Jehová raniiny que guirá buñ nac nitisi mod nabanyibu guisuidyibu de láabu né de Gobierno xtunybu (1 Timoteo 2:3, 4). Por ngú, testigo xtuny Jehová rabeʼyibu Biblias né stipnés galrracné par gonyibu rutirigaʼlni layibu par gacnéyibu buñ guisuidyibu ni ná la Biblia, ndeʼ raguiñani buñgüet. Xcudx Jehová ma goleʼyibu xidal mil publicaciones ló más de 100 diitz gop. a ¿Ximod rareʼni né ximod ragaisy guirá publicaciones reʼ? ¿Xí ma góc loguiaʼni par guireʼni más galán? publicaciones en más de 100 lenguajes de señas.

 Ló guidopynac Gudxlio noʼ equipos de traducción de xidal clas diitz gop. Órni guitzaʼyibu toib publicación, tigaaga equipo rasuidytzay láani. De ngú, raniʼyibu ximod guisianyibu láani par guieen buñgop láani. De ngú, rony grabaryibu publicacióncu ló video. Ló naareʼ noʼ 60 equipos ni ratzaʼ guirá ór galrracné par guisuidyibu la Biblia. Né sa 40 rony láani nagapsi ór.

 Ló dzú ni see, par nabeʼyibu video ló diitz gop nigolú gosacni. Cámaras né equipo ni biquiinyibu nigolú más gosacni órcu que nigoreʼ. Láaca grabaciones, goyoʼpa toib lagary ro gocni. Goyoʼ ór bisaʼdo láani, né stipnés ór buny copyibu toib edificio. Par ñonyibu guirá ndeʼ, par toib equipo de traducción gosacni más de 30.000 dólares. b

 Par naquiintzaydo donaciones, xcudx Jehová bunyibu rutigoygaʼlni layibu par nayopyibu mod par ma diti ñonyibu xiroʼ gaxt loguiaʼ traducción. Por ngú, caquiindo equipos ni laʼra careʼ, ni diti tampa rasac né ni diti tampa nagan guiquiin buñ. Por ngú, ma diti raquiindo toibpa lagary ro gac grabar. Tigaaga equipo de traducción labúu gony grabar videos desde oficina xtuny nosi raquiinni que cueʼ yoʼcu gacni color nagaʼ. Órni xidal herman rareʼ ló toib video, tigaagayibu labúu gony grabar láani desde lainy oficina xtuny o desde riolidxcayibu.

 Láaca bisaʼdo programas ni labúu gacné equipos ni rabeʼ publicaciones. Por guirá galrracné reʼ, tigaaga publicación ni rareʼ ló diitz gop nosi raquiinni tigalaʼ tiemp ni biquiindo nírcu. Herman nigolú radudyibu guixquix por guirá galrracné reʼ. Toib herman ni laa Alexánder ná: «Nigolú rabaladxi portín guirási ór rareʼ videos ló diitz gop. Guirá dzú rabiʼya toib video».

 Ló naareʼ, par gactzay toib lagary ro gac traducción ló diitz gop rac gaxt menos de 5.000 dólares. Por ngú, labúu rabeʼdo más videos ló diitz gop.

 Después de gac grabar toib video, raquiin guidxinni ro noʼ buñ ni caquiin láani. Ló dzú ni see, órni ma góc grabar toib video raquiin ñeeni ronoʼ toib compañía ni nabeʼ láani ló caset né ló DVD, de ngú ma ñeeni ro noʼ guirá congregaciones. Par ñac guirá ndeʼ, biquiinni xiroʼ tiemp, xtem né bidxiich. Nosi ló íz 2013 góc gaxt más de 2.000.000 de dólares par nareʼ videos ló DVD ló diitz gop.

 Buñgüet nigolú bibaladx portín gopyibu guirá videos reʼ, per diti guirá ór labúu biquiin herman láani, né máspa órni goyoʼ más caset né DVD. Goyoʼ ór toibsi libro xtuny la Biblia biquiin nareʼni ló xidal DVD. Toib hermano de Brasil ni laa Gilnei ná: «Guirá ór ni goniiny ñoldo toib texto biquiin ñando ló xi DVD noʼni. Nagangoluʼ gocni». Toib hermana ni laa Rafayane, ni biquiin DVD ló diitz gop, ná: «Órni bisudi la Biblia tobi nigolú bidzaga. Xiroʼ tiemp bisnita loguiaʼni biyobi textos né referencias». Né par labúu naniʼ herman xtiitz Dios goynéyibu DVD né caset par labúu natudyibu láani ló televisión xtuny buñ ni goniiny ñan más de Jehová. Noʼyibu dada goyné ro nagoʼyibu DVD cu. Diti xidzú bireʼ toib aparato ni bitné pantalla ro goloʼyibu DVD. Bobby, ni rabés Estados Unidos, ná: «Pal nainy looy guislooylo toib texto, né de ngú guislooylo stoib, xidal buelt non natzaʼlo de DVD. Xiroʼ tiemp goynéni. por ngú, gosac nagando naquiindo la Biblia órni gonido xtiitz Dios».

 Ló íz 2013, xcudx Jehová goleʼ toib aplicación JW Library Sign Language, né xcalrracnéni, herman labúu nalit né nagoʼ videos ló diitz gop ló teléfono o tableta xtunyibu. Primer la nosi bireʼni ló diitz gop americano, per ló íz 2017 góc copyni par labúu naquiin guirá diitz gop láani. Herman bibaladxgoluʼyibu. Tob herman de Brasil ni laa Juscelino ná: «Dipa biluladxi’ láani. Guirá ór buni pensary ló Tidxó buñ ni nap Xiroʼ Galnan nigolú ronladxbu guirádo ni nacdo buñgop né raniiny layibu niʼsdo ló sentido espiritual xomod guirá ni nan raniʼ. Órni bireʼ aplicación reʼ, bibaladxgoluʼya né goniiny naʼ nasudi más ni ná la Biblia».

 Ló naareʼ, rabeʼdo guirá videos ló diitz gop ló formato digital né rakiʼsdo láani né xcalrracné sitio web ni napdo né aplicación JW Library Sign Language. Né guirá galrracné reʼ ma diti raclado beʼo o íz, par guitzaʼdo, gony grabardo né par guikiʼsdo publicación né ma ronydo láani ló chop tzónsi dzú. Publicaciones reʼ rareʼni toibsi ór né guirá diitz ni raquiin buñ ni raniʼ.

 Cuá cuidad ni raniʼ tipnés herman gopien. Toib hermana ni laa Klízia ná: «Diti noʼ toib organización ni riogoluʼ galrrasaʼ por buñgop par gap galrro espiritual guirá ór. Diti noʼ stoib xomod xcudx Jehová ló Gudxlio reʼ ni rony por lóodo». Né Vladimir ná: «Guirá videos raslooyni naʼ que Jehová ronladx buñgop susica ronladxbu buñ ni nan raniʼ».

 Xidal videos xtunyno ni noʼ ló diitz gop rasetlani ndeʼ: «Guiich reʼ diti radoʼni, láani goyaʼni par guigaisni ló guidopynac Gudxlio par guisuidy buñ láani toibsi né la Biblia, né láani riaʼni por guirá donación». Radudydo guixquix né guidopy xcalnabanydo por guirá donaciones ni radudyto, xidal buelt ronyto láani ló donate.jw.org. Né guirá ndeʼ racnéni lóodo cueʼdo Biblias né tipnés galrracné par guisuidy guirá buñ ni ná la Biblia, dada guirá ni raquiin diitz gop.