1. Watter negatiewe gevoel ervaar baie mense, insluitende party ware Christene?

 HET Jehovah God jou as persoon lief? Party stem saam dat God die mensdom in die algemeen liefhet, soos Johannes 3:16 sê. Maar hulle voel in werklikheid: ‘God kan my as individu nooit liefhê nie.’ Selfs ware Christene voel soms onseker hieroor. Een man wat mismoedig was, het gesê: “Dit is vir my baie moeilik om te glo dat God enigsins vir my omgee.” Worstel jy soms met soortgelyke twyfelgedagtes?

2, 3. Wie wil ons graag laat glo dat ons niks werd of onbeminlik in Jehovah se oë is, en hoe kan ons hierdie gedagte bestry?

² Satan wil ons graag laat glo dat Jehovah God ons nie liefhet nie en dat ons geen waarde in sy oë het nie. Satan verlei mense wel dikwels deur hulle ydelheid en trots te streel (2 Korintiërs 11:3). Maar hy skep ook behae daarin om die selfrespek van kwesbare mense te verpletter (Johannes 7:47-49; 8:13, 44). Dit is veral so in hierdie swaar “laaste dae”. Baie word vandag groot in gesinne waar daar geen “natuurlike liefde” is nie. Ander is voortdurend blootgestel aan mense wat wreed, selfsugtig en hardkoppig is (2 Timoteus 3:1-5). Nadat hulle jare lank mishandeling, rassisme en haat verduur het, is sulke mense moontlik daarvan oortuig dat hulle niks werd of onbeminlik is.

³ As jy sulke negatiewe gevoelens ervaar, moet jy nie wanhopig raak nie. Baie van ons is van tyd tot tyd onredelik streng op onsself. Maar onthou, God se Woord is bedoel om “dinge reg te stel” en om “om dinge wat soos sterk vestings is, af te breek” (2 Timoteus 3:16; 2 Korintiërs 10:4). Die Bybel sê: “Ons sal ons hart voor hom gerusstel in alles waarin ons hart ons veroordeel, want God is groter as ons  hart en weet alles” (1 Johannes 3:19, 20). Kom ons kyk na vier maniere waarop die Skrif ons help om ‘ons hart gerus te stel’, of van Jehovah se liefde te verseker.

4, 5. Hoe toon Jesus se illustrasie van die mossies dat ons waardevol is in Jehovah se oë?

⁴ Eerstens, die Bybel leer uitdruklik dat elkeen van God se knegte waardevol is in sy oë. Jesus het byvoorbeeld gesê: “Twee mossies word vir ’n muntstuk van min waarde verkoop, nie waar nie? Tog sal nie een van hulle op die grond val sonder dat julle Vader daarvan weet nie. Maar selfs die hare op julle kop is almal getel. Moet dus nie bang wees nie. Julle is meer werd as baie mossies” (Matteus 10:29-31). Kyk wat daardie woorde vir Jesus se eerste-eeuse luisteraars beteken het.

⁵ Ons wonder dalk waarom enige iemand ’n mossie sou koop. Wel, in Jesus se dag was die mossie die goedkoopste voël wat as kos verkoop is. Let op dat iemand twee mossies vir ’n muntstuk van min waarde kon koop. Maar later het Jesus gesê dat iemand wat bereid was om twee muntstukke te bestee, nie vier mossies nie, maar vyf gekry het. Die ekstra voël is bygevoeg asof dit absoluut geen waarde gehad het nie. Hierdie voëls was miskien in die oë van mense niks werd nie, maar hoe het die Skepper hulle beskou? Jesus het gesê dat “nie een van hulle [nie eens die een wat bygevoeg word] deur God vergeet [word] nie” (Lukas 12:6, 7). Nou kan ons Jesus se punt begin verstaan. As Jehovah soveel waarde aan ’n enkele mossie heg, hoeveel waardevoller is ’n mens dan! Soos Jesus verduidelik het, ken Jehovah elke besonderheid omtrent ons. Selfs die hare op ons kop is getel!

6. Waarom is ons seker dat Jesus realisties was toe hy gesê het dat die hare op ons kop getel is?

⁶ Ons hare is getel? Party dink dalk dat Jesus hier onrealisties was. Maar dink net aan die hoop op die opstanding.  Hoe intiem moet Jehovah ons tog ken om ons te kan herskep! Ons is vir hom so waardevol dat hy elke besonderheid onthou, met inbegrip van ons genetiese kode en al ons jare van herinneringe en ondervindinge. a In vergelyking hiermee sou dit iets eenvoudigs wees om ons hare te tel – waarvan daar omtrent 100 000 op die gemiddelde kop groei.

7, 8. (a) Wat is party eienskappe wat Jehovah verheug is om te vind wanneer hy menseharte deursoek? (b) Wat is party van ons werke wat Jehovah waardeer?

⁷ Tweedens, die Bybel leer ons wat Jehovah in sy knegte waardeer. Kortom, hy skep behae in ons goeie eienskappe en in die pogings wat ons aanwend. Koning Dawid het vir sy seun Salomo gesê: “Jehovah deursoek alle harte, en hy sien elke begeerte en gedagte” (1 Kronieke 28:9). Hoe verheug moet God tog wees wanneer hy miljarde menseharte in hierdie gewelddadige, haatdraende wêreld deursoek en ’n hart vind wat vrede, waarheid en regverdigheid liefhet! Wat gebeur wanneer God ’n hart vind wat oorloop van liefde vir hom, wat meer van hom wil leer en hierdie kennis aan ander wil meedeel? Jehovah sê vir ons dat hy op dié let wat met ander oor hom praat. Hy het selfs “’n gedenkboek” vir almal “wat Jehovah vrees en vir dié wat oor sy naam nadink” (Maleagi 3:16). Sulke eienskappe is vir hom kosbaar.

⁸ Wat is party van die goeie werke wat Jehovah waardeer? Beslis ons pogings om sy Seun, Jesus Christus, na te volg (1 Petrus 2:21). ’n Lewensbelangrike werk wat God waardeer, is die verkondiging van die goeie nuus van sy Koninkryk. Ons lees in Romeine 10:15: “Hoe lieflik is die voete  van dié wat goeie nuus van goeie dinge bekend maak!” Ons dink miskien nie gewoonlik aan ons voete as lieflik nie. Maar hier verteenwoordig hulle die pogings wat Jehovah se knegte aanwend om die goeie nuus te verkondig. Al hierdie pogings is lieflik en kosbaar in sy oë. – Matteus 24:14; 28:19, 20.

9, 10. (a) Waarom kan ons seker wees dat Jehovah ons volharding te midde van verskillende ontberinge waardeer? (b) Watter negatiewe beskouings het Jehovah nooit van sy getroue knegte nie?

⁹ Jehovah waardeer ook ons volharding (Matteus 24:13). Onthou, Satan wil hê dat jy jou rug op Jehovah moet draai. Elke dag dat jy aan Jehovah getrou bly, is nog ’n dag waarin jy gehelp het om ’n antwoord op Satan se uittartings te gee (Spreuke 27:11). Dit is soms nie maklik om te volhard nie. Gesondheidsprobleme, finansiële moeilikhede, emosionele angs en ander struikelblokke kan van elke dag ’n beproewing maak. Uitgestelde verwagtinge kan ook ontmoedigend wees (Spreuke 13:12). Volharding ondanks hierdie uitdagings is vir Jehovah nog kosbaarder. Daarom het koning Dawid Jehovah gevra om sy trane in ’n “leersak” te  bewaar, en hy het vol vertroue bygevoeg: “Is hulle nie in u boek opgeteken nie?” (Psalm 56:8). Ja, Jehovah waardeer en onthou al die trane en lyding wat ons verduur terwyl ons ons lojaliteit teenoor hom handhaaf. Ook dit is kosbaar in sy oë.

¹⁰ Maar die selfveroordelende hart weier dalk om hierdie bewyse te aanvaar dat ons waardevol is in God se oë. Dit fluister miskien knaend: ‘Maar daar is so baie ander wat voorbeeldiger is as ek. Hoe teleurgesteld moet Jehovah tog wees wanneer hy my met hulle vergelyk!’ Jehovah vergelyk ons nie met ander nie; hy is ook nie onbuigsaam of hardvogtig in sy denke nie (Galasiërs 6:4). Hy lees ons hart met groot insig, en hy waardeer die goeie – al is dit ook hoe gering.

11. Wat kan ons van Jehovah leer uit die manier waarop hy die geval van Abia hanteer het?

¹¹ Derdens, terwyl Jehovah ons deursoek, sif hy alles noukeurig, op soek na die goeie. Toe Jehovah byvoorbeeld opdrag gegee het dat die hele afvallige vorstehuis van koning Jerobeam tereggestel moet word, het Hy beveel dat een van die koning se seuns, Abia, ’n behoorlike begrafnis moes kry. Waarom? “Jehovah, die God van Israel, [het] iets goeds gevind” in hom (1 Konings 14:1, 10-13). Jehovah het as ’t ware die hart van daardie jong man gesif en “iets goeds” daarin gevind. Ongeag hoe gering of onbeduidend daardie “iets goeds” miskien was, Jehovah het dit die moeite werd geag om dit in sy Woord te meld. Hy het dit selfs beloon deur ’n gepaste mate van genade aan daardie een lid van ’n afvallige huis te bewys.

12, 13. (a) Hoe toon die geval van koning Josafat dat Jehovah die goeie in ons soek selfs wanneer ons sondig? (b) Hoe tree Jehovah soos ’n liefdevolle Ouer op wanneer dit by ons goeie werke en eienskappe kom?

¹² ’n Selfs positiewer voorbeeld kan in goeie koning Josafat  gevind word. Toe die koning iets dwaas gedoen het, het Jehovah se profeet vir hom gesê: “Omdat u dit gedoen het, het u Jehovah kwaad gemaak.” Wat ’n ontstellende gedagte! Maar Jehovah se boodskap het nie daar geëindig nie. Dit het voortgegaan: “Maar God het goeie dinge in u gesien” (2 Kronieke 19:1-3). Jehovah se regverdige woede het hom dus nie verblind vir die goeie in Josafat nie. Hoe anders tog as onvolmaakte mense! Wanneer ander ons ontstel het, is ons dikwels blind vir die goeie in hulle. En wanneer ons sondig, verblind die teleurstelling, skaamte en skuldgevoel wat ons ervaar, ons moontlik vir die goeie in ons. Maar onthou, Jehovah vergewe ons as ons berou het oor ons sondes en hard probeer om dit nie te herhaal nie.

¹³ Wanneer Jehovah jou sif, werp hy sulke sondes weg, net soos ’n prospekteerder wat goud uitwas, waardelose gruis weggooi. Wat van jou goeie eienskappe en werke? Dit is die “stukkies goud” wat hy hou! Het jy al opgemerk hoe liefdevolle ouers hulle kinders se tekeninge of skooltake bewaar, soms dekades nadat die kinders daarvan vergeet het? Jehovah is die liefdevolste Ouer. Solank ons aan hom getrou bly,  sal hy nooit ons goeie werke en eienskappe vergeet nie. Trouens, hy sal dit as onregverdig beskou om dit te vergeet, en hy is nooit onregverdig nie (Hebreërs 6:10). Hy sif ons ook op ’n ander manier.

14, 15. (a) Waarom verblind ons onvolmaakthede Jehovah nooit vir die goeie in ons nie? Lig toe. (b) Wat sal Jehovah doen met die goeie dinge wat hy in ons vind, en hoe beskou hy sy getroue knegte?

¹⁴ Jehovah kyk verby ons onvolmaakthede en sien ons potensiaal. Ter toeligting: Kunsliefhebbers sal groot moeite doen om erg beskadigde skilderye of ander kunswerke te restoureer. Toe iemand byvoorbeeld ’n tekening deur Leonardo da Vinci, wat ongeveer R340 miljoen werd is, in die National Gallery in Londen, Engeland, met ’n haelgeweer beskadig het, het niemand voorgestel dat die tekening weggegooi moet word omdat dit nou beskadig is nie. Daar is onmiddellik begin om die 500 jaar oue meesterstuk te restoureer. Waarom? Want dit was kosbaar in die oë van kunsliefhebbers. Is jy nie meer werd as ’n kryt-en-houtskool-tekening nie? Jy is beslis in God se oë – ongeag hoe beskadig jy weens oorgeërfde onvolmaaktheid is (Psalm 72:12-14). Jehovah God, die vaardige Skepper van die mensdom, sal doen wat nodig is om almal wat op sy liefdevolle sorg reageer, tot volmaaktheid te herstel. – Handelinge 3:21; Romeine 8:20-22.

¹⁵ Ja, Jehovah sien die goeie in ons wat ons miskien nie in onsself sien nie. En terwyl ons hom dien, sal hy die goeie laat toeneem totdat ons uiteindelik volmaak is. Ongeag hoe Satan se wêreld ons behandel, Jehovah waardeer sy getroue knegte en beskou hulle as kosbaar. – Haggai 2:7.

16. Wat is die grootste bewys van Jehovah se liefde vir ons, en hoe weet ons dat hierdie gawe vir ons persoonlik bedoel is?

¹⁶ Vierdens, Jehovah doen baie om sy liefde vir ons te bewys. Christus se losprysoffer is sekerlik die kragtigste antwoord  op die sataniese leuen dat ons niks werd of onbeminlik is. Ons moet nooit vergeet dat die pynlike dood wat Jesus aan die folterpaal gesterf het en die selfs groter pyn wat Jehovah verduur het terwyl hy sy geliefde Seun sien sterf het, bewys is van hulle liefde vir ons nie. Ongelukkig is dit vir baie mense moeilik om te glo dat hierdie gawe vir hulle persoonlik bedoel is. Hulle voel onwaardig. Maar onthou dat die apostel Paulus eens ’n vervolger van Christus se volgelinge was. Tog het hy geskryf: “Die Seun van God [het] my liefgehad . . . en homself vir my oorgegee.” – Galasiërs 1:13; 2:20.

17. Deur middel waarvan trek Jehovah ons na hom en na sy Seun?

¹⁷ Jehovah bewys sy liefde vir ons deur elkeen van ons te help om by die voordele van Christus se offerande baat te vind. Jesus het gesê: “Geen mens kan na my toe kom tensy die Vader, wat my gestuur het, hom trek nie” (Johannes 6:44). Ja, Jehovah self trek ons na sy Seun en die hoop op ewige lewe. Hoe? Deur middel van die predikingswerk, waardeur ons individueel bereik word, en deur middel van sy heilige gees, wat Jehovah gebruik om ons te help om geestelike waarhede te verstaan en toe te pas ten spyte van ons beperkings en onvolmaakthede. Jehovah kan dus van ons sê soos hy van Israel gesê het: “Ek het jou met ’n ewige liefde liefgehad. Daarom het ek jou met lojale liefde na my toe getrek.” – Jeremia 31:3.

18, 19. (a) Wat is die intiemste manier waarop Jehovah sy liefde vir ons bewys, en wat toon dat hy self hierna omsien? (b) Hoe verseker God se Woord ons dat Jehovah met empatie luister?

¹⁸ Ons ervaar Jehovah se liefde seker op die intiemste manier deur die voorreg van gebed. Die Bybel nooi elkeen van ons: “Bid sonder ophou” tot God (1 Tessalonisense 5:17). Hy luister. Hy word selfs die “Hoorder van die gebed” genoem (Psalm 65:2). Hy het hierdie verantwoordelikheid aan niemand anders oorgedra nie, nie eens aan sy eie Seun nie. Dink net: Die Skepper van die heelal spoor ons aan om  hom in gebed te nader, met vrymoedigheid van spraak. En watter soort luisteraar is hy? Koud, ongevoelig, onverskillig? Glad nie.

¹⁹ Jehovah het empatie. Wat is empatie? Een getroue bejaarde Christen het gesê: “Empatie is jou pyn in my hart.” Word Jehovah werklik deur ons pyn geraak? Ons lees oor die lyding van sy volk Israel: “Wanneer dit sleg gegaan het met hulle, het hy saam met hulle gely” (Jesaja 63:9). Jehovah het nie net hulle moeilikhede gesien nie; hy het empatie vir die volk gehad. Jehovah se woorde aan sy knegte lig toe presies hoe intens hy voel: “Wie aan julle raak, raak aan my oogappel” (Sagaria 2:8). b Hoe pynlik sou dit tog wees! Ja, Jehovah het empatie vir ons. Wanneer ons seerkry, kry hy seer.

20. Watter ongebalanseerde denke moet ons vermy as ons die raad in Romeine 12:3 wil gehoorsaam?

²⁰ Geen gebalanseerde Christen sal hierdie bewys van God se liefde en agting as ’n verskoning vir trots of egotisme gebruik nie. Die apostel Paulus het geskryf: “Deur die onverdiende goedheid wat aan my gegee is, sê ek vir elkeen van julle om nie meer van homself te dink as wat nodig is nie, maar om op ’n manier te dink wat toon dat hy verstandig is, elkeen volgens die geloof wat God hom gegee het” (Romeine 12:3). ’n Ander vertaling sê hier: “Ek sê vir elkeen van julle om homself nie bo sy werklike waarde te skat nie, maar om ’n matige skatting van homself te maak” (A Translation in the Language of the People, deur Charles B. Williams). Terwyl ons dan die warmte van ons hemelse Vader se liefde geniet, moet ons gesond van verstand wees en onthou  dat ons nie God se liefde kan verdien of daarop aanspraak kan maak nie. – Lukas 17:10.

21. Watter sataniese leuens moet ons voortdurend weerstaan, en met watter Goddelike waarheid moet ons voortgaan om ons hart gerus te stel?

²¹ Laat ons almal alles in ons vermoë doen om al Satan se leuens te verwerp, insluitende die leuen dat ons niks werd of onbeminlik is. As jou ondervindinge in die lewe jou geleer het om te dink dat jy ’n struikelblok is wat te groot is selfs vir God se ontsaglike liefde om te oorkom, of dat jou goeie werke te onbeduidend is om selfs deur sy alsiende oë raakgesien te word, of dat jou sondes te groot is om selfs deur die dood van sy kosbare Seun bedek te word, is jy ’n leuen geleer. Verwerp hierdie leuens met jou hele hart! Laat ons voortgaan om ons hart gerus te stel met die waarheid wat in Paulus se geïnspireerde woorde uitgedruk word: “Ek is daarvan oortuig dat nie die dood of die lewe of engele of regerings of dinge wat nou gebeur of dinge wat nog gaan gebeur of magte of hoogte of diepte of enige ander skepping ons sal kan skei van God se liefde wat in Christus Jesus, ons Here, is nie.” – Romeine 8:38, 39.