Scú. Dios rioʼ galrrasaʼ por xpiin ni caxoʼ. La Biblia raibyni buñguitz: «Jehováca san looy ló xcalguitzlo» (Salmo 41:3). Reʼ ritlaa tzón cós ni labúu gonyno pal caxoʼsiino:

1.   Guinabno Dios guidudy fuers lóono par gony guantaryno. «Paz xtuny Dios ni digaldi guieen buñgudxlio» sacnéni lóono par diti tzogoluʼno ló galrrasaʼ né sadudyni lóono fuers ni caquiinno par diti guireʼganno (Filipenses 4:6, 7).

2.   Diti nimaca guireʼganno. La Biblia ná: «Órni xcalnabany buñ noʼ nakit nacni xomod remeidy, per órni nigolú rioʼob xcalnabany buñ nacni xomod toib galguitz» (Proverbios 17:22). Órni noʼno nakit diti nosi rabeʼni galnabann ronoʼno, láaca rasialni lóono.

3.   Gony nadipno esperanza ni napno. Ná caxoʼno labúu sabanyno goxt portín napno esperanza (Romanos 12:12). La Biblia ná que sadxin dzú ni toib buñ saniʼ: «Caxoʼya» (Isaías 33:24). Dios sanitló guirá galguitz ni diti labúu ranitló buñgudxlio. Dios láaca ná que ló dzú ni sietra ma diti sioʼx buñ, portín la Biblia ná scareʼ: «Sacbu más naputien que dzú gócbu mbioxhlasien; sapbu galnadip xomod órni gócbu mbioxhlas» (Job 33:25).

 Nota: Lóodo ni nacdo testigos xtuny Jehová rapto confianz lóo Dios, per láaca rioʼdo ló doctor órni caxoʼdo (Marcos 2:17). Ná scú, diti raibydo buñ: «Goʼ remeidy reʼ, ndeʼ bisial naʼ», portín tigaaga buñ non guiyopy xi remeidy gueʼ.