1-3. Peko macalo mene ma jo munyomme gitye kwede? (Nen cal ma tye i pot karatac man.)

 LACO mo ma dong orii i nyomme ki yomcwiny pi mwaki 38 kulu owaco ni: “Ka ce itute ki keroni ducu dok imito ni nyommi obed maber, ci ibinongo mot pa Jehovah.” Ada, twere pi laco gin ki dako me bedo ki yomcwiny kun ngat man nongo konyo lawote i kare me peko.​—Car. 18:22.

² Ento, pe obedo gin me ur ka luot moni gitye i ‘ayelayela mogo me kwo me lobo man.’ (1 Kor. 7:28) Pingo? Pien lweny ki peko me nino ducu romo kelo tele i ot. Pi roc ma laco ki dako gitye kwede, man twero kelo cwercwiny, niango manok, ki dong weko pe giloko i kingi maber. (Yak. 3:2, 5, 8) Jo munyomme ginongo tek tutwal me gwoko dog ticgi kun bene nongo gipito lutinogi. Par kacel ki olo romo weko bedo tek tutwal pi jo mogo munyomme me kwanyo cawa ma mitte wek gijing nyomgi. Mar ki woro ma gitye kwede i kingi romo balle woko pi can lim, two nyo peko mukene. Medo i kom meno, nyom ma kitamo ni gutine ocung matek twero doko goro pi “tic me kit pa dano,” calo tim kwele, tarwang, mone, daa, nyeko, kiniga, ki dong pyem.​—Gal. 5:19-21.

 ³ Gin marac loyo aye ni i “kare me agikki[-ni],” nyom mapol tye ka balle pien dano gitye ki cwiny me woro me jami ki dok pe gimaro Lubanga. (2 Tem. 3:1-4) Me agikki, jo munyomme myero gucung matek pien tye lamone mo ma omoko tamme me balo nyom. Lakwena Petero ocikowa ni: “Lakworwu Catan tye ka wirre macalo labwor ma kok, kun yenyo dano me amwoda.”​—1 Pet. 5:8; Yabo 12:12.

4. Gin ango ma weko nyom moni cung matek dok yomcwiny bedo iye?

⁴ Won ot mo ma bedo i lobo Japan owaco ni: “Can cente onongo odiyo ma pe larre. Dakona bene obedo i lyeto magwar pien onongo pe aloko kwede atir atir. Medo i kom meno, ma cokcok-ki kome obedo lit adada. I kine mukene, lyeto ma kit man weko wagwenyo lok i kinwa.” Pekki mukene tye i nyom ma pe wene ento pud kitwero cobogi. Ki kony pa Jehovah, jo munyomme gitwero bedo ki yomcwiny i nyomgi. (Kwan Jabuli 127:1.) Kong wanyamu jami abic ma romo konyowa wek nyomwa ocung matek dok orii pi naka. I ngeye, wabineno gin mumiyo mar pire tek wek nyom ocung matek.

5, 6. Gin ango ma laco gin ki dako giromo timone wek Jehovah obed i nyomgi?

⁵ Te guti me nyom bedo matek ka jo munyomme giketo gengi i kom Jehovah dok gimine i te telane. (Kwan Latitlok 4:12.) Co ki mon giweko Jehovah bedo i nyomgi ka ce gilubo tirane. Baibul oloko i kom jo pa Lubanga i kare macon ni: “Ka ce onongo wungak woko, ci wubiwinyo lok ma a ki yo tung ngewu, kun waco ni, ‘Yo ene, wulubi,’ ka wulokke yo tung lacuc nyo yo tung lacam.” (Ic. 30:20, 21) I kare-ni, jo munyomme ‘giwinyo’ lok pa Jehovah ka gikwano Baibul kacel. (Jab. 1:1-3) Gin bene gijingo nyomgi ka gibedo ki yub me Woro pi Jo me Ot ma miyo ginongo yweyo i yo me cwiny. Ki bene, lega kacel nino ducu obedo gin ma pire tek adada wek nyom ocung matek ma kanyo lyeto me lobo pa Catan-ni.

⁶ Gerhard ma bedo i lobo Germany owaco ni: “Ka yomcwinywa oballe pi peko ma odiyo ngat acel acel nyo pi niango manok, tira ma i Lok pa Lubanga obedo ka konyowa me diyo cwinywa ki dok dongo cwiny me timo kica. Kit aryo magi pigi tek wek nyom ocung matek.” Ka jo munyomme gitimo jami me cwiny kacel wek Lubanga obed i nyomgi kun gitiyo pire kacel, gin gibedo cok ki Lubanga ki dok luotgi ki yomcwiny.

7. Co myero guter mongi nining?

⁷ Kit ma laco tero kwede jo me ode romo weko nyom cung matek dok bedo ki yomcwiny. Baibul wacci: “Wi laco acel acel en aye Kricito, wi dako aye cware.” (1 Kor. 11:3) Man te lokke ngo? Te lokke ni co myero guter mongi kit ma Yecu otero kwede lupwonnyene. Yecu pe obedo ka tero lupwonnyene i yo me aconya nyo ki gero ento kare ducu en onyuto mar, cwiny me kica, niango, woro ki dong mwolo.​—Mat. 11:28-30.

8. Gin ango ma weko dako maro dok woro laco?

⁸ Co ma gin Lukricitayo pe myero cawa weng gubed ka diyo mongi adiya ni omyero gunyutigi woro. Ma ka meno, gin myero ‘gubed ki mongi ki  niang maber.’ Gin ‘gimiyo deyo bot mongi macalo luwotgi ma komgi pe tek.’ (1 Pet. 3:7) Kadi bed gitye i kin dano nyo kengi, co ginyuto ni giworo dok giterogi mongi i yo me kica i kit ma giloko kwedgi. (Car. 31:28) Ka laco tero dakone kumeno, ci dakone marre kun bene wore dok Lubanga goyo laa i kom nyomgi.

9. Dako twero nyutone ni en lawiny nining?

⁹ Ka wamaro Jehovah ki cwinywa ducu pien walubo cikke ma igi lac, man bikonyowa me mwolle i te twerone. (1 Pet. 5:6) Yo acel ma pire tek ma dako ma lawiny nyuto kwede ni eworo twero pa Jehovah aye ka en note dok konyo jo me ode. Baibul waco ni: “Wun mon, wumine kenwu i te loc pa cogwu, pien meno aye gin ma myero i kin jo ma tye i Rwot.” (Kol. 3:18) Ki lok ada, pe te lokke ni tam mo keken ma laco okati kwede dakone bijolone. Ento, dako myero ojol tamme ka ce pe turo cik pa Lubanga.​—1 Pet. 3:1.

10. Pingo pire tek ni dako myero omine i te loc pa cware?

¹⁰ Jehovah omiyo tic me deyo bot mon i paco. Dako tye macalo “lakony” kor cware. (Acak. 2:20) Ka gitye ka moko tam, dako myero omi tamme dok otit kit ma en winyo kwede ki i cwinye i yo me woro kun pud medde ki bedo i te loc pa cware. Laco maryek ling mot ci winyo gin ma dakone tye wacone. (Car. 31:10-31) Ka dako mine i te loc pa cware, man kelo yomcwiny, kuc, ki dong ribbe i ot. Macalo adwogine, laco gin ki dako ginongo yengo madit pien gingeyo ni gitye ka yomo cwiny Lubanga.​—Ep. 5:22.

11. Pingo timo kica pire tek?

¹¹ Gin acel ma pire tek ma weko nyom moni cung matek aye cwiny me  timo kica. Nyom moni rii ka co ki mon ‘gidiyo cwinygi kekengi, dok ngat acel acel diyo cwinye i kom lawote, kun gitimo kica ki luwotgi i kingi kekengi.’ (Kol. 3:13) Ki tungcel bene, wat ma i nyom doko goro ka laco nyo dako gwoko jami mutimme con i cwinye kun gitiyo kwede me canyo lawote. Kit macalo ka kor ot obar, ci otte doko goro-ni, bedo bene tek pi jo munyomme me timo kica i kingi ka kiniga makogi dok gimako lok i cwinygi. Ento, wat matek bedo tye i kin jo munyomme ka laco gin ki dako gitimo kica i kingi kit ma Lubanga bene timo kica pi balgi-ni.​—Mika 7:18, 19.

12. Mar “umo lwak bal mapol” nining?

¹² Mar me ada “pe bedo kun keto cwinye i kom gin marac ma gitimo i kome.” Ki lok ada, “mar umo lwak bal mapol.” (1 Kor. 13:4, 5; kwan 1 Petero 4:8.) Pi meno, ka wamaro jo mukene, ci omyero wabed ka timmigi kica kare ducu. I kare ma lakwena Petero openyo ni tyen adi ma myero etim kica iye bot ngat moni, Yecu odokke iye ni: ‘tyen pyerabiro wiye abiro.’ (Mat. 18:21, 22) En onongo tye ka wacci Lakricitayo moni pe myero otim kica bot ngat mukene tyen manok keken, ento tyen mapol ata.​—Car. 10:12. *

13. Watwero lweny nining ki cwiny ma gengowa timo kica?

¹³ Annette owaco ni: “Ka luot moni pe gimito timo kica i kingi, ci mako akemo ki gung cwiny twero cako bedo tye, ma man tye kwir marac ma balo nyom. Timo kica jingo wat ma tye i nyomwu dok weko wunyike cok.” Me lweny ki cwiny ma gengo timo kica, dong cwiny me miyo pwoc. Mi pwoc ma a ki i cwinyi bot luotwu kare ducu. (Kol. 3:15) Macalo adwogine, wubibedo ma wiwu opye mot, wubinote ki dong wubinongo cwak pa Lubanga.​—Rom. 14:19.

14, 15. Tira ango ma Yecu omiyo, dok ketone i tic konyo jo munyomme nining?

¹⁴ Labongo akalakala, imito ni kimini woro dok bene kiteri ni piri tek. Ibedo ki pwoc ka dano giwinyo lokki dok gitamo pi kit ma iwinyo kwede ki i cwinyi. Ento tika dong iwinyo ka dano giwaco ni: “Abitimo gin ma en otimo i koma-ni bene i kome”? Kadi bed ni i kine mukene watwero tamo kumeno, ento Baibul wacciwa ni: “Pe myero iwac ni, ‘Abitimo gin ma en otimo i koma-ni bene i kome.’” (Car. 24:29) Ki lok ada, Yecu otito yo maber loyo ma lubbe ki kit ma myero wacob kwede peko ma tye i kinwa. Man aye tira ma en omiyo i kom kit ma myero water kwede jo mukene: “Kit ma wumito dano gutimwu, wun bene wutimgi kumeno.” (Luka 6:31) Yecu onongo tye ka wacci omyero water jo mukene kit ma wamito ni myero guterwa kwede kun pe waneko mac ki mac. Man tere ni jo munyomme myero gutim jami mabeco ma weko ginongo adwogi maber ki i nyomgi.

¹⁵ Jo munyomme gijingo wat ma i kingi ka ngat acel acel neno ni pe ecwero cwiny lawote. Won ot mo ma bedo i South Africa owaco ni: “Wabedo ka temme me keto i tic tira ma Yecu omiyo ma lubbe ki kit ma myero water kwede  ngat acel acel. Tye kono ni, i cawa mogo iwa wang, ento wabedo ka tic matek me tere kekenwa i yo me kica​—wamiyo woro dok wan ducu watero ngat acel acel ni pire tek.”

16. Gin ango ma jo munyomme myero pe gutim?

¹⁶ Pe myero itit bot jo mukene goro pa luotwu nyo ibed ka koko i kome pi kite mogo ma cwero cwinyi, kun bene pe itiyo kwede macalo lok ore. Wi myero opo ni nyom pe obedo pyem ka ma kineno iye nga matek, nga ma dwane winye ma longo, nyo nga ma romo waco lok makec ma cwero cwiny lawote. I kom lok, wan ducu watimo bal dok i cawa mukene wacwero cwiny jo mukene. Ento pe pore pi laco nyo dako me kelo lewic i kom lawote nyo yete ki leb ma pe rwatte, ki dong marac loyo aye ka en coro, dongo nyo bapo lawote.​—Kwan Carolok 17:27; 31:26.

17. Wegi odi gitwero tero mongi i yo me kica nining?

¹⁷ Kadi bed ni i kabedo mukene kitero co ma ginywaro nyo gipwodo mongi ni gubedo twon oteka, ento Baibul waco ni: ‘Ngat ma kiniga pe mako oyot ber loyo twon oteka, ngat ma loyo tam ma i cwinye kene loyo ngat ma omayo gang kulu.’ (Car. 16:32) Mito tute adada wek ngat moni ojukke-kene kun lubo lanen pa Yecu Kricito, laco ma pud dong ngene loyo. Laco ma yeto dakone nyo oloke odoko bul me agoya nongo obedo laco magoro, dok balo watte ki Jehovah. Daudi, ma obedo laco matek dok cwinye tekki owaco ni: “Kadi bed kiniga omakwu, ento pe wutim bal; wutam tam matut mada ki i cwinywu, wubed kenwu dok laling i wi kitandawu.”​—Jab. 4:4.

18. Pingo pire tek me medde ki nyuto mar?

¹⁸ Kwan 1 Jo Korint 13:4-7. Mar aye obedo kit ma pire loyo i nyom. “Wuruk cwiny ma miyo wuparo pi can pa luwotwu, wubed ki kica, mwolo, woro ki diyo cwiny . . . Ento makato magi ducu, myero wubed kun wupong ki mar. Pien mar keken aye tweyo jami ducu, ribogi kacel ma cobo bene maber licwic.” (Kol. 3:12, 14) Mitte ni co ki mon myero gunyut mar matut i kingi kun gilubo lanen pa Kricito ma ojalo kwone pi jo mukene-ni. Ka mar ma kit meno tye i nyom, ci nyomme cung matek kadi bed lawoti timo gin ma cwero cwinyi, two malit tye, can lim odiyowu, ki dong ka lupaco pa dako nyo laco kitgi tek.

19, 20. (a) Jo munyomme gitwero weko nyomgi cung matek dok bedo ki yomcwiny nining? (b) Gin ango ma wabinyamo i pwony ma lubo man?

¹⁹ Ki lok ada, mar, genne ki dong tute gimitte wek nyom moni ocung matek. Ma ka ngwec ki i nyom ka peko tye, jo munyomme myero gutute me jingo wat ma i nyomgi kun pe giilo cinggi. Lukricitayo ma gunyomme ma gimaro Jehovah dok bene gimarre kekengi omyero gunen ni gicobo peko mogo ma tye i kingi, pien “mar pe gik.”​—1 Kor. 13:8; Mat. 19:5, 6; Ibru 13:4.

²⁰ Tek adada wek nyom moni ocung matek dok obed ki yomcwiny pien watye ka kwo i kare ma ‘piny-nye rac.’ (2 Tem. 3:1) Ento ki kony pa Jehovah man twere. Kadi bed kumeno, jo munyomme myero gulweny ki lobo man ma opong ki cwiny me buto keken-ni. Pwony ma lubo man binyamo gin ma co ki mon myero gutim me gwoko nyomgi ki i tim tarwang.