Rosi ná: «Nigolú goyoʼya galrrasaʼ por tipnés galnagan portín diti goleʼya láani guica né buny pensary que nigolú mal sarecaaya». ¿Xí texto gocné láabu? Toibtica texto ni gocné láabu ngú Mateo 6:34, ni ná: «Dipa tzoʼto ló galrrasaʼ por xi gac guixí, portín guixí sitnéni xcalrrasaʼni. Cada dzú láani ma napni xcalnaganni». Rosi ná que diitzreʼ ni goniʼ Jesús gocné láabu par diti ñoʼbu ló galrrasaʼ por cós ni sigory diti sac. Né nábu: «Ma buen napa galnagan diti noʼ xí portín tzoʼya ló galrrasaʼ por cós ni yása gac, por cós ni sigory dipa sac».

Yasmín láaca buny pensary que dipa labúu nareʼbu ló xcalrrasaʼbu. Nábu: «Guirá xomal gorudxaʼya, né tipnés gueʼel diti labúu gotiasi. Xcalrrasaʼya nigolú bistoʼbyni naʼ». ¿Xí versículo xtuny la Biblia gocné láabu? Bisetlabu 1 Pedro 5:7, ro ná: «Colguisian ladxñabu guirá galrrasaʼ ni napto, portín láabu rioʼbu ló galrrasaʼ por lóoto». Yasmín ná: «Guirá ór gonaba lóo Jehová né, conforma godudy dzú, láabu cuapybu naʼ. Gosaca suusi bisiana tiplad toib guix nanaʼ ni bieeya. Ritzanlósa pensary mal guica, per nigoreʼ órni rieedni ló xpensari ma naana xí goni».

Toib buñgonaʼ ni laa Isabella ná: «Sigory órni buñ nap mañ de guisian xchiin par stoib ór, sieedni de family, portín bixiosa scúca nac. Rioʼ ór rasiana xchiina par stoib ór nosi portín diti nainyna goni láani né rabúya rabiʼya televisión o rasaladxi. Toib costumbre mal láani portín más rioʼ buñ ló galrrasaʼ, né radxin midid, cuenunysi rony buñ xchiin». Toib texto ni nigolú gocné láabu ngú 2 Timoteo 2:15, ni ná: «Buny rutirigaʼlni looy par guicacuent Dios looy, buñ ni ronygoluʼ dxiin ni diti nap razón par guitoy». Isabella ná: «Diti goniiny naʼ que Jehová natoy nabiʼ xchiina portín bisiana láani par stoib ór».

Láaca, Kelly ná: «Órni non ñonycuenta toib dxiin, bisiana láani dada último ór. Órni bidxin dzú ni ñonycuent láani gorudxaʼya, ma diti gotiasi né nigolú goloʼni naʼ ló galrrasaʼ. Diti noʼ pu gocné ngú naʼ». Litz ni sieed ló Proverbios 13:16 nigolú gocné láabu: «Guirá buñ ni noʼ xcalrrien nan xi ni gony, per buñ ngaʼal raduidy diitz que nacbu buñ ngaʼal». Láabu raniʼbu xí bisuidybu ló texto reʼ: «Galán láani tzoʼ xcalrrienno né cueʼno tiemp par guibiʼno ximod gonyno xchiinno. Nigoreʼ napa toib lagary ro racaʼya guirá ni goni; láani racnéni naʼ goni xchiina né tiemp né diti guisiana láani par stoib ór».

Cristina ná: «Tzeʼela bisian naʼ né tap mbioxien». ¿Xí texto gocné láabu? Proverbios 17:17, ni ná: «Toib amigdxin guirá ór nadxiʼ, né nacbu toib buch ni gool par órni noʼ galnagan». Láabu biyopybu xcalrracné stipnés buñ ni rien Dios. ¿Ximod goyeeni láabu? «Guirá ximiga nimaca gocnéyibu naʼ de xidal mod. Tipnésyibu goynéyibu galrro né guieʼ lidxi. Tzón buelt xidal ximiga gocné naʼ né guiráca xiinienna par nadzaʼdo de yoʼ. Toibyibu bidzel dxiin par naʼ. Ximiga dipa bisian naʼ».

Diana, ni bisetlano antes, láaca goyoʼ nabambu portín biaʼanbu toibbu. Láabu rasetnaladxbu ximod gosacbu órni bisnitbu guirá ni gopbu: «Gocni suusi nabiʼya stipnés buñ ni nipendaʼ nabany, né naʼ diti labúu bibani xomod layibu. Nigolú gosaca que noʼya tobi». Toib texto ni gocné láabu ngú Salmo 68:6, ni ná: «Dios raduidy toib yoʼ ro cués buñ ni noʼ toib». Diana ná: «Goona que texto reʼ diti raduidyni diitz que Dios nosi caniʼ que guiduidy toib yoʼ ro labúu cuésno. Bidudi cuent que Dios raduidy lóono toib yoʼ espiritual, toib lagary ro diti guidzuibyno, toib lagary ro guiguaʼno toibsi né buñ ni nadxiʼ a Jehová. Per bidudi cuent que diti labúu nabigaxa stipnés buñ pal diti rabigaxa Dios. Né Salmo 37:4 gocné naʼ: «Goyoʼ goxtiguie nisló Jehová, né láabu saduidybu ni nainy xcalnabanylo».

Diana ralox raniʼ scareʼ: «Bidudi cuent que biquiin nanásdxichi ña Jehová; diti noʼ stoib xomod láabu. Par labúu nadzaʼga buñ ni láaca radzak Jehová xomod naʼ, bicaʼya ló guiich xí cós labúu ñoni né layibu. Bibiʼya cós tzaay ni napyibu né bituidy scásiʼ ro rachéyibu».

Golú, buñ ni rony xchiin Dios láaca nacyibu buñ galkié. Testigos xtuny Jehová racalóyibu galnagan ni racaló guiráxadit buñ, per ni rasuidyibu ló la Biblia rachiin layibu gacnéyibu stipnés buñ órni labúuni layibu. Galán láani guidzakno buñ xomod layibu. Per ¿labúu gacné xilitz la Biblia lóono guicalóno galnagan ni ma diti nap remeidy xomod órni raxoʼsiino o órni raity xfamilno la?