ARTÍCULO NI GUISUIDYNO 17
CANCIÓN 99 Miles de fieles hermanos
Dipa noʼno toibno
«Naʼ sacnéya looy» (IS. 41:10).
TEMA
Tap mod ni ran Jehová lóono.
1, 2. a) ¿Xigony labúu guinino que dipa sioʼno toibno órni guicalóno galnagan? b) ¿Xí guisuidyno ló artículo reʼ?
PAL cadudyno ló toib galnagandaʼ, pentzi rasacno que noʼno toibno lainy toib lanch lainy nisdaʼ órni cayac toib guiédaʼ. Per diti noʼno toibno, portín Bixiosno ni noʼ guibá né ni ronladx lóono cabiʼ galrrioʼob ni cadudyno ló né ma biduʼdybu xtiitzbu tzoʼbu né lóono. Jehová raibybu né galrronladx tigaaga xpiimbu: «Naʼ sacnéya looy» (Is. 41:10).
2 Ló artículo reʼ sanino de tap mod ni racné Jehová lóono: 1) ragonésbu, 2) raduʼdybu ni caquiinno, 3) rapbu lóono né 4) rasialdóbu xcalnabanyno. Láabu ma biduʼdybu xtiitzbu que gac nitisi galnagan ni tudyno ló laʼga nabanyno, dipa sialadxbu lóono né dipa sasiambu lóono. Por ngú diti noʼno toibno.
JEHOVÁ RAGONÉS LÓONO
3, 4. ¿Ximod ragonés Jehová lóono? (Salmo 48:14).
3 (Bíil Salmo 48:14). Jehová nan que lóocano diti labúu ragonésno mod nabanyno, por ngú ragonésbu lóono. ¿Ximod ronybu láani? Toib mod ni ronybu láani ngú né xcalrracné la Biblia (Sal. 119:105). Né xcalrracné Xtiitzbu, racnébu lóono cutzayno xi láani gonyno, gapno cualidades né gapno toib esperanza de guibanyno tipzó. a Por ejemplo, rasuidybu lóono guituʼdyno scásiʼ ni rony stipnés lóono né diti tzanéno xian, guinino ni nigolú ló guirá cós né gandxidoʼtno saʼno né guidopy xcalnabanyno (Sal. 37:8; Heb. 13:18; 1 Ped. 1:22). Órni raslooyno guirá cualidades reʼ labúu rantzayno xiinno, tzeelno né ximigno.
4 Ló la Biblia, Jehová láaca ma goloʼ tipnés historias de buñ ni bibany ló dzú ni see ni láaca gop galnagan né gosac modca rasacno (1 Cor. 10:13; Sant. 5:17). Órni rolno né rasobno guirá lesiony ni rasuidyno de láani, racaʼno chop galnasác. Primer, raduʼdyno cuent que diti nosi lóono radudyno ló galnagan ló xcalnabányno; stipnés láaca ma godudy ló galnagan ni racalóno né ma buny guantaryibu láani né xcalrracné Jehová (1 Ped. 5:9). Ni rarop, rasuidyno ximod guicalóno galnagan (Rom. 15:4).
5. ¿Chú layibu raquiin Jehová par conésbu lóono?
5 Stoib mod ni ragonés Jehová lóono láani ngú né xcalrracné herman. b Superintendentes xtuny circuit riguenyibu congregación né ragoʼyibu discurs ni rony nadip fe xtunyno né racnéni lóono par guiguaʼno toibsi (Hech. 15:40–16:5). Ancianos xtuny congregación láaca rioʼyibu galrrasaʼ por tigaaga publicador (1 Ped. 5:2, 3). Rasuidyibu xiinyibu gandxiʼ Jehová, cutzayibu xi láani gonyibu, guisuidyibu xquiichyibu, goʼolyibu la Biblia, tzeeyibu reunión né gonyibu stipnés cós (Prov. 22:6). Hermanas ni nadip xfe racnéyibu mbioxhlas né ejemplo xtunyibu, né raquiinyibu galrronladx órni raduʼdyibu consej né ánimo (Tito 2:3-5).
6. ¿Xí non gonyno par gacné mod ragonés Jehová lóono?
6 Jehová ma bunybu ni non gonybu, ma ragonésbu lóono. ¿Xí láani non gonyno par gacnéni lóono né guislooyno que raduʼdyno guixquix láabu? Proverbios 3:5, 6 náni: «Gop confianz lóo Jehová né guidopy xcalnabanylo né diti gaplo confianz looca xcalnanlo». ¿Ximod sarecaano pal ronyno ngú? «Láabu sony nadopbu xinéslo». Ló stoib diitz, racnébu lóono par diti tudyno ló galnagan né tzoʼno más nakit. ¡Nigolú raduʼdyno guixquix Jehová portín ronladxgoluʼbu lóono né raduʼdybu consej ni caquiinno! (Sal. 32:8).
JEHOVÁ RADUʼDY CÓS NI CAQUIINNO
7. ¿Ximod racné Jehová lóono mod ná Filipenses 4:19?
7 (Bíil Filipenses 4:19). Láabu diti nosi raduʼdybu ni caquiinno ló sentido espiritual, Jehová rasiab xcalnasác loguiaʼ guirá cós ni raquiinno, xomod galrro, lairy né toib lagary ro cuésno (Mat. 6:33; 2 Tes. 3:12). Wal rioʼno ló galrrasaʼ por cós ni caquiinno, Jehová raibybu lóono que dipa tzogoluʼno ló galrrasaʼ por guiráni (Mateo 6:25). ¿Xigony yaca? Portín Bixiosno dipa sasiambu xpiimbu (Mat. 6:8; Heb. 13:5). Labúu gapno confianz que láabu sony cumplirbu ni ma goniʼbu né saduʼdybu guirá ni caquiinno.
8. ¿Ximod gocné Jehová a David?
8 Gonyno pensary ximod gocné Jehová a David laʼga bixonybu de rey Saúl. Ló guirá íz nagancu, Jehová biduʼdy láabu né guirá xpiimbu guirá cós ni naquiinyibu par labúu nabanyibu. Órni David bisetnaladx guiráni bicaʼbu ndeʼ: «Góca mbioxhlas né nigoreʼ ma naca buñgol, per dipa ma bibiʼya que toib buñ ni rony xinésni riaʼan toib, nili xiimbu casaa canab ni guá» (Sal. 37:25). Pentzi ló xcalnabánylo láaca ma bibiʼlo ximod ma biduʼdy Jehová né galrronladx guirá cós ni caquiinlo o ni caquiin xhermanlo.
9. ¿Ximod raduʼdy Jehová guirá ni caquiin xpiimbu órni radudyibu ló desgrasy? (Láaca bibiʼ retrat).
9 Jehová láaca raduʼdybu ni caquiin xpiimbu órni rioʼ desgrasy. Por ejemplo, ló siglo primero, cristianos de xidal lagary bixelyibu tipnés cós par herman de gudx Jerusalén, órni godudyibu ló galrralán (Hech. 11:27-30; Rom. 15:25, 26). Ló naareʼ, xcudx Dios raduʼdy ni nap né guidopy xcalnabany. Órni rac toib desgrasy, Jehová rachiinbu xpiimbu par guiduʼdy galrro, nís, lairy, remeidy buñ ni godudy ló desgrasy. Láaca noʼ herman ni ronytzaay lidx herman né Salones del Reino. Né nimaca rayopyibu mod par gacnéyibu ló sentido emocional né espiritual guirá ni bisnit lidx o ni goity xfamil. c
¿Ximod rasialdó Jehová xcalnabanyno órni radudyno ló desgrasy? (Bibiʼ párrafo 9). e
10, 11. ¿Xí rasuidy ni gosaclóo Boris looy?
10 Jehová raduʼdybu ni napbu né guidopy xcalnabanybu né raduʼdybu ni raquiin guirá buñ, dada buñ ni diti nac xpiimbu. Lóono rasuʼno láabu né rayopyno oportunida par gacnéno buñ ni diti rony crer ni ronyno crer (Gál. 6:10). Por ni ronyno láani, xidal buelt buñ raniʼ sacró de Jehová. Guibiʼno ni gosaclóo Boris, toib director de toib scuel ni rabés lainy gudx Ucrania. Ná diti nacbu testigo xtuny Jehová, guirá ór godabiobu sacró né gopbu respet mbiox scuel ni nac Testigos. Órni gosaló guerr lainy gudxcu, láabu goloʼbu guicbu tzeebu stoib lagary lainy xcudxcabu ro diti tampa noʼ riesga, né herman gocné láabu. Después, goyeebu Memorial. Né órni bibiʼbu guirá ni buny herman por láabu, Boris goniʼ: «Testigos xtuny Jehová goyoʼyibu galrrasaʼ por naʼ né gonyibu naʼ. Nigolú raduʼdi guixquix layibu».
11 Guiráno labúu guisuʼno xcalrronladx Bixiosno ni noʼ guibá né gacnéno buñ ni caquiin galrracné, ná diti nacyibu Testigos (Luc. 6:31, 36). Napno confianz que galnadxiʼ ni guislooyno layibu labúu sachiinni layibu guisuidyibu más de Jehová né gonyibu xchiin Jehová toibsi né lóono (1 Ped. 2:12). Per mod nitisi gacni sasacno sacró portín órni raduʼdyno ni napno stipnés rioʼno nakit (Hech. 20:35).
JEHOVÁ RAP LÓONO
12. ¿Xí ma biduʼdy Jehová xtiitz gony né xcudx? (Salmo 91:1, 2, 14).
12 (Bíil Salmo 91:1, 2, 14). Jehová ma biduʼdybu xtiitzbu ganbu xcudxbu ló sentido espiritual. Dipa saduʼdybu lagary que Buñdzab gony buidy adoración nayaa ni raduʼdyno láabu (Juan 17:15). Né órni saló «gran tribulación», napno confianz que Jehová sony cumplirbu ni ma goniʼbu de gapbu xcudxbu, tanli ló sentido espiritual né ló sentido físico (Apoc. 7:9, 14).
13. ¿Ximod rap Jehová tigaaga xpiin?
13 ¿Ximod rap Jehová tigaaga xpiimbu? Láabu ma biduʼdybu la Biblia par gacnébu lóono ganno xi láani ngú cós tzaay né xi láani ngú cós mal (Heb. 5:14). Ni guisobno guirá principios ni sieed ló la Biblia nacni suusi naquiinno toib escudo ni rap lóono ló sentido físico né espiritual (Sal. 91:4). Jehová láaca rap lóono né xcalrracné congregación (Is. 32:1, 2). Órni radzakno buñ ni ronladx Jehová né ni rasob láabu, racaʼno ánimo né fuers ni caquiinno par diti guidzakno buñ mal (Prov. 13:20).
14. a) ¿Xigony diti guirá ór rabeʼ Jehová guirá galnagan ni cacalóno? b) ¿Xí raiby Salmo 9:10 lóono? (Láaca bibiʼ ñeʼ guiich).
14 Ló dzú ni see, goyoʼ ór ro Jehová gopbu xpiimbu ló sentido físico. Per diti guirá ór bunybu láani. La Biblia rasuidyni lóono que labúu tudyno ló «desgrasy» (Ecl. 9:11). Láaca, tanli ló dzú ni see né ló naareʼ, rioʼ ór Jehová raduʼdy lagary que xpiimbu tudy ló persecución o gaity. ¿Xigony? Par guislooybu que Buñdzab rascú (Job 2:4-6; Mat. 23:34). Jehová diti guirá ór sabeʼbu guirá prueby ni racalóno, per labúu gapno confianz que dipa sasiambu buñ ni nadxiʼ láabu (Sal. 9:10). d
JEHOVÁ RASIALDÓ XCALNABANYNO
15. ¿Ximod rasialdó Jehová xcalnabanyno né xcalrracné oración, Xtiitzbu né xhermanno? (2 Corintios 1:3, 4).
15 (Bíil 2 Corintios 1:3, 4). Guiráno nagapsi ór rioʼ nabanno, radudyno ló galrrioʼob o rioʼno ló galrrasaʼ. Sigory nigoreʼ cadudyno ló galnagan ni ragoʼ lóono ló galrrasaʼ o rony que guisacno que noʼno toibno. Ná ralooyni diti noʼ chú rien mod cadudyno, Jehová rien lóono. Né diti ngúsi, láaca rasialdóbu «xcalnabanyno ló guirá galnagan ni cacalóno». ¿Ximod ronybu láani? Né xcalrracné oración, la Biblia né xhermanno. Órni raninéno Jehová, láabu racapybu né raduʼdybu lóono «paz xtuny Dios ni digaldi guieen buñgudxlio» (Filip. 4:6, 7). Órni rolno Xtiitzbu rabiʼno balaati nadxiʼbu lóono, rasuidyno consej ni raduʼdybu lóono né rasacno sacró por esperanza ni napno. Né, órni noʼno né xhermanno ló reunión rasacno xcalrronladxyibu né raibyibu lóono diitz ni rasialdó xcalnabanyno ni rabeʼyibu ló la Biblia.
16. ¿Xí rasuidylo ni gosaclóo Nathan né Priscilla?
16 Par guibiʼno ximod rasialdó né rony animar Jehová lóono né xcalrracné Xtiitzbu, guibiʼno ni gosaclóo Nathan né Priscilla, ni rabés Estados Unidos. Ma xidzú íz de goló goloʼyibu guicyibu tzeeyibu stoib lagary par guiniʼyibu xtiitz Dios. Nathan ná: «Gopdo confianz que Jehová nasiab xcalnasác loguiaʼdo». Per, órni bidxinyibu congregación copycu, bixoʼyibu né cualóyibu galnagan xtol bidxiich. Después bibiguetyibu xcudxyibu, per cú láaca cualóyibu galnagan xtol bidxiich. Nathan ná: «Gonabdiidza naʼ xigony Dios diti biduʼdy xcalnasác modpa golésdo. Dada gonabdiidza naʼ pal buni toib cós mal». Per, conforma godudy tiemp, guiropcayibu biduʼdyibu cuent que Dios diti bisian layibu. Nathan ná: «Ló guirá galnagancu ni biila la Biblia gocni suusi nacadiaga toib ximiga ni caduʼdy ánimo né consej naʼ. Bisuidydo diti gonydo pensary ló galnagan ni cacalódo, xalagary ngú gonydo pensary ximod cayacné Jehová par labúu gony guantarydo láani. Né ngú ma gocné lóodo par guicalódo nitisi galnagan ni coʼ prueby fe xtunydo».
17. ¿Ximod bialdó xcalnabany hermana ni laa Helga? Láaca bibiʼ retrat).
17 Xomod ma bibiʼno, xhermanno labúu guisialdóyibu xcalnabanyno. Guibiʼno ni gosaclóo Helga, ni rabés gudx Hungría. Por xidal íz, láabu cualóbu xidal galnagan ni bisioʼob xcalnabanybu né gosacbu que diti noʼ pu raquiimbu. Per nigoreʼ, órni rasetnaladxbu guiráni, raduʼdybu cuent que Jehová bisialdó xcalnabanybu né xcalrracné congregación. Láabu nábu: «Jehová guirá ór gocnébu naʼ órni bibiʼbu que ma diti napa fuers né ma diti labúuni naʼ né guiráni: dxiin, ni goona xiina ni caxoʼ né stipnés galnagan. Ló 30 íz ni godudy labúu guiniya que Jehová buny cumplir ni goniʼbu, bisialdóbu xcalnabani. Dipa ma bisiambu naʼ nipa tipdzú. Xidal buelt rony nadipbu naʼ, né xcalrracné diitz nadaʼa, né ni nap galrronladx xtuny herman. ¡Xidal buelt ma cuaʼya toib mensaj, toib tarjet o toib diitz sacró órni merpa caquiinna láani!».
¿Ximod labúu guiquiin Jehová looy par guisialdólo xcalnabany stipnés? (Bibiʼ párrafo 17).
18. ¿Ximod labúu guisialdóno xcalnabany stipnés?
18 Napno privilegio de guisuʼno Dios xtunyno né guisialdóno xcalnabany stipnés. ¿Ximod labúu gonyno láani? Guicadiagtzayno layibu né paseins, gaibyno layibu diitz ni racné né gacnéno layibu de xidal mod (Prov. 3:27). Né diti nosi né xhermanno ronyno ndeʼ, láaca ronyno láani né buñ ni radudy ló galrrioʼob, dada né buñ ni diti ma nac xpiimbu. Pal cadudyibu ló toib galnagandaʼ, ló toib galguitz o pal bisnityibu toib buñ ni ronladxyibu, riguenno layibu, racadiagno né rony animarno layibu né la Biblia. Órni rasuʼno Dios ni rasialdó xcalnabany buñ, diti nosi sacnéno xhermanno gony guantary prueby, láaca labúu sonyno que tipnés buñ ni diti rony xchiin Jehová guiniiny guimbu láabu (Mat. 5:16).
JEHOVÁ GUIRÁ ÓR SIOʼBU NÉ LÓONO
19. ¿Xí rony Jehová por lóono, né ximod labúu guisuʼno láabu?
19 Jehová rioʼbu galrrasaʼ por guiráno ni nadxiʼ láabu né dipa rasiambu lóono órni cadudyno ló galnagandaʼ. Ronladxbu né ranbu lóono xomod toib buñ ni ran xiin. Ragonésbu lóono, raduʼdybu ni caquiinno, rapbu né rasialdóbu xcalnabanyno. Né lóono labúu guisuʼno láabu órni racnéno né rony animarno buñ ni cadudy ló prueby. Nac nitisi galnagan ni guicalóno ló xcalnabányno, labúu gapno confianz que Jehová guirá ór sioʼbu né lóono portín láabu ma biduʼdybu xtiitzbu: «Diti guidzuibylo, portín naʼ noʼya né looy» (Is. 41:10). ¡Nigolú rasacno sacró portín nanno que pal Jehová noʼ né lóono dipa sioʼno toibno!
CANCIÓN 100 Seamos hospitalarios
a Bibiʼ artículo «Tomemos decisiones que honren a Dios», ni sieed ló La Atalaya 15 de abril íz 2011.
b Bibiʼ artículo «Guirá ór bisob mod ragonés Jehová looy», ni sieed ló Guiich ni caniʼ íz 2024, párrafos 11 a 14.
c Sadzelo xidal ejemplos ni godudy ló ndeʼga pal rieelo ló jw.org né rayopylo «Mod racnédo ro rioʼ desgrasy».
d Bibiʼ «Preguntas de los lectores» ni sieed ló La Atalaya de febrero íz 2017.
e MOD RAREXA RETRAT: Lainy gudx Malaui, tipnés herman cacaʼ galrracné ló sentido material né espiritual después ni godudy toib desgrasy.
