4 | Consej galán ni sieed ló la Biblia
LA BIBLIA NÁ: «Guirá ni caa ló la Biblia sieedni de Dios, raquiinni par guisuidyni buñ» (2 TIMOTEO 3:16).
¿Xí radudyni diitz?
Ná la Biblia diti nacni toib libro de remeidy, radudyni consej galán par buñ ni caxoʼ xpensary. Bibiʼ tipnés ejemplos.
¿Ximod racnéni lóono?
«Buñ nasac diti raquiin tzee ló doctor, per buñguitz la scú» (MATEO 9:12).
La Biblia raiby lóono que rioʼ ór raquiinno xcalrracné doctor, xidal buñ ni caxoʼ xpensary rasacyibu sacró órni ranyibu xi cayacyibu né órni rayopyibu xcalrracné doctor.
«Ejersis goxeʼsi racnéni buñ» (1 TIMOTEO 4:8).
Pal raquiinno xfuersno né xtiempno galán, sacno buñ nasac. Tipnés cós galán ni labúu gonyno ngú, gonyno ejersis guirá ór, guáno galrro ni gacné lóono né gaistzayno.
«Órni xcalnabany buñ noʼ nakit nacni xomod remeidy, per órni nigolú rioʼob xcalnabany buñ nacni xomod toib galguitz» (PROVERBIOS 17:22).
Pal rolno textos ni gony animar lóono né ronyno cós ni rigaʼlni lóono gonyno sacnéni lóono guisacno sacró. Pal diti ronyxiroʼno toib galnagan sigory sacnéni lóono par guisacno sacró, ná caxoʼ xpensaryno.
«Sabiduría noʼni né buñdxo» (PROVERBIOS 11:2).
Pentzi saquiinlo xcalrracné stipnés par gonylo stoib cós, por ngú cuacuent xcalrracné stipnés. Guirá xfamilo né ximiglo ná gacné looy, per pentzi diti nanbu ximod gonybu láani. Góoch layibu xipa caquiinlo, per goyoʼ conforme né ni radudyibu looy né bidudy guixquix layibu por guirá ni ronyibu.
Ximod racné consej xtuny la Biblia ni caxoʼ xpensary
«Bidudi cuent que caxoʼya, por ngú goyaʼya ló doctor, doctoracu góoch naʼ xi casacloya, né gocnébu naʼ nacacuenta xcalguidza. Láaca gochbu naʼ xi clas remeidy labúu gaca» (Nicole, a ni nap trastorno bipolar).
«Ni roldo la Biblia guirá dzú né tzeʼela racnégoluʼni naʼ. Modcu guirá rosil rioʼ gan xcalnabani. Ma bidudi cuent que ló dzú ni más noʼya nabann noʼ toib texto ni radxin lainy xcalnabani» (Peter, ni nap depresión).
«Primer bitoya naniya xi galnagan cacalóya per toibtica ximiga bieen ni casaca né binladxbu naʼ. Gocnébu naʼ nasaca sacró né nadudi cuent que diti noʼya tobi» (Ji-yoo, ni nap trastorno alimentario).
«Né xcalrracné la Biblia ma rabiʼya dxiin né midid né ma rasaladxi. Xconsejni ma gocnéni naʼ ló galguitz ni napa» (Timothy, ni nap trastorno obsesivo-compulsivo).
a Bidzaʼ laayibu.
