1, 2. a) ¿Chú láabu non conés lóono? b) ¿Xí galrranabdiitz guicapyno ló capítulo reʼ?

 ¿RASETNALADXLO dzú góclo mbioxien la? Sigory bixioslo o xinaʼlo gonab ñonylo toib cós ni diti goniiny ñonylo. Ná binladxlo layibu né gonlo que non guisoblo layibu, diti guirá ór goniiny ñonylo láani.

² Nandxichno que Bixiosno Jehová, nadxiʼ lóono. Láabu ranbu né radudybu guirá ni raquiinno par guibanyno goxt. Por ejemplo, ragonésbu lóono par tzeeni lóono galán. Rioʼ ór, láaca raquiimbu tipnés buñ par conésbu lóono. Guirá ór non gony respetarno xcalmandary Jehová (Proverbios 24:21). Per ¿xigony rioʼ ór diti rioladxno que stipnés conés lóono? ¿Xigony ranab Jehová lóono guisobno? ¿Né ximod raslooyno que napno respet xcalmandarybu? (Bibiʼ ni ná nota 9, «Ragonésbu né ralitzbu»).

3, 4. a) ¿Xigony nacno buñ galkié? b) ¿Xigony rasac naganno que stipnés conés lóono?

³ Lóono ni nacno buñgudxlio wal nayaʼno. Nacno scú desde dzú Adán né Eva bunyibu galkié. Ná Dios bisaʼ layibu sin galkié, gocyibu buñ galkié órni cualóyibu xcalmandary Jehová. Desde dzúcu, guiráno nacno buñ galkié. Por ngú rasac naganno guisanés Jehová né stipnés buñ lóono. Láaca rasac naganno láani portín buñ ni Jehová raquiin par conés lóono nacyibu buñ galkié (Génesis 2:15-17; 3:1-7; Salmo 51:5; Romanos 5:12).

⁴ Láaca, por ni nacno buñ galkié nacno buñ farmay. Láani ronyni que guisac naganno que stipnés conés lóono. Guisuidyno toib ejemplo. Jehová golúbu Moisés par nagonés xcudxbu. Per toib buñguieeu ni góc laa Coré, ni buny ni ná Jehová por xidal íz, gócbu buñ farmay né diti gopbu respet Moisés. Ná Moisés gosanir nisló xcudx Dios, diti gócbu buñ farmay. La Biblia ná que Moisés gócbu buñdxo né diti goyoʼ stoib xomod láabu. Per Coré diti gosaguel que Moisés nagonés láabu. Dada bunybu que stipnés buñ ñac toibsi né láabu par nacalóyibu Moisés. ¿Xí gosaclóo Coré né stipnés buñ ni góc toibsi né láabu? Jehová binitló layibu (Números 12:3; 16:1-3, 31-35). Ló la Biblia radzelno xidal ejemplos ni rasuidy lóono que galfarmay nacni toib riesga (2 Crónicas 26:16-21). (Bibiʼ ni ná nota 10, «Buñ farmay né buñdxo»).

5. ¿Ximod tipnés buñ ni bibany ló dzú ni see biquiin mal xcalmandary?

 ⁵ Sigory ma bicadiaglo que órni buñ nap galmandary, raxin mod nacbu. De goló noʼno ló Gudxlio, xidal buñ raquiin mal xcalmandary (bíil Eclesiastés 8:9). Por ejemplo, Saúl gócbu toib buñtzay né buñdxo órni Jehová golú láabu par gacbu rey xtuny Israel. Per bidudybu lagary que galfarmay ñony gan láabu né bisobladxbu ni gop stipnés por ngú cuanalbu David, toib buñguieeu ni diti gop dool (1 Samuel 9:20, 21; 10:20-22; 18:7-11). Después David bidxin góc rey né gócbu toibtica rey ni más galán gop gudx Israel. Per conforma godudy íz láaca biquiimbu mal xcalmandarybu. Gotnébu Bat-Seba, tzeʼel Urías. Né par nacachbu xcalkiébu, bixelbu Urías nisló soldad par ñaity (2 Samuel 11:1-17).

6, 7. a) Por ni nadxiʼno Jehová, ¿xí ronyno? b) ¿Ximod labúu guisuʼno Jesús?

⁶ Nadxiʼno Jehová por ngú rasaguelno conésbu lóono. Nigolú nadxiʼno Jehová, por ngú raniiny coʼ nakitno xcalnabanybu (bíil Proverbios 27:11; Marcos 12:29, 30). Desde dzú Adán né Eva goyoʼ lainy lagary sacróyen ni góc laa Edén, Buñdzab rayopy mod que buñ diti guisob xcalmandary Jehová. Raniiny láabu gonyno pensary que Jehová diti nap derech gaiby lóono xi non gonyno. Per nandxichno que nacni toib galrrascú. Noʼno de acuerdo né diitzreʼ: «Jehová Dios xtunydo, nosi looy non gonyxiroʼdo,  gapdo respet né guicaʼlo galnadip, portín looy bisaʼlo guirá cós» (Apocalipsis 4:11).

⁷ Dzú góclo mbioxien bisuidylo guisoblo bixioslo né xinaʼlo ná diti goniiny looy ñonylo láani. Scúca, lóono ni nacno xpiin Dios rioʼ ór rasac naganno guisobno. Per nadxiʼno Jehová né rapno respet láabu, por ngú ronyno rutirigaʼlni lóono guisobno láabu. Jesús bisian toib galán ejemplo par lóono. Bisobbu Jehová ná gosac naganbu gonybu láani. Por ngú labúu gochbu Bixiosbu: «Diti gac ni nainy naʼ, xalagary ngú gac ni nálo» (Lucas 22:42). (Bibiʼ ni ná nota 11, «Galmandary»).

8. ¿Ximod ragonés Jehová lóono? (Láaca bibiʼ ni ná cuadriyen « Guicacuentno litz»).

⁸ Ló naareʼ, Jehová ragonésbu lóono de xidal mod. Por ejemplo, ma bidudybu la Biblia lóono. Láaca ma bidudybu ancianos ni noʼ lainy congregación. Raslooyno que rapno respet xcalmandary Jehová órni rony respetarno buñ ni raquiimbu par conés lóono. Pal diti racacuentno galrracné ni radudyibu lóono, nacni suusi nabeʼno Jehová tiplad. Órni israelitas diti bisobyibu Moisés, Jehová bibiʼ láani xomod toib galkié rodann, gocni suusi nabeʼyibu Jehová tiplad (Números 14:26, 27). (Bibiʼ ni ná nota 12, «Ancianos ni noʼ lainy congregación»).

9. ¿Xigony órni rasobno raslooyno galnadxiʼ?

⁹ Órni rapno respet galmandary, raslooyno que nadxiʼno xhermanno. Gonyno pensary ló ejemplo reʼ. Órni rioʼ desgrasy xomod xo rodann, rioʼ toib grupo par gacné buñ ni cadudy ló desgrasy. Par labúu  gonyibu xchiinyibu sacró, non tzoʼ toib ni guisanir nislóyibu né stipnéscu non guisob. Per ¿xí ñac pal toibticayibu diti rasob né nábu gonybu ni náapabu? Ná raniiny gacnébu, xcalnayaʼbu labúu coʼ xcompañerbu ló riesga. Scúca, pal diti rasobno Jehová né diti rasobno buñ ni ma bidudybu galmandary, stipnés buñ labúu tzoʼ ló riesga. Per pal rasobno Jehová, raslooyno que nadxiʼno xhermanno né rapno respet xcalmandary Dios (1 Corintios 12:14, 25, 26).

10, 11. ¿Xí láani guisuidyno?

¹⁰ Guirá ni ranab Jehová gonyno nacni par tzeeni lóono galán. Pal rapno respet galmandary lainy famil, lainy congregación né órni noʼno nisló buñchiin, sarecaano galán (Deuteronomio 5:16; Romanos 13:2-4; Efesios 6:2, 3; Hebreos 13:17).

 ¹¹ Pal rienno xigony raniiny Jehová gapno respet stipnés, diti sasac naganno gonyno láani. Guienno más ximod labúu gapno respet ló tzón cós.

12. ¿Ximod raslooy buñguieeu que rap respet xcalmandary Jehová?

¹² Jehová bisaʼ famil, né bidudybu tigaagayibu toib dxiin. Órni tigaagayibu rien xi ranab Jehová gonyibu, famil goxtiguie rabany né guiráyibu racaʼ galnasác (1 Corintios 14:33). Jehová golúbu buñguieeu par guisanir lainy famil. Ndeʼ radudy diitz que Jehová ranab láabu ganbu tzeelbu né xiimbu, né conésbu xfamilbu né galnadxiʼ. Dios sanab cuent láabu ximod cayanbu xfamilbu. Buñguieeu ni rony ni ná Jesús ronladxbu né ragobiobu xfamilbu xomod Jesús  randxiʼdot congregación. Modreʼ, buñguieeu raslooy que nap respet a Jehová (Efesios 5:23). (Bibiʼ ni ná nota 13, «Ni rasanir lainy famil»).

13. ¿Ximod raslooy buñgonaʼ que rap respet xcalmandary tzeʼel?

¹³ Buñgonaʼ ni rasob ni ná Jesús napbu toib dxiin ni rasac lainy xfamilbu. Racnébu tzeelbu portín tzeelbu rasanir galán laniolidxbu. Láabu láaca non guisuidybu xiimbu. Par labúu guisuidybu xiimbu gap respet, nír láabu non gapbu respet (Proverbios 1:8). Láabu rapbu respet tzeelbu né rasobbu ni ná tzeelbu, né órni diti noʼbu de acuerdo né ni ná tzeelbu, rayopybu mod gaibybu tzeelbu ximod ronybu pensary. Buñgonaʼ ni rony ni ná Jesús, láaca racalóbu stoib galnagan pal tzeelbu diti nac Testigo. Per pal nadxiʼbu né napbu respet tzeelbu, sigory sadxin dzú saniiny láabu gony adorarbu Jehová (bíil 1 Pedro 3:1).

14. ¿Ximod raslooy mbiox que rap respet xcalmandary bixios né xinaʼ?

¹⁴ Jehová nigolú nadxiʼbu mbioxien. Né raquiinyibu buñ ni conés layibu. Órni mbiox rasob bixios né xinaʼ, rioʼyibu nakit. Né ni máspa, raslooyibu que napyibu respet Jehová né ragoʼ nakityibu xcalnabany Jehová (Proverbios 10:1). Lainy xidal famil, rioʼ ór nosi buñguieeu o nosi buñgonaʼ rasniʼs xiin. Ndeʼ nigolú nagan. Per pal mbiox rasob layibu, guiráyibu sabanyibu goxtiguie. Nac nitisi nac, guirá famil raché. Per rabanyibu más sacró órni tigaagayibu rasob xilitz Dios. Ndeʼ ronyxiroʼ a Jehová, ni Bisaʼ famil (Efesios 3:14, 15).

15. ¿Ximod raslooyno que napno respet galmandary ni noʼ lainy congregación?

¹⁵ Jehová raquiimbu congregación cristiana par conés lóono né ma bidudybu galmandary Jesús par conés láani (Colosenses 1:18). Láaca Jesús ma golú «mós ni rony xinésni né naní xcalrrien» par gan xcudx Dios ló Gudxlio (Mateo 24:45-47). Ló naareʼ, «mós ni rony xinésni né naní xcalrrien» nac Tidxó buñ ni nap xiroʼ Galnan. Layibu radudyibu ni caquiinno xorpani par gac nadip fe xtunyno. Ancianos, siervos ministeriales né superintendentes de circuit ronyibu dxiin par gacnéyibu congregación ni noʼ ló guidopynac Gudxlio né rasobyibu ni ná Tidxó buñ ni nap xiroʼ Galnan. Guiráyibu non ganyibu lóono né Jehová sanab cuent layibu por mod cayonyibu xchiinyibu. Por ngú órni rapno respet guiráyibu, rony respetarno Jehová (bíil 1 Tesalonicenses 5:12; Hebreos 13:17). (Bibiʼ ni ná nota 14, «Tidxó buñ ni nap xiroʼ Galnan»).

16. ¿Xigony labúu guinino que herman radxin racyibu ancianos né siervos ministeriales por espíritu santo?

¹⁶ Ancianos né siervos ministeriales racnéyibu congregación par gonyibu ni ná Dios né guiguaʼyibu toibsi. Nanno que nacyibu buñ galkié xomodca lóono. Per ¿ximod rabúyibu ni guisanir nislóno? Layibu non gony cumpliryibu né xidal requisitos ni ranab la Biblia (1 Timoteo 3:1-7, 12; Tito 1:5-9). Jehová biquiimbu espíritu santo par golonésbu buñ ni bicaʼ la Biblia né loni sieed guirá requisitos ni ranabbu. Órni ancianos rabú xi herman guisanir  nisló congregación ranabyibu xcalrracné Jehová par guidudy espíritu santo layibu. Radudyno cuent que Jehová né Jesús ragonés congregaciones (Hechos 20:28). Herman ni racné né ran lóono nacyibu toib xcalrrascad Dios (Efesios 4:8).

17. Rioʼ ór, ¿xí non gony toib hermana?

¹⁷ Rioʼ ór, diti noʼ ni toib anciano o siervo ministerial ni labúu gony dxiin lainy congregación. Pal scú nacni, stipnés buñguieeu ni ma goyonis labúu gacné. Per pal diti noʼ ni labúu gony láani, toib hermana labúu gony dxiin ni rony toib hermano ni ma goyonis. Órni racni scú, non coʼbu lairy guicbu, sigory né toib bay o toib xombrel ni rien sacró (1 Corintios 11:3-10). Órni ronybu láani modreʼ, raslooybu que rapbu respet galmandary ni ma bidudy Jehová famil né congregación. (Bibiʼ ni ná nota 15, «Ragoʼ lairy guic»).

18, 19. a) ¿Xí rasuidyno ló Romanos 13:1-7? b) ¿Ximod raslooyno que napno respet buñchiin né stipnés buñ ni nap galmandary?

¹⁸ Ló naareʼ, Jehová radudy lagary que buñchiin gap tidxó galmandary, né non gapno respet layibu. Layibu racaayibu cuidad que guirá gudxrop né gudxyen gony dxiin galán né que guirá buñ gap ni caquiin. Lóono ni nacno cristianos rasobno ni ná Romanos 13:1-7 (bíil láani). Rapno respet «buñchiin» né rasobno ni ranabyibu lóono gonyno. Rasobno ley ni raguiña famil, negosy o layoo ni napno. Por ejemplo, raguiixno impuestos né diti rascúno órni rastzano toib document ni ranab buñchiin lóono. Per ¿xí  non gonyno pal buñchiin ranab gonyno toib cós ni diti noʼ de acuerdo né xiley Dios? Apóstol Pedro goniʼ: «Non guisobdo Dios xomod ni rony mandary xalagary guisobdo buñgudxlio» (Hechos 5:28, 29).

¹⁹ Órni rioʼno nisló buñchiin, xomod jueces o policia, guirá ór non gonyno láani né respet. Mbioxhlas ni nac cristianos láaca rony respetaryibu xomextrayibu né stipnés buñ ni rony dxiin lainy yolayscuel. Né ro ronyno dxiin rapno respet xpatronno ná pal stipnés buñ ni rony dxiin lagarycu diti rony láani. Pal ronyno láani scú, sasuʼno apóstol Pablo ni gop respet buñchiin ná rioʼ ór góc naganni par láabu (Hechos 26:2, 25). Ná órni stipnés buñ diti ragobioo lóono, rapno respet layibu (bíil Romanos 12:17, 18; 1 Pedro 3:15).

20, 21. ¿Xí galnasác sacaʼno pal rapno respet buñ?

²⁰ Rabésno ló toib Gudxlio ro buñ ma diti nap respet saʼ. Per lóono ni nacno xpiin Jehová diti nacno scú. Ronyno xtem par gapno respet guiráxadit buñ. Rasobno ni ná apóstol Pedro: «Colgap respet buñ de guirá clas» (1 Pedro 2:17). Órni rapno respet, buñ radudy cuent. Jesús goniʼ: «Colguisaní guii ni napto nisló buñ. Par guibiʼyibu dxiin galán ni ronyto modreʼ gonyxiroʼyibu Bixiosto» (Mateo 5:16).

²¹ Pal raslooyno respet lainy famil, lainy congregación né stoib lagary, ejemplo galán ni raslooyno labúu gonyni que stipnés guiniiny gan de Jehová. Láaca, órni rapno respet stipnés buñ, raslooyno que rapno respet Jehová. Ngú ragoʼ nakit xcalnabanybu né raslooyno que nadxiʼno láabu.