¿Rioladxloʼ gannlo más de la Biblia la? ¿Nainy looy gannlo más de toib buñ, ximod rarexa toib versículo, lagary o ni góc ni rasetlaa la Biblia la? ¿Toibtica buelt ma gonabdiitzlo looyca pal Xtiitz Dios labúu gacné looy cuéxalo toib galnagan ni nóolo ló la? Biquiin biblioteca ni noʼ Lagary ro radopno.

Biblioteca napni xidal cós ni labúu gacné lóono guisuidyno. Sigory looy diti naplo guirá guiich ni ma goleʼ testigos xtuny Jehová ló xtiitzlo, per biblioteca ni noʼ Lagary ro radopno napni casi guirá guiich cú. Sigory láaca noʼ xidal clas biblias, diccionarios né stipnés guiich ni labúu gacné looy. Diti guiatzladxlo, labúu guiquiinlo láani órni yása saló reunión o órni ma biloxni. Pal noʼ toib computadora ni sigory nap toib programa ni laa Watchtower Library, ni sitné tipnés guiich ni rasuidy testigos xtuny Jehová. Programa reʼ diti nagann par guiquiinno láani, napni toib lagarien ro labúu guiyopyno temas, diitz o versículos ni caquiinno.

Ni radudy ló reunión Mod nabanyno né mod ronyno Xchiin Dios raquingoluʼyibu láani. Looy labúu guiquiinlo biblioteca par cuélo xtiscurslo. Anciano ni riné reunión reʼ xcuentbu noʼ biblioteca, né láabu racaabu cuidad que gapni guiich copy ni careʼga né láaca par guiguaʼtzayni sacró. Láabu o xomextralo labúu guisuidy looy ximod guidzel lo ni caquiinlo. Nosi bisednaladx que buñ diti labúu cué láani Lagary ro radopno, láaca guicaano cuidad ximod guiquiinno láani né diti guidiéni.

La Biblia ná que par guidzelno «xcalnanpa Dios», non tzóno puext guiyopyno láani suusi ñacni «cós ni rasac ni noʼ nagach» (Proverbios 2:1-5). Biblioteca ni noʼ Lagary ro radopno nacní toib galán lagary ro labúu salóno guiyopyno cós ni rasac.

• ¿Xí láani nap biblioteca ni noʼ Lagary ro radopno ni gacné lóono?

• ¿Chú labúu gacné looy gannlo guiquintzaylo biblioteca?