiri nin siisay man sagkod na magdatong sia na igwa kan legal na katanosan, asin iyan itatao ko sa saiya.”—Ezequiel 21:25-27.

17. Anong peryodo nin panahon an nagpoon kan 607 B.C.E.?

 ¹⁷ Kaya an paghade nin Dios, na ipinagrepresentar kan “kahoy,” pinalod kan 607 B.C.E. Mayo na nin gobyerno na magrerepresentar sa kahadean nin Dios sa daga. Kun siring, kan 607 B.C.E. nagpoon an sarong peryodo nin panahon na kan huri inapod ni Jesu-Cristo na “an itinalaan na mga panahon kan mga nasyon,” o, “an mga panahon kan mga Hentil.” (Lucas 21:24; King James Version) Sa laog kan “itinalaan na mga panahon” na ini an Dios mayo nin gobyerno na magrerepresentar kan saiyang paghade sa daga.

18. Ano an mangyayari kun matapos na “an itinalaan na mga panahon kan mga nasyon”?

¹⁸ Ano an mangyayari kun matapos na an “itinalaan na mga panahon kan mga nasyon” na ini? Itatao ni Jehova an kapangyarihan na maghade sa Saro “na igwa kan legal na katanosan.” An Sarong ini iyo si Jesu-Cristo. Kaya kun maaaraman niato kun noarin matatapos “an itinalaan na mga panahon kan mga nasyon,” maaaraman niato kun noarin si Cristo mapoon na mamahala bilang hade.

19. Sa laog nin pirang “panahon” na mapuputol an paghade nin Dios sa daga?

¹⁹ Sono sa Daniel kapitulo kuwatro, an “itinalaan na mga panahon” na ini magigin “pitong panahon.” Sinasabi ni Daniel na magkakaigwa nin “pitong panahon” na sa laog kaiyan an paghade nin Dios, na ipinagrerepresentar kan “kahoy,” dai mamamahala sa daga. (Daniel 4:16, 23) Gurano kalawig an “pitong panahon” na ini?

20. (a) Gurano kalawig an sarong “panahon”? (b) Gurano kalawig an “pitong panahon”? (c) Taano ta binibilang niato na sarong taon an sarong aldaw?

 ²⁰ Sa Kapahayagan kapitulo 12, bersikulo 6 asin 14, naaaraman niato na an 1,260 aldaw bale “panahon [an boot sabihon, 1 panahon] asin mga panahon [an boot sabihon, 2 panahon] patin kabangang panahon.” Iyan 3¹⁄₂ panahon gabos. Kaya an “panahon” bale 360 aldaw. Kun siring, an “pitong panahon” bale 7 x 360, o 2,520 aldaw. Ngonyan kun bibilangon niato na an sarong aldaw sarong taon, sono sa sarong reglamento sa Biblia, an “pitong panahon” bale 2,520 taon.—Bilang 14:34: Ezequiel 4:6.

21. (a) Noarin mapoon asin matatapos “an itinalaan na mga panahon kan mga nasyon”? (b) Noarin mapoon na mamahala an gobyerno nin Dios? (c) Taano ta tama pa man giraray na ipamibi na dumatong logod an kahadean nin Dios?

²¹ Naaraman na niato na “an itinalaan na mga panahon kan mga nasyon” nagpoon kan taon 607 B.C.E. Kaya paagi sa pagbilang nin 2,520 taon poon sa petsang iyan, minaabot kita sa 1914 C.E. Iyan an taon na natapos an “itinalaan na mga panahon” na ini. Minilyon na nabubuhay pa ngonyan an nakakagirumdom sa mga nangyari kan 1914. Kan taon na idto, an Guerra Mundial I nagpoon nin sarong panahon nin grabeng kasakitan na nagpapadagos sagkod sa satong aldaw. Ini nangangahulogan na si Jesu-Cristo nagpoon na mamahala bilang hade sa langitnon na gobyerno nin Dios kan 1914. Asin huli ta an Kahadean nagpoon nang mamahala, napapanahon nanggad na ipamibi niato na iyan “dumatong” na logod asin paraon sa daga an maraot na palakaw nin mga bagay ni Satanas!—Mateo 6:10; Daniel 2:44.

22. Ano an puwedeng ihapot nin nagkapira?

²² Alagad tibaad ihapot nin saro: ‘Kun si Cristo nagbuwelta na tanganing mamahala sa kahadean kan saiyang Ama, taano ta dai niato sia naheheling?’

[Nota sa Ibaba]

[Mga Hapot Para sa Pag-adal]

[Tsart sa pahina 140, 141]

Kan 607 B.C.E. buminagsak an kahadean nin Dios sa Juda.

Kan 1914 C.E. si Jesu-Cristo nagpoon na magsakop bilang hade sa langitnon na gobyerno nin Dios

607 B.C.E.—1914 C.E.

Oktubre, 607 B.C.E.—Oktubre, 1 B.C.E. = 606 taon

Oktubre, 1 B.C.E.—Oktubre, 1914 C.E. = 1,914 taon

PITONG PANAHON NIN MGA HENTIL = 2,520 TAON

[Ritrato sa pahina 134]

“Ibabalik mo ngonyan an kahadean sa Israel?”

[Ritrato sa pahina 139]

An halangkaw na kahoy sa Daniel kapitulo 4 nagrerepresentar sa paghade nin Dios. Sa kadikit na panahon ini ipinahayag paagi sa kahadean nin Juda

[Ritrato sa pahina 140, 141]

An kahoy pinalod kan malaglag an kahadean nin Juda