Chop beʼo de goló bireʼ israelitas lainy gudx Egipto, bidxinyibu laidy dainy Sinaí né cú bisaladxyibu. Ór cú Jehová gonabbu Moisés ñaʼpy laidy dainycu né goniʼbu: «Naʼ bilaaya israelitas. Pal rasobdiitzyibu naʼ né ronyibu guirá ni ná leyes ni bidudi layibu, sacyibu xcudxi». Órni Moisés bietj laidy dainycu, gochbu israelitas guirá ni góoch Jehová láabu. ¿Xí goniʼ israelitas ór cú? Goniʼyibu: «Sonydo guirá ni guinab Jehová».

Después biaʼpy Moisés laidy dainycu stoib. Né cú Jehová góoch láabu: «Ló ni rion govitz guininéya gudx Israel. Gooygudx guirá buñ que diti guiaʼpyibu laidy dainy Sinaí». Moisés gooygudxbu israelitas ñoʼ puext par nacadiagyibu ni naniʼ Jehová.

Ló ni rion govitz, israelitas bibiʼyibu ximod biapynís né toib xcaay bisiegni guidopyca dainy Sinaí. Bicadiagyibu ximod goyobuu dainycu né bicadiagyibu xiruid dxityoos. Después Jehová bietjbu ló guii laidy dainycu par goninébu israelitas né layibu nigolú bidzuibyibu. Guidopyca dainycu biegni de goʼox né nigolú bisisni. Dxityooscu gosaló gosuchni más fuers. Ór cú Jehová goniʼ: «Naʼ ngú Jehová. Diti non guiento stoib dioxh».

Moisés biaʼpybu laidy dainycu stoib, né cú Jehová biduidy tipnés leyes ni nasob israelitas. Ló guirá leyes Jehová goniʼ ximod non guisobyibu né ximod non guibanyibu. Moisés bicaʼ láani né después bíilbu láani nacadiag israelitas. Ór cú goniʼyibu: «Sonydo guirá ni ná Jehová». Layibu biduidyibu xtiitzyibu gonyibu ni ná Jehová, per ¿bunyibu láani la?