GOYOʼ ór buñ ni bicaa la Biblia xidal buelt bicaʼyibu toib diitz, dada diitz por diitz. ¿Xigony bunyibu láani? Guibiʼno tzón razón:

Pu dzú cuáni. Lainy gudx Israel ni goyoʼ ló dzú ni see casi guirá buñ diti gopyibu copia xtuny Ley. Nosi bicadiagyibu láani órni guidopy gudx bidop par ñoʼolni lainy tabernáculo né lainy templo (Deut. 31:10-12). Labúu gonyno pensary balaati ruid goyoʼ lagarycu portín xidal buñ goyoʼ cu (Neh. 8:2, 3, 7). Órcu, ni bicadiagyibu xidal buelt ni bireʼ loguiaʼ, gocnéni layibu par nasetnaladxyibu láani né nasobyibu ni náni. Né ngú nigolú gosac máspa órni bitlaa tipnés cós ni rasac, xomod tipnés mandary né ley ni bidudy Jehová (Lev. 18:4-22; Deut. 5:1).

Ximod cuáni. Midid 10% ni sieed ló la Biblia nacni canción, ni raguiña Salmos, El Cantar de los Cantares né Lamentaciones. Tipnés canción gopni toib estribillo. Diitzreʼ ni birecaa xidal buelt gocnéni par nareʼ loguiaʼ tema xtuny canción né par diti nasac naganno ñanno láani de memory. Par ganno láani, guibiʼno xi ná Salmo 115:9-11: «Israel, gop confianz lóo Jehová. (Láabu racnébu né rapbu lóono). Lidx Aarón, gop confianz lóo Jehová. (Láabu racnébu né rapbu lóono). Lóoto ni napto respet Jehová, colgap confianz lóo Jehová. (Láabu racnébu né rapbu lóono)». Órni toib buñ buny cantar canción cu, sigory mensaj sacróyen cu biaʼanni guicbu.

Xigony cuáni. Tipnés buñ ni bicaʼ la Biblia xidal buelt bicaʼyibu xidal diitz portín gosacgoluʼni né portín goniiny layibu nareʼ loguiaʼni. Por ejemplo, órni Jehová gochbu israelitas que diti non ñooyibu runy, bunybu que Moisés xidal buelt naniʼ xigony buny mandarybu ngú. Dios goniiny que guiráyibu ñentzaayibu que guirá ni nabany noʼni ló runy, ni radudy diitz que runy rony representar galnabany (Lev. 17:11, 14). Xidal íz después, órni apóstoles né ancianos de Jerusalén goniʼyibu xi láani diti non gonyno par coʼ nakitno xcalnabany Jehová, goniʼyibu stoib balaati rasac diti guicaʼno runy (Hech. 15:20, 29).

Ná rioʼ ór ló la Biblia xidal buelt rarecaa toib diitz, ngú diti radudy diitz que Jehová nainy guinino xidal buelt tipnés diitz, suusi ñacni toib ritual. Jesús goniʼ: «Órni gonylo oración, diti guiniʼlo ngúca ngúca xidal buelt» (Mat. 6:7). Láaca goniʼbu xidal cós ni labúu guinino órni gonyno oración né ni noʼ deacuerdo né ni ná Dios (Mat. 6:9-13). Ná órni raninéno Jehová diti ngúca ngúca ranino, ni labúu gonyno láani ngú, guinino xidal buelt de toib tema (Mat. 7:7-11).

¡Nigolú sacró ni xidal buelt rarecaa tipnés diitz ló la Biblia! Nacni toibtica mod ni raquiin Xomextrano par guisuidybu lóono par tzeeni galán lóono ló xcalnabanyno (Is. 48:17, 18).