Conforma godudy dzú nigolú bidal buñ ló Gudxlio. Casi guirá buñ góc buñ mal, dada tipnés ángeles góc mal. Bisianyibu guibá ro golésyibu né bietjyibu ló Gudxlio. ¿Nanlo xigony bunybu ngú la? Goniiny ñacyibu xomod buñgudxlio né ñonyibu galtzeʼel né buñgonaʼ.

Goyoʼ xiinyibu né guirá buñgonaʼ reʼ. Xiinyibu góc buñ nadip né bunynaayibu buñ. Jehová diti biduidy lagary que cós malcu ñacxiroʼni más ló Gudxlio. Por ngú bitnébu toib guiérodann par binitlóbu buñ mal.

Per goyoʼ toib buñ ni diti góc xomod layibu. Láabu nigolú binladxbu Jehová né góc laabu Noé. Goyoʼ toib tzeelbu né tzón xiimbu ni góc laa Sem, Cam né Jafet, né tigaaga xiingaʼnbu bitzña né toib buñgonaʼ. Jehová góoch Noé nasaʼ toib arca xiroʼ par labúu nalaabu né guiráca xfamilybu órni ñac Guiérodancu. Toib arca láani ngú toib caj de tabla ni labúu bisoblo ló nís. Jehová láaca gochbu Noé nagoʼ guirá nimal lainy arcacu par labúu nalaayimu.

Noé né xfamily nimaca gosaló bisaʼ arca. Goclayibu midid 50 íz par bilox bisaʼyibu láani. Bisaʼyibu láani xomodpa goniʼ Jehová gacni. Laʼga bunybu dxiincu láaca gochbu buñ que sac toib Guiérodann. Per ni toib buñ bicadiag láabu.

Bidxin dzú goyoʼyibu lainy arca. Ló lesiony ni sieed sasuidyno xí góc.