Bilang 25:1-18
25 Kan nag-iistar an Israel sa Sitim,+ an banwaan nagpuon na magkaigwa nin imoral na seksuwal na relasyon* sa mga babayi kan Moab.+
2 Inagda kan mga babayi an banwaan sa mga pag-atang ninda sa saindang mga diyos,+ asin an banwaan nagkakan saka duminuko sa mga diyos ninda.+
3 Kaya an Israel uminiba sa pagsamba* ki Baal nin Peor,+ asin naanggot na marhay si Jehova sa Israel.
4 Sinabi ni Jehova ki Moises: “Tipunon mo an gabos na lider* kan mga tawong ini asin garadanon mo sinda asin ibitay sa atubangan ni Jehova sa kainitan kan aldaw,* tanganing mawara an grabeng kaanggutan ni Jehova sa Israel.”
5 Dangan sinabi ni Moises sa mga hukom kan Israel:+ “Gadanon kan kada saro sa saindo an mga katribo niya na uminiba sa pagsamba* ki Baal nin Peor.”+
6 Pero kan oras mismong idto, may uminabot na sarong Israelita na may kaibang babaying Midianita+ palaog sa saindang kampo. Nahiling iyan ni Moises saka kan bilog na katiripunan kan mga Israelita, mantang naghihiribi sinda sa may entrada kan tolda nin pakipagtagbuan.
7 Kan mahiling iyan ni Finehas+ na aki ni Eleazar na aki ni Aaron na saserdote, tulos-tulos niyang binayaan an katiripunan asin kuminua nin garod.*
8 Tapos sinundan niya an Israelitang idto sa laog kan tolda asin tinuhog niya sinda, an Israelita asin an babayi sa ikinabuhay kaini. Huli kaiyan, napundo an damat sa mga Israelita.+
9 An mga nagkagaradan dahil sa damat uminabot nin 24,000.+
10 Dangan sinabi ni Jehova ki Moises:
11 “Napapundo ni Finehas+ na aki ni Eleazar na aki ni Aaron na saserdote an grabeng kaanggutan ko sa banwaan nin Israel huling dai niya nanggad itinugot na magkaigwa ako nin kaagaw sa saindang pagsamba.+ Kaya dai ko pinuho an mga Israelita, maski ngani naghahagad ako nin eksklusibong* debosyon.+
12 Kaya sabihon mo, ‘Nakikipagtipan ako sa saiya nin tipan nin katuninungan.
13 Asin paagi sa tipan na iyan, an pagkasaserdote magdadanay sa saiya asin sa saiyang magigin mga gikan,+ huling dai niya itinugot na magkaigwa nin kaagaw an saiyang Diyos+ asin guminibo siya nin pagbayad para sa kasalan kan banwaan nin Israel.’”
14 An Israelita na ginadan kaiba kan babaying Midianita iyo an aki ni Salu na si Zimri, na pamayo sa sarong angkan kan mga Simeonita.
15 An babaying Midianita na ginadan iyo si Cozbi na aki ni Zur;+ si Zur sarong lider nin mga grupo nin pamilya na kabilang sa sarong angkan sa Midian.+
16 Paghaloy-haloy, sinabi ni Jehova ki Moises:
17 “Salakayon nindo an mga Midianita, asin garadanon nindo sinda,+
18 huli ta ipinahamak ninda kamo paagi sa mga pakana asin pang-aakit ninda para magkasala kamo duman sa Peor+ asin magkasala kamo paagi ki Cozbi na aki kan sarong pamayo kan Midian, an tugang ninda na ginadan+ kan aldaw na uminabot an damat huli kan pangyayari sa Peor.”+
Mga Nota
^ O “nagpuon na gumibo nin seksuwal na imoralidad.”
^ O “iinasosyar an sadiri.”
^ Sa literal, “payo.”
^ Sa literal, “sa atubangan kan aldaw.”
^ O “na iinasosyar an sadiri.”
^ O “budyak.”
^ O “dai nababangang.”
