La Biblia bitzaʼ mod bibanyibu

¿XÍ LÁANI bichiin toib buñ ni nadox par ñonladx saʼ né tzoʼ galrrasaʼ pór stipnés? ¿Xí láani buny que toib mbioxhlas mexican nasian galyoxh? ¿Xigony toib ciclista de gudx Japón ma diti buny competir? Raruʼdo looy ganlo xi láani góc né layibu.

«Góca buñ nagüet, buñ farmay né buñ nadox» (DENNIS O’BEIRNE)

ÍZ NI GOLBU: 1958

GUDX: INGLATERRA

TIPNÉS CÓS NI BUNYBU: DITI BIOLADXBU NADZAKBU STIPNÉS

NI BUNI LÓ DZÚ NI SEE: Goniʼsa xomod católico irlandés, portín xfamil bixiosa gocyibu irlandeses. Per xfamila xidal buelt bixelyibu naʼ guidaʼ tobi, né ngú diti bioladxi. Ná scú, rasetnaladxi que bioladxi ñaana de Dios. Guirá goxin goniya padrenuestro; órni ma naxi ló loʼon, goleʼya oración reʼ ló xidal laʼ par ñaana xi radudy diitz tigaagani.

Ló xcalmbioxhlasa goniiny naʼ ñoʼya lad rastafari né láaca bioladxi ñoʼya lad política xomod liga antinazi. Per ni más bioladxi láani ngú ñaca punk. Biquiinna drogas casi guirá dzú, né máspa la mariguan. Gosochgoluʼya né diti goyoʼya galrrasaʼ por naʼ nili por stipnés. Diti tampa bidzaga buñ, bianladxi nabeʼ buñ xiretrata né diti biiy diitz né buñ, nosi buni láani órni biquiinni. Órni rasetnaladxi guirá ngú, radudi cuent que góca buñ nagüet, farmay né nadox. Nosi ximiga godabioya né góca buñtzay né layibu.

Dzú gopa 20 íz goyoʼya galrrasaʼ ñaana ni ná la Biblia. Toibtica ximiga ni ratoʼ drogas gosaló bíil la Biblia lainy lachquiip, né toibtica dzú biiydo diitz xiroʼ ór de religión, de Guidaʼ né ni rony Buñdzab ló Gudxlio. Gosiiya toib Biblia né gosaló bisudi láani. Ximiga né naʼ bíildo láani tigaagado, bidopdo par nanido xi biendo né par nabexado láani. Por xidal beʼo bunydo láani.

Reʼ sieed tipnés cós ni bidudydo cuent: rabésno ló dzú ni ma guidubylagaʼ gudxliogoxreʼ; cristianos non guiniʼyibu diitz sacró de Gobierno xtuny Dios; diti non gacyibu de gudxliogoxreʼ nili tzoʼyibu lad partid, né la Biblia radudy consej galán buñ. Gondxichdo que la Biblia raniʼ galnigolú né por ngú non tzoʼ toib religión ni rasuidy xinésni. Per gonabdiitzdo lóocado, ¿xí religión? Goyoʼdo lainy xidal religión ni rioʼ lad partid né guirá lanii ni ronyibu né bibiʼdo que diti ronyibu mod buny Jesús. Biendxichni que Dios diti racacuent layibu, por ngú goloʼdo guicdo nabiʼdo xi rony tipnés religiones ni diti tampa rimbu buñ.

Biiydo diitz né tipnés buñ ni radop lainy guidaʼ reʼ né bunydo tipnés galrranabdiitz layibu ni sieed ló la Biblia. Lóodo maca nando mod rarexani por ngú nimaca radudydo cuent pal ni raniʼyibu radzakni né Xtiitz Dios o yaca. Después ni rabiʼdo layibu, guirá ór gonaba Dios que pal layibu napyibu religión ni rasuidy xinésni naniiny naʼ nabiʼya layibu stoib. Per después de xidal beʼo, ni toibyibu diti labúu golexa né la Biblia galrranabdiitz ni gopdo nili goniiny naʼ nabiʼya layibu stoib.

Bidxin midid goninédo testigos xtuny Jehová. Órni bunydo galrranabdiitz reʼca layibu golexayibu láani né la Biblia. Mod golexayibu láani bidzaktzayni né nimaca nando. Órcu bunydo layibu tipnés galrranabdiitz ni diti nando ximod rarexa, xomod pal rioladx Dios ni raquiin buñ drogas né ragob gues. Né golexayibu láani stoib né la Biblia. Biaʼando nadopdo né layibu ló toib reunión ni rac lainy Salón del Reino.

Gosac nagana láani. Dipa radzaʼga buñ, por ngú diti bioladxi que guirá buñcu bibigax né goniʼ dioxh naʼ, diti bioladxi xomodyibu por ngú ma diti goniiny naʼ ñaʼya más xireuniónyibu. Gonaba lóo Dios naniiny naʼ nadzaʼga buñreʼ pal napyibu religión ni rasuidy xinésni. Órcu nigolú goniiny naʼ nasudi la Biblia né Testigos.

¿XIMOD BITZAʼ LA BIBLIA MOD BIBANI?: Goona que diti non guiquiina drogas, por ngú bisiana láani nimaca. Ni más gosac nagana ngú nasiana nagoba gues. Xidal buelt buny prueby nasiana láani per diti birebuʼni. Órni goyoʼ ni góoch naʼ que noʼ tipnés buñ ni nosi rasapy caj ni noʼ gues lainy né ma diti ragobyibu más, gonaba Jehová ñacné naʼ. Desde dzúcu ma diti godóba gues stoib. Bisudi que nigolú rasac guininé buñ Jehová né guidopy xcalnabany.

Stoib cós ni bitzaʼya ngú mod godoca lairy né mod goctzaya. Primerdiguieʼ buelt ni goyoʼya lainy Salón del Reino guitzguica gocni xomod xquez guitngol de color azul né después bitiéya láani color naranjad. Godoca toib pantalón xilag né toib gotón guid ni caa tipnés diitz laidy. Diti goona xigony non natzaʼya mod ractzaya, ná xidal buelt góoch Testigos naʼ goni láani. Bidxin midid buni pensary ni ná 1 Juan 2:15-17: «Diti gandxiʼto gudxliogoxreʼ nili cós ni noʼ ló gudxliogoxreʼ. Pal toibtica de lóoto nadxiʼ gudxliogoxreʼ diti nadxiʼbu Bixiosno». Bidudi cuent que mod ractzaya raslooyni que nadxiʼya gudxliogoxreʼ né par naslooya que nadxiʼya Dios, non natzaʼya. Né scú buni.

Después bienna que diti Testigos ngú ni raiby naʼ ñaʼya reunión, Dios ngú ni góoch naʼ ñaʼya, mod ná Hebreos 10:24, 25. Órni gosaló goyaʼya guirá reunión né bimbuya guirá herman, bichiinni naʼ ñonisa.

¿XÍ GALNASÁC MA CUAʼYA?: Radziguiaʼya mod radudy Jehová lagary guidzaktzayno láabu. Xcalrronladxbu né xcalnadxiʼbu bichiinni naʼ guisuʼya láabu né Xiimbu Jesucristo ló galnabany xtuni (1 Pedro 2:21). Bisudi que labúu gaca xomod naʼca laʼga cayoni xtem par gaca mod rioladx Dios. Roni xtem por gaca buñ nadaʼa né buñ ni ronladx, né roni por guisuʼya Cristo mod cobioya tzeʼela né xiingaʼna. Láaca rioʼya galrrasaʼ por xhermana. Ni rasuʼya Cristo racnéni naʼ gandxiʼya naʼca né gandxiʼya stipnés.

«Sacró godabioyibu naʼ» (GUADALUPE VILLARREAL)

ÍZ NI GOLBU: 1964

GUDX: MÉXICO

TIPNÉS CÓS NI BUNYBU: GÓCA BUÑYOX

NI BUNI LÓ DZÚ NI SEE: Goniʼsa né xhoop xiin bixiosa né xinaʼya lainy gudx Hermosillo (Sonora, México), toib lagary ro noʼ golú galsii. Bixiosa goity órni mitsiya por ngú xinaʼya biyaʼan lóodo. Gosaló buni dxiin dzú mitiensa naʼ par labúu ñacnéya xinaʼya, per casi guirá ór gosaaya xiñeʼya portín diti goyoʼ bidxiich par nadzel zapata. Xomodca xidal famil pen goygaʼl lagary ro golésdo.

Xinaʼya casi guirá dzú bunybu dxiin, por ngú diti labúu gonbu lóodo de buñ ni diti rimbudo. Órni gopa xhoop íz toib mbioxhlas de 15 íz bixin naʼ, né bunyrabu láani xidal buelt. Xtolni birel xcalrriena. Buni pensary que ditini mal ni rioladxi buñguieeu. Órni biiy diitz né doctor né xobal par nadudyibu consej naʼ, gochyibu naʼ que diti noʼ xi naca.

Órni gopa 14 íz goniya que naca moxh. Por 11 íz buni láani, dada golesnéya xidal buñ. Bisudi par labúu guichoga guitzguic buñguieeu né buñgonaʼ né gopa toib salón de belleza. Ná scú diti goyoʼya nakit, godudi ló galrrioʼob né diti bibani sacró. Gosaca que mal ni roni né gonabdiidza naʼca pal noʼ buñtzay ló Gudxlio.

Bisetnaladxi bisana, ni bisuidy la Biblia né después goyonis xomod testigo xtuny Jehová. Guirá ór gochbu naʼ ni casuidybu, per naʼ diti goloʼya cuent láani. Ná scú, bidziguiaʼya mod bibanybu né mod góc xcaltzeelbu. Xcuñada né láabu sacró golésyibu láaca gondxiʼyibu né gopyibu respet saʼyibu. Después gosaló bisudi la Biblia né toib Testigo. Primer buni láani por compromis, dipa gopa gan nasudi, per bidxin midid bidzaʼ mod buni pensary.

¿XIMOD BITZAʼ LA BIBLIA MOD BIBANI?: Goyaʼya reunión xtuny Testigo né goona que gadzé mod nacyibu. Casi guirá buñ bixiich naʼ, per layibu yaca. Xalagary ngú, sacró godabioyibu né goniʼyibu dioxh naʼ. Gosaca sacró.

Modreʼca bunyibu órni goyaʼya toib samblia né bibiʼya que dada ló reunión ro radxingoluʼ buñ, buñreʼ nacyibu xomod bisana: nacyibu buñtzay né diti rascúyibu. Buni pensary. «¿De clas buñreʼ cayobi ma xidzú tiemp la?». Bidziguiaʼya mod nadxiʼyibu né mod raguaʼyibu toibsi, láaca mod raquiinyibu la Biblia par cuéxayibu guirá galrranabdiitz. Bidudi cuent que Xtiitz Dios racnéni layibu ló xcalnabanyibu. Né bidudi cuent que non natzaʼya xidal cós par labúu ñoʼya ladyibu.

Bitzaʼya xidal cós, portín bibani xomod toib buñgonaʼ. Non natzaʼya mod raniya, mod rasaaya, xhaba, guitzguica, ximiga, guiráni. Guirá buñ ni bidzaga gosaló góoch naʼ: «¿Xigony ronylo láani? Diti guisuidylo la Biblia. Más galán goyoʼlo nírcu. Naplo guiráni». Ni más gosac nagana láani ngú nasiana galyoxh.

Diitz ni sieed ló la Biblia ló 1 Corintios 6:9-11 bidxinni lainy xcalnabani, né bienna que labúu guidzaʼ buñ. Cu náni: «¿Xí diti nanto que buñ ni diti rony xinésni diti sioʼyibu lainy Gobierno xtuny Dios la? Diti guiscúto lóocato. Buñyox, ni rien dioxh, ni rioné tzeʼel stoib, buñ moxh, buñguieeu ni rioné moxh [...] diti sioʼyibu lainy Gobierno xtuny Dios. Né tipnésto scú góc ló dzú ni see. Per lóoto ma biáto». Jehová gocnébu buñ ni bibany ló dzú ni see par nadzaʼ mod góc, né láaca gocnébu naʼ. Goclaya xidal íz né buni xiroʼgolu xtem, per consej né xcalrronladx xtuny Testigos gocnéni naʼ.

¿XÍ GALNASÁC MA CUAʼYA?: Ló naareʼ tzeʼela né naʼ rasuidydo xiingaʼndo guisob principios ni sieed ló la Biblia. Nigoreʼ racaʼya xidal galnasác né privilegios. Naca anciano lainy toib congregación, né ma gocnéya xidal buñ guisuidy galnigolú ni sieed ló Xtiitz Dios. Guirá cós ni bitzaʼya gocnéni xinaʼya nasaguel nasuidy la Biblia né ñonis. Toibtica bisana ni láaca góc buñyox, láaca bisiambu mod bunybu né gócbu testigo xtuny Jehová.

Dada tipnés buñ ni góoch naʼ que diti non natzaʼya mod góca radudyibu cuent que ma más galán noʼya. Né naʼ naana xi láani bichiin naʼ. Nírcu biyobi xcalrracné buñnan per pór consej mal bidudyibu naʼ; per Jehová nigolú gocnébu naʼ. Ná gosaca que diti noʼ pu rasaca, láabu bibiʼbu naʼ, né godabiobu né paseins né galnadxiʼ naʼ. Ni bichiin naʼ láani ngú, que toib Dios ni nadxiʼgolu né nap xiroʼ galnan nabiʼ naʼ né nadudy naʼ toib galnabany sacró.

«Diti goyoʼya nakit né ni gopa né gosaca que goyoʼya tobi» (KAZUHIRO KUNIMOCHI)

ÍZ NI GOLBU: 1951

GUDX: JAPÓN

TIPNÉS CÓS NI BUNYBU: TOIB CICLISTA NI BISOBLADX

NI BUNI LÓ DZÚ NI SEE: Goniʼsa lainy toib gudxyen lainy Shizuoka (Japón), ro golésa né xfamila. Bixiosa bitoʼ biciclet né órni mitsiya goynébu naʼ ro raxony buñ biciclet, né ngú buny que ñoladxi nabubi biciclet. Goniiny láabu ñaca toib ciclista profesional, por ngú gosaló buny entrenarbu naʼ órni napsaya 14 íz. Órni gopa 16 a 18 íz buni gan tzón buelt ló competencia ni góc lainy Japón. Goyoʼ oportunida par nasudi lainy toib scuel xirop, per naʼ goloʼya guica tzaʼya toib centro de alto rendimiento. Né órni gopa 19 íz ma góca toib ciclista profesional.

Bibani par diti ñoʼ stoib ciclista xomod naʼ lainy gudx Japón. Goniiny naʼ ñoni gan xiroʼgolu par diti ñoʼ xi ñac falt xfamila, por ngú guirá ór buni entrenar. Órni bireʼgana ro caxoni biciclet o por guirá ejersis, goodxi naʼca que goola par goni guirá ndeʼ né diti labúu guisiana láani. Diti xidzú, guirá ni buni birebuʼni. Golúyibu naʼ xomod ni copy de íz dzú laʼra gosalóya xomod ciclista profesional. Xhoop buelt buni gan ló ni rarop lagary.

Naʼ ngú ni más buny gan ló carrera, por ngú goleʼyibu laaya Locomotora xtuny Tokai, toib región ni riaʼan lainy gudx Japón. Nigolú bisobladxi né dada stipnés ciclistas bidzuibyibu naʼ portín dipa gopa laxtima layibu ló carrera. Gopa xiroʼgolu bidxiich, por ngú labúu gosiiya ni goniiny naʼ. Gosiiya toib yoʼ ni nap gimnasio né láaca gosiiya toib camión ni gosac mididca gosac yoʼcu. Né par diti nanit xpidxiichi scásiʼ buni negosy loguiaʼni.

Ná scú, diti goyoʼya nakit né ni gopa né gosaca que goyoʼya tobi. Par ló dzúcu ma buni galtzeʼel né ma goyoʼ tzón xiina. Casi guirá ór bidzutzi né tzeʼela né ximbioxa por nitisi cós, por ngú biaʼbu nasuidyibu xomod rac lóoya par ñanbu pal cadzutzi.

Toibtica dzú tzeʼela gosaló bisuidy la Biblia né testigos xtuny Jehová, ndeʼ buny que natzaʼbu mod gócbu. Órni gochbu naʼ que nainy láabu tzeebu reunión, goodxi láabu que guirádo non tzoʼdo. Rasetnaladxi toib godzu ni bieed toib anciano de congregación lidxi par nasuidy naʼ ni ná la Biblia. Ni bisudi bidxinni dada lainy xcalnabani.

¿XIMOD BITZAʼ LA BIBLIA MOD BIBANI?: Dipa sialadxi dzú biila Efesios 5:5. Cu náni: «Portín lóoto nanto né rientzaayto que ni toib buñ ni rony galyoxh, ni toib buñ ni diti nayaa, ni toib buñ ni rasobladx —ni radudy diitz guieen buñ dioxh- diti labúu sioʼyibu lainy Gobierno xtuny Cristo né xtuny Dios». Bienna que carrera xtuny ciclista notzni né ni raguit buñ por bidxiich né ronyni que guisobladx buñ, por ngú xcalrriena gosaló bunynudyni naʼ. Goona que pal nainy naʼ coʼ nakita Jehová non nasiana láani, né ngú nigolú góc naganni par naʼ.

Nigolú sacró goyeeni naʼ, né goniiny naʼ nasalóya láani stoib. Per láaca goona que órni rasudi la Biblia rasaca sacró, diti gosaca modreʼ órni goyoʼya ló carrera. De goló gosaló bisudi nosi tzón buelt goyaʼya carrera, per goyoʼsani lainy xcalnabani. Láaca, diti goona xi ñoni par nayaʼana xfamila portín dipa bioladxyibu religión ro ma noʼya. Bixiosa bisac que biscúya láabu. Xtol guirá galrrasaʼcu dada bireʼ toib úlcera naʼ.

Ni gocné naʼ ló guirá galnagancu láani ngú ni bisudi la Biblia né goyaʼya reunión ni rony Testigos. Dxoga dxoga, fe xtuni góc nadipni. Gonaba Jehová nacadiag né ñacné naʼ nabiʼya que láabu racadiagbu oración xtuny buñ. Tzeʼela láaca goleʼbu galrrasaʼ ladi órni gochbu naʼ que diti raquiimbu toib yoʼ roʼ par tzoʼbu nakit. Dxoga dxoga goniʼsa lainy xcudx Jehová.

¿XÍ GALNASÁC MA CUAʼYA?: Bisudi que nigolú ni goniʼ Jesús ló Mateo 6:33, ro ná: «Por ngú, primer colguiyopy Gobierno né justicia xtuny Dios, né órcu sacaʼto guirá ndeʼ». Dipa ma góc falt lóodo «guirá cós» ni bisetlaa Jesús, ni radudy diitz cós ni raquiin buñ par guibany. Ná nigoreʼ diti napdo xiroʼgolu bidxiich xomod nírcu, ló gál íz ni ma godudy dipa ma godudydo ló govinn.

Ni roni xchiin Dios né xhermana ragoʼ nakitni naʼ né rasaca que dzú nigolú naguel radudy. Ma más galán rabésa né xfamila né láaca tzón xiingaʼna né tzeʼelyibu ma nacyibu xpiin Jehová.