Xidal buñ ni noʼ ló guidopynac Gudxlio cayacné layibu página jw.org ni noʼ ló Internet. Nigoreʼ guibiʼno ximod tipnésyibu biduidy guixquix por página reʼ, né guirá diitzreʼ bidxinni ló beʼo may íz 2014 central mundial ro rony testigos xtuny Jehová dxiin.

«Xiinna órni rabiguetbu de guardería ritnébu lapíz, juguet né lent par govitz ni nac xtuny xcompañerbu. Xidal buelt ná raibydo láabu que pal racaʼbu xtuny stoib cabanbu né que mal láani, per láabu diti rioʼbu ló razón. Goyoʼ toib dzú bilitdo toib video ló página jw.org ni laa, Diti non cuanno. ¡Balaati gocnéni lóodo! Bireʼni órni merpa caquiin xiindo láani. Después ni bibiʼbu láani goniʼbu que nainy láabu guidxiguetbu guirá ni golambu, nigoreʼ nanbu que Dios diti rioladx que buñ cuann. ¡Balaati gocné página reʼ lóodo!» (D. N., África.)

«Ximbioxdo nigolú rioladx página jw.org. Layibu ralityibu video ni nac xomod caricaturas ni racné layibu guisobyibu xilitz la Biblia par gacyibu mbiox ni natzaay xcalrrien. Né láaca rasuidyibu stipnés cós ni gacné layibu ló dzú ni sietra, né gacyibu buñtzay lagary ro rabésyibu.» (O. W., las Antillas.)

«Goniiny naʼ nasian scuel portín nagann gosac láani. Per toibtica dzú bila ló página jw.org toib artículo ni laa, ¿Debería dejar de estudiar? Desde dzú cú bibiʼya que scuel labúu gacnéni naʼ. Artículo cú bisuidyni naʼ que scuel sacné naʼ tzoʼya puext ló dzú ni sietra né gaca buñ ni noʼ xcalrrien.» (N. F., África.)

«Guirá litz ni noʼ par mbioxhlas ni sieed ló página jw.org ma gocnéni naʼ par gaca mbioxtzay lainy yolayscuel. Ma bisudi guicadiagtzay guirá ni rasuidy mextra ló scuel xalagary gony stipnés cós.» (G., África.)

«Toib buñgonaʼ ni ronynéya dxiin gochbu naʼ que mbiox scuel ratzaldaʼ xiimbu, per ni más ratzaldaʼ xiimbu ngú toib nidxigonaʼ. Xiindzapbu nigolú bidzuiby né ma diti goyeebu scuel ló chop tzón govitz. Goodxi xcompañera que noʼ toib video ni laa, Como defenderse sin dar un solo golpe, ni sieed ló sección jw.org La pizarra animada. Nigolú bioladxbu ximod video reʼ sitné litz par gacnéni buñ. Né gochbu a xiimbu ni labúu gony órni cadudy ló galnagan cú, né xiimbu labúu goyee scuel stoib sin guidzuibygoluʼbu. Conforma dzú mbioxgonaʼ ni bitzaldaʼ láabu bidxin góc ximigbu.» (V. K., Europa oriental.)

«Radudi guixquix por artículos ni noʼ ló página jw.org ni ná, ¿Por qué siento el impulso de cortame? Ma xidzú íz cacalóya galnagan reʼ. Ná bisaca que nosi naʼ napa galnagan reʼ né pal ñaabi láani a stipnés buñ diti ñenyibu xí casacloya. Ni rasetlaa artículo reʼ ximod stipnés láaca gosaclo ni naʼ noʼya ló nigolú gocnéni naʼ. ¡Nigoreʼ ma naana que noʼ ni rien ni rasaca!» (Toib mbioxhlas de Australia.)

«Página jw.org racnéni naʼ guidzela naguel temas de xi galnagan racaló mbioxhlas. Toibtica artículo ni sitnéni gocnéni naʼ par guienna xi láani ngú órni noʼ ni ratzaldaʼ stipnés né diitz yox né gocnéni naʼ par biduidy cuent que ma goyoʼ ni buny ná scú. Né góna ximod guicalóya galnagan cú.» (T. W., las Antillas.)

«Xiinganaʼ ni ma nac mbioxhlas diti rabúdzu. Tisintiempsi ronybu nitisi cós né naʼ diti nána xi noʼ ló xpensarybu. Por ngú, rasaca nagann guininéya láabu. Toibtica buelt, goyoʼya ló sección de jw.org ronoʼ galrracné par galtzeʼel né par buñ ni ma noʼ xiin, bidzela xidal artículos ni raniʼ de temas ni naʼ cadudi ló. Bisuidyni naʼ ximod guininéya xiinna más galán. Láaca página reʼ gocné láabu. Nigoreʼ ma rooybu diitz né naʼ né ma raibybu naʼ xí galrrasaʼ noʼbu ló né xí cós tzaay ni rasaclobu.» (C. B., África.)

«Página jw.org raibyni a guirá buñ ni ma noʼ xiin ximod guisuidyibu ximbioxyibu sin guixacladx. Por ejemplo, toib video ni noʼ ló página reʼ ni raniʼ ximod guidzel buñ ximigdxin ni noʼ ló sección La pizarra animada gocnéni xiimbioxdo guibiʼ xi clas buñ gac ximigdxinbu né guidzakyibu buñ ni gacné layibu. Órni merpa cacaló xiindo toib galnagan, ló página jw.org rareʼ toib artículo ni raniʼ de tema cú. Nogoluʼ galán litz ló página reʼ.» (E. L., Europa.)

«Naʼ né tzeʼela ma sinédo xhoop íz de goló bunydo galtzeʼel. Xomod rasaclo guirá galtzeʼel, bisuidydo guiendo saʼdo, gonydo pensary toibsi mod né guininédo sacró saʼdo. Por ngú artículo ni sieed ló jw.org ni ná Aprenda a escuchar bioladxi láani. Sitnéni litz par guidiag buñ galán. Biila guidopy artículo né de ngú bidudi láani tzeʼela. Cayonydo dada rutirigaʼlni lóodo guisobdiitzdo litz ni sitnéni.» (B. B., las Antillas.)

«Ma sinéya toib íz ni caninéya testigos xtuny Jehová, né nainy guidudi guixquix por ni noʼ página jw.org. Ma bisudi xidal cós ni sieed loni [...] hasta guitzaʼya mod ni naca né gaana ximbiox né tzeʼela sacró. «Página reʼ bilaani xcaltzela.» (L. G., las Antillas.)

«Raduidy guixquixi por ni noʼ página jw.org portín por láani bibany stoib. Guirá video ni noʼ ló diitz gop americano ma gocnéni naʼ par labúu gooy diitz galán. Nírcu bisaca que diti labúuni naʼ gapa meta laʼga nabani, per ló video ni laa, Ahora veo la Biblia en mi idioma, bidxiinni lainy xcalnabani né gocnéni naʼ gony pensary pór ló cós galán.» (J. N., África.)

«Página reʼ nigolú rasacni. Naʼ noʼya ló toib programa ni racné scásiʼ a buñgüet, per máspa racnédo mbioxhlas ngüet. Por ni noʼ xidalguixo videos, guiich ló diitz gop, láani ma gocnéni naʼ gaana diitz reʼ. Láaca raduidyni lagary naʼ gacnéya stipnés buñ guidzakbu né ximigbu né xfamilbu.» (K. J., las Antillas.)

«Naʼ naca toib buñdxep né página jw.org nigolú xiroʼ cayacnéni naʼ. Ni cayoola ló página reʼ pal naxelyibu láani naʼ ló correo nigolú ñaclani par nadxinni ronoʼya. Ni ma bisudi ló página reʼ racnéni naʼ né xfamila par labúu guiguaʼdo sacró né par gaca buñtzay lagary ro rabésa. Láaca, rioladxi guicaʼya guirá guiich reʼ toibsi né guirá ximiga ni labúu rabiʼ.» (C. A., Sudámerica.)

«Buñ ni diti labúu roʼol braille o diti labúu rasiʼ libros ni noʼ ló diitz cú, página jw.org nigolú racnéni layibu. Grabaciones ni sitnéni ronyni que buñ ni nachep bisaló conforma dzú rasuidyibu más. Página reʼ noʼni par gacnéni guirá clas buñ sin cueʼni buñ tiplad. Página reʼ ronyni que buñ ni diti rabiʼ guisac sacró né racnéni lóodo guiduidydo cuent que rasacdo nisló buñ.» (R. D., África.)

«Página jw.org diti nacni xomod páginas ni nap stipnés religión, láani diti sitnéni diitz nagann ni nosi buñ ni rasanir ló religión cú guieen láani. Né láaca diti raibyni looy xidalgoluʼ cós ni raxacladx buñ goʼol. Nacni toib página ni labúu guienlo ni nayaa caa. Diti sitnéni diitz ni diti noʼ pu racné, láaca diti rasuidyni xpensary buñgudxlio. Diti raniʼni que fe nagann par guidzel buñ láani, xalagary ngú nayadit caani.» (A. G., Asia.)

«Gosaca xomod toib buñ ni diti raquiin órni yása guiquiina página jw.org. Órni naʼ raxala página reʼ nacni suusi nacaʼya guii toib foc ló toib Gudxlio ni nacayasquiin ro buñ diti ná guiyopy Dios. Né ór cú labúu roola né racadiaga artículos ro rabexa ximod rabiʼ Dios tipnés cós né radzela galrracapy ni nainy naʼ gaana.» (J. C., las Antillas.)

«Nigolú radudi guixquix por galrracné par labúu gaana de Dios ni página Internet jw.org raduidy naʼ ná noʼya lainy guixtaʼ de gudx Sudámerica. Pal diti ñoʼ página reʼ, diti ñaana de Dios.» (M. F., Sudámerica.)