1. ¿Xí dxiin bidudy Jehová Pedro antes ni ñaity apóstol reʼ?

 APÓSTOL Pedro bunybu xchiin Jehová por xidal íz. Buny compañerbu Jesús órni bunybu xchiin Bixiosbu, gosaló goniʼbu xtiitz Dios buñ de stipnés gudx né goyoʼbu lad Tidxó buñ ni nap xiroʼ Galnan. Dzú mápa mer gaitybu, Jehová bidudy stoib dxiin láabu. Lad íz 62 né 64 de xtzúno, Dios buny que Pedro nacaʼ chop guiich: libros ni sieed ló la Biblia, 1 né 2 Pedro. Apóstol reʼ goniiny láabu que chop guiich ni bicaʼbu ñacnérani cristianos después de xcalgoitybu (2 Ped. 1:12-15).

2. ¿Xigony guiich ni bicaʼ Pedro cuáni ór ni merpa caquiin buñ láani?

² Pedro bicaʼ chop guiich reʼ ló tiemp ro cristianos goyoʼ «galrrasaʼ por xidal prueby» (1 Ped. 1:6). Goyoʼ tipnés buñ mal ni bichetz galrrasuidy falz lad herman, né ni biyopy mod par ma diti ñac nayaa congregación (2 Ped. 2:1, 2, 14). Cristianos ni golés lainy gudx Jerusalén mápa mer nabiʼyibu «fin de guirá cós», ni radudy diitz, nanitló soldad romanos xcudxyibu né templo (1 Ped. 4:7). Guiich ni bicaʼ Pedro nigolú gocnéni cristianos de dzúcu ñony guantaryibu prueby ni godudyibu ló né par ñonyibu puext prueby ni nadxinra. b

3. ¿Xigony non guisuidyno chop guiich ni bicaʼ Pedro?

³ Ná Pedro bicaʼ guiich ló cristianos de siglo primero, Jehová goniiny láabu que ñoʼni ló la Biblia par labúu ñacnéni lóono  (Rom. 15:4). Lóono láaca nabanyno ló toib Gudxlio ro nogoluʼ galyoxh, né racalóno galnagan ni labúu gony que ma diti gonyno xchiin Jehová. Láaca, mápa mer tudyno ló tribulación ni sac más xiroʼ que ni binitló gudx Jerusalén né templo. Por ngú chop guiich ni bicaʼ Pedro rasuidyni lóono lesiony ni rasac ni gacné lóono cuésno xtzú Jehová, gonyno gan galrradzuiby, né gandxidoʼtno saʼno. Guirá ni guisuidyno láaca sacnéni ancianos par gantzayibu xilieen.

4. ¿Xí labúu ñony que fe xtunyno nasnit fuers? (2 Pedro 3:3, 4).

⁴ Casi guirá buñ diti nap fe ni rasetlaa la Biblia ni gac ló dzú ni sietra. Ma sanéno xidzú tiemp canino né gan, que gudxliogoxreʼ sanitló, por ngú buñ ni racaló lóono labúu guixiichyibu lóono né guiniʼyibu que gudxliogoxreʼ dipa sanitló (bíil 2 Pedro 3:3, 4). Pal buñ ni rony predicarno, toib buñ ni ronynéno dxiin o toibtica xfamilno, ñaiby ngú lóono, fe xtunyno labúu nasnitni fuers. ¿Xí labúu gacné lóono? Guisuidyno ni golexa Pedro.

5. ¿Xí sacné lóono par cuésno né paseins guidxin fin? (2 Pedro 3:8, 9).

⁵ Sigory tipnés buñ rony pensary que Jehová nigolú cayacla par guinitló gudxliogoxreʼ. Per Pedro bisetlaa alga ni rony que gonyno pensary. Bisetnaladxbu lóono que Jehová né buñgudxlio diti toibsi mod rabiʼ cós (bíil 2 Pedro 3:8, 9). Par Jehová, tipmil íz nacni xomod tipdzú. Láaca, napbu paseins né diti nainy láabu que ni toib guinitló. Per xtzúbu sadxin…, né sanitló gudxliogoxreʼ. ¿Nigolú toib privilegio rodann guiquintzayno tiemp ni riaʼan par gony predicarno buñ de guirá gudxrop ja?

6. ¿Ximod labúu cuesusyno xtzú Jehová? (2 Pedro 3:11, 12).

⁶ Pedro raiby lóono que non cuésusyno guidxin xtzú Jehová (bíil 2 Pedro 3:11, 12). ¿Ximod labúu gonyno láani? Pal labúuni, gonyno pensary mod guibanyno ló Gudxlio copy. ¿Rabiʼlo looy ma cacaʼlo buu nayadit né ma cayólo galrro naníx ne nasac la? ¿Rabiʼlo looy cacacuentlo buñ ni nadxiʼlo ni guiás né cabexalo buñ ni bibany ma xidzúgolu íz ximod goc cumplir guirá profecías ni sieed ló la Biblia la? Ni gonylo pensary ló guirá ndeʼ, sacnéni looy cuéslo guidxin xtzú Jehová né guisetnaladxlo que ma nabanylo ló dzú ni ma guidubylagaʼ. Lóono maca nanno ni gac ló dzú ni sietra, por ngú diti guidudyno lagary que buñ ni rachetz galrrasuidy falz, cueʼ lóono ló néz de galnigolú (2 Ped. 3:17).

7. ¿Ximod labúu gonyni mal lóono ni guidzuibyno stipnés?

⁷ Nanno que xtzú Jehová ma noʼni gax. Por ngú raniiny guidudyno oportunida stipnés buñ par guicadiag diitz sacró de Gobierno xtuny Dios. Per rioʼ ór diti napno balory guinino. ¿Xigony? Portín radzuibyno stipnés buñ. Ngú ni gosac Pedro goxin ni góc juzgar Jesús. Diti goniʼbu que nacbu toibtica xpiin Jesús né más de tibuelt goniʼbu que diti rimbubu Jesús (Mat. 26:69-75). Per bunybu gan xcalnadzuibybu, né después labúu goniʼbu: «Diti guidzuibyto ni radzuibyibu nili tzoʼto ló galrrasaʼ» (1 Ped. 3:14). Diitz ni goniʼbu, ronyni que gandxichno que labúu gonyno gan galrradzuiby ni napno stipnés.

8. ¿Xí sacné lóono par diti guidzuibyno stipnés? (1 Pedro 3:15).

⁸ ¿Xí sacné lóono gonyno gan galrradzuiby ni napno stipnés? Pedro radudy consej reʼ  lóono: «Colgonyxiroʼ Cristo xomod Señor lainy xcalnabanyto» (bíil 1 Pedro 3:15). Ndeʼ raguiña gonyno pensary ló dxiin né galnadip ni nap Señor xtunyno né Rey, Jesucristo. Pal órni rioʼ toib oportunida par gony predicarlo radzuibylo, buñ pensary ló Rey xtunyno. Por ejemplo, bibiʼ láabu ma cayony mandarybu lainy guibá, né xidalguixo ángeles nagoo láabu. Né bisetnaladx, láabu ma cuaʼbu «guirá galmandary lainy guibá né ló gudxlio» né sioʼbu né looy «guirá dzú dada dzú ma guidubylagaʼ gudxliogoxreʼ» (Mat. 28:18-20). Pedro raiby lóono que guirási ór non tzoʼno puext par gony defenderno fe xtunyno. ¿Ñoladxlo naniʼlo xtiitz Dios, ló dxiin, ló scuel o stoib lagary la? Pal ngú ni nainy looy, buny pensary pu ór labúu gonylo láani né bisuidytzay ni guiniʼlo. Gonab Jehová guidudy balory looy, né gop confianz que láabu sacnébu looy par diti guidzuibylo stipnés buñ (Hech. 4:29).

9. ¿Pu ór diti bislooy Pedro galnadxiʼ? (Láaca bibiʼ dibuj).

⁹ Pedro bisuidy ni radudy diitz guislooy buñ galnadxiʼ saʼ. Láabu goyoʼbu órni Jesús goniʼ: «Radudi lóoto toib mandary copy: gandxiʼto saʼto; xomodca naʼ ma gondxiʼya lóoto, lóoto láaca gandxiʼto saʼto» (Juan 13:34). Per después, Pedro bidzuiby né ma diti gosaguelbu ñoobu toibsi né cristianos ni diti  góc judíos. Apóstol Pablo goniʼ que diti láani ngú ni buny Pedro, portín goniʼbu toib cós né bunybu stoib cós (Gál. 2:11-14). Pedro cuacuent ni góoch Pablo láabu né bitzaʼbu. Ló chop guiich ni bicaʼbu, goniʼbu que diti nosi gapno galnadxiʼ herman, láaca non guislooyno láani.

10. ¿Xí sacné lóono guislooyno «cariño fraternal ni nigolú»? (1 Pedro 1:22).

¹⁰ Pedro goniʼ que non gapno «cariño fraternal ni nigolú» xhermanno (bíil 1 Pedro 1:22). Galrronladxcu nacni por ni rasobno galnigolú, né ló galnigolú cu noʼ galrrasuidy que «Dios diti rabúbu buñ» (Hech. 10:34, 35). Pal nosi raslooyno galnadxiʼ chop tzónsi herman de congregación xtunyno, diti casobno ni goniʼ Jesús de galnadxiʼ. Nigolú, labúu guidzaktzayno más toib herman, modpa gosaclóo Jesús né tipnés xpiin (Juan 13:23; 20:2). Per Pedro rony que guisetnaladxno que non guislooyno guirá xhermanno «cariño fraternal», ni radudy diitz, gandxiʼno layibu xomod randxiʼno xfamilno (1 Ped. 2:17).

11. ¿Xí cós raguiña gandxidoʼtno saʼno né guidopy xcalnabanyno?

¹¹ Pedro bidudy consej reʼ: «Colgandxidoʼt saʼto né guidopy xcalnabanyto». Diitzreʼ «colgandxidoʼt» rioʼ ór radudyni diitz guiscaʼno xcalnadxiʼno par guidxinni buñ, ni diti labúu nadxiʼno. Por ejemplo, ¿ximod ñonyno pal toib herman ronynaa o raninaa lóono? Sigory diti naslooyno galnadxiʼ láabu, né nadxiguetno cós mal ni bunybu lóono. Per, pal ñonyno ngú, diti nabaladx Jehová né lóono, modpa Jesús bisuidy Pedro (Juan 18:10, 11). Apóstol bicaʼbu: «Diti guidxiguetto cós mal saʼto nili guidxiguetto diitz nanaa saʼto. Xalagary ngú, colguidxiguet toib galnasác» (1 Ped. 3:9). Pal looy nadxidoʼtlo, sagobiolo sacró dada buñ ni ronynaa looy.

12. a) Pal randxidoʼtno xhermanno, ¿xí más sonyno? b) ¿Xí láani rachiin gonylo video ni laa, Cuidemos nuestra valiosa unidad?

¹² Ló primer guiich ni Pedro bicaʼ, láaca biquiimbu diitz «gandxidoʼto». Galnadxiʼcu diti nosi ratudyni scásiʼ chop tzón galkié, ratudyni scásiʼ «xidal galkié» (1 Ped. 4:8). Pentzi órni bicaʼ Pedro ngú, bisetnaladxbu ni Jesús bisuidy láabu xidzú íz antes, órni biiybu diitz que non guitudy buñ scásiʼ xcalkié stipnés. Órni Pedro gochbu Jesús que láabu labúu natudybu scásiʼ xcalkié stipnés dada gatz buelt, sigory gosacbu que nigolú caslooybu galrronladx. Per Jesús góoch láabu que non natudybu scásiʼ xcalkié stipnés «dada 77 buelt», ni radudy diitz que diti non nagabbu balac buelt guitudybu scásiʼ ni rony stipnés láabu. Né ngú láaca nacni toib lesiony par lóono (Mat. 18:21, 22). ¿Rasac naganlo guisoblo consej reʼ la? Diti guireʼganlo. Guiráno ni nacno xpiin Jehová nacno buñ galkié, por ngú rioʼ ór nigolú rasac naganno guitudyno scásiʼ ni rony stipnés lóono. ¿Xí labúu gonylo? Ni más rasac láani ngú, gonylo rutirigaʼlni looy por guitudylo scásiʼ ni rony xhermanlo looy, né guidzaklo sacró láabu stoib. c

13. ¿Xigony labúu gac nagan par ancianos ganyibu xilieen?

¹³ Sigory Pedro dipa bialadx ni góoch Jesús láabu después ni biás Jesús lad gueʼet: «Gon guirá xilienna» (Juan 21:16). Pal naclo anciano nanlo que non guisoblo instrucción reʼ. Per labúu gac nagan cueʼlo tiemp par gony cumplirlo né dxiinreʼ ni nigolú rasac. Primer lagary, ancianos non guidudyibu ni caquiin xfamilyibu tanli ló sentido físico,  emocional, né espiritual. Láaca layibu non guisaniryibu ló predicación né guisuidyibu xquiichyibu par guisuidyibu stipnés ló reunión, né guitudyibu discurs ló samblia. Tipnés ancianos láaca ronyibu dxiin toibsi né Comités de Enlace con los Hospitales o né Departamento Local de Diseño né Construcción. Nigolú noʼ xchiinyibu.

14. ¿Xigony raniiny ancianos ganyibu xilieen, né xí labúu gacné layibu? (1 Pedro 5:1-4).

¹⁴ Pedro góoch stipnés cristianos ni láaca góc ancianos: «Colgan xilieen xtuny Dios» (bíil 1 Pedro 5:1-4). Nanno que ancianos nadxiʼyibu né nainy ganyibu xhermanyibu. Per sigory rioʼ ór rasacyibu que diti labúu gony cumpliryibu né responsabilidadcu portín nogoluʼ xchiinyibu o portín nigolú cadzagyibu. Pal ngú casaclolo, ¿xí labúu gonylo? Góoch Jehová mod rasaclo. Pedro bicaʼ: «Pal noʼ ni racné stipnés, gonybu láani xomod ni raquiin fuers ni radudy Dios» (1 Ped. 4:11). Pentzi xhermanlo cadudy ló toib galnagan ni diti labúu gac reglar ló gudxliogoxreʼ. Per bisetnaladx que Jesucristo, «pastor ni rareloguiaʼ», labúu gony más por layibu que looy, tanli nigoreʼ né ló Gudxlio copy. Jehová rabés que ancianos gandxiʼ, gan né gacyibu toib ejemplo par xilieen.

15. ¿Xí rony toib anciano par ganbu xilieen? (Láaca bibiʼ retrat).

¹⁵ William, ni nac toib anciano ni nap experiencia, nigolú rasac par láabu ganbu xilieen. Órni gosaló pandemia de COVID-19, láabu né stipnés ancianos de congregación xtunybu, bunyibu pensary que nigolú rasac guininéyibu publicadores de grupos de predicación xtunyibu guirá xomal. ¿Xigony? Láabu nábu: «Xidal herman toibguielot goyoʼ lidx, né diti goyoʼ ni toib né layibu nosi xpensaryibu. Diti góc nagan ñonyibu pensary ló cós ni diti noʼ pu ñacné layibu». Órni toib herman cacaló toib galnagan, William racadiagtzaybu herman cu par ganbu xi ni merpa caquiimbu o xi cós cagoʼ láabu ló galrrasaʼ. Órcu rayopybu toib cós par labúu gacnébu herman cu, casi guirá ór, raquiimbu toib video ni rarecaa ló página ni napno ló internet. William ná: «Dxiin ni ganno xilieen más rasacni nigoreʼ. Ronyno rutirigaʼlni lóono par gacnéno buñ guimbu Jehová. Né ngúca non gonyno par ganno xilieen, par gacnéno xilieen xtuny Jehová tzoʼrayibu ló galnigolú».

16. ¿Ximod labúu guisobno ni ma bisuidyno ló chop guiich ni bicaʼ Pedro?

¹⁶ Ló artículo reʼ, nosi goleʼno chop tzónsi lesiony de chop guiich ni bicaʼ Pedro. Pentzi bibiʼlo tipnés cós ro raquiin gonylo dxiin. Por ejemplo, ¿naniiny looy ñonylo pensary más ló galnabany sacróyen ni sapno ló Gudxlio copy la? ¿Ma goloʼlo guiclo guiniʼlo xtiitz Dios, ló xchiinlo, scuel o stoib lagary la? ¿Ma bunylo pensary stipnés mod ni guislooylo que nadxidoʼtlo xhermanlo la? Né, pal naclo anciano, ¿ma goloʼlo guiclo ganlo xilieen xtuny Jehová ne gan la? Pal órni ronylo guirá galrranabdiitz reʼ looy, rabiʼlo que noʼ ro raquiin gonylo dxiin, diti guireʼganlo. Bisetnaladx que «Señor napgoluʼ galrronladx» né que láabu sacnébu looy gonylo dxiincu más galán (1 Ped. 2:3). Pedro raiby lóono: «Dios […] sasloʼoxbu xcalrrasuidyto. Láabu sonydxichbu lóoto, láabu sony nadipbu lóoto, láabu sacnébu lóoto par diti tzaguiabto» (1 Ped. 5:10).

17. ¿Xí galnasác sacaʼno pal diti rareʼganno né radudyno lagary guisuidy Jehová lóono?

¹⁷ Toibtica buelt, Pedro gosac que diti rasacbu par guisagaʼbu nisló Xiin Dios (Luc. 5:8). Per, né xcalrracné né xcalrronladx xtuny Jehová né Jesús, Pedro dipa bisiambu Cristo. Por ngú, cuaʼbu lagary par ñoʼbu, «ló Reino ni diti salox xtuny Señor Jesucristo xtunyno ni ralaa lóono» (2 Ped. 1:11). ¡Toib galnasác rodann ngú ni cuaʼbu! Pal rony guantarylo né diti rareʼganlo xomodca Pedro né radudylo lagary guisuidy Jehová looy, láaca sacaʼlo galnabany tipzó. Fe xtunylo salaa looy (1 Ped. 1:9).