Jeremias 16:1-21
16 Uminabot giraray sa sako an tataramon ni Jehova, na an sabi:
2 “Dai ka mag-agom, asin dai ka magkaigwa nin mga aking lalaki asin mga aking babayi sa lugar na ini.
3 Huling ini an sabi ni Jehova manungod sa mga aking lalaki asin mga aking babayi na namumundag digdi asin manungod sa saindang mga ina na nagmumundag sa sainda saka manungod sa saindang mga ama na nagpapangyaring mamundag sinda sa nasyon na ini:
4 ‘Magagadan sinda huli sa nakakagadan na mga hilang,+ pero mayo nin siisay man na magmumundo o maglulubong sa sainda; sinda magigin garo udo sa ibabaw kan daga.+ Magagadan sinda sa espada saka sa tiggutom,+ asin an mga bangkay ninda magigin kakanon kan mga gamgam sa kalangitan saka kan mga hayop sa daga.’
5 Huli ta ini an sabi ni Jehova,‘Dai ka maglaog sa harong na igwang handaan para sa mga nagmumurundo,Asin dai ka magduman tanganing magtangis o makidumamay.’+
‘Huling hinali ko na sa banwaan na ini an sakong katuninungan,’ an sabi ni Jehova,‘Pati na an sakong maimbod na pagkamuot asin pagkahirak.+
6 An mga prominente asin mga ordinaryong tawo parehong magkakagaradan sa dagang ini.
Dai sinda ilulubong,Mayo nin magmumundo para sa sainda,Ni maggugurot kan sadiri an siisay man o magpapakalbo para sa sainda.*
7 Asin mayo nin siisay man na magtatao nin kakanon para duman sa mga nagmumundo,Tanganing rangahon sinda sa pagkagadan kan mahal ninda sa buhay;Ni may matao man sa sainda nin kopa nin pagrangaTanganing mag-inom huli sa pagkagadan kan saindang ama o ina.
8 Asin dai ka maglaog sa harong na may handaanTanganing tumukaw kaiba ninda para magkakan asin mag-inom.’
9 “Huli ta ini an sabi ni Jehova na pamayo nin mga hukbo, an Diyos kan Israel, ‘Sa lugar na ini, sa mga aldaw nindo asin sa atubangan kan saindo mismong mga mata, papapunduhon ko an mga kurahaw nin labi-labing kagaya-gayahan asin pag-ugma, an boses kan nobyo saka an boses kan nobya.’+
10 “Pag sinabi mo sa banwaan an gabos na tataramon na ini, hahaputon ka ninda, ‘Taano ta sinabi ni Jehova an gabos na grabeng kapahamakan na ini laban sa samuya? Anong pagkakasala asin kasalan an nagibo mi ki Jehova na samuyang Diyos?’+
11 Ini an isimbag mo sa sainda, ‘“Huli ta binayaan ako kan mga apuon nindo,”+ an sabi ni Jehova, “asin padagos sindang nagsunod sa ibang mga diyos, naglingkod sa mga iyan, asin nagduko sa mga iyan.+ Pero ako binayaan ninda, saka dai ninda inutob an katugunan ko.+
12 Asin kamo, guminawi kamo nin mas maraot pa kisa sa mga apuon nindo,+ tapos an kada saro sa saindo nagin matagas an payo asin sinunod an saiyang maraot na puso imbes na magsunod sa sako.+
13 Kaya ibabaribad ko kamo paluwas sa dagang ini pasiring sa sarong daga na dai nindo midbid pati kan mga apuon nindo,+ asin aldaw-banggi kamo duman na maglilingkod sa ibang mga diyos,+ huling dai ko kamo kakahirakan.”’
14 “‘Alagad maabot an mga aldaw,’ an sabi ni Jehova, ‘na dai na ninda sasabihon: “Isinusumpa ko sa ngaran kan buhay na Diyos na si Jehova, na nagluwas sa banwaan nin Israel hali sa daga nin Ehipto!”+
15 kundi sasabihon ninda: “Isinusumpa ko sa ngaran kan buhay na Diyos na si Jehova, na nagdara sa banwaan nin Israel hali sa daga kan norte asin hali sa gabos na kadagaan kun sain niya sinda iwinararak!” asin ibabalik ko sinda sa daga ninda, na itinao ko sa mga apuon ninda.’+
16 ‘Uya, magsusugo ako nin dakul na parasira,’ an sabi ni Jehova,‘Asin hahanapon saka dadakupon sinda kan mga ini nin siring sa mga sira.
Pagkatapos, masugo ako nin dakul na paraayam,Asin hahanapon sinda kan mga ini sa lambang bukid asin lambang bulodAsin sa mga gaak kan mga dakulang gapo.
17 Huling nahihiling kan sakong mga mata an gabos nindang ginigibo.*
Dai iyan natatago sa atubangan ko,Ni natatago man sa sakong mga mata an pagkakasala ninda.
18 Sisingilon ko nguna sinda kan bilog na kabayadan na maninigo para sa saindang pagkakasala asin kasalan,+Huling an sakong daga linapastangan ninda paagi kan daing buhay na mga ladawan* kan saindang mga makababalding idoloAsin an sakong mana pinano ninda kan saindang makababalding mga bagay.’”+
19 O Jehova, sakuyang kusog asin sakuyang masarig na depensa,*Sakuyang lugar na madudulagan sa aldaw nin kasakitan,+Sa saimo mapasiring an mga nasyon hali sa mga puro kan daga,Asin masarabi sinda: “An mga apuon mi nagmana nin lubos na kaputikan,Mayong kamanungdanan asin daing serbing mga bagay na mayong pakinabang.”+
20 Makakagibo daw an sarong tawo para sa sadiri niya nin mga diyosMantang an mga ini bako man talagang mga diyos?+
21 “Kaya ipapaaram ko sa sainda,Sa pagkakataon na ini, ipapahiling ko sa sainda an sakuyang kapangyarihan asin an sakuyang kakusugan,Asin maaaraman nanggad ninda na an sakuyang pangaran Jehova.”
Mga Nota
^ Paganong mga kaugalian sa pagmundo na minalataw na ginigibo kan apostatang Israel.
^ Sa literal, “Huling an sakong mga mata nasa gabos nindang dalan.”
^ Sa literal, “kan mga bangkay.”
^ O “sakuyang kuta.”
