ພະນິມິດທີ່ເປີດເຜີຍໃຫ້ໂຢຮັນ 3:1-22
3 “ໃຫ້ຂຽນຫາຜູ້ສົ່ງຂ່າວ*ຂອງປະຊາຄົມໃນເມືອງຊາເດຈັ່ງຊີ້. ເພິ່ນຜູ້ທີ່ມີພະລັງທັງເຈັດຂອງພະເຈົ້າ+ແລະມີດາວ 7 ດວງ+ນັ້ນເວົ້າວ່າ ‘ຂ້ອຍຮູ້ສິ່ງທີ່ເຈົ້າເຮັດ. ເບິ່ງເຈົ້າຄືວ່າມີຊີວິດຢູ່ ແຕ່ທີ່ຈິງເຈົ້າຕາຍແລ້ວ.+
2 ຂໍໃຫ້ເຝົ້າລະວັງ+ແລະເສີມກຳລັງໃຫ້ສິ່ງທີ່ເຫຼືອຢູ່ທີ່ໃກ້ຈະຕາຍ ຍ້ອນຂ້ອຍເຫັນວ່າເຈົ້າບໍ່ໄດ້ເຮັດທຸກຢ່າງໃຫ້ສຳເລັດຕາມທີ່ພະເຈົ້າຕ້ອງການໃຫ້ເຮັດ.
3 ດັ່ງນັ້ນ ຂໍໃຫ້ຈື່ໄວ້ສະເໝີວ່າເຈົ້າໄດ້ຮັບຫຍັງແລະໄດ້ຍິນເລື່ອງຫຍັງ. ຂໍໃຫ້ເຮັດສິ່ງເຫຼົ່ານັ້ນຕໍ່ໄປແລະໃຫ້ກັບໃຈ.+ ແຕ່ຖ້າເຈົ້າຍັງບໍ່ຍອມຕື່ນ ຂ້ອຍຈະມາແທ້ໆຄືກັບຂີ້ລັກມາ+ແລະເຈົ້າຈະບໍ່ຮູ້ເລີຍວ່າຂ້ອຍຈະມາຫາເຈົ້າຕອນໃດ.+
4 ແຕ່ຍັງມີພວກເຈົ້າບາງຄົນໃນເມືອງຊາເດທີ່ບໍ່ໄດ້ເຮັດໃຫ້ເສື້ອຄຸມຂອງໂຕເອງເປື້ອນ.+ ເຂົາເຈົ້າຈະໃສ່ເສື້ອຄຸມສີຂາວຍ່າງໄປກັບຂ້ອຍ+ ຍ້ອນເຂົາເຈົ້າເປັນຄົນທີ່ສົມຄວນໄດ້ຮັບກຽດນີ້.
5 ດັ່ງນັ້ນ ຄົນທີ່ໄດ້ໄຊຊະນະ+ຈະໃສ່ເສື້ອຄຸມສີຂາວ+ ແລະຂ້ອຍຈະບໍ່ລຶບຊື່ລາວອອກຈາກປຶ້ມລາຍຊື່ຄົນທີ່ຈະໄດ້ຊີວິດ.+ ຂ້ອຍຈະບອກວ່າຂ້ອຍຮູ້ຈັກຊື່ລາວເມື່ອຢູ່ຕໍ່ໜ້າພໍ່ແລະຕໍ່ໜ້າພວກທູດສະຫວັນຂອງພໍ່.+
6 ຄົນທີ່ມີຫູ ຂໍໃຫ້ຟັງສິ່ງທີ່ພະລັງຂອງພະເຈົ້າເວົ້າກັບປະຊາຄົມຕ່າງໆ.’
7 ໃຫ້ຂຽນຫາຜູ້ສົ່ງຂ່າວຂອງປະຊາຄົມໃນເມືອງຟີລາເດັນເຟຍຈັ່ງຊີ້. ເພິ່ນຜູ້ທີ່ບໍລິສຸດ+ ຜູ້ເປັນຄວາມຈິງ+ ຜູ້ມີລູກກະແຈຂອງດາວິດ+ ເມື່ອເພິ່ນເປີດແລ້ວຈະບໍ່ມີຜູ້ໃດປິດໄດ້ ແລະເມື່ອເພິ່ນປິດແລ້ວຈະບໍ່ມີຜູ້ໃດເປີດໄດ້ ເພິ່ນເວົ້າວ່າ
8 ‘ຂ້ອຍຮູ້ສິ່ງທີ່ເຈົ້າເຮັດ. ເຖິງວ່າມີກຳລັງບໍ່ຫຼາຍ ແຕ່ເຈົ້າກໍເຮັດຕາມທີ່ຂ້ອຍບອກແລະພິສູດໂຕວ່າສັດຊື່ຕໍ່ຂ້ອຍ.* ຂ້ອຍເປີດປະຕູໄວ້ຕໍ່ໜ້າເຈົ້າ+ເຊິ່ງບໍ່ມີຜູ້ໃດປິດໄດ້.
9 ສ່ວນຄົນທີ່ເປັນພັກພວກ*ຂອງຊາຕານແລະຕົວະວ່າເປັນຄົນຢິວທັງໆທີ່ເຂົາເຈົ້າບໍ່ໄດ້ເປັນ+ ຂ້ອຍຈະເຮັດໃຫ້ເຂົາເຈົ້າມາໝູບຢູ່ຕີນເຈົ້າແລະເຮັດໃຫ້ເຂົາເຈົ້າຮູ້ວ່າຂ້ອຍຮັກເຈົ້າ.
10 ຍ້ອນເຈົ້າເຮັດຕາມສິ່ງທີ່ໄດ້ຍິນມາເລື່ອງຄວາມອົດທົນຂອງຂ້ອຍ*+ ຂ້ອຍຈະປົກປ້ອງເຈົ້າໃນໄລຍະການທົດສອບ+ເຊິ່ງຈະເປັນການທົດສອບທຸກຄົນຢູ່ທົ່ວໂລກ.
11 ຂ້ອຍຈະຟ້າວມາຫາເຈົ້າ.+ ຂໍໃຫ້ຍຶດໝັ້ນກັບສິ່ງທີ່ເຈົ້າມີ ເພື່ອຈະບໍ່ມີຜູ້ໃດເອົາລາງວັນ*ໄປຈາກເຈົ້າ.+
12 ຂ້ອຍຈະເຮັດໃຫ້ຄົນທີ່ໄດ້ໄຊຊະນະເປັນເສົາທີ່ແໜ້ນໜາໃນວິຫານຂອງພະເຈົ້າຂອງຂ້ອຍ. ລາວຈະບໍ່ຖືກຍ້າຍອອກໄປອີກເລີຍ. ຂ້ອຍຈະຂຽນຊື່ພະເຈົ້າຂອງຂ້ອຍ+ ຂຽນຊື່ເມືອງຂອງພະເຈົ້າຂອງຂ້ອຍເຊິ່ງກໍຄືເຢຣູຊາເລັມໃໝ່+ທີ່ລົງມາຈາກສະຫວັນເຊິ່ງເປັນບ່ອນທີ່ພະເຈົ້າຢູ່ ແລະຂຽນຊື່ໃໝ່ຂອງຂ້ອຍໃສ່ໜ້າຜາກລາວ.+
13 ຄົນທີ່ມີຫູ ຂໍໃຫ້ຟັງສິ່ງທີ່ພະລັງຂອງພະເຈົ້າເວົ້າກັບປະຊາຄົມຕ່າງໆ.’
14 ໃຫ້ຂຽນຫາຜູ້ສົ່ງຂ່າວຂອງປະຊາຄົມໃນເມືອງລາວດີເກອາ+ຈັ່ງຊີ້. ເພິ່ນຜູ້ທີ່ຖືກເອີ້ນວ່າອາແມນ*+ ຜູ້ເປັນພະຍານ+ທີ່ສັດຊື່ແລະເວົ້າຄວາມຈິງສະເໝີ+ແລະເປັນຜູ້ທຳອິດທີ່ພະເຈົ້າສ້າງ+ ເພິ່ນເວົ້າວ່າ
15 ‘ຂ້ອຍຮູ້ສິ່ງທີ່ເຈົ້າເຮັດ. ເຈົ້າບໍ່ຮ້ອນບໍ່ເຢັນ. ຂ້ອຍຢາກໃຫ້ເຈົ້າເປັນອັນໃດອັນໜຶ່ງ. ຄັນເຈົ້າຊິຮ້ອນກະຮ້ອນ ຄັນຊິເຢັນກະເຢັນ.
16 ແຕ່ເຈົ້າກະອຸ່ນໆຢູ່ ບໍ່ຮ້ອນ+ບໍ່ເຢັນ.+ ຍ້ອນແນວນີ້ ຂ້ອຍຊິຄາຍເຈົ້າອອກຈາກປາກ.
17 ເຈົ້າເວົ້າວ່າ “ຂ້ອຍຮັ່ງແລ້ວ+ ມີສົມບັດຫຼາຍແລ້ວ ຂ້ອຍບໍ່ຕ້ອງການຫຍັງອີກແລ້ວ” ແຕ່ເຈົ້າບໍ່ຮູ້ວ່າທີ່ຈິງແລ້ວເຈົ້າເປັນຕາສົມເພດ ເປັນຕາອີ່ຕົນ ທຸກຍາກ ຕາບອດ ແລະປະໂປ້ຢູ່.
18 ຂ້ອຍຈຶ່ງແນະນຳໃຫ້ເຈົ້າຊື້ຄຳຈາກຂ້ອຍເຊິ່ງເປັນຄຳແທ້ເພື່ອເຈົ້າຈະຮັ່ງແທ້ໆ ໃຫ້ຊື້ເສື້ອຄຸມສີຂາວມາໃສ່ເພື່ອເຈົ້າຈະບໍ່ຕ້ອງອາຍຍ້ອນປະໂປ້ຢູ່+ ແລະໃຫ້ຊື້ຢາມາທາຕາ+ເພື່ອເຈົ້າຈະເຫັນຮຸ່ງ.+
19 ຂ້ອຍຮັກຜູ້ໃດ ຂ້ອຍກໍຕັກເຕືອນແລະສັ່ງສອນຜູ້ນັ້ນ.+ ດັ່ງນັ້ນ ຂໍໃຫ້ກະຕືລືລົ້ນແລະກັບໃຈ.+
20 ເບິ່ງແມ້! ຂ້ອຍຢືນເຄາະປະຕູຢູ່. ຖ້າຜູ້ໃດໄດ້ຍິນສຽງຂ້ອຍແລ້ວເປີດປະຕູ ຂ້ອຍຈະເຂົ້າໄປໃນເຮືອນຂອງລາວ ແລ້ວກິນເຂົ້າແລງນຳລາວ ແລະລາວຈະກິນເຂົ້າແລງນຳຂ້ອຍ.
21 ຂ້ອຍຈະໃຫ້ຄົນທີ່ໄດ້ໄຊຊະນະ+ນັ່ງເທິງບັນລັງນຳຂ້ອຍ+ ຄືກັບທີ່ຂ້ອຍໄດ້ໄຊຊະນະແລະນັ່ງເທິງບັນລັງ+ນຳພໍ່ຂອງຂ້ອຍ.
22 ຄົນທີ່ມີຫູ ຂໍໃຫ້ຟັງສິ່ງທີ່ພະລັງຂອງພະເຈົ້າເວົ້າກັບປະຊາຄົມຕ່າງໆ.’”
ຂໍ
^ ແປຕາມໂຕວ່າ “ທູດສະຫວັນ”
^ ແປຕາມໂຕວ່າ “ຕໍ່ຊື່ຂອງຂ້ອຍ”
^ ແປຕາມໂຕວ່າ “ບ່ອນປະຊຸມ”
^ ຫຼືອາດແປວ່າ “ເຮັດຕາມຕົວຢ່າງຄວາມອົດທົນຂອງຂ້ອຍ”
^ ແປຕາມໂຕວ່າ “ມົງກຸດ”
^ ຊື່ທີ່ມີຄວາມໝາຍເປັນໄນຂອງພະເຢຊູ
