Ikaduwang Cronica 9:1-31
9 Nabaretaan kan reyna kan Sheba+ an manungod ki Solomon, kaya nagduman siya sa Jerusalem para testingon si Solomon paagi sa dipisil na mga hapot.* May kaiba siyang kadakul na lingkod,* asin may dara siyang mga kamelyo na may kargang lanang balsamo, dakulon na bulawan,+ asin mamahalon na mga bato. Nagduman siya ki Solomon asin nakipag-ulay sa saiya manungod sa gabos na bagay na harani sa puso niya.+
2 Dangan sinimbag ni Solomon an gabos na hapot niya. Mayo nin dipisilon na bagay* an dai kayang ipaliwanag sa saiya ni Solomon.
3 Kan mahiling kan reyna kan Sheba an kadunungan ni Solomon,+ an harong na itinugdok niya,+
4 an kakanon sa saiyang lamesa,+ an areglo nin pagkakatukaw kan saiyang mga opisyal, an pagserbi sa lamesa kan saiyang mga serbidor saka an saindang sulot, an saiyang mga serbidor nin arak saka an saindang sulot, asin an saiyang mga atang na pigtututong na regular niyang idinudulot sa harong ni Jehova,+ ngalason nanggad siya.*
5 Kaya sinabi niya sa hadi: “Totoo man nanggad an nababaretaan ko sa sakong nasyon manungod sa mga nagibo* mo saka manungod sa kadunungan mo.
6 Alagad dai ako nagtubod sa mga nababaretaan ko sagkod na nagdigdi ako asin mahiling ko mismo iyan.+ Pero grabe! Mayo pa palan sa kabanga kan saimong dakulang kadunungan an nasabi sako.+ Nalabihan mo pang marhay an nabaretaan ko.+
7 Maugma an mga tawuhan mo, asin maugma an saimong mga lingkod na pirming nagtitindog sa saimong atubangan, na nagdadangog sa saimong kadunungan!
8 Pag-umawon lugod si Jehova na saimong Diyos, na nauugma sa saimo asin nagpatukaw sa saimo sa saiyang trono bilang hadi para ki Jehova na saimong Diyos. Huling namumutan kan saimong Diyos an Israel,+ asin tanganing magdanay ini sagkod lamang, ninombrahan ka niya na magin hadi kaiyan para magtao nin hustisya saka katanusan.”
9 Dangan tinawan niya an hadi nin 120 talentong* bulawan,+ kadakul na lanang balsamo, asin mamahalon na mga bato. Dai na nuarin man nin nag-abot na lanang balsamo na arog kan itinao kan reyna kan Sheba ki Hading Solomon.+
10 Apuwera diyan, an mga lingkod ni Hiram asin an mga lingkod ni Solomon na nagdara nin bulawan hali sa Ofir+ nagdara man nin mga tablon na algum saka mamahalon na mga gapo.+
11 Ginamit kan hadi an mga tablon na algum sa paggibo nin mga hagyanan sa harong ni Jehova+ saka sa harong* kan hadi,+ asin sa paggibo nin mga arpa saka mga instrumentong de-kuwerdas para sa mga parakanta.+ Dai pa kasuarin man nin nahiling na arog kan mga iyan sa daga nin Juda.
12 Itinao man ni Hading Solomon sa reyna kan Sheba an ano man na magustuhan asin hagadon kaini. Labi pa an itinao niya sa reyna kisa sa* dinara kaini sa hadi. Dangan, nagpuli na an reyna sa sadiri niyang daga kaiba an saiyang mga lingkod.+
13 Asin an timbang kan bulawan na nag-aabot ki Solomon sa sarong taon 666 na talentong bulawan,+
14 dai pa digdi kaiba an dinadara kan mga nagbibiyaheng negosyante, an dinadara kan mga nagnenegosyo, asin an hali sa gabos na hadi kan mga Arabe saka sa mga gobernador kan nasyon na nagdadara nin bulawan saka plata ki Solomon.+
15 Naggibo si Hading Solomon nin 200 na darakulang kalasag na gibo sa bulawan na may halo+ (600 na siklong* bulawan na may halo sa kada kalasag)+
16 asin 300 na pansagang* na gibo sa bulawan na may halo (tulong minang* bulawan sa kada pansagang). Dangan ilinaog an mga iyan kan hadi sa Harong kan Kadlagan nin Lebanon.+
17 Naggibo man an hadi nin sarong dakulang trono na gibo sa marpil* asin kinalupkupan iyan nin purong bulawan.+
18 May anom na tangga pasiring sa trono, asin may bulawan na tungtungan nin bitis na nakakabit sa trono, asin may pasunadan nin takyag sa mag-ibong na gilid kan tukawan, saka may duwang estatuwang leon+ na nakatindog sa gilid kan mga pasunadan nin takyag.
19 Asin sa anom na tangga igwang nakatindog na 12 estatuwang leon,+ saro sa kada puro kan anom na tangga. Mayong ibang kahadian an may ginibong ano man na arog kaini.
20 Bulawan an gabos na inuman ni Hading Solomon, asin purong bulawan an gabos na kagamitan sa Harong kan Kadlagan nin Lebanon. Mayo nin gibo sa plata, huling kaidtong panahon ni Solomon ibinibilang na mayong halaga an plata.+
21 Nagbibiyahe kaya pasiring sa Tarsis+ an mga barko kan hadi kaiba kan mga lingkod ni Hiram.+ Sarong beses sa kada tulong taon, nag-aabot an mga barko nin Tarsis na kargado nin bulawan saka plata, marpil,+ mga kabalang,* asin mga paboreal.*
22 Kaya nakakalabi nanggad sa kayamanan asin kadunungan si Hading Solomon kisa sa gabos na iba pang hadi sa daga.+
23 Asin an mga hadi sa bilog na daga gustong magduman ki* Solomon tanganing madangog an saiyang kadunungan na ibinugtak kan tunay na Diyos sa saiyang puso.+
24 Kada taon, an kada saro sa minabisita sa saiya may darang regalo—mga kagamitan na plata, mga kagamitan na bulawan, mga bado,+ pangalasag, lanang balsamo, mga kabayo, asin mga mula.*
25 Igwa si Solomon nin 4,000 na kuwadra para sa saiyang mga kabayo saka mga karwahe asin 12,000 an saiyang mga kabayo,*+ asin ilinaag niya an mga iyan sa mga siyudad para sa mga karwahe asin sa Jerusalem harani sa hadi.+
26 Asin namahala siya sa gabos na hadi puon sa Salog* sagkod sa daga kan mga Filisteo asin sagkod sa linderos* kan Ehipto.+
27 Huli sa ginibo kan hadi, nagin kasingdakul nin mga gapo an plata sa Jerusalem, asin an mga sedro nagin kasingdakul kan mga puon nin sikomoro sa Sefela.+
28 Asin nagdadara sinda ki Solomon nin mga kabayo hali sa Ehipto+ asin hali sa gabos na iba pang kadagaan.
29 Kun manungod sa iba pang nangyari sa buhay ni Solomon,+ puon sa kapinunan sagkod sa katapusan, bakong nakasurat iyan sa mga isinurat* ni Natan+ na propeta, sa propesiya ni Ahias+ na taga Shilo, asin sa rekord nin mga bisyon ni Iddo+ na bisyonaryo manungod ki Jeroboam+ na aki ni Nebat?
30 Namahala si Solomon sa Jerusalem bilang hadi sa bilog na Israel sa laog nin 40 taon.
31 Dangan nagadan* si Solomon. Ilinubong ninda siya sa Siyudad ni David na saiyang ama;+ asin si Rehoboam na saiyang aki an nagsalida sa saiya bilang hadi.+
Mga Nota
^ O “tawuhan.”
^ O “paagi sa mga paukod.”
^ Sa literal, “Mayong natatago ki Solomon.”
^ Sa literal, “nawaran na siya nin espiritu.”
^ O “mga tataramon.”
^ An sarong talento katumbas nin 34.2 kilos. Hilingon an Apendise B14.
^ O “palasyo.”
^ O posibleng “Apuwera pa iyan sa mga regalo niya na katumbas kan halaga kan.”
^ An sarong siklo katumbas nin 11.4 gramos. Hilingon an Apendise B14.
^ Sa Hebreong Kasuratan, an sarong mina katumbas nin 570 gramos. Hilingon an Apendise B14.
^ Sadit na kalasag na sa parati ginagamit kan mga parapana.
^ Sa Ingles, ivory.
^ O “ukay.”
^ Sa Ingles, peacock.
^ Sa literal, “hinahanap an lalawgon ni.”
^ An Hebreong termino nanunungod sa ugbon nin lalaking asno asin babaying kabayo.
^ O “parakabayo.”
^ An buot sabihon, an Eufrates.
^ O “sagkudan.”
^ O “tataramon.”
^ Sa literal, “huminigdang kaiba kan saiyang mga apuon.”
