Jehová gochbu Jacob que diti ñoʼbu ló galrrasaʼ portín láabu ñanbu Jacob xomod gonbu Abrahán né Isaac. Jacob goylésbu toib lagary ni góc laa Harán. Lagarycu bunybu galtzeʼel, goyoʼ xidal xiimbu né gócbu buñ ric.

Después de xidal íz Jehová gochbu Jacob: «Bibiguet ro bibany bixioslo». Por ngú Jacob né xfamily goyoʼyibu néz né bibiguetyibu. Órni ma seeyibu ló néz tipnés xomósbu bieedgudx láabu: «Buchlo Esaú sieed guidzaglóo lóono né sitnébu 400 buñ». Jacob bidzuibybu que Esaú ñaiby ñonynaa láabu né xfamilybu. Por ngú gochbu Jehová: «Ranába looy, bilaa naʼ ladxña buchi». Stoib dzúcu, Jacob bixelbu galrrascad nacaʼ Esaú né biscadbu xidal xiil, chiv, yós, camey né bor.

Gueʼelcu, órni Jacob biaʼanbu toibbu, bibiʼbu toib ángel. Ángelcu gosaló cualsaʼ né láabu. Guidopynac gueʼel cualsaʼyibu, né Jacob diti bireʼgan ná ma gocnaabu. Ángelcu góoch láabu: «Bislaʼ naʼ par ma guiaʼya». Per Jacob cuapy: «Yaca, diti saslaʼya looy pal diti raduidylo xilaaylo naʼ».

Bidxin midid ángelcu biduidybu xilaaybu a Jacob. Ór cú Jacob gondxich que Jehová diti naduidybu lagary que Esaú ñonynaa láabu.

Rosilcú, Jacob bibiʼbu Esaú sieed sit né sitnébu 400 buñ. Né gosanirbu par nadzaglóbu Esaú, órni bidxinbu gahxca  bixixipbu gatz buelt. Esaú bixony né goduʼdx láabu. Guiropcayibu gosaló gorudxaʼdootyibu né buny reglaryibu galrradíil ni gopyibu. ¿Bioladx Jehová ni buny Jacob la?

Después Esaú bibiguet lidx né Jacob goyoʼbu néz seebu ro bibany bixiosbu. Goyoʼ 12 xiin Jacob né góc laayibu: Rubén, Simeón, Leví, Judá, Dan, Neftalí, Gad, Aser, Isacar, Zabulón, José né Benjamín. Después Jehová biquiimbu toib xiin Jacob ni góc laa José par bilaabu xcudxbu. ¿Nainy ganlo ximod gocni la? Guibiʼno láani.