Levitico 27:1-34
27 Nagsabi pa si Jehova ki Moises:
2 “Kaulayon mo an mga Israelita asin sabihan mo sinda, ‘Kun an sarong tawo* maggibo nin espesyal na promesa+ na matao siya ki Jehova nin katumbas na kantidad nin sarong tawo,
3 kun iyan sarong lalaki na an edad puon 20 sagkod 60, an katumbas na kantidad kaiyan 50 siklong* pirak na uyon sa siklo kan banal na lugar.*
4 Pero kun iyan sarong babayi, an katumbas na kantidad kaiyan 30 siklo.
5 Kun an edad puon 5 sagkod 20, an katumbas na kantidad para sa lalaki 20 siklo asin 10 siklo para sa babayi.
6 Kun an edad puon sarong bulan sagkod limang taon, an katumbas na kantidad para sa lalaki limang siklong pirak asin tulong siklong pirak para sa babayi.
7 “‘Kun an edad 60 pataas, 15 siklo an katumbas na kantidad para sa lalaki asin 10 siklo para sa babayi.
8 Pero kun pobrehon siya asin dai niya kayang bayadan an katumbas na kantidad,+ dapat niyang darahon sa saserdote an tawong iprinomesa niya, asin sasabihon kan saserdote kun gurano an magigin kantidad kaini. Ibabasar kan saserdote an siring na kantidad sa kun ano an kaya kan saro na nagpromesa.+
9 “‘Kun an iprinomesa sarong hayop na puwedeng idulot ki Jehova, an ano man na itatao ki Jehova magigin banal.
10 Dai niya puwedeng salidahan o ribayan iyan. Dai puwedeng ribayan nin marahay na klase an maluyang klase o nin maluyang klase an marahay na klase. Pero kun riribayan niya nin ibang hayop an iprinomesa niyang hayop, an inot na hayop saka an iriribay diyan parehong magigin banal.
11 Kun iyan maating hayop+ na dai puwedeng iatang bilang dulot ki Jehova, dadarahon niya an hayop sa atubangan kan saserdote.
12 Sasabihon kan saserdote kun gurano an kantidad kaiyan, depende kun marahay na klase iyan o maluyang klase. An kantidad na sabihon kan saserdote iyo an susunudon.
13 Pero engkaso gusto niyang tubuson iyan, dapat niyang bayadan an bilog na katumbas na kantidad kaiyan asin madagdag pa siya nin 20 porsiyento kaiyan.+
14 “‘Kun pabanalon kan sarong tawo an saiyang harong asin idulot iyan bilang sarong bagay na banal ki Jehova, sasabihon kan saserdote kun gurano an kantidad kaiyan, depende kun marahay na klase iyan o maluyang klase. Kun ano an sabihon kan saserdote, iyan an magigin kantidad kaiyan.+
15 Pero kun gustong tubuson kan saro an saiyang harong na pinabanal niya, dapat niyang bayadan an bilog na katumbas na kantidad kaiyan asin madagdag pa siya nin 20 porsiyento kaiyan, dangan magigin saiya giraray an saiyang harong.
16 “‘Kun pabanalon kan sarong tawo an sarong parte kan saiyang uma para itao ki Jehova, an kantidad kaiyan madepende sa kun gurano kadakul na banhi an kaipuhan para matanuman iyan: 50 siklong pirak an magigin kantidad para sa sarong homer* na banhi nin sebada.
17 Kun pabanalon niya an saiyang uma sa taon nin Jubileo,+ ibabasar diyan an magigin katumbas na kantidad.
18 Kun pabanalon niya an saiyang uma pagkatapos kan Jubileo, babawasan kan saserdote an katumbas na kantidad kaiyan, depende sa kun gurano pa kadakul na taon an natatada bago an sunod na taon nin Jubileo.+
19 Pero engkaso gustong tubuson kan saro an saiyang uma na pinabanal niya, dapat niyang bayadan an bilog na katumbas na kantidad kaiyan asin madagdag pa siya nin 20 porsiyento kaiyan, dangan magigin saiya giraray an saiyang uma.
20 Kun dai niya tubuson an uma asin ipabakal an uma sa ibang tawo, dai na iyan puwedeng tubuson.
21 Sa taon nin Jubileo, an uma itatao na ki Jehova para gamiton sa sagradong katuyuhan; banal iyan asin magigin pagsadiri iyan kan mga saserdote.+
22 “‘Kun pabanalon kan sarong tawo para itao ki Jehova an sarong uma na nabakal niya na bakong kabtang kan minana niyang pagsadiri,+
23 kukuwentahon kan saserdote an kantidad kaiyan depende sa mga natatadang taon bago an taon nin Jubileo, asin itatao niya sa aldaw na iyan an katumbas na kantidad.+ Banal iyan para ki Jehova.
24 Sa taon nin Jubileo, ibabalik an uma sa pigbakalan kaiyan, sa kagsadiri kan dagang iyan.+
25 “‘An lambang kantidad dapat na uyon sa siklo kan banal na lugar. An sarong siklo dapat na katumbas nin 20 gerah.*
26 “‘Alagad, dai nin siisay man an magpabanal kan inot na ugbon kan mga hayop, huling an inot na ugbon talagang para ki Jehova.+ Iyan man torong baka o karnero, ki Jehova na talaga iyan.+
27 Kun iyan kabali sa mga maating hayop asin gusto niyang tubuson iyan, babayadan niya an bilog na katumbas na kantidad kaiyan asin madagdag pa siya nin 20 porsiyento kaiyan.+ Pero kun dai niya iyan tutubuson, ipapabakal iyan kan saserdote sigun sa katumbas na kantidad kaiyan.
28 “‘Pero dai puwedeng ipabakal o tubuson nin sarong tawo an ano man na pagsadiri niya na idinusay na niya sagkod lamang* para ki Jehova, iyan man tawo o hayop o uma na pagsadiri niya. Kabanal-banali an gabos na bagay na idinusay na para ki Jehova.+
29 Apuwera kaiyan, dai puwedeng tubuson an tawo na sinentensiyahan na nin kagadanan.*+ Dapat nanggad siyang gadanon.+
30 “‘An lambang ikasampulong kabtang*+ kan bunga kan daga sadiri ni Jehova, iyan man inani hali sa uma o bunga nin mga kahoy. Banal iyan para ki Jehova.
31 Kun gustong tubuson nin saro an arin man sa saiyang ikasampulong kabtang, dapat niyang bayadan an bilog na kantidad kaiyan asin madagdag pa siya nin 20 porsiyento kaiyan.
32 Kun manungod sa kada ikasampulo sa mga baka asin sa mga karnero, sa gabos na nag-aagi sa irarom kan sugkod kan pastor, an ikasampulong hayop* dapat na magin banal ki Jehova.
33 Dai niya dapat hilingon kun iyan marahay na klase o maluyang klase, asin dai niya man iyan dapat ribayan. Pero kun riribayan niya iyan, an hayop na riribayan niya saka an iriribay niya parehong magigin banal.+ Dai iyan puwedeng tubuson.’”
34 Iyan an mga tugon na itinao ni Jehova ki Moises para sa mga Israelita sa Bukid nin Sinai.+
Mga Nota
^ O “kalag.”
^ An sarong siklo katumbas nin 11.4 gramos. Hilingon an Apendise B14.
^ O “uyon sa banal na siklo.”
^ An sarong homer katumbas nin 220 litros. Hilingon an Apendise B14.
^ An sarong gerah katumbas nin 0.57 gramo. Hilingon an Apendise B14.
^ O “na itinalagang laglagon.”
^ O “an tawong itinalagang laglagon.”
^ O “ikapu.”
^ O “payo.”
