Godudy chii govitz de goló bibiguet Jesús guibá ór cú xpiimbu cuaʼ espíritu santo. Góc Lanii Pentecostés ló íz 33 né buñ de xidal lagary bidxinyibu Jerusalén par gonyibu laniicu. Midid 120 xpiin Jesús bidop lainy toib cuart ni noʼ ló ni rarop píis lainy gudx Jerusalén, né tisintiempsi góc toib galrradziguiaʼ. Toib guii biab guic tigaagayibu né gosaló goniʼyibu gadzéga diitz. Láaca bienyibu toib ruid de toib buroʼdant lainy guidopy yoʼcu.

Buñ ni bidxin de stipnés gudxrop bienyibu ruidcu né bixonyibu goyeeyibu ronoʼ yoʼcu par nabiʼyibu xi cayac. Bidziguiaʼyibu órni bibiʼyibu xpiin Jesús caniʼ stipnés diitz. Goniʼyibu: «Buñreʼ nac de Galilea, ¿né ximod labúu raniʼyibu xtiitzno?».

Ór cú Pedro né stipnés xcompañerbu gosagaʼ nisló guirá buñcu. Pedro goniʼ: «Lóoto bigaityto Jesús, per Jehová golís láabu. Nigoreʼ Jesús noʼ guibá né sobbu ladbuʼ Dios. Né ma biduidybu espíritu santo lóodo mod ni biduidybu xtiitzbu  gonybu. Por ngú cacadiagto né cabiʼto guirá galrradziguiaʼ reʼ».

Buñ nigolú bidziguiaʼ, né diitz ni goniʼ Pedro bidxinni lainy xcalnabanyibu, por ngú gonabdiitzyibu: «¿Xí gonydo?». Láabu cuapybu: «Colguisian guirá galkié ni ronyto né non tzonisto ló laa Jesús. Después láaca sacaʼto espíritu santo». Midid 3.000 buñ goyonis dzúcu. Desde dzúcu gosaló bidal más xpiin Jesús lainy gudx Jerusalén. Apóstoles xtuny Jesús buny más congregaciones né xcalrracné espíritu santo. Modcu labúu bisuidyibu buñ guirá ni buny mandary Jesús layibu.