De likze, ka den bzedu nhi che Xtille Dios ba guklhenhen lhe par gake chech yelechhek den nhapo Jeoba. Per naʼ, chhunhen byen welhallo chauch yelechhek den nhapo por Jeoba (1 Pedro 2:2). Den usedechho che Xtille Dios nha zu galze lhen leʼ tuze denhi gaklhenhen ga xueido yelemban tushize. Blhab Juan 17:3; 1 Timoteo 2:3, 4.

lhau dzedechho che Dios denhi gunhen chech den chhejlio nha gaklhenhen dek yebeide Jeoba (Hebreos 11:1, 6). Den chhejlio kuyelen lhe ga yelhendu nha ushaw yelemban chio par gunho de wen. Blhab Hechos 3:19.

Shik zelhallo ushaljo lhen bene yoblhe den ba nezdo, le yugechho chhebeichho ushaljchho de nhake de wen. Lhau sdau gumbio den shnha le Biblia usedo uchinhon par ushaljo che Jeoba nha de wen de gunhe par benach. Blhab Romanos 10:13-15.

Wake sulhawo lhen bene lu yuʼ chiw nha lhen bene xmigw. Per chheyale gaku bene llilhalle nha gapo dille bene yoblhe. Welhaz yuʼ bene ki dek den tsejlie bit nhaken tuli, bshaljlhenhe ka den gun Dios. Jeizalhalle dek par bene zakech kan nza chio kleze ka de shlhueidonhe. Blhab 2 Timoteo 2:24, 25.

Shi usedtezo Biblia denhi wen latj dek su galze lhen leʼ. Nha shulhalle yechhugdo gunho tu de nhake de sake. Wak llinho gako txen familh che Dios. Blhab 2 Corintios 6:18.

Bit usanho den dzedo Xtille Dios (Hebreos 5:13, 14). Bnab lhau tu Testigʼo che Jeoba usedlhenhe lhe libr den nsi ¿Qué nos enseña la Biblia? Shlaw sda shnezelldo, suchho mbalhaz. Le Biblia shnan: «Mbalhaz zu bene bi chhunhe txen lhen bene malh ka [...]. San, chhebeillde ley che Jeoba, nha yuge lla, yuge lle shlaben shishize» (Salmo 1:1, 2). Blhab Romanos 12:2.

Jeizelhalle dek de shaw de wen den za lhau Biblia zan che Jeoba, Dios mbalhaz, nha lhe usakedo su galze lhen leʼ shi chhaku txen lhen bene wen llin chie ka (Hebreos 10:24, 25). Nha shi chhuntezo den shnab Jeoba, nha «guxe checho yelemban den deliʼ nheke yelemban», yelemban par tushize (1 Timoteo 6:19, TNM). Delikse, wensh gake chiw shi su galze lhen Dios. Blhab 1 Timoteo 1:11.