An Pagigin Kahangahanga kan Langitnon na Trono ni Jehova
Kapitulo 14
An Pagigin Kahangahanga kan Langitnon na Trono ni Jehova
Bisyon 2—Kapahayagan 4:1–5:14
Tema: Makangingirhat na mga pangyayari sa atubangan kan trono nin paghokom nin Dios
Panahon nin kaotoban: Ilinaladawan kan bisyon na ini an mga pangyayari poon 1914 sagkod sa katapusan kan Milenyo patin lihis pa, sa panahon na an gabos na linalang na yaon sa langit asin digdi sa daga mag-oomaw ki Jehova.—Kapahayagan 5:13
1. Taano ta maninigo kitang magin interesadong marhay sa mga bisyon na sinasabi sa sato ni Juan?
PINOPONAN ngonyan na sabihon sa sato ni Juan an dugang pang nakakapukaw sa boot na mga bisyon. Paagi sa pasabong sia yaon pa sa aldaw kan Kagurangnan. Kaya, an saiyang ilinaladawan may hararom na kahulogan para sa sato na aktuwal na nabubuhay sa aldaw na iyan. Paagi sa mga bisyon na ini, hinahale ni Jehova an garo baga tahob kaya dai naheheling an aktuwal na mga bagay sa langit asin sinasabi sa sato an saiyang punto de vista sa mga paghokom nia na gigibohon digdi sa daga. Dugang pa, baga man langitnon o daganon an satong paglaom, an mga kapahayagan na ini nakakatabang sato na maheling an satong lugar sa katuyohan ni Jehova. Kun siring, kita gabos maninigong magpadagos na magin interesadong marhay sa sinabi ni Juan: “Maogma an nagbabasa nin makosog asin an mga nagdadangog sa mga tataramon kan propesiyang ini, asin nag-ootob kan mga bagay na nasusurat dian.”—Kapahayagan 1:3.
2. Ano ngonyan an naeksperyensiahan ni Juan?
2 An sunod na naheling ni Juan nakakalabi sa ano man na naheling sa video nin mga tawo sa presenteng panahon! Sia nagsurat: “Pagkatapos kan mga bagay na ini, uya! naheling ko an sarong bukas na pinto sa langit, asin an enot na tingog na nadangog ko siring kan sa sarong trumpeta, na nakikipag-olay sa sako, na an sabi: ‘Sakat digdi, asin ipapaheling ko sa saimo an mga bagay na mangyayari nanggad.’” (Kapahayagan 4:1) Paagi sa bisyon nalaog ni Juan an dai naheheling na kalangitan na yaon duman an presensia ni Jehova, na mas halangkaw pang marhay sa pisikal na espasyo na sinisiyasat nin mga astronaut, mas halangkaw pa nganing marhay sa mga galaksia kan materyal na uniberso. Garo baga naglaog sa sarong bukas na pinto, inimbitaran si Juan na basogon an saiyang mata sa pagmasid sa pinakaharayong espiritung kalangitan na duman nakatukaw sa trono si Jehova mismo, tanawon na garo dai ka makahangos huli sa kagayonan. (Salmo 11:4; Isaias 66:1) Abaa kadakulang pribilehio!
3. Ano an ipinapagirumdom kan tingog na “siring kan sa sarong trumpeta,” asin siisay an daing duwa-duwa na Pinaghalean kaiyan?
3 Dai sinasabi kan Biblia kun kiisay an “enot na tingog” na ini. Kapareho kan makosog na tingog ni Jesus na nadangog bago kaini, iyan garo makosogon na tanog nin trumpeta. (Kapahayagan 1:10, 11) Ipinapagirumdom kaiyan an dangog sagkod sa harayo na tanog nin amodyong na senyal kan presensia ni Jehova sa Bukid nin Sinai. (Exodo 19:18-20) Daing duwa-duwa, si Jehova an mamuraway na Pinaghalean kan pag-apod. (Kapahayagan 1:1) Binukasan nia an pinto tanganing, paagi sa bisyon, si Juan makalaog sa kabanalbanaleng lugar kan bilog na mahiwason na sakop kan soberaniya ni Jehova.
An Makinang na Presensia ni Jehova
4. (a) Ano an kahulogan kan bisyon ni Juan para sa linahidan na mga Kristiano? (b) Ano an kahulogan kan bisyon para sa mga may paglaom na mabuhay sagkod lamang digdi sa daga?
4 Ano an naheling ni Juan? Hinanyoga, mantang sinasabi nia sa sato ngonyan an saiyang marahayon na eksperyensia: “Pagkatapos kan mga bagay na ini ako tolos-tolos na napasa kapangyarihan kan espiritu: asin, uya! may sarong trono na yaon duman sa langit, asin may sarong nakatukaw sa trono.” (Kapahayagan 4:2) Sa panale, si Juan ibinalyo sa espirituwal na paagi kan puersa aktiba nin Dios pasiring sa mismong trono ni Jehova. Abaa kanakakaogma kaini para ki Juan! Digdi tinawan sia nin nakakasula, preliminaryong paheling sa mismong kalangitan na duman nakareserba an “dai nalalapa asin daing digta patin dai napaparang mana” para sa saiya asin sa iba pang linahidan na Kristiano. (1 Pedro 1:3-5; Filipos 3:20) Para sa mga may paglaom na mabuhay sagkod lamang digdi sa daga, igwa man nin hararom na kahulogan an bisyon ni Juan. Iyan nakakatabang sainda na masabotan an kamurawayan kan presensia ni Jehova asin kan langitnon na areglo sa pamamahala na ginagamit ni Jehova sa paghokom sa mga nasyon asin dangan sa paggobernar sa buhay nin mga tawo digdi sa daga. Talagang si Jehova an Dios nin matibayon na pag-organisar!
5. Anong aktuwal na bagay an naheling ni Juan na isinimbolisar kan takop kan kaban nin tipan?
5 An kadaklan sa namasdan ni Juan duman sa langit nakakaagid sa mga kabtang kan tabernakulo sa kaawagan. Ini itinogdok mga 1,600 na taon na an nakaagi kaidto bilang santuaryo nin tunay na pagsamba para sa mga Israelita. Nasa Kabanalbanale kan tabernakulong idto an kaban kan tipan, asin si Jehova mismo nagtataram hale sa ibabaw kan solidong bulawan na takop kan Kaban. (Exodo 25:17-22; Hebreo 9:5) Huli kaini, an takop kan Kaban nagserbing simbolo kan trono ni Jehova. Naheling ngonyan ni Juan an aktuwal na irinerepresentar kan simbolong idto: an Soberanong Kagurangnan na Jehova mismo nakatukaw na may labi-labing kamurawayan sa saiyang engrandeng trono sa langit!
6. Anong impresyon ki Jehova an sinasabi sa sato ni Juan, asin taano ta angay ini?
6 Bakong arog kan mas naenot na mga propeta na nagkamit nin mga bisyon kan trono ni Jehova, dai detalyadong ilinaladawan ni Juan an Banal na nakatukaw dian. (Ezequiel 1:26, 27; Daniel 7:9, 10) Alagad sinasabi sato ni Juan an saiyang impresyon sa Sarong nakatukaw sa trono sa mga tataramon na ini: “Asin an nakatukaw agid an itsura sa sarong batong jaspe asin sa mahal na marhay na bato na kolor pula, asin sa palibot kan trono igwa nin hablon-dawani na agid an itsura sa esmeralda.” (Kapahayagan 4:3) Ini kahangahanga nanggad na daing kapareho! An naheling ni Juan trangkilo, makilyab na kagayonan kapareho nin makinang, makilyab na mga mutya. Ini tamang-tama sa pagkaladawan ni disipulo Santiago ki Jehova bilang “Ama kan langitnon na mga liwanag”! (Santiago 1:17) Dai nahaloy pakasuratan kan Kapahayagan, si Juan mismo nagsabi: “An Dios liwanag asin dian sa saiya dai nin ano man na kadikloman.” (1 Juan 1:5) Abaa kamamuraway na Persona si Jehova!
7. Ano an manonodan niato sa bagay na may hablon-dawani sa palibot kan trono ni Jehova?
7 Mangnohon na naheling ni Juan sa palibot kan trono an sarong hablon-dawani, na an kolor berdeng esmeralda. An termino sa Griego na trinadusir digding hablon-dawani (irʹis) nagsusuherir nin pormang bilog na bilog. An hablon-dawani enot na nasambitan sa Biblia may koneksion sa aldaw ni Noe. Kan hubas na an tubig kan Delubyo, pinalataw ni Jehova an sarong hablon-dawani sa panganoron, asin ipinaliwanag nia kun ano an isinisimbolisar kaiyan sa mga tataramon na ini: “Ibinubugtak ko an sakuyang hablon-dawani sa panganoron, asin iyan magigin tanda kan tipan sa pag-oltanan ko asin kan daga. Asin magigirumdoman ko nanggad an sakuyang tipan sa pag-oltanan ko asin nindo saka kan lambang nabubuhay na kalag sa gabos na laman; asin an katubigan dai na magigin delubyo na malaglag sa gabos na laman.” (Genesis 9:13, 15) Kun siring, ano an ipapagirumdom ki Juan kan langitnon na bisyon? An hablon-dawani na saiyang naheling seguradong nagpagirumdom sa saiya kan pangangaipo nin matoninong na relasyon ki Jehova, arog kan nakakamtan ngonyan kan grupong Juan. Idodoon man kaiyan sa saiya an katrangkilohan asin katoninongan kan presensia ni Jehova, katrangkilohan na malakop sa gabos na makinuyog na tawo kun ladladon na ni Jehova an saiyang tolda sa katawohan duman sa sosyedad sa bagong daga.—Salmo 119:165; Filipos 4:7; Kapahayagan 21:1-4.
Pag-aram Kun Sairisay an 24 Kamagurangan
8. Sairisay an naheling ni Juan sa palibot kan trono, asin sairisay an irinerepresentar kan mga ini?
8 Aram ni Juan na may mga saserdoteng ninombrahan na maglingkod sa suanoy na tabernakulo. Kaya tibaad napangalas sia kan maheling nia an sunod niang ilinaladawan: “Asin sa palibot kan trono igwa nin beinte kuatrong trono, asin sa mga tronong ini naheling kong nakatukaw an beinte kuatrong kamagurangan na may sulot na puting pan-ibabaw na mga gubing, asin sa saindang payo may mga koronang bulawan.” (Kapahayagan 4:4) Iyo, imbes na mga saserdote, yaon an 24 kamagurangan, na nakatukaw sa trono asin may korona siring sa mga hade. Sairisay an kamagurangan na ini? Daing iba kundi an mga linahidan sa Kristianong kongregasyon, na binuhay liwat asin nasa kamugtakan sa langit na ipinanuga sa sainda ni Jehova. Paano niato iyan naaaraman?
9, 10. Paano niato naaaraman na an 24 kamagurangan nagrerepresentar sa linahidan na Kristianong kongregasyon sa mamuraway na kamugtakan kaiyan sa langit?
9 Enot sa gabos, sinda may mga korona. An Biblia nagtataram manongod sa pagkakamit kan linahidan na mga Kristiano nin ‘koronang bakong malalapaon’ asin pagkaigwa nin buhay na daing katapusan—nin inmortalidad. (1 Corinto 9:25; 15:53, 54) Alagad mantang an 24 kamagurangan na ini nakatukaw sa mga trono, an mga koronang bulawan sa kontekstong ini nagrerepresentar sa autoridad nin sarong hade. (Ikomparar an Kapahayagan 6:2; 14:14.) Ini nagsusuportar sa konklusyon na an 24 kamagurangan naglaladawan sa linahidan na mga parasunod ni Jesus sa saindang kamugtakan sa langit, huli ta si Jesus nakipagtipan sa sainda na tumukaw sa mga trono sa saiyang Kahadean. (Lucas 22:28-30) Solamente si Jesus asin an 24 kamagurangan na ini—dawa mga anghel dai kaiba—an ilinaladawan na namamahala sa langit sa atubangan ni Jehova.
10 Kaoyon ini kan panuga ni Jesus sa kongregasyon sa Laodicea: “An makadaog totogotan kong tumukaw kaiba ko sa sakong trono.” (Kapahayagan 3:21) Alagad an langitnon na asignasyon kan 24 kamagurangan bako sanang paggobyerno. Sa introduksion kan libro nin Kapahayagan, si Juan nagsabi manongod ki Jesus: “Ginibo nia kitang magin sarong kahadean, mga saserdote para sa saiyang Dios asin Ama.” (Kapahayagan 1:5, 6) An mga ini hade sagkod saserdote. “Sinda magigin mga saserdote nin Dios asin kan Cristo, patin mamamahala bilang mga hade kaiba nia sa laog kan sangribong taon.”—Kapahayagan 20:6.
11. Taano ta angay na an kabilangan kan kamagurangan 24, asin ano an kahulogan kan kabilangan na iyan?
11 Ano an makahulogan manongod sa kabilangan na 24, ta si Juan nakaheling nin 24 kamagurangan sa palibot kan trono? Sa dakol na bagay, an mga ini ipinanganino kan maimbod na mga saserdote sa suanoy na Israel. Si apostol Pedro nagsurat sa linahidan na mga Kristiano: “Kamo ‘rasang pinili, sa hadeng grupo nin mga saserdote, banal na nasyon, banwaan para sa espesyal na pagkasadiri.’” (1 Pedro 2:9) Interesante nanggad, an suanoy na Judiong mga saserdote binaranga sa 24 grupo. An kada grupo naasignaran nin mga semana sa laog kan taon na maglilingkod ki Jehova, kaya ikinakatao nin daing putol an sagradong paglilingkod. (1 Cronica 24:5-19) Kun siring, angay sana na may 24 kamagurangan na ipinapaheling sa bisyon ni Juan kan langitnon na grupo nin mga saserdote ta an mga saserdoteng ini naglilingkod ki Jehova nin padagos, daing pondo. Kun kompleto na, magkakaigwa nin 24 grupo, an kada saro may 6,000 na mga nakadaog, huli ta sinasabi sato kan Kapahayagan 14:1-4 na 144,000 (24 x 6,000) an “binakal hale sa katawohan” na matindog sa langitnon na Bukid nin Sion kaiba kan Kordero, si Jesu-Cristo. Mantang an kabilangan na 12 nangangahulogan nin organisasyon na balanse sa pagheling nin Dios, dinodoble—o pinapakosog—kan 24 an siring na areglo.
Mga Kikilat, Tingog, Asin Daguldol
12. Ano an sunod na naheling asin nadangog ni Juan, asin ano an ipinapagirumdom kan “mga kikilat asin tingog patin daguldol”?
12 Ano an sunod na naheling asin nadangog ni Juan? “Asin hale sa trono may nagluluwas na mga kikilat asin tingog patin daguldol.” (Kapahayagan 4:5a) Nagpapagirumdom nanggad ini kan iba pang makangingirhat na mga pagpaheling kan langitnon na kapangyarihan ni Jehova! Halimbawa, kan si Jehova “huminilig” sa Bukid nin Sinai, si Moises nagsabi: “Nangyari na pagkaaga kan ikatolong aldaw nagpoon na magkaigwa nin mga daguldol asin kikilat, asin nin mahibog na panganoron sa ibabaw kan bukid patin nin makosogon na tanog nin amodyong. . . . Kan pakosog nang pakosog an tanog kan amodyong, si Moises nagpoon na magtaram, asin an tunay na Dios nagpoon na sumimbag sa saiya sa sarong tingog.”—Exodo 19:16-19.
13. Ano an ilinaladawan kan mga kikilat na nagluluwas sa trono ni Jehova?
13 Durante kan aldaw kan Kagurangnan, ipinapaheling ni Jehova an saiyang kapangyarihan asin presensia sa mamuraway na paagi. Bako, bakong paagi sa literal na kikilat, ta mga tanda an naheheling ni Juan. Kun siring, ano an irinerepresentar kan mga kikilat? Bueno, an mga silyab nin kikilat puedeng magtao nin liwanag, alagad iyan puede man na makagadan. Kun siring, an mga kikilat na ini na nagluluwas sa trono ni Jehova naglaladawan nanggad sa mga silyab nin kaliwanagan na padagos niang itinatao sa saiyang banwaan asin, mas makahulogan pa ngani, sa saiyang nagkakalayong mga mensahe nin paghokom.—Ikomparar an Salmo 18:14; 144:5, 6; Mateo 4:14-17; 24:27.
14. Paano nadadangog an mga tingog ngonyan?
14 Kumusta man an mga tingog? Kan humilig si Jehova sa Bukid nin Sinai, may tingog na nakipag-olay ki Moises. (Exodo 19:19) An mga tingog hale sa langit nagtao kan dakol na pagboot asin proklamasyon sa librong Kapahayagan. (Kapahayagan 4:1; 10:4, 8; 11:12; 12:10; 14:13; 16:1, 17; 18:4; 19:5; 21:3) Ngonyan, si Jehova nagtatao man nin mga pagboot asin proklamasyon sa saiyang banwaan, na tinatawan nin kaliwanagan an saindang pakasabot sa mga propesiya asin prinsipyo sa Biblia. Itinatao man sa internasyonal na mga kombension an mga impormasyon na nagtatao nin kaliwanagan, asin an mga katotoohan na iyan sa Biblia ibinabalangibog man sa bilog na kinaban. Si apostol Pablo nagsabi manongod sa maimbod na mga parahulit kan maogmang bareta: “Tara, sa katunayan, ‘an saindang tingog nakalakop sa bilog na daga, asin an saindang mga tataramon sagkod sa kaporoporohi kan ineerokan na daga.’”—Roma 10:18.
15. Anong mga daguldol an nagluwas sa trono sa kabtang na ini kan aldaw kan Kagurangnan?
15 An daguldol parateng kasunod nin kikilat. Inapod ni David an literal na daguldol na “tingog ni Jehova.” (Salmo 29:3, 4) Kan si Jehova makipaglaban para ki David tumang sa mga kaiwal kaini, sinasabi na nagdaguldol hale sa Saiya. (2 Samuel 22:14; Salmo 18:13) Sinabihan ni Eliu si Job na an tingog ni Jehova garo daguldol, mantang Sia “naggigibo nin darakulang bagay na dai niato kayang aramon.” (Job 37:4, 5) Sa kabtang na ini kan aldaw kan Kagurangnan, ‘nagdaguldol’ si Jehova, na nagpapatanid manongod sa darakulang bagay na saiyang gigibohon tumang sa saiyang mga kaiwal. An simbolikong mga daguldol na ini paorootrong nag-aaningal sa bilog na daga. Maogma kamo kun kamo nagtatao nin atension sa nagdadaguldol na mga proklamasyon na ini asin madonong na ginagamit an saindong dila tanganing orog pa iyan na kumosog!—Isaias 50:4, 5; 61:1, 2.
Mga Lampara nin Kalayo Asin Garo Salming na Dagat
16. Ano an kahulogan kan “pitong lampara nin kalayo”?
16 Ano pa an naheling ni Juan? Ini: “Asin may pitong lampara nin kalayo na naglalaad sa atubangan kan trono, asin an mga ini nangangahulogan kan pitong espiritu nin Dios. Asin sa atubangan kan trono igwa nin sarong garo salming na dagat na agid sa kristal.” (Kapahayagan 4:5b, 6a) Sinasabi mismo ni Juan sa sato an kahulogan kan pitong lampara: “An mga ini nangangahulogan kan pitong espiritu nin Dios.” An kabilangan na pito nagsisimbolisar nin pagkakompleto sa pagheling nin Dios; kaya an pitong lampara seguradong nagrerepresentar sa kalubosan kan nagtataong liwanag na puersa kan banal na espiritu. Kanigoan an pasalamat kan grupong Juan ngonyan na iyan pinaniwalaan kan kaliwanagan na ini, kaiba an responsibilidad na ipaabot man iyan sa mga tawo digdi sa daga na nagugutom sa espirituwal! Kanigoan an kaogmahan niato na taon-taon an ginatos na milyon na kopya kan magasin na An Torrengbantayan padagos na nagpapasirang kan liwanag na ini sa mga 150 lenguahe!—Salmo 43:3.
17. Ano an isinisimbolisar kan “garo salming na dagat na agid sa kristal”?
17 Nakaheling man si Juan nin “garo salming na dagat na agid sa kristal.” Ano an isinisimbolisar kaini mapadapit sa mga imbitado sa langitnon na korte ni Jehova? Si Pablo nagtaram manongod sa paagi na sinantipikar ni Jesus an kongregasyon, “na linilinigan iyan sa paghugas nin tubig paagi sa tataramon.” (Efeso 5:26) Bago sia magadan, sinabihan ni Jesus an saiyang mga disipulo: “Kamo malinig na huli kan tataramon na isinabi ko sa saindo.” (Juan 15:3) Huli kaini, an garo salming na dagat na ini na agid sa kristal seguradong nagrerepresentar sa nakakalinig, nasusurat na Tataramon nin Dios. An mga kabilang sa sa hadeng grupo nin mga saserdote na minaatubang mismo ki Jehova seguradong lubos nang nalinigan kan saiyang Tataramon.
Helinga—“Apat na Buhay na Linalang”!
18. Ano an naheling ni Juan sa tahaw saka sa palibot kan trono?
18 Namasdan ngonyan ni Juan an saro pang bagay. Sia nagsurat: “Asin sa tahaw kan trono saka sa palibot kan trono igwa nin apat na buhay na linalang na pano nin mga mata sa atubangan asin sa likod.”—Kapahayagan 4:6b.
19. Ano an ilinaladawan kan apat na buhay na linalang, asin paano niato ini naaaraman?
19 Ano an ilinaladawan kan mga linalang na ini? An sarong bisyon na ibinabareta nin saro pang propeta, si Ezequiel, nakakatabang sato na manompongan an simbag. Si Jehova naheling ni Ezequiel na nakatukaw sa trono sa sarong langitnon na karuwahe, na may kaibang buhay na mga linalang na may mga karakteristiko na kaagid kan mga ilinadawan ni Juan. (Ezequiel 1:5-11, 22-28) Paghaloyhaloy, naheling giraray ni Ezequiel an tronong iyan na nasa karuwahe na may kaibang buhay na mga linalang. Minsan siring, inapod nia ngonyan na mga kerubin an buhay na mga linalang. (Ezequiel 10:9-15) An apat na buhay na linalang na naheling ni Juan seguradong nagrerepresentar sa dakol na kerubin nin Dios—mga linalang na halangkaw an katongdan sa Saiyang espiritung organisasyon. Dai iisipon ni Juan na pambihira an pakaheling nin mga kerubin na haranihon ki Jehova, ta sa tabernakulo kan suanoy, may duwang kerubin na bulawan sa ibabaw kan takop kan kaban nin tipan, na nagrerepresentar sa trono ni Jehova. Hale sa pag-oltanan kan mga kerubin na ini, an tingog ni Jehova nagtao nin mga pagboot sa nasyon.—Exodo 25:22; Salmo 80:1.
20. Sa anong paagi na masasabi na an apat na buhay na linalang nasa “tahaw kan trono saka sa palibot kan trono”?
20 An apat na buhay na linalang na ini nasa “tahaw kan trono saka sa palibot kan trono.” Ano an eksaktong kahulogan kaini? Iyan puedeng mangahulogan na nakapuesto sinda sa palibot kan trono tangani na may sarong nagtitindog sa tahaw kan kada lado. Huli kaini, arog kaini an pagkasabi kan mga paratradusir kan Today’s English Version bilang pagpakahulogan sa orihinal na frase sa Griego: “nakapalibot sa trono sa kada lado kaiyan.” An fraseng ini puede man na mangahulogan na an apat na buhay na linalang nakapuesto sa tahaw duman sa langit na namumugtakan kan trono. Posible na iyan an dahelan kaya trinadusir kan The Jerusalem Bible an frase na: “nasa tahaw, magkakairiba sa palibot mismo kan trono.” An importante iyo na harani an mga kerubin sa trono ni Jehova, na kaagid kan mga kerubin na naheling ni Ezequiel sa lambang kanto kan organisasyonal na karuwahe ni Jehova. (Ezequiel 1:15-22) Ini gabos kaoyon kan mga tataramon sa Salmo 99:1: “Si Jehova nagin hade. . . . Sia nakatukaw sa mga kerubin.”
21, 22. (a) Paano an pagkaladawan ni Juan sa apat na buhay na linalang? (b) Ano an irinerepresentar kan itsura kan kada saro sa apat na buhay na linalang?
21 Si Juan nagpapadagos: “Asin an enot na buhay na linalang agid sa leon, asin an ikaduwang buhay na linalang agid sa torilyo, asin an ikatolong buhay na linalang may lalauogon na garo sa tawo, asin an ikaapat na buhay na linalang agid sa naglalayog na agila.” (Kapahayagan 4:7) Taano ta magkakalaen na marhay an itsura kan apat na buhay na linalang na ini? An magkakalaen na buhay na linalang na ini malinaw na nagtatao nin pagdodoon sa espesipikong diosnon na mga kualidad. Enot, yaon an leon. An leon ginagamit sa Biblia bilang simbolo nin kosog nin boot, nangorogna sa paghanap nin hustisya asin katanosan. (2 Samuel 17:10; Talinhaga 28:1) Sa siring, an leon nagrerepresentar nanggad sa diosnon na kualidad nin may kosog nin boot na hustisya. (Deuteronomio 32:4; Salmo 89:14) An ikaduwang buhay na linalang kaagid nin torilyo. Anong kualidad an minasabong sa isip nindo kun pinag-oolayan an torong baka? Para sa mga Israelita an torong baka mahalagang rogaring huli sa kosog kaiyan. (Talinhaga 14:4; helingon man an Job 39:9-11.) Kun siring, an torilyo nagrerepresentar sa kapangyarihan, sa dinamikong kosog na itinatao ni Jehova.—Salmo 62:11; Isaias 40:26.
22 An ikatolong buhay na linalang may lalauogon na garo sa tawo. Ini seguradong nagrerepresentar sa pagkamoot na garo sa Dios, mantang digdi sa daga tawo sana an linalang sa ladawan nin Dios, na may daing kabaing na kualidad nin pagkamoot. (Genesis 1:26-28; Mateo 22:36-40; 1 Juan 4:8, 16) Daing duwa-duwa, ipinapaheling kan mga kerubin an kualidad na ini mantang sinda naglilingkod sa palibot kan trono ni Jehova. Kumusta man an ikaapat na buhay na linalang? An sarong ini agid sa naglalayog na agila an itsura. Si Jehova mismo nag-aapod nin atension sa pakaheling kan agila sagkod sa harayo: “Sagkod sa harayo nagpaparaheling an mga mata kaiyan.” (Job 39:29) Huli kaini, an agila nagsisimbolisar nanggad sa kadonongan na harayo an pananaw. Si Jehova an Burabod nin kadonongan. An saiyang mga kerubin naggagamit kan kadonongan nin Dios sa saindang pagkuyog sa saiyang mga pagboot.—Talinhaga 2:6; Santiago 3:17.
Nag-aaningal an mga Pag-omaw ki Jehova
23. Ano an isinisimbolisar kan bagay na an apat na buhay na linalang ‘pano nin mga mata,’ asin ano an idinodoon kan pagkaigwa ninda nin tolong padis na pakpak?
23 Ipinagpapadagos ni Juan an saiyang paglaladawan: “Asin kun manongod sa apat na buhay na linalang, an lambang saro sa sainda may anom na pakpak; sa palibot asin sa irarom pano sinda nin mga mata. Asin mayo sinda nin pahingalo aldaw-banggi mantang sinasabi ninda: ‘Banal, banal, banal si Jehova Dios, an Makakamhan sa Gabos, an kaidto asin an ngonyan patin an madatong.’” (Kapahayagan 4:8) An pagigin pano nin mata nagsusuherir nin pagheling na kompleto asin harayo an pananaw. Ini daing ontok na ginagamit kan apat na buhay na linalang, ta dai ninda kaipuhan na magtorog. Inaarog ninda an Saro na manongod sa saiya nasusurat: “Kun mapadapit ki Jehova, an saiyang mga mata naglilibot sa bilog na daga tanganing ipaheling an saiyang kosog para duman sa mga kompleto an puso para sa saiya.” (2 Cronica 16:9) Mantang kadakol kan mata, heling kan mga kerubin an gabos na lugar. Mayo nin natatago sa saindang atension. Sa siring, andam nanggad sindang maglingkod sa Dios sa saiyang paghohokom. Manongod sa saiya sinasabi: “An mga mata ni Jehova yaon sa gabos na lugar, na nagbabantay sa mga maraot asin sa mga marahay.” (Talinhaga 15:3) Asin mantang may tolong padis na pakpak—ta ginagamit an kabilangan na tolo sa Biblia para sa pagdodoon—an mga kerubin makakahirong arog karikas nin kikilat sa pagpahayag kan mga paghokom ni Jehova asin sa pag-implementar kaiyan.
24. Paano inoomaw kan mga kerubin si Jehova, asin may anong kahulogan?
24 Hinanyoga! Magayonon pagdangogon asin nakakapukaw sa boot an awit nin pag-omaw na inaawit kan mga kerubin ki Jehova: “Banal, banal, banal si Jehova Dios, an Makakamhan sa Gabos, an kaidto asin an ngonyan patin an madatong.” Sa giraray, an pagigin tolo nagpaparisa nin pagigin sigido. Mapuersang kinokompirmar kan mga kerubin an kabanalan ni Jehova Dios. Sia an Burabod asin pinaka-Pamantayan nin kabanalan. Sia man an “Hade sa panahon na daing sagkod,” pirmeng “an Alfa asin an Omega, an enot asin an huri, an kapinonan asin an katapusan.” (1 Timoteo 1:17; Kapahayagan 22:13) An mga kerubin dai nagpapahingalo mantang saindang ibinabalangibog an daing kaagid na mga kualidad ni Jehova sa gabos na linalang.
25. Paano an buhay na mga linalang asin an 24 kamagurangan nagkakasararo sa pagsamba ki Jehova?
25 Nag-aaningal duman sa pinakaharayong kalangitan an mga pag-omaw ki Jehova! An paglaladawan ni Juan nagpapadagos: “Asin pag nagdodolot an buhay na mga linalang nin kamurawayan asin onra patin pasalamat sa Saro na nakatukaw sa trono, an Saro na nabubuhay sagkod pa man, an beinte kuatrong kamagurangan minahuruhod sa atubangan kan Saro na nakatukaw sa trono asin sinasamba an Saro na nabubuhay sagkod pa man, asin idinadaklag ninda an saindang korona sa atubangan kan trono, na sinasabi: ‘Maninigo ka, Jehova, na samong Dios, na mag-ako kan kamurawayan asin kan onra patin kan kapangyarihan, huli ta linalang mo an gabos na bagay, asin huli sa saimong kabotan an mga iyan nag-eksister asin nalalang.’” (Kapahayagan 4:9-11) Sa bilog na Kasuratan, saro ini sa pinakamagayon na kapahayagan nin pagtao nin onra ki Jehova, an satong Dios asin Soberanong Kagurangnan!
26. Taano ta idinadaklag kan 24 kamagurangan an saindang korona sa atubangan ni Jehova?
26 An nasa isip na aktitud kan 24 kamagurangan kapareho kan ipinapaheling ni Jesus, na idinadaklag pa ngani an saindang korona sa atubangan ni Jehova. Harayoon sa saindang isip na ilangkaw an saindang sadiri sa atubangan nin Dios. Mapakumbaba na minimidbid ninda na an solamenteng katuyohan kan saindang pagigin hade iyo an pagtao nin onra asin kamurawayan sa saiya, arog kan pirmeng ginigibo ni Jesus. (Filipos 2:5, 6, 9-11) May pagpapasakop na rinerekonoser ninda an saindang pagigin hababa asin itinutuga na an saindang pamamahala nagsasarig sa soberaniya ni Jehova. Sa siring, sinda odok sa pusong kaoyon kan mga kerubin asin kan gabos na iba pang maimbod na linalang sa pagtao nin pag-omaw asin kamurawayan sa Dios na naglalang kan gabos na bagay.—Salmo 150:1-6.
27, 28. (a) Ano an maninigong magin epekto sa sato kan pagkaladawan ni Juan sa bisyon na ini? (b) Anong mga hapot an minalataw manongod sa kun ano an sunod na naheling asin nadangog ni Juan?
27 Siisay an dai mapapahiro sa pagbasa kan salaysay ni Juan sa bisyon na ini? Iyan magayonon, mamuraway! Alagad ano daw an itsura kan aktuwal na bagay? An mismong kamahalan ni Jehova dapat na makapahiro sa siisay man na may mapagpahalagang puso na umiba sa apat na buhay na linalang asin sa 24 kamagurangan sa pag-omaw sa Saiya, sa pamibi sagkod sa hayagan na pagbalangibog kan Saiyang ngaran. Iyo ini an Dios na para sa saiya pribilehio nin mga Kristiano na magin mga saksi ngonyan. (Isaias 43:10) Girumdoma na an bisyon ni Juan aplikado sa aldaw kan Kagurangnan, na namumugtakan niato ngonyan. An “pitong espiritu” pirmeng yaon tanganing giyahan asin pakosogon kita. (Galacia 5:16-18) An Tataramon nin Dios yaon ngonyan tanganing tabangan kita na magin banal sa paglilingkod sa banal na Dios. (1 Pedro 1:14-16) Tunay nanggad, kita naoogmang basahon nin makosog an mga tataramon kan propesiyang ini. (Kapahayagan 1:3) Kanigoan na pan-agyat an itinatao kaiyan sa sato na magmaimbod ki Jehova asin dai togotan an kinaban na irayo an satong atension sa aktibong pag-awit nin mga pag-omaw sa saiya!—1 Juan 2:15-17.
28 Sagkod sa puntong ini, ilinadawan ni Juan an saiyang naheling kan sia imbitaran na lumaog sa bukas na pinto sa langit. An pinakamahalaga, sia nagbabareta na si Jehova, sa bilog na kamurawayan kan Saiyang kamahalan asin dignidad, nakatukaw sa Saiyang langitnon na trono. Sia napapalibotan kan pinakamakosog sa gabos na organisasyon—na makinang sa kagayonan asin kaimbodan kaiyan. May sesyon an Korte nin Dios. (Daniel 7:9, 10, 18) Andam na an entablado para sa sarong pambihirang mangyayari. Ano daw iyan, asin paano iyan nakakaapektar sa sato ngonyan? Helingon niato mantang nagpopoon na an eksena!
[Mga Hapot Para sa Pag-adal]
[Bilog na pahinang ritrato sa pahina 75]
[Bilog na pahinang ritrato sa pahina 78]
