EJEMPLO XTUNY BIXIOSA NÉ XINAʼYA

Ló íz 1957, bixiosa né xinaʼya bireʼyibu Italia né goyeeyibu Canadá, toib gudxyen ni laa Kindersley, lainy Saskatchewan. Diti xidzú después bimbuyibu galnigolú, né ndeʼ más gosac ló xcalnabánydo. Rasetnaladxi que órni góca mbiox, buny predicar né xfamila xidal ór. Por ngú rioʼ ór raguita raniya que desde dzú gopa xhoon íz ma góca precursor auxiliar.

Bixiosa né xinaʼya diti tampa gopyibu bidxiich, per ná scú, guirá ór gosaguelyibu bunyibu sacrificios por Jehová. Por ejemplo, ló íz 1963 góc toib samblia internacional lainy gudx Pasadena (California, Estados Unidos). Bixiosa né xinaʼya goniiny ñeeyibu, por ngú bitoʼyibu xidal xcósyibu par labúu ñapdo bidxiich ni naquiindo. Ló íz 1972, goyoʼdo gocnédo ñac predicar buñ ló diitz italiano lainy toib gudx ni laa Trail, ni riaʼan midid 1.000 kilómetros (620 millas) de lagary ro golésdo, lainy gudx Columbia Británica (Canadá). Bixiosa buny dxiin lainy toib tiend xiroʼ, bisiábu né bunytzaaybu cós lainy tiend cu. Goniiny láabu nagoʼbu guicbu ló xchiin Jehová, por ngú diti gosaguelbu nacaʼbu stipnés dxiin ro ñonybu gan más bidxiich.

Nigolú raduʼdi guixquix ejemplo ni bixiosa né xinaʼya biduʼdy buchi, chop bisana né naʼ. Layibu nigolú gocnéyibu naʼ par ñodieʼya ló xchiin Jehová, né bisuidyibu naʼ toib cós ni ñacné naʼ ló guidopy xcalnabáni: pal ragoʼya primer lagary Gobierno xtuny Jehová, láabu guirá ór sanbu naʼ (Mat. 6:33).

RASALÓ RIODIEʼYA LÓ XCHIIN JEHOVÁ

Ló íz 1980, bitzñaya né Debbie, toib herman móz ni gon xi metas ná tzágal. Guiropcado goniiny lóodo ñodieʼdo ló xchiin Jehová, por ngú Debbie góc precursora tzón beʼo después ni bunydo galtzeʼel. Tobiz después ni bitzñado,  goyoʼdo toib congregación ni caquiin herman par guiniʼ xtiitz Dios, né naʼ láaca góca precursor.

Conforma godudy tiemp, bireʼgando né goniiny lóodo ñoʼdo stoib lagary. Per nír goninédo superintendente xtuny circuit, ni né galrronladx per láaca nayadit góoch lóodo: «Lóoto nacto láani. Nigolú ronyto pensary ló cós ni diti careʼ sacró. Pal rayopyto cós sacróyen ni napto, sadzelto láani». Diitzcu ni merpa biquiin nacadiagdo (Sal. 141:5). Nimaca bunydo ni gochbu lóodo, né nimaca biduʼdydo cuent que goyoʼ xidal cós sacróyen. Xidal herman lainy congregación goyoʼyibu puext ñonyibu más por Jehová, dada mbiox né tipnés hermanas ni nap tzeʼel ni diti cayoʼol. Ngú bisuidy lóodo toib cós ni nigolú rasac, bisuidydo nayopydo cós sacróyen ló guirá ni cadudydo né ñapdo confianz que Jehová ñony reglar nitisi galnagan xorpani (Miq. 7:7). Goyoʼ nakitdo stoib né ma más sacró bibanydo.

Ló primer scuel de precursores ni goyoʼdo, gopdo tap instructores, né tzón de layibu buny dxiin lainy stoib gudxrop. Bislooyibu lóodo tipnés retrat né goniʼyibu de galnagan ni godudyibu ló né galnasác ni cuaʼyibu, ngú buny que naniiny lóodo ñacdo misioneros. Por ngú goloʼdo meta cu guicdo.

Goniiny lóodo ñoʼdo puext par meta cu, por ngú ló íz 1984 goylésdo gudx Quebec, ni riaʼan más de 4.000 kilómetros (2.485 millas) de Columbia Británica. Cú, buñ raniʼ diitz francés, por ngú biquiin nasuidydo stoib diitz né ñaʼdo stipnés costumbre. Stoib galnagan ni cualódo láani ngú, que casi guirá ór diti goygaʼl xpidxiichdo. Toibtica buelt, toib buñ ni nap xalioo, biduʼdy lagary natopdo papas ni biaʼan sobra. Ngúsi gopdo par ñoodo. Debbie bunytzaay xidal clas galrro né papas cu, né nigolú naníx bireʼni láabu. Ná godudydo ló xiroʼ galnagan, bunydo rutigoygaʼlni lóodo par ñony guantarydo né galrrabaladx. Né láaca, bibiʼdo ximod Jehová gon lóodo (Sal. 64:10).

Toibtica dzú gopdo toib llamada ni diti golésdo. Gocni toib invitación par ñonydo dxiin lainy Betel ni noʼ Canadá. Lóodo goloʼdo xquiichdo par tzoʼdo Scuel xtuny Galaad, por ngú goyoʼ nakitdo, per láaca gosac nabando,  ná scú, cuacuentdo invitación cu. Órni bidxindo Betel, gonabdiitzdo hermano Kenneth Little, toib hermano ni buny dxiin ló Comité xtuny Sucursal: «¿Xí gonydo pal raruʼyibu lóodo tzoʼdo Galaad?». Láabu cuapybu lóodo: «Tudyno puent cu órni guidxinno ronoʼni».

Dzú ni nadudydo ló puent cu, bidxinni tixomal después, órni Debbie né naʼ cuaʼdo invitación par Galaad. Non nabúdo xi láani ñonydo. Hermano Little góoch lóodo: «Cuuto nitisi cuuto, sioʼ dzú sonyto pensary que más galán nabúto stoibcu. Guiropcani rasacni toibsi midid. Jehová labúu guisiab xcalnasác ló nitisi dxiin». Cuacuentdo invitación par Galaad, né conforma godudy íz, bibiʼdo que nigolú ngú ni goniʼ hermano Little. Né xidal buelt ma gochdo ngúca herman ni non nabú xi dxiin gony lainy xcudx Jehová.

MOD BIBANYDO ÓRNI GOCDO MISIONEROS

Nigolú bibaladxdo goyoʼdo né sa 22 herman, clase 83 xtuny Galaad, ni gosaló beʼo abril íz 1987 lainy gudx Brooklyn (Nueva York). Chop de instructores cu gocyibu herman Ulysses Glass né Jack Redford. Gáay beʼo ni goyoʼdo scuel, naguel godudyni, né bireʼdo scuel 6 de septiembre íz 1987. Bixelyibu lóodo Haití toibsi né John né Marie Goode.

Gócdo primer misioneros xtuny Galaad ni bidxin Haití desde íz 1962, órni buñ goleʼ misioneros ni goyoʼ cú. Tzón xomal después ni bireʼdo scuel, gosaló bunydo dxiin lainy toib congregación mitien ni gop 35 publicadores, ni goyoʼ lad dainy. Mbioxhlasa lóodo né biquiin  nasuidydo xidal cós, né nosi lóodo golésdo lainy toib yoʼ par misioneros. Buñ de gudx Haití gocyibu buñ pobre, né casi guiráyibu diti gonyibu bíilyibu. Tiemp ni bibanydo cú, godudydo ló galnagan portín goyoʼ galrradíil lad política, buñ cualó gobierno, bisaʼijyibu cós par bisiegyibu ló néz né góc guiérodann.

Bisuidydo xidal cós de herman de gudx Haití, layibu biaʼyibu mod cadudyibu né goyoʼ nakityibu. Nagan bibanyibu per gondxiʼyibu predicación né gondxiʼyibu Jehová. Toib hermana golien diti gonbu bíilbu, per gonbu de memory 150 textos ni sieed ló la Biblia. Guirá ni bibiʼdo guirá dzú, bichiinni lóodo ñaibydo buñ que nosi Gobierno xtuny Dios labúu cueʼ galrrioʼob ni radudy buñgudxlio. Nigolú ragoʼ nakitni lóodo que conforma godudy tiemp, tipnés buñ ni bisuidydo la Biblia bidxin góc precursores regulares, precursores especiales né ancianos.

Lainy gudx Haití bimbuya toib mbioxhlas ni góc mormón ni laa Trevor, né xidal buelt labúu biiydo diitz de la Biblia. Íz después, nigolú bidziguiaʼya órni bixelbu toib guiich lóoya ro gochbu naʼ: «¡Tzonisa ló samblia ni sieed! Nainy naʼ guibigueta Haití né gaca precursor especial lagaryca ro goyoʼya órni góca mormón». Né scú gocni: goyoʼbu cú xidal íz né tzeelbu.

EUROPA NÉ DE NGÚ ÁFRICA

Conforma godudy tiemp, bixelyibu lóodo ñonydo dxiin Europa, ro dxoga dxoga ma gopno permís guinino xtiitz Dios. Ló íz 1992 bidxindo Liubliana (Eslovenia), gaxca lagary ro goniʼs bixiosa né xinaʼya antes ni ñeeyibu Italia. Ló dzúcu cayac guerr lagary ni bimbu buñ xomod Yugoslavia. Par ló dzúcu, sucursal ni noʼ Viena (Austria) né oficinas ni noʼ Zagreb (Croacia) né Belgrado (Serbia) bibiʼ ximod cayac xchiin Jehová cú. Per nigoreʼ ma láani ñapni Betel xtunyni.

Por ngú non ñaʼdo stoib diitz né stoib costumbre. Buñ eslovenos gochyibu lóodo «Jezik je težek», ni raduʼdy diitz «Nagan xtiitzdo». ¡Né nigolú ni goniʼyibu! Nigolú bioladxdo bibiʼdo que herman dipa bisianyibu Jehová né sacró cuacuentyibu guirá cós ni bitzaʼ xcudx Jehová. Né bibiʼdo ximod Jehová bisiab xcalnasác loguiaʼyibu por guirá ni  bunyibu. Né bibiʼdo stoib que láabu guirá ór rony corregirbu né galrronladx guirá cós xorpani. Íz ni godudydo Eslovenia gocnéni lóodo par nasetnaladxdo xidal cós ni bisuidydo né bisuidyni xidal cós copy lóodo.

Órcu bidzaʼ más cós. Íz 2000, bixelyibu lóodo Costa de Marfil, lainy África Occidental. Per gosaló toib guerr né ló beʼo noviembre íz 2002 goleʼyibu lóodo cú né goynéyibu lóodo Sierra Leona, ro suusipa bilox toib guerr ni gocla 11 íz. Nigolú gosac nabando nareʼdo Costa de Marfil tisintiempsi, per guirá ni ma bisuidydo gocnéni lóodo par diti nareʼgando né ñoʼ nakitdo.

Goloʼdo guicdo mod cuacuent buñ de territorio diitz sacró né ló xcalnadxiʼ herman ni buny guantary xidal íz ló guerr. Ná gocyibu buñ pobre, goniiny layibu naduʼdyibu ni napyibu stipnés. Toib herman goniiny nascadbu Debbie tlaʼ lairy. Primer, Debbie biyopybu mod ñapybu hermanacu que yaca, per hermanacu gonab láabu nacacuentbu láani né gochbu Debbie: «Órni goyoʼ guerr, herman de stipnés gudx nigolú gocnéyibu lóodo. Nigoreʼ ma lóodo non gacnédo lóoto». Por ngú goloʼdo guicdo guisuʼdo ejemplo galán xtuny guirá hermanos cu.

Después bibiguetdo Costa de Marfil, per ni goyoʼ galrradíil lad política bunyni que buñ nasaló nadíil né nagaity saʼ. Por ngú beʼo noviembre íz 2004 bixonydo de lagarycu lainy helicóptero, né tigaagado nosi labúu ñac nanaʼ xcósdo 10 kil (22 libras). Gotiasydo ro goyoʼ soldad xtuny Francia, né stoib dzúcu, goynéyibu lóodo Suiza lainy roplan. Galaʼ gueʼel bidxindo sucursal. Né ni Comité xtuny Sucursal né instructores xtuny Scuel de Entrenamiento Ministerial né tzeʼelyibu golés lóodo, goduʼuch né cuacuent lóodo né toib galrro laguii né cholaity suizo, nigolú bidxinni lainy xcalnabanydo.

Bixelyibu lóodo tidxósi tiemp gudx Ghana, né órni moda biapló ló galrradíil, bibiguetdo Costa de Marfil. Órni goyoʼdo ló galrrasaʼ por ni bixonydo de lagary ro goyoʼdo né por ni bidzaʼ asignación xtunydo, xcalrronladx herman nigolú gocnéni lóodo. Debbie né naʼ goloʼdo guicdo que ná xcudx Jehová nadxiʼ saʼ né ngú ni más rasac, dipa ñaladxdo láani. Guirá tiemp nagan reʼ nigolú bisuidyni lóodo xidal cós ni gocné lóodo ló xchiin Jehová.

ASIGNACIÓN XTUNYDO RADZAʼ STOIB

Ló íz 2006, cuaʼdo toib guiich ni bixel central mundial lódo ro gochyibu lóodo gonydo dxiin Asia occidental (Oriente Medio). Ngú biduʼdy diitz nabanydo stipnés cós, nacalódo stipnés galnagan, nasuidydo stoib diitz né ñaʼdo stoib costumbre. Non nasuidydo xidal cós lagary reʼ ro política né religión nigolú rasacni. Né nigolú bioladxdo que lainy congregación goyoʼ xidal herman ni raniʼ gadzéga diitz né ximod biguaʼyibu toibsi por ni bisobyibu instrucciones ni raduʼdy xcudx Jehová. Nigolú bidziguiaʼdo ximod xidal herman buny guantary né balory oposición xtuny xfamilyibu, buñ ni goynéyibu scuel, buñ ni bunynéyibu dxiin né xpesinyibu.

Íz 2012 goyoʼdo samblia especial ni góc lainy gudx Tel Aviv (Israel). Dipa rialadxdo láani, portín desde Pentecostés íz 33 diti ma bidop xidalgoluʼ xpiin Jehová lagarycu.

 Ló guirá ízcu, bixelyibu lóodo tzáguendo toib gudxrop ro diti gopno permís guinino xtiitz Dios. Goynédo tipnés publicaciones, bireʼdo predicación né goyoʼdo tipnés samblia mitien. Goyoʼ soldad ni cuaʼ xquip guirá lad, per diti bidzuibydo portín tipnés publicadores ni goyoʼ gudxcu buny compañeryibu lóodo né gocnéyibu lóodo nasaado né cuidad lainy gudxcu.

RABIGUETDO ÁFRICA

Ló íz 2013 cuaʼdo stoib asignación ni góc gadzé mod: biruʼyibu lóodo gonydo dxiin lainy sucursal ni noʼ Kinsasa (República Democrática del Congo). Gocni toib gudxrop ro bidza lagary sacróyen, per nigolú goyoʼ buñ pobre né casi guirá ór goyoʼ galrradíil. Primer gonido: «Ma rimbudo África, ma bibanydo cú, nanno xi láani cuésno». Per ná scú goyoʼ xidal cós ni nasuidydo, por ejemplo, ñonydo viaj por lagary ro yadi carreter nili puent. Ná scú, bidzeldo xidal cós sacróyen ro nagoʼdo guicdo, xomod ni herman buny guantary né goyoʼ nakit ná diti gopyibu bidxiich, galnadxiʼ ni gopyibu predicación né ni bunyibu rutirigaʼlni layibu par ñeeyibu reunión né samblia. Bibiʼdo ximod xchiin Jehová goniʼsni cú né xcalrracné né xcalnasác Jehová. Íz ni goyoʼdo Congo-Kinsasa bisuidyni lóodo xidal cós ni rasac né biduʼdyni lóodo ximigdo ni bidxin góc xomod xfamildo.

Órni ma calox íz 2017 bixelyibu lóodo Betel ni noʼ Sudáfrica, sucursal reʼ nacni sucursal ni más xiroʼ ro bunydo dxiin, né biduʼdyibu lóodo tipnés dxiin ni dipa ma goyoʼ dzú bunydo. Goyoʼ xidal cós copy ni nasuidydo, per guirá ni ma bisuidydo nírcu, nigolú gocnéni lóodo. Noʼ xidal herman ni ma sané xidal íz cayony xchiin Jehová ni diti rasian láabu, né nigolú ronladxdo layibu. Nigolú radziguiaʼdo ximod raguaʼ famil Betel toibsi ná nacyibu de gadzéga lagary né diitz. Xpiin Jehová rabanyibu mod ranab Dios né rasobyibu principios ni sieed ló la Biblia, por ngú Jehová rasiab xcalnasác loguiaʼyibu né ronybu que guiguaʼyibu sacró.

Ló guirá íz reʼ, Debbie né naʼ ma cuaʼdo xidal asignación sacróyen, ma biaʼdo xidal costumbre né ma bisuidydo xidal diitz. Né ná goyoʼ ór góc naganni, bibiʼdo xcalnadxiʼ Jehová guirá ór né xcalrracné xcudxbu né herman (Sal. 144:2). Guirá ni ma bisuidydo ló xchiin Jehová nigolú ma gocnéni lóodo par gacdo toib galán xpiin Jehová.

Nigolú rasac par naʼ mod bisniʼs bixiosa né xinaʼya naʼ, xcalrracné tzeʼela ni ronladxi, né ejemplos galán xtuny herman ni noʼ ló guidopynac gudxlio. Órni rabiʼdo xi gac ló dzú ni sietra, ragoʼdo guicdo guisuidyrado de Xomextrano.