1, 2. ¿Chú láabu góc Sadoc? (1 Crónicas 12:22, 26-28).

 BUNY pensary ló ndeʼ, más de 340.000 buñguieeu bidop par gonyibu David rey xtuny gudx Israel. Por tzón govitz, guirá buñguieeu reʼ goyoʼyibu gaxca dainy Hebrón, nakit biiybu diitz, buny cantaryibu alabanzas né bixiichyibu (1 Crón. 12:39). Cu noʼ toib mbioxhlas ni laa Sadoc, ni sigory diti rareʼ loguiaʼ lad guirá buñcu. Per Jehová bibiʼ Sadoc, né goniiny láabu ñanno que mbioxhlas reʼ goyoʼ cu (bíil 1 Crónicas 12:22, 26-28). Per ¿chú láabu góc Sadoc?

² Sadoc gócbu toib sacerdote ni buny dxiin toibsi né sumo sacerdote Abiatar. Láaca gócbu toib vidente, ni radudy diitz, toib buñ ni Jehová bidudy xiroʼ sabiduría par ñen xi láani nainy láabu (2 Sam. 15:27). Buñ biyopy xconsej Sadoc. Né láaca gócbu toib buñguieeu ni gop xiroʼ balory. Ló artículo reʼ guisuidyno de balory ni gop Sadoc.

3. a) ¿Xigony non gapno balory? b) ¿Xí guisuidyno ló artículo reʼ?

³ Ló dzú ni cadubylagaʼ reʼ, Buñdzab ma más cacaló xcudx Dios (1 Ped. 5:8). Laʼga rabésno guinitló Jehová a Buñdzab né xcudx, non gapno balory (Sal. 31:24). Guibiʼno tzón mod ro labúu guisuʼno balory ni gop Sadoc.

GOCNÉ GOBIERNO XTUNY DIOS

4. ¿Xigony raquiinno balory par gacnéno Gobierno xtuny Dios? (Láaca bibiʼ retrat).

⁴ Lóono ni nacno xpiin Jehová racnéno Gobierno xtuny Dios né guidopy xcalnabanyno, per casi guirá  ór raquiinni balory (Mat. 6:33). Por ejemplo, ló gudxliogoxreʼ raquiinno balory par guisobno ni rony mandary Jehová né guinino diitz sacró de Gobierno xtuny Dios (1 Tes. 2:2). Láaca nagan guisagaʼ galayno ló toib gudxliogox ro buñ diti raguaʼ toibsi (Juan 18:36). Né xidal testigos xtuny Jehová diti rasaguelyibu rioʼyibu lad partid né ló galsoldad, por ngú radudyibu ló galsii, buñ ronynaa layibu né dada rioʼyibu lachquiip.

5. ¿Xigony biquiin Sadoc balory par ñacnébu David?

⁵ Sadoc diti nosi goyeebu Hebrón par ñoʼbu ló lanii ro bunyibu David rey. Láaca cuaʼbu xquipbu né goyoʼbu puext pal ñoʼ guerr (1 Crón. 12:38). Gosaguelbu ñeebu guerr né David, né nalaabu gudx Israel ladxña xi enemig. Mbioxhlas reʼ gop xiroʼ balory.

6. ¿Xí ejemplo bidudy David a Sadoc? (Salmo 138:3).

⁶ ¿Ximod gop Sadoc balory? Sigory ejemplo xtuny buñ ni bigoo láabu ni góc buñguieeu nadip né ni gop balory nigolú gocnéni láabu. Toibtica de buñguieeucu góc David. Né xiroʼ balory golonés David gudx «Israel órni goyeeyibu ló guerr», por ngú, guidopy gudx Israel buny láabu Rey (1 Crón. 11:1, 2). David gop confianz lóo Jehová, né órni xi enemigbu cuanal láabu, biyopybu xcalrracné Jehová (Sal. 28:7; bíil Salmo 138:3). Láaca goyoʼ stipnés buñguieeu ni gop balory ni bibany ló xtzú Sadoc ni góc toib galán ejemplo par láabu, xomod Jehoiadá né xiimbu Benaya ni góc toib soldad, né 22 buñguieeu ni gosanir ló tribus ni goyoʼ xilad David (1 Crón. 11:22-25; 12:26-28). Guiráyibu goloʼyibu guicyibu gacnéyibu David xomod rey.

7. a) ¿Chú layibu radudy toib galán ejemplo lóono ló naareʼ? b) ¿Xí rasuidy video xtuny hermano Nsilu looy?

 ⁷ Ni guisuidyno ejemplo xtuny xpiin Jehová ni gocné Gobierno xtunybu, radudyni fuers né balory lóono. Rey xtunyno, Jesucristo, diti goniiny ñoʼ lad política xtuny xcudxliogox Buñdzab (Mat. 4:8-11; Juan 6:14, 15). Guirá ór gopbu confianz lóo Jehová par ñapbu fuers. Né láaca napno ejemplo xtuny xidal mbioxhlas ni nabany ló naareʼ, ni diti rasaguel tzoʼ ló galsoldad o ló política. Labúu guiyopylo tipnés experiencias cu ló jw.org. a

GOCNÉ HERMAN

8. ¿Ló xí cós non gap ancianos balory par gacnéyibu herman?

⁸ Xpiin Jehová nigolú rioladxyibu gacnéyibu saʼyibu (2 Cor. 8:4). Per rioʼ ór par gonyibu láani, raquiin gapyibu balory. Por ejemplo, órni rioʼ guerr, guirá ancianos nanyibu que herman raquiinyibu tzoʼ ni gony animar né gacné layibu, né láaca tzoʼ ni tzané galrro espiritual ronoʼyibu né stipnés cós ni raquiinyibu. Guirá ancianos nadxiʼyibu xilieen, por ngú rioʼyibu puext guidudyibu ni caquiin herman, ná tzoʼyibu ló riesga (Juan 15:12, 13). Modcu raslooyibu que napyibu balory xomod Sadoc.

9. Mod ná 2 Samuel 15:27-29, ¿xí láani góoch David a Sadoc gony? (Láaca bibiʼ dibuj).

⁹ Xcalnabány David goyoʼni ló riesga. Xiimbu Absalón goniiny ñac rey xalagarybu (2 Sam. 15:12, 13). Por ngú nimaca non naxonybu de Jerusalén. Gochbu xpiimbu: «¡Coltzoʼ, guixonyno de lagary reʼ, pal yaca la, ni toib de lóono labúu salaa ladxña Absalón!»  (2 Sam. 15:14). Órni bireʼyibu Jerusalén, David bidudy cuent que non ñaʼan toibtica de xpiimbu lainy gudx, par ñan xi láani ná Absalón gony né ñaiby láani layibu. Por ngú bixelbu Sadoc né stipnés sacerdotes gudx Jerusalén stoib par naláachyibu Absalón (bíil 2 Samuel 15:27-29). Guirá biinreʼ non ñap xiroʼ cuidad, portín dxiin ni bidudy David layibu, goloʼni layibu ló riesga; labúu ñaityibu. Absalón góc toib buñguieeu ni goyoʼ galrrasaʼ por láasibu, toib buñguieeu nadox né moxter. ¿Ronylo pensary xí ñonybu né guirá biinreʼ pal ñanbu que caláachyibu par gacnéyibu David la?

10. ¿Ximod bilaa Sadoc né stipnés buñ a David?

¹⁰ David goniʼ xi ñony Sadoc né stoib ximigbu ni góc laa Husai, par narebuʼ ni goloʼyibu guicyibu (2 Sam. 15:32-37). Chop biinreʼ buny ni góoch David layibu, Husái buny que Absalón ñap confianz láabu, né gochbu Absalón ximod nacalóbu David. Ni gochbu Absalón bidudyni tiemp David ñony xpuext. Después Husái gochbu ni bunybu a Sadoc né Abiatar (2 Sam. 17:8-16). Órcu guiropcayibu bixelyibu toib mensaj David (2 Sam. 17:17). Sadoc né stipnés sacerdotes labúu bilaayibu David né xcalrracné Jehová (2 Sam. 17:21, 22).

11. ¿Ximod labúu gapno balory xomod Sadoc pal rioʼ ni ranab lóono gacnéno xhermanno?

¹¹ ¿Ximod labúu gapno confianz xomod Sadoc pal rioʼ ni ranab lóono gacnéno xhermanno né rioʼ riesga gaityno? 1) Guisobno instrucciones ni guidudy herman lóono. Ló clas galnagan reʼ nigolú rasac guisobno par labúu guiguaʼno toibsi. Por ngú, gonyno ni gaiby sucursal lóono (Heb. 13:17). Ancianos guirá ór non guibiʼ instrucciones ro  ritlaa ximod gony buny puext par toib desgrasy, né xi láani gony buñ órni ma cayacni (1 Cor. 14:33, 40). 2) Gapno balory, per láaca ganno lóono (Prov. 22:3). Coʼno xcalrrienno né dipa non guiyopyno tzoʼno ló riesga. 3) Gapno confianz lóo Jehová. Láabu rioʼbu xcalrrasaʼno né diti nainy láabu guisaclono cós mal. Labúu gacnébu lóono par gacnéno xhermanno né diti tzoʼ xi gacno.

12, 13. ¿Xí rasuidy ejemplo xtuny Víktor né Vitali looy? (Láaca bibiʼ retrat).

¹² Guibiʼno ejemplo xtuny Víktor né Vitali, chop ancianos reʼ goynéyibu galrro né nís a herman de Ucrania. Víktor ná: «Biyopydo galrro guirá lad, né casi guirá ór bicadiagdo cayatz tíir gaxca ronoʼdo. Toib hermano biscad galrro ni goloʼtzaybu, né xcalrracnébu xidal publicadores gopyibu ni godóyibu por xidal dzú. Rasetnaladxi que órni cagoʼdo galrrocu lainy camión, biab toib bomba midid 20 metros (66 pies) de lagary ronoʼdo, per diti gotzni. Guidopy dzúcu gonaba Jehová nadudy balory naʼ par ñacnériya herman».

¹³ Vitali ná: «Biquiinni xiroʼ balory. Primer viaj ni buni goclani 12 ór. Laʼga saʼya ló néz buni oración Jehová». Vitali gop balory per láaca gonbu láabu. Nábu: «Guirá ór gonaba Jehová nadudy sabiduría naʼ né ñacnébu naʼ ñaca buñdxo. Nosi godudi lagary ro gobierno bidudy permís tudy buñ. Fe xtuni góc nadipni órni bibiʼya herman cayony dxiin toibsi. Bisiáyibu ló néz, bitopyibu galrro né goloʼyibu láani lainy camión, láaca bidudyibu a Víktor né naʼ galrro né toib lagary ro ñando».

DITI GUISIANLO JEHOVÁ

14. ¿Ximod rasacno órni toib buñ ni ronladxno rasian Jehová?

¹⁴ Diti noʼ xidal cós ni rioʼobgolu xomod ni toib ximigno o xfamilno guisian Jehová (Sal. 78:40; Prov. 24:10). Né pal bidzaktzayno láabu, más rioʼobni lóono. Pal looy ma gosaclolo ndeʼ, ejemplo xtuny Sadoc sacné looy.

15. ¿Xigony biquiin Sadoc balory par diti nasiambu Jehová? (1 Reyes 1:5-8).

¹⁵ Dzú ma calox xcalmandary David, né ma nacbu buñgol né mápa mer gaitybu, xiimbu Adonías biyopy mod ñac rey xalagarybu, ná Jehová goniʼ que Salomón gac rey (1 Crón. 22:9, 10). Sadoc diti bisian Jehová, per ximigbu Abiatar goloʼ guic gacné Adonías (bíil 1 Reyes 1:5-8). Modcu Abiatar bisiambu David né Jehová. ¿Ronylo pensary balaati goyoʼ nabann né bioʼob xcalnabany Sadoc la? Bunyibu dxiin toibsi xomod sacerdotes más de 40 íz (2 Sam. 8:17). Goynéyibu toibsi «Arca xtuny Dios ni nigolú» (2 Sam. 15:29). Guiropcayibu gocnéyibu David, né bibanyibu xidal cós órni bunyibu xchiin Jehová toibsi (2 Sam. 19:11-14).

16. ¿Xí láani buny animar Sadoc par diti nasiambu Jehová?

¹⁶ Sadoc diti bisian Jehová, ná Abiatar buny láani, né David dipa buny pensary que Sadoc ñony xomodca Abiatar. Órni goyoʼ ni góoch a David ni ná Adonías gony, David biyopy a Sadoc, Natán né Benaya par ñonyibu rey a Salomón (1 Rey. 1:32-34). Ejemplo xtuny stipnés buñguieeu xomod Natán ni diti bisian Dios né ni gocné rey David, buny animarni Sadoc (1 Rey. 1:38, 39). Órni Salomón  bidxin góc rey, goloʼbu sacerdote Sadoc «ló dxiin ni gop Abiatar» (1 Rey. 2:35).

17. ¿Ximod labúu guisuʼlo Sadoc pal toib buñ ni ronladxlo rasian Jehová?

¹⁷ ¿Ximod labúu guisuʼlo Sadoc? Pal toib buñ ni ronladxlo rasian Jehová, bislooytzay chú xilad noʼlo (Jos. 24:15). Jehová sadudybu fuers né balory ni guiquiinlo. Gonab xcalrracnébu ló oración né goyoʼ gaxca xpiimbu ni diti rasian láabu. Par Jehová nigolú rasac ni diti rasianlo láabu né saguiixbu looy (2 Sam. 22:26).

18. ¿Xi rasuidylo de ejemplo xtuny Marco né Sidse?

¹⁸ Guibiʼno ni gosaclóo Marco né tzeelbu Sidse. Chop xiindzapyibu bisianyibu galnigolú órni goniʼsyibu. Marco ná: «Desde dzú rál xiinlo, nadxiʼlo layibu. Ñonylo nitisi cós par diti ñoʼ xi ñacyibu. Por ngú, órni rasianyibu Jehová, nigolú rioʼob xcalnabanylo». Láaca nábu: «Per Jehová guirá ór goyoʼ né lóodo, láabu ronybu que órni naʼ careʼgana, Sidse tzoʼ dxich, né órni láabu careʼganbu, naʼ tzoʼya dxich». Sidse ná: «Labúu cayony guantarydo guirá ndeʼ portín Jehová cadudy fuers lóodo. Nigolú mal gosaca portín buni pensary que guiropca xiindzapa bisianyibu galnigolú xtola. Goodxi láani Jehová. Chop tzón govitz después, toib hermana ni ma xidzú diti rabiʼya bieed ronoʼya, godixbu ñabu ro xiʼca, bibiʼbu lóoya né goniʼbu: Bisetnaladx Sidse, diti xtolo láani. Né xcalrracné Jehová, nakit cayoni xchiimbu».

19. ¿Xí láani ma goloʼlo guiclo gonylo?

¹⁹ Jehová raniiny que guiráno ni nacno xpiimbu gapno balory xomod Sadoc (2 Tim. 1:7). Per diti nainy láabu gapno confianz lóocano, xalagary ngú, Jehová nainy gapno confianz lóbu. Por ngú, órni guicalólo toib galnagan ro raquiin gaplo balory, biyopy xcalrracné Jehová. Labúu gaplo confianz que láabu sacnébu looy gaplo balory xomod Sadoc (1 Ped. 5:10).