Ló dzú ni diti góc guié gudx Israel, Jehová gochbu Elías: «Goyee gudx Sarepta. Cú rabés toib gonaʼ viod ni sayaʼan looy». Órni bidxin Elías roloo gudxcú bibiʼbu toib buñgonaʼ pobre catop yac, gonabbu tidxó nís gonaʼ reʼ. Órni gonaʼ reʼ goyca láani, Elías góoch láabu: «Ranaba looy, biduidy naʼ tlaʼ páa par guáya». Per gonaʼcu góoch láabu: «Diti napa páa par guidudi looy. Nosi napa tidxó rin né tidxó aceity par gonytzaaya ni guá xiinna né gonytzaaya ni guáya». Elías góoch láabu: «Jehová ma biduidy xtiitz, pal ronytzaaylo toib payen par guáya, diti sabich aceity xtunylo né rin ni naplo diti saráni dada órni gac guié stoib».

Ór cú gonaʼ viodcu goleʼbu páa par profeta xtuny Jehová. Ná diti góc guié, gonaʼ viodcu gop ni godó né xiin guiránac dzú, mod ni goniʼ Jehová gacni. Rin xtunybu diti birá né aceity xtunybu diti bibichni.

Después góc toib cós ni goloʼ nabann gonaʼcu. Xiimbu bixoʼ né goity né gonabbu Elías ñacné láabu. Elías goynébu  nidxiyencu lainy toib cuart ni noʼ ló ni rarop píis né godiʼxbu nidxicu ló loʼon né gonabbu lóo Dios: «Jehová, ranaba looy, biscuany nidxiyen reʼ». ¿Nanlo xigony bidziguiaʼ buñ ni buny Jehová la? Portín ló dzúcu, yása guiás ni toib buñ ni ma goity né portín viod reʼ diti gócbu buñ israelita.

Ór cú nidxiyen reʼ gosaló cuaʼ buu né bibanybu stoib. Elías gochbu gonaʼ viodcu: «¡Bibiʼ ganlo! Xiinlo ma bibany stoib». Láabu goyoʼ nakitbu né gochbu Elías: «Nigoreʼ nantzaya que naclo profeta xtuny Dios. Guirá ni raniʼlo sieedni de Jehová por ngú rarebuʼni».