Runy nigolú rasacni. Diti labúu nabanyno pal diti ñapno láani. Dios bisaʼ lóono, por ngú láabu non guiniʼbu ximod non guiquiinno láani. ¿Xí láani nábu de runy? ¿Labúu guá buñ láani xomod ro buñ toib galrro o labúu coʼno láani laidyno la? ¿Né xí labúu gacné looy par gonylo xinésni?

1. ¿Ximod rabiʼ Jehová runy?

Ló dzú ni see, Jehová gochbu xpiimbu: «Vida xtuny guirá clas beʼel ngú runy» (Levítico 17:14). Par Jehová, runy rony representarni vida. Né vida nacni xcalrrascad Dios, ni nac nigolú nayaa né sagrado, por ngú runy láaca nacni sagrado.

2. ¿Radudy Dios lagary lóono guiquiinno runy la?

Antes ni ñoʼ congregación cristiana, Jehová gochbu xpiimbu que diti non ñooyibu runy (bíil Génesis 9:4 né Levítico 17:10). Né órni ma goyoʼni, Jehová goniʼ láani stoib. Tidxó buñ ni gop xiroʼ galnan né grupo de apóstoles né ancianos ni gosanir lainy congregación bidudy instrucción reʼ a guirá cristianos: «Diti guicaʼto runy» (bíil Hechos 15:28, 29).

¿Xí radudy diitz diti guicaʼno runy? Pal doctor ñaiby looy que diti guiquiinlo alcohol, diti ñeʼlo láani ¿ja? Per ¿ñoʼlo galrro ni nap alcohol o nagoʼlo láani ló xinesrunylo la? Yaca. Né modcuca non guibiʼno runy. Órni rasobno ni rony mandary Dios radudyni diitz diti guáno nili diti gueeno runy né diti guáno beʼel ni nap runy. Láaca diti non guáno galrro ni notz runy.

¿Né pal raquiinno runy xomod remeidy ga? Tipnés remeidy ni raquiin doctor diti noʼni de acuerdo né ley xtuny Dios, xomod transfusiones ni nap xiroʼgolu runy: glóbulos rojos, glóbulos blancos, plaquetas né plasma. Per rioʼ ór diti rienni pal cachéno ló ley xtuny Dios. Por ejemplo, noʼ tipnés remeidy ni raquiin tidxósi runy. Né rioʼ ór raquiinyibu xirunyca ni caxoʼ. Ni ma bisuidyno guirá ndeʼ, tigaaga buñ non gan xi láani gony (Gálatas 6:5). a

 NANOY GUISUIDYNO LÁANI

3. Buny cós ni rioladx Jehová

¿Ximod labúu gonylo xinésni par guibiʼlo runy xomod rabiʼ Dios láani? Colguibiʼ VIDEO reʼ né colgooy diitz xigony rasac guisoblo ni sieed ló reʼ:

• Gonab lóo Dios sabiduría (Santiago 1:5).

• Biyopy textos ni sieed ló la Biblia ni radzak né láani, né gon ximod guisoblo ni náni (Proverbios 13:16).

• Gon xi clas remeidy noʼ lagary ro rabéslo.

• Gon xi clas remeidy diti non guicaʼlo.

• Gon que ni coʼlo guiclo gonylo diti gonynudyni xcalrrienlo (Hechos 24:16). b

• Gon que ni toib buñ nili tzeʼelo, toib anciano o mextra ni rasuidy looy ni ná la Biblia diti layibu non gaibyibu looy xi láani non gonylo (Romanos 14:12).

• Bicaʼ ló guiich xi láani ma goloʼlo guiclo gonylo.

4. Testigos xtuny Jehová rayopydo remeidy ni más galán nac

Órni rasobdo xiley Dios ro ritlaa de runy diti radudyni diitz que diti labúu gacdo remeidy ni más galán nac. Colguibiʼ VIDEO reʼ.

Colgoʼol Tito 3:2 né colgooy xtiitzni:

• ¿Xigony non guiyopyno mod né gapno respet órni gaibyno doctor xí clas remeidy gacno?

 5. Fracciones de runy

Runy napni tap cós xomod: glóbulos rojos, glóbulos blancos, plaquetas né plasma. Né tigaaga cós reʼ nacni tipnés cós mitien, ni rimbu buñ xomod fracciones de runy. c Tipnés fracciones raquiinni xomod remeidy par guisialni tipnés galguitz o par guiquetni ló runy.

Órni rasetlani de fracciones de runy, tigaaga cristianos non gan xi láani gony mod ma bisuidyibu ló la Biblia. Sigory tipnés diti racacuent remeidy ni nap fracciones de runy per stipnés cristianos racacuent láani.

Par ganlo xi láani gonylo, gonabdiitz ndeʼ looy:

• ¿Ximod labúu gaabi doctor xigony diti racacuenta o xigony racacuenta fracciones xtuny runy?

 ¿XÍ BISUIDYLO?

Jehová diti rioladx cuenunysi guiquiinno runy.

Repas

• ¿Xigony ná Jehová que raquiin gapno respet runy?

• ¿Xigony nanno que ni rony mandary Dios diti guicaʼno runy láaca raguiñani transfusiones de runy?

• ¿Xí labúu gacné looy par ganlo xí láani gonylo órni gaiby doctor looy guicaʼlo runy?