¿XÍ LÁANI cayony que cayab muros ni nap gudx Jericó? Ralooypani noʼ guerr lagary reʼ né gudxrop de Jericó canitlóni. Per diti scú láani. ¡Láani ngú stoib galrradziguiaʼ ni cayony Jehová! Guisuidyno ximod góc guirá ndeʼ.

Bicadiag tzaay ni Jehová góoch a Josué: Looy né soldad ni noʼ né looy guiduidyto xaij roloo Jericó. Non gonyto ndeʼ toibsi buelt ló tipdzú, por xhoop govitz. Tzanéto caj ni rasetnaladx acuerdo ni buny Jehová né Israel. Gatz buñguieeu ni rasanir nisló israelitas par gony goʼox non tze nisló caj reʼ né non guicudxbu dxitguic nimal.

Órni guisaʼ gatz govitz guiduidyto xaij roloo gudx Jericó gatz buelt. Ór cú guicudxto xiroʼ ór dxitguic nimal, né guicaʼto rudx fuers. ¡Né muros ni nap gudx Jericó guiabni!

Josué né gudx Israel ronyibu ni ná Jehová. Laʼga casaayibu roloo gudx Jericó, diti raniyibu. Nosi ni racadiag buñ, ngú ruid ni ronyibu né dxitguic nimal láaca ruid ni ronyibu né ñeʼyibu órni rasaayibu. Labúu guinino que guirá xi enemigyibu de gudx Jericó bidzuiby. ¿Labúu rabilo doʼ xináa ni nal roʼ bentan ca la? ¿Chú láabu rabés lainy yoʼ ro caa bentan ca? Scú láani, Rahab ma bunybu ni góoch chop buñguieeu ni goyee biláach Jericó. Guirá xfamilybu noʼ né láabu lanioʼ né cabíyibu xi ni cayac.

Órni radxiin gatz govitz, dzú ma bilox biduidyibu xaij roloo Jericó gatz buelt, rasaló racudxyibu dxitguic nimal, Josué né soldad ni noʼ né láabu racaʼyibu rudx, né muros ni nap gudx Jericó riabni. Josué raniʼ: Colguigaity buñ né colguisaʼij Jericó né guirá ni napni, per diti guisaʼijto plata, or, cobre né hierro, guirá ndeʼ guitnéto láani par yoʼ ro rac adorar Jehová.

Josué raiby a chop buñguieeu ni goyee biláach gudx Jericó: Colguioʼ laniolidx Rahab né colcueʼ láabu né guirá xfamilybu. Layibu ralaayibu xomod goní chop biinreʼ.