Puon kan 2018, an satong pampublikong mga magasin nagtatampok nin saro sanang tema kada isyu. An gabos na magasin na ini yaon sa satong Toolbox sa Pagtutukdo. Kaya puwede tang gamiton an mga iyan sa ministeryo. Puwede man kitang magdara nin nagkapira kaiyan pag nagbibiyahe o namamakal. Dai dinisenyo an mga magasin para gamiton sa pagtutukdo sa mga tawo manungod sa Bibliya, pero puwede kaiyan pukawon an interes nin saro sa espirituwal.

Pagkatapos mapunan an pakikipag-ulay, magbasa nin sarong teksto asin magsambit nin sarong tema sa magasin na magugustuhan kan kaulay mo. Halimbawa, kun igwa siya nin pamilya o may inaagihan na problema o kaya nai-stress, puwede mong sabihon: “May nabasa pa sana akong magayon na artikulo manungod diyan. Gusto mong ipahiling ko saimo?” Kun magpahiling nin interes, puwede mo siyang tawan nin imprentadong kopya nin magasin o padarahan siya nin elektronikong kopya, dawa sa inot na pakikipag-ulay. Dawa ngani bako man panginot na katuyuhan niyato an magpasakamot nin mga literatura, puwedeng makatabang sa sato an mga magasin na mahanap an mga andam na humiro kauyon kan saindang mga nanunudan.—Gi 13:48.