Inot na Samuel 15:1-35
15 Dangan sinabi ni Samuel ki Saul: “Isinugo ako ni Jehova tanganing lahidan ka na magin hadi kan saiyang banwaan na Israel.+ Kaya magdangog ka sa sasabihon ni Jehova.+
2 Ini an sabi ni Jehova na pamayo nin mga hukbo: ‘Papanimbagon ko an mga Amalekita huling kinalaban ninda an Israel mantang nasa dalan, kan magluwas an mga ini sa Ehipto.+
3 Kaya salakayon mo an mga Amalekita,+ asin laglagon mo sinda+ kaiba an gabos na yaon sa sainda. Dai mo dapat sinda pagpaligtason;* garadanon mo sinda,+ lalaki man o babayi, aki man o umboy, torong baka man o karnero, kamelyo man o asno.’”+
4 Ipinaapod ni Saul an mga suldados asin binilang sinda sa Telaim: 200,000 an mga suldados asin 10,000 an mga lalaki kan Juda.+
5 Uminabante si Saul asin an saiyang mga suldados sagkod sa siyudad nin Amalek asin puminuwesto sa may kababan* tanganing mantambang.
6 Dangan sinabihan ni Saul an mga Kenita:+ “Magharali na kamo, bayaan na nindo an mga Amalekita tanganing dai ko kamo malaglag kaiba ninda.+ Nagpahiling kaya kamo nin maimbod na pagkamuot sa bilog na banwaan nin Israel+ kan magluwas sinda sa Ehipto.” Kaya binayaan kan mga Kenita an Amalek.
7 Pagkatapos kaiyan, ginaradan ni Saul an mga Amalekita+ puon sa Havila+ sagkod sa Sur,+ na kataid kan Ehipto.
8 Dinakop niyang buhay si Agag+ na hadi kan Amalek, pero an gabos na iba pa ginaradan niya paagi sa espada.+
9 Alagad dai ginadan* ni Saul asin kan saiyang mga tawuhan si Agag. Dai man ninda linaglag an pinakamarahay na mga karnero, mga baka, mga pinatabang hayop, mga lalaking karnero, asin an gabos na mararahay na bagay.+ Habo nindang laglagon an mga iyan. Pero linaglag ninda an gabos na dai mapapakinabangan asin an gabos na dai ninda kaipuhan.
10 Dangan uminabot ki Samuel an tataramon ni Jehova:
11 “Ikinakamundo ko* na ginibo kong hadi si Saul, huling tinalikdan niya ako asin dai na niya sinunod an mga sinabi ko.”+ Napurisaw na marhay si Samuel, asin bilog na banggi siyang nagparaagrangay ki Jehova.+
12 Kan suminunod na aldaw, amay na nagbangon si Samuel tanganing kaulayon si Saul. Dangan, may nagsabi ki Samuel: “Nagpasiring sa Carmel+ si Saul, asin nagpatindog siya duman nin monumento na para sa saiya.+ Tapos naghali siya duman asin nagbaba sa Gilgal.”
13 Kan manumpungan na ni Samuel si Saul, sinabi ni Saul sa saiya: “Bendisyunan ka lugod ni Jehova. Natapos ko nang gibuhon an sinabi ni Jehova.”
14 Pero sinabi ni Samuel: “Kun natapos mo na, ano ta may nadadangog akong ribok nin mga karnero saka mga baka?”+
15 Nagsimbag si Saul: “Hali an mga iyan sa mga Amalekita, huling dai ginaradan* kan mga suldados an pinakamarahay sa mga karnero asin mga baka tanganing iatang ki Jehova na saimong Diyos; alagad idtong iba pa, ginaradan mi.”
16 Kaya sinabi ni Samuel ki Saul: “Pumurupundo ka! Sasabihon ko saimo an mga sinabi sa sako ni Jehova kasubanggi.”+ Nagsimbag siya: “Sige!”
17 Asin sinabi ni Samuel: “Bako daw na ibinibilang mo pang daing halaga an saimong sadiri+ kaidtong gibuhon kang pamayo kan mga tribo nin Israel asin kaidtong lahidan ka ni Jehova na magin hadi kan Israel?+
18 Kan huri, isinugo ka ni Jehova para sa sarong misyon asin sinabi saimo: ‘Maghali ka, laglagon mo an makasalan na mga Amalekita.+ Makipaglaban ka sa sainda sagkod na magkaurubos mo sinda.’+
19 Kaya taano baya ta dai mo sinunod an sinabi* ni Jehova? Imbes, may kapasluan mong dinalagan an mga samsam+ asin ginibo an maraot sa paghiling ni Jehova!”
20 Alagad ta sinabi ni Saul ki Samuel: “Pero sinunod ko an sinabi* ni Jehova! Nagduman ako sa kun sain ako isinugo ni Jehova, asin dinakop ko si Agag na hadi kan Amalek, saka ginaradan ko an mga Amalekita.+
21 Kaso nagkurua an mga suldados nin mga karnero saka mga baka hali sa samsam, su mga pinakamarahay sa mga dapat kutanang garadanon, tanganing iatang an mga iyan ki Jehova na saimong Diyos duman sa Gilgal.”+
22 Dangan sinabi ni Samuel: “Mas nauugma daw si Jehova sa mga dulot na pigtututong saka sa mga atang+ kisa sa pagsunod sa mga sinabi* ni Jehova? Magdangog ka! Mas marahay an pagsunod kisa sa atang,+ asin an pagtao nin atensiyon kisa sa taba+ nin mga lalaking karnero;
23 huli ta an pagrebelde+ kapareho man sana kan kasalan na panghuhula,+ asin an kapangahasan kapareho man sana nin paggamit nin kapangyarihan sa pagmamahika asin nin idolatriya.* Huling isinikwal mo an tataramon ni Jehova,+ isinikwal ka man niya sa pagigin hadi.”+
24 Dangan sinabi ni Saul ki Samuel: “Nagkasala ako, huling binalga ko an pagbuot ni Jehova asin an mga sinabi mo; natakot kaya ako sa mga tawuhan ko asin nagdangog ako sa sinabi ninda.
25 Patawada man tabi ako sa kasalan ko, asin ibanan mo ako pabalik tanganing makaduko pa ako ki Jehova.”+
26 Pero sinabi ni Samuel ki Saul: “Dai ako maiba saimo pabalik, huling isinikwal mo an tataramon ni Jehova, saka isinikwal ka na ni Jehova sa pagigin hadi kan Israel.”+
27 Kan patalikod na si Samuel para maghali, biglang kinaputan ni Saul an gayad kan saiyang pang-ibabaw na bado na daing manggas, pero nagisi ini.
28 Kaya sinabi ni Samuel sa saiya: “Ginisi ni Jehova hali sa saimo ngunyan na aldaw an paghadi sa Israel, asin itatao niya iyan sa saimong kapwa na mas marahay kisa saimo.+
29 Saro pa, an Kamahalan kan Israel+ dai magpuputik+ asin dai magbabago nin isip,* huli ta bako Siyang tawo para magbago nin isip.”*+
30 Huli kaini, sinabi niya: “Nagkasala ako. Pero tawan mo tabi ako nin onra sa atubangan kan kamagurangan kan sakong banwaan asin sa atubangan kan Israel. Ibanan mo ako pabalik, asin maduko ako ki Jehova na saimong Diyos.”+
31 Kaya buminalik si Samuel na kasunod ni Saul, asin nagduko si Saul ki Jehova.
32 Asin sinabi ni Samuel: “Daraha nindo sako si Agag na hadi kan Amalek.” Nag-aalangan* na nagpasiring sa saiya si Agag, huling bago kaini sinabi na ni Agag sa sadiri: ‘Siguradong libredo na ako sa peligrong magadan.’*
33 Alagad sinabi ni Samuel: “Kun paanong paagi kan saimong espada nawaran nin mga aki an mga babayi, an saimong ina man an pinakamawawaran nin aki sa gabos na babayi.” Dangan, pigparatigbas ni Samuel si Agag asin piniridaso sa atubangan ni Jehova sa Gilgal.+
34 Nagpasiring na ngunyan si Samuel sa Rama, asin nagpuli man si Saul sa harong niya sa Gibeah.*
35 Sagkod kan aldaw na magadan si Samuel, dai na siya nakipaghilingan giraray ki Saul, huling ipinagmundong marhay ni Samuel si Saul.+ Asin ikinamundo* ni Jehova na ginibo niyang hadi kan Israel si Saul.+
Mga Nota
^ O “kahirakan.”
^ O “sulugan na kababan.”
^ O “Alagad kinahirakan.”
^ O “Nagbabasol ako.”
^ O “huling kinahirakan.”
^ O “boses.”
^ O “boses.”
^ O “sa boses.”
^ Sa literal, “mga terafim na estatuwa,” an buot sabihon, mga diyos kan pamilya; mga idolo.
^ O “magbabasol.”
^ O “magbasol.”
^ O posibleng “May kumpiyansa.”
^ Sa literal, “sa kapaitan nin kagadanan.”
^ Sa literal, “Gibeah ni Saul.”
^ O “pinagbasulan.”
