GUIRÁ cós tzaay ni napnó Dios biduidybu láani lóono. Láabu bisaʼ Govitz par guiduidyni guii lóono rodzu, Beʼo né vitzón par guisaníni gueʼel, né biduidybu toib Gudxlio móz par labúu guibanyno loni.

Govitz, Beʼo né vitzón ditini ngú ni Dios bisaʼ nirdiguié. ¿Nanlo xí ni bisaʼbu nirdiguié la? Gocni buñ xomodca láabu. Diti labúu rabino layibu, xomod diti labúu rabino Dios. La Biblia raniʼ layibu ángeles. Dios bisaʼ guirá ángeles par nabésyibu toibsi lainy guibá né láabu.

Dios bisaʼ nirdiguié toib ángel ni más gondxiʼbu. Gócbu primer Xiin Dios né bunybu dxiin né Bixiosbu. Gocnébu Dios bisaʼ stipnés cós ladni noʼ Govitz, Beʼo, vitzón né láaca Gudxlio ro rabésno.

¿Ximod góc Gudxlio dzúcu? Dzúcu diti noʼ chú labúu bibany ló Gudxlio. Nosi nís biguaʼ guidopynac ló Gudxlio. Goniiny Dios ñoʼ buñ par nabany ló Gudxlio. Por ngú, gosalobu bunytzaaybu láani par lóono. ¿Xí bunybu?

Primer bibíbu Gudxlio raquiinni guii. Por ngú, biduidybu Govitz par guicaptzaʼ ló Gudxlio. Bunybu láani par ñoʼ rodzu né gueʼel. Diti xidzú bunybu que nís ni noʼ ló nisdaʼ ñaʼach loni né ñaʼan Gudxlio loguiaʼ.

Dzúcu xitcal goyoʼ ló Gudxlio. Gocni xomod dibuj ni rabilo reʼ. Diti noʼ xi goyoʼ loni, ni guieʼ, ni yac, ni nimal. Né láaca lainy nisdaʼ diti goyoʼ beel. Nigolú xiroʼ dxiin gop Dios par que nimal né buñ nabany nasac ló Gudxlio.