ARTÍCULO NI GUISUIDYNO 22
CANCIÓN 15 Alabemos al Primogénito de Jehová
Balaati rasac laa Jehová par Jesús
«Naʼ ma bisudi laalo layibu, né sasuidyraya láani buñ» (JUAN 17:26).
TEMA
Bisuidy xi goniiny Jesús naduʼdy diitz órni goniʼbu que láabu bisuidybu buñ laa Jehová, né ximod bislooybu xiroʼgolu respet Bixiosbu né que guirá ni goniʼ Buñdzab de Jehová diti nigolúni.
1, 2. a) ¿Xí láani buny Jesús toib goxin antes de gaitybu? b) ¿Xí guicapyno ló artículo reʼ?
GÓCNI toib juevy ma goxin. Laʼra gosaló 14 de nisán íz 33 né mápa mer gonycuent buñ Jesús ladxña xi enemig, par gony juzgar, gonynaa né guigaity buñ láabu. Jesús goyoʼ né apóstoles xtunybu ni diti bisian láabu lainy toib cuart guic yoʼ. Después ni bilox godoxtzuyibu, Jesús góoch layibu tipnés diitz sacróyen. Órcu, órni mápa mer guieeyibu, Jesús buny toib oración desde lainy xcalnabany. Apóstol Juan bicaʼ láani ló Juan, capítulo 17.
2 Ló artículo reʼ, sabiʼno xi labúu guisuidyno de oración ni buny Jesús: ¿ló xí cós goyoʼbu galrrasaʼ órcu, né xí láani gosac par láabu órni goyoʼbu ló Gudxlio?
«NAʼ MA BISUDI LAALO LAYIBU»
3. ¿Xí láani goniʼ Jesús de laa Jehová, né xí láani biduʼdybu diitz? (Juan 17:6, 26).
3 Ló oración ni buny Jesús, gochbu Jehová: «Naʼ ma bisudi laalo layibu». Riendxichni que ngú nigolú gosac par láabu, portín goniʼbu láani chop buelt (bíil Juan 17:6, 26). ¿Biduʼdybu diitz que bisuidybu xpiimbu que laa Dios ngú Jehová la? Yaca. Xpiimbu gondxichiguieʼ láani, portín gocyibu judíos né laa Jehová sieedni xidal mil buelt ló Escrituras Hebreas. Órni goniʼbu que bisuidybu xpiimbu laa Dios, Jesús biduʼdy diitz que bisuidybu xpiimbu xi clas buñ nac Jehová, ni raguiña ni nainy gonybu, cós ni ronybu, né cualidades ni napbu. Diti goyoʼ chú bimbu Jehová xomod Jesús, por ngú diti goyoʼ stoib ni labúu nasuidy layibu xidal cós de Jehová.
4, 5. a) ¿Ximod labúu guisac laa toib buñ? Golexa láani né toib ejemplo. b) ¿Ximod bidxin gosac laa Jehová par apóstoles?
4 Guisetlano toib ejemplo, buny pensary que lainy congregación xtunylo noʼ toib anciano ni laa David né ni nan rony operar buñ. Pentzi ma xidzú de goló rimbulo láabu. Per gonyno pensary que toibtica dzú ralainyguitzlo. Nimaca rinéyibu looy hospital ro rony hermanocu dxiin né láabu raquiimbu guirá ni nanbu par diti gaitylo. ¿Nigoreʼ más sonladxlo láabu ja? Né pentzi guirá ór ni guicadiaglo laabu, sasetnaladxlo ni bunybu por looy. David ma diti nosi nacbu anciano de congregación xtunylo, láaca nacbu buñ ni bilaa looy. Ló stoib diitz, laabu más rasacni par looy nigoreʼ.
5 Modcuca, ná xpiin Jesús maca nanyibu laa Jehová, laa cu más gosacni par layibu portín Jesús gocné layibu nimbutzaayibu Jehová. ¿Xigony labúu guinino ngú? Portín Jesús bisuʼtzaybu mod nac Bixiosbu ló guirá ni bunybu né goniʼbu. Por ngú, órni bibiʼyibu ximod bisuidy né godabioo Jesús buñ, apóstoles bimbutzaayibu Jehová (Juan 14:9; 17:3).
«LAALO, NI BIDUʼDYLO NAʼ»
6. ¿Xí goniiny Jesús naduʼdy diitz órni goniʼbu que Jehová biduʼdy laa láabu? (Juan 17:11, 12).
6 Ló oración ni bunybu, Jesús gonabbu por xpiimbu lóo Jehová ndeʼ: «Gon layibu por laalo, ni biduʼdylo naʼ» (bíil Juan 17:11, 12). ¿Raduʼdy ndeʼ diitz que Jesús ñac laa Jehová la? Yaca. Cuá cuidad que ló oración ni buny Jesús goniʼbu de laa Jehová ndeʼ, «laalo». Por ngú Jesús diti bitzaʼbu laabu, diti gosaló góc laabu «Jehová». Per, ¿xí goniiny naduʼdybu diitz órni goniʼbu que Jehová biduʼdy laa láabu? Primer lagary, Jesús góc representante xtuny Jehová. Bieedbu ló laa Bixiosbu né bunybu xidal galrradziguiaʼ ló laa Jehová (Juan 5:43; 10:25). Né láaca, laa Jesús raduʼdyni diitz «Jehová ngú ni ralaa». Mod rabiʼno, mod rarexa laa Jesús sitnéni laa Jehová.
7. Golexa né toib ejemplo xigony labúu goniʼ Jesús ló laa Jehová.
7 Par guientzaayno láani guisetlano toib ejemplo. Toib presidente, labúu cúbu toib buñ par gac representante xtunybu, né guiduʼdybu galmandary buñcu par guiniʼ por láabu. De goló órcu, diitz ni guiniʼ buñcu sasacni xomodca ni raniʼ presidente cu. Modcuca, Jehová golúbu Jesús xomod representante xtunybu né biduʼdybu galmandary Jesús par guiniʼ por láabu (Mat. 21:9; Luc. 13:35).
8. ¿Xigony goniʼ Jehová que laabu goyoʼni né Jesús dada órni yása guieedbu ló Gudxlio? (Éxodo 23:20, 21).
8 La Biblia ná que Jesús nac Diitz, portín Jehová raquiin láabu par guiduʼdybu tipnés información né instrucciones a ángeles né buñgudxlio (Juan 1:1-3). Sigory Jesús góc ángel ni Jehová bixel par nagonés né ñap gudx Israel órni gosaayibu ló yoovich. ¿Xigony non nasobyibu ángelcu? Jehová goniʼ xigony non ñonybu láani, goniʼbu: «Laaya noʼ né láabu» (bíil Éxodo 23:20, 21). a Laa Jehová goyoʼni «né» portín Jesús, raniʼ por láabu né raslooybu que ronybu guiráni galán né que nacbu nayaa.
«BIXIOSA, BUNYXIROʼ LAALO»
9. ¿Ximod nanno que laa Jehová nigolú gosacni par Jesús?
9 Mod ma bisuidyno, dada antes ni ñeed Jesús ló Gudxlio, laa Jehová nigolú gosacni par láabu. Né ngúca labúu guinino órni goyoʼbu reʼ ló Gudxlio. Né guirá ni bunybu bislooybu que laa Jehová ngú ni más rasac par láabu. Órni ma yaca guilox xchiimbu ló Gudxlio, Jesús gonabbu lóo Jehová: «Bixiosa, bunyxiroʼ laalo». Órcuca Bixiosbu cuapy láabu né toib rudx fuers desde lainy guibá: «Naʼ ma bunyxiroʼya láani né sonyxiroʼya láani stoib» (Juan 12:28).
10, 11. a) ¿Ximod bunyxiroʼ Jesús laa Jehová? (Láaca bibiʼ dibuj). b) ¿Xigony non naslooy buñ que Jehová buny xinésni né que nayaa laabu?
10 Jesús láaca bunyxiroʼbu laa Bixiosbu. ¿Ximod bunybu láani? Toibtica mod ni bunybu láani ngú, gochbu stipnés cualidades sacróyen ni nap Jehová né cós sacróyen ni bisaʼbu. Per, diti nosi ngú bunybu par bunyxiroʼbu laa cu. Láabu gonbu que non naslooybu que Jehová buny xinésni né que nayaa laa Bixiosbu. Jesús bislooybu que ndeʼ nigolú gosacni órni bisuidybu xpiimbu ñony oración modreʼ. Láabu goniʼbu: «Bixiosdo ni noʼ guibá, gac nayaa laalo» (Mat. 6:9).
11 ¿Xigony non naslooy buñ que Jehová buny xinésni né que nayaa laabu? Portín ló lagary móz ni góc laa Edén, Buñdzab bigotz falz Jehová órni goniʼbu que Jehová rascú né que diti caduʼdybu lagary Adán né Eva gap cós tzaay (Gén. 3:1-5). Buñdzab láaca biduʼdy diitz que diti xinésni mod rony Jehová. Guirá galrrascú cu buny buidyni laa Jehová. Después, ló xtzú Job, Buñdzab goniʼ que guirá ni rony xchiin Jehová nosi ronyibu láani portín noʼ ni racaʼyibu. Buñdzab ni rascugoluʼ, láaca goniʼbu que buñ ma diti ñony xchiin Jehová órni nadudyibu ló prueby portín diti nigolú nadxiʼyibu Jehová (Job 1:9-11; 2:4). Biquiinni tiemp par ñenni chú láabu goniʼ ni nigolú: Jehová la, o Buñdzab.
Jesús bisuidybu xpiimbu balaati rasac gac nayaa laa Dios. (Bibiʼ párrafo 10).
«RONYCUENTA XCALNABÁNI»
12. ¿Xí láani gosaguel Jesús buny por ni gondxiʼbu laa Jehová?
12 Jesús nigolú gondxiʼbu Bixiosbu, por ngú bunybu rutigoygaʼlni láabu par ñapbu xiroʼgolu respet laa Jehová né naslooybu que ni raniʼ Buñdzab de láabu diti nigolúni. Por ngú goniʼbu: «Ronycuenta xcalnabáni» (Juan 10:17, 18). Láabu gosaguelbu goitybu por laa Jehová. b Adán né Eva, ni góc primer buñgudxlio ni diti gop galkié, bisianyibu Jehová né goyoʼyibu xilad Buñdzab. Per, Jesús gosaguelbu bieedbu ló Gudxlio, né bisobbu dada dzú goitybu par naslooybu balaati nadxiʼbu Jehová (Heb. 4:15; 5:7-10). Diti bisiambu Jehová dada dzú goitybu ló toib yac nadop (Heb. 12:2). Modcu bislooybu galnadxiʼ ni gosacbu por Jehová né por laa Jehová.
13. ¿Xigony diti goyoʼ stoib xomod Jesús ni labúu naslooy que Buñdzab ngú ni biscú? (Láaca bibiʼ dibuj).
13 Né guirá ni bunybu, Jesús bislooy que Buñdzab ngú ni biscú, diti Jehová (Juan 8:44). Yadi stoib ló Gudxlio né guibá ni rimbutzaay Jehová xomod Jesús. Pal toibtica cós ni goniʼ Buñdzab de Jehová, ñapni ná tiplaʼyen de galnigolú, Jesús ñan láani. Per láabu, goloʼbu guicbu gony defenderbu laa Jehová. Né dada órni ralooyni bisian Jehová láabu, más bioladxbu ñaitybu xalagary nasiambu Bixiosbu ni ronladx láabu (Mat. 27:46). c
Né guirá ni buny Jesús ló xcalnabány, bislooybu que Buñdzab ngú ni rascú, diti Jehová. (Bibiʼ párrafo 13).
«MA BISLOʼOXA DXIIN NI BIDUʼDYLO NAʼ GONI»
14. ¿Ximod biduʼdy Jehová galnasác Jesús por ni diti bisian Jesús láabu?
14 Ló oración ni bunybu goxin antes de gaitybu, Jesús gochbu Jehová: «Ma bisloʼoxa dxiin ni biduʼdylo naʼ goni». Láabu gopbu confianz que Jehová naduʼdy galnasác láabu por ni diti bisiambu Jehová (Juan 17:4, 5). Né diti bichébu. Jehová diti biduʼdy lagary ñaʼanbu lainy baʼ (Hech. 2:23, 24). Golísbu Jesús né biduʼdybu Jesús toib lagary ni nigolú rasac lainy guibá (Filip. 2:8, 9). Xidal íz después, Jesús gosaló buny mandary xomod Rey de Gobierno xtuny Dios. ¿Né xí láani gony Gobiernocu? Jesús golexabu láani órni bisuidybu lóono guinabno lóo Jehová: «Guieed Gobierno xtunylo. Gac ni nálo xomod lainy guibá, láaca ló gudxlio» (Mat. 6:10).
15. ¿Xí más sony Jesús?
15 Mápa mer, Jesús sadíil né xi enemig Dios né sanitlóbu buñ mal ló Armagedón (Apoc. 16:14, 16; 19:11-16). De ngú, sasalbu Buñdzab lainy «abismo», toib lagary simbólico ro guieg Buñdzab né diti labúu sonybu xitcal (Apoc. 20:1-3). Después, Jesús sony mandary por Tipmil Íz, né sonybu que buñ labúu guiguaʼ sacró ló Gudxlio né sacnébu buñ par ma diti gap galkié. Salísbu buñ lad gueʼet, né sonybu Gudxlio reʼ toib lagary móz. ¡Órcura sac cumplir ni nainy Jehová! (Apoc. 21:1-4).
16. ¿Ximod sabany buñ órni guilox Tipmil Íz ni gony mandary Jesús?
16 ¿Ximod sabany buñ órni guilox Tipmil Íz ni gony mandary Jesús? Galkié ma diti sioʼni. Buñgudxlio ma diti saquiinyibu guinabyibu tudy xcalkiéyibu scásiʼ por xcalgoity Jesús. Láaca ma diti saquiinyibu sacerdotes nili buñ ni gacné layibu guibigaxyibu ronoʼ Jehová. Né «último enemig, galgoity» ma diti sioʼni. Gueʼet ma biás órcu. Guirá ni guibany ló Gudxlio ma diti sacyibu buñ galkié (1 Cor. 15:25, 26).
17, 18. a) ¿Xí láani sac órni lox Tipmil Íz ni gony mandary Cristo? b) ¿Xí sony Jesús órni lox gony mandarybu? (1 Corintios 15:24, 28; láaca bibiʼ dibuj).
17 ¿Xí más sac órni guilox Tipmil Íz ni gony mandary Jesús? Toib cós ni nigolú rasac: ma diti sioʼ ni gony pensary que Dios diti rony xinésni. Lainy lagary sacróyen ni góc laa Edén, Buñdzab goniʼ que Jehová rascú, né que nacbu toib ni diti rony mandary xinésni né diti ronladxbu buñgudxlio. Desde dzúcu, de goló noʼ buñ ló Gudxlio, xpiin Jehová rony nayaayibu laabu. Órni lox Tipmil Íz, sienni que ni goniʼ Buñdzab de Jehová diti nigolúni. Bixiosno ni noʼ guibá ma bislooybu que nigolú ronladxbu lóono.
18 Órcu guiráxadit buñ san que guirá ni goniʼ Buñdzab de Jehová, pór galrrascú láani. ¿Xí láani sony Jesús órni guilox xcalmandarybu? ¿Sasuʼbu Buñdzab né sacalóbu Jehová la? ¡Yaca, diti sonybu ngú! (Bíil 1 Corintios 15:24, 28). Jesús diti nacbu xomod Buñdzab. Láabu sadxiguetbu Gobiernocu Bixiosbu né sioʼbu xan xomandary Jehová. Né sonybu láani portín nadxiʼbu Jehová.
Jesús sasaguelbu guidxiguetbu galmandarycu Jehová órni guilox Tipmil Íz. (Bibiʼ párrafo 18).
19. ¿Balaati rasac laa Jehová par Jesús?
19 Por ngú Jehová gosaguel biduʼdybu laabu Xiingaʼnbu par naniʼ por láabu. Né Jesús buny cumplir né responsabilidadcu. Por ngú, ¿balaati rasac laa Jehová par Jesús? Diti noʼ stoib cós ni más rasac par Jesús que laa Jehová. Gosaguelbu goitybu por laa cu, né órni guilox gony mandarybu Tipmil Íz, sasaguelbu guidxiguetbu galmandarycu Jehová. ¿Ximod labúu guisuʼno láabu? Ganno xcalrracapyni ló artículo ni sieed.
CANCIÓN 16 Alabemos a Jehová por su Hijo, el Ungido
a Láaca goyoʼ ángeles ni goniʼ ló laa Jehová órni biduʼdyibu mensaj buñgudxlio. Por ngú, rioʼ ór la Biblia náni que Jehová caniʼ órni toib ángel caniʼ por láabu (Gén. 18:1-33). Por ejemplo ná Escrituras náni que Jehová biduʼdy Ley a Moisés, stipnés versículos raslooyni que biquiimbu ángeles par biduʼdybu láani Moisés (Lev. 27:34; Hech. 7:38, 53; Gál. 3:19; Heb. 2:2-4).
b Xcalgoity Jesús bunyni que buñgudxlio labúu nabany tipzó.
c Bibiʼ ro ná «Preguntas de los lectores» ni bireʼ ló La Atalaya beʼo abril íz 2021, páginas 30 né 31.
