Kaiba daw sa saimong espirituwal na rutina an aroaldaw na pagbasa kan teksto sa Bibliya asin mga komento sa Pagsiyasat sa Kasuratan Aroaldaw? Kun dai, puwede mo daw na iiba iyan sa saimong rutina? Dakul an naggigibo kaiyan nin amay na aga tanganing mahurop-hurop ninda iyan mantang ginigibo an saindang mga aktibidad sa aroaldaw. (Jos 1:8; Sal 119:97) Paano ka mas makikinabang sa teksto sa Kasuratan? Basahon an konteksto kaiyan para maaraman an kabilugan na impormasyon. Mag-isip nin istorya sa Bibliya na nag-iilustrar kan prinsipyong idinuon sa teksto. Dangan iaplikar an prinsipyo sa saimong buhay. Kun kauyon kan Tataramon nin Diyos an ginigibo mong mga desisyon, gigiyahan kaiyan an buhay mo asin talagang makikinabang ka.—Sal 119:105.

Pinag-uulayan kan pamilyang Bethel sa bilog na kinaban an Pagsiyasat sa Kasuratan Aroaldaw sa oras nin pamahaw. Kaining nakaaging mga taon, dakul sa mga pagtukar na ini an mahihiling sa JW Broadcasting^® sa video category na MGA PROGRAMA ASIN OKASYON. Kasuarin ka huring naghiling nin saro o nagkapirang video kaiyan? Tibaad an pira diyan iyo mismo an kaipuhan mo. Halimbawa, paano puwedeng makaimpluwensiya sa mga desisyon mo an istorya manungod ki Lot?

HILINGON AN VIDEO NA DAI MAMUOT SA KINABAN (1JU 2:15), DANGAN SIMBAGON AN MINASUNOD NA MGA HAPOT:

• Anong prinsipyo sa Bibliya an pinagbasaran kan tinukar sa Pang-agang Pagsamba na ini?

• Paano ipinahiling sa istorya manungod ki Lot an peligro kan pagkamuot sa kinaban o sa mga bagay na yaon diyan?—Ge 13:12; 14:12; 19:3, 12, 13, 24-26

• Paano niyato maipapahiling na namumutan ta si Jehova imbes na an kinaban o an mga bagay na yaon diyan?