LESIONY 44
¿Racacuent Dios guirá lanii la?
Jehová rioladx guibanyno sacró né láaca raniiny láabu gonyno tipnés galnakit. Per ¿racacuent Dios guirá lanii la? ¿Ximod labúu guislooyno que ronladxno láabu né que rioʼno galrrasaʼ ximod rasacbu?
1. ¿Xigony diti racacuent Jehová xidal clas lanii?
Sigory sadziguiaʼlo órni ganlo que xidal lanii, nacni lanii pagan o diti bireʼni ló xcalrrasuidy la Biblia. Sigory guirá lanii reʼ radzakni né guirá religión falz, o radzakni né galchiser o rabeʼ loguiaʼni que alma diti raity. Láaca tipnés costumbres rareʼni ló crenys ni nap buñ o radzakni né suert (Isaías 65:11). Por ngú diti radziguiaʼno ni raiby Jehová xpiin: «Colguireʼ tiplad [...] né ma diti canto cós buidy» (2 Corintios 6:17). a
2. ¿Xí láani rony pensary Jehová de guirá lanii ni rasanadx a buñgudxlio?
Jehová raiby lóono que diti gacno xomod guirá buñ ni «rap confianz ló buñgudxlio», portín nacni toib tramp (bíil Jeremías 17:5). Tipnés buñ ronyibu lanii par guisanadxyibu gobernantes o héroes nacionales. Ló stipnés lagary ronyibu xilanii independencia o símbolos xomod bandera (1 Juan 5:21). Né stipnés lagary láaca ronyibu lanii ni radzak né política. Pal nigolú nasanadxno toib buñ o toib organización, xpensarylo, ¿ximod nasac Dios?
3. ¿Xí láani labúu ñony que diti nacacuent Dios toib lanii?
La Biblia ná que mal tudy midid gueʼ buñ vino, gony buñ lanii ni radudy ló midid, né guidop buñ par guisoch (1 Pedro 4:3). Ló tipnés lanii buñ ranit xpensary né ma cuenunysi rony. Pal raniiny lóono gacrano ximig Jehová, galsitno de guirá cós mal reʼ.
NANOY GUISUIDYNO LÁANI
Ganno xi labúu gonylo órni tzeelo toib lanii né modcu labúu coʼ nakitlo xcalnabany Jehová.
4. Diti tzeelo lanii ni diti racacuent Jehová
Colgoʼol Efesios 5:10 né colgooy xtiitzni:
-
¿Xí láani non guientzaayno órni coʼno guicno pal gonyno toib lanii o yaca?
-
¿Xí lanii rac lagary ro rabéslo?
-
Xpensarylo, ¿racacuent Jehová láani la?
Por ejemplo, ¿ma gonabdiitzlo looy toibtica buelt xí láani rony pensary Dios órni buñ rony cumpleany la? Ni toib lagary ló la Biblia diti sieed pal toib xpiin Dios goyee ló lanii de cumpleany, per rasetlani de chop cumpleany ni buny buñ ni diti buny adorar láabu. Colgoʼol Génesis 40:20-22 né Mateo 14:6-10. De ngú colgooy xtiitzni:
-
¿Xigony toibsi midid nac guiropca cumpleany reʼ?
-
Ni ma bíilno chop historias reʼ, xpensarylo ¿ximod rabiʼ Jehová cumpleany?
Ná scú sigory ranabdiitzlo looyca: «¿Rioladx Jehová que goni toib cumpleany o tzaʼya toib lanii ni diti radzak né ni ná la Biblia la?». Colgoʼol Éxodo 32:1-8. De ngú colguibiʼ VIDEO reʼ né colgooy xtiitzni:
-
¿Xigony non ganno xí láani racacuent Jehová?
-
¿Ximod ronyno láani?
¿Ximod labúu ganno pal racacuent Dios toib lanii?
-
¿Rareʼni ló galrrasuidy ni diti rony apoyar la Biblia la? Par ganlo pal nacni scú biyopy información pu golanyni.
-
¿Rasanadxni buñgudxlio, organización o símbolos xomod bandera la? Lóono ronyxiroʼno Jehová ló guirá cós né rapno confianz que láabu sabeʼbu guirá galnagan ló Gudxlio.
-
¿Guirá ni rac ló lanii radzakni né ni rony mandary Dios ló la Biblia la? Non gacno nayaa ló sentido moral.
5. Gocné stipnés par gapyibu respet ni ronylo crer
Labúu guisac naganno guinino que «yaca», órni stipnés buñ rakíil lóono tzoʼno ló toib lanii ni diti racacuent Jehová. Goniʼ né paseins né respet xigony diti rieelo ló toib lanii. Par labúu ganlo xi láani buny toib buñ ni godudy modreʼ, colguibiʼ VIDEO reʼ.
Bíil Mateo 7:12 né colgooy xtiitzni:
-
Mod ná versículo reʼ, ¿non gaibylo xfamilo ni diti nac Testigo diti gonybu toib lanii la?
-
¿Ximod labúu guislooylo xfamilo que rasacyibu né que ronladxlo layibu ná diti rioʼlo ló lanii ni ronyibu?
6. Jehová raniiny que tzoʼno nakit
Jehová rioladx tzoʼno nakit né xfamilno né ximigno. Colgoʼol Eclesiastés 8:15 né colgooy xtiitzni:
-
¿Ximod raslooy versículo reʼ que Jehová raniiny tzoʼno nakit?
Jehová láaca raniiny que xpiimbu tzoʼ nakit né guiguaʼyibu sacró né saʼyibu. Colguibiʼ VIDEO reʼ par guidudyto cuent que ndeʼ rareʼ loguiaʼ ló samblia internacional.
Colgoʼol Gálatas 6:10 né colgooy xtiitzni:
-
¿Raquiin gonyno lanii par gonyno cós tzaay por stipnés buñ la?
-
¿Xí clas galrrascad raniiny looy guidudylo: ni radudy buñ de mal gan la o ni radudy buñ né guidopy xcalnabany?
-
Xidal Testigos ronyibu tipnés galnakitien par xiinyibu, né dada rioʼ ór radudyibu galrrascad xiinyibu. Pal noʼ xiinlo, ¿xí cós labúu ñonylo por layibu?
TIPNÉS BUÑ NÁ: «Diti noʼ pu raquiin gan buñ pu golainy lanii. Ni más rasac láani ngú tzoʼ buñ nakit né xfamil né ximig».
-
¿Xí nacapylo?
¿XÍ BISUIDYLO?
Jehová raniiny que tzoʼno sacró né xfamilno né ximigno, per diti rioladxbu tzoʼno ló lanii ni diti racacuentbu.
Repas
-
¿Xí galrranabdiitz gonyno lóocano par ganno pal racacuent Jehová toib lanii?
-
¿Ximod labúu gacnéno xfamilno né ximigno par guienyibu xigony diti rioʼno ló toib lanii?
-
¿Ximod nanno que Jehová raniiny tzoʼ nakitno né guibaladxno?
PAR GANLO MÁS
Bíil xi clas lanii diti rony cristianos.
«¿Xigony testigos xtuny Jehová diti ronyibu tipnés lanii?» (Artículo ni sieed ló jw.org)
Bisuidy tap cós ni raslooy xigony diti racacuent Dios cumpleany.
«¿Xigony testigos xtuny Jehová diti ronyibu lanii dzú rasaʼyibu íz?» (Artículo ni sieed ló jw.org)
Bibiʼ ximod toib mbioxhlas bislooy respet órni guirá xcompañerbu bixiich de láabu xigony diti ronybu Laninin.
Xidalguixo cristianos diti ronyibu Laninin. ¿Rabaladxyibu por ni diti ronyibu láani la?
«Bidzelyibu cós ni más galán» (Guiich ni caniʼ, 1 de diciembre íz 2012)
Sigory láaca sioladxlo ndeʼ
NI MÁS RANABDIITZ BUÑ
¿Ximod rasuidy testigos xtuny Jehová buñ?
Órni guisuidylo né testigos xtuny Jehová labúu guiquiinlo nitisi traducción xtuny la Biblia. Labúu guiruʼlo guirá xfamilo né ximiglo par gony compañer looy.
