Nahum 2:1-13
2 An saro na nangwawarak nag-abot para salakayon ka.*+
Magbugtak ka nin mga bantay sa saimong mga pandepensa.*
Bantayan mo an tinampo.
Maghanda kamo* asin pakusugon nindo an saindong sadiri.
2 Huli ta ibabalik ni Jehova an orgulyo kan Jacob,Pati an orgulyo kan Israel,Huli ta linaglag sinda kan mga paralaglag;+Asin rinaot ninda an saindang mga supang.
3 An mga kalasag kan saiyang makukusog na tawuhan tinugma* nin pula,An saiyang mga parapakilaban nakasulot nin pulang* bado.
An mga lansang* na nakakabit sa saiyang mga karwaheng panggiyera nagsusurusilyab na garo kalayoSa aldaw na naghahanda siya para sa ralaban,Asin iwinawasiwas kan mga parapakilaban an mga garod* na gibo sa kahoy na enebro.
4 An mga karwaheng panggiyera biyong nagpapagitpit* sa mga tinampo.
Marikas na nagpapabalik-balik an mga iyan sa mga plasa.
Nagkikinang an mga iyan na garo mga karaba asin nagsisilyab na garo kikilat.
5 Ipapaapod niya an saiyang mga opisyal.
Magkakasiringkog sinda mantang sinda nag-aabante.
Naghihidali sinda pasiring sa saiyang pader;Nagbubugtak sinda nin barikada.
6 Mabubuksan an mga trangkahan kan mga salog,Asin matutunaw* an palasyo.
7 Ipinagbuot* na iyan: Hinubaan siya,Dinara siyang bihag, asin nagsisigok-sigok an saiyang mga uripon na babayi;Nagsisigok-sigok sinda na garo mga salampati mantang tinutubtob ninda an saindang daghan.*
8 Kaidto, an Nineve+ garo tipunan nin tubig,Alagad ngunyan nagdudulag sinda.
“Pundo! Pundo!”
Pero mayong nagsasalingoy.+
9 Manamsam kamo nin plata,* manamsam kamo nin bulawan!
Dai nauubos an mga kayamanan.
Pano-pano iyan kan gabos na klase nin mamahalon na mga bagay.
10 Daing laog an siyudad, tiwangwang, gaba!+
Natutunaw sa takot an puso ninda, nangruruluya an mga tuhod ninda, nagkukubog-kubog an piad ninda;Malungsi an lalawgon ninda gabos.
11 Hain an lungib nin mga leon,+ kun sain nagkakakan an mga durudakula nang leon,*Kun sain minaluwas an leon kaiba an saiyang mga ugbon,Na diyan mayo nin siisay man na nantatakot sa sainda?
12 An ginutay-gutay kan leon igo para sa saiyang mga ugbon,Asin nansakmal* iyan para sa saiyang mga babaying leon.
Pirmi niyang pinapano an saiyang mga lungib kan saiyang mga biniktima,Asin pinapano niya nin ginutay-gutay na mga hayop an saiyang taguan.
13 “Uya! Ako an saimong kalaban,” an sabi ni Jehova na pamayo nin mga hukbo,+“Susuluon ko an saimong mga karwaheng panggiyera sagkod na magin aso na sana an mga iyan,+Asin uubuson kan espada an saimong mga durudakula nang leon.*
Papapunduhon ko an paniniba mo sa daga,Asin dai na madadangog an boses kan saimong mga mensahero.”+
Mga Nota
^ An buot sabihon, an Nineve.
^ O “pader.”
^ Sa literal, “Pakusuga an mga piad.”
^ O “tinumok.”
^ Sa Ingles, crimson.
^ O “batbat.”
^ O “budyak.”
^ O “nagruruhab.”
^ O “mabagsak.”
^ O “Itinalaga.”
^ Sa literal, “puso.”
^ Sa Ingles, silver.
^ O “durudakula nang leon na may bunday.”
^ O “nantilok.”
^ O “durudakula nang leon na may bunday.”
