Jehová raniiny guimbutzaaylo láabu. ¿Xigony? Portín Dios nap confianz que órni ma rimbulo cualidades xtunybu né ni caa guicbu gonybu, más saniiny looy gaclo ximigbu. Per ¿xí nigolúpa labúu gac buñ ximig Dios la? (Bíil Salmo 25:14). ¿Xí labúu gonylo par labúu gaclo ximigbu? La Biblia rabexa láani, né raibyni lóono pal radzakno Jehová ngú ni más rasac.

1. ¿Xí ná Jehová guidudy looy?

«Colguibig ronoʼ Dios né láabu sabigbu ronoʼto» (Santiago 4:8). ¿Xí radudyni diitz? Que Jehová ná gac ximiglo. Sigory noʼ tipnés buñ ni rasac nagan guidzakbu buñ ni diti labúu rabiʼbu né ni máspa la Dios. Ló la Biblia sieed guirá ni raniiny Dios ganno de láabu par labúu guibigaxno ronoʼbu. Órni rolno la Biblia radzaktzayno Jehová más ná diti labúu rabiʼno láabu.

2. ¿Xigony diti noʼ stoib amig xomod Jehová?

Diti noʼ stoib ni ronladx looy xomod Jehová. Raniiny láabu guibaladxlo né guiyopylo láabu ortísi caquiinlo láabu. Labúu gaibylo Dios «guirá galrrasaʼ» ni cacalólo portín láabu rioʼbu galrrasaʼ por looy (1 Pedro 5:7). Jehová puextca noʼbu par gacnébu, par guisialdóbu né guicadiagbu ximigbu (bíil Salmo 94:18, 19).

3. ¿Xí ranab Jehová gony ximig?

Jehová nadxiʼbu guiráxadit buñ, per «radzaktzaybu buñ ni rony xinésni» (Proverbios 3:32). Jehová ranabbu ximigbu gony cós tzaay né diti gonyibu cós mal. Sigory tipnés buñ rony pensary que diti labúu gonyibu ni ná Jehová. Per láabu riembu buñ né racacuentbu guirá ni nadxiʼ láabu, né ronyibu rutirigaʼlni layibu par coʼ nakityibu xcalnabany Jehová (Salmo 147:11; Hechos 10:34, 35).

 NANOY GUISUIDYNO LÁANI

4. Abrahán góc ximig Jehová

Historia xtuny Abrahán, ni láaca góc laa Abrán, raslooyni lóono xi radudy diitz gacno ximig Dios. Colgoʼol ro ritlaa de Abrahán ló Génesis 12:1-4 né colgooy xtiitzni:

• ¿Xí gonab Jehová a Abrahán ñony?

• ¿Xí goniʼ Jehová guidudy láabu?

• ¿Xí buny Abrahán después ni cuaʼbu instrucciones xtuny Jehová?

5. Ni ranab Jehová gony ximig

Casi guirá ór rabésno que ximigno gonyibu cós tzaay por lóono.

• ¿Xí raniiny looy gony ximiglo por looy?

Colgoʼol 1 Juan 5:3 né colgooy xtiitzni:

• ¿Xí ranab Jehová gony ximig?

Par labúu guisobno Jehová, sigory napno xi de guitzaʼno mod nacno né mod ronyno. Colgoʼol Isaías 48:17, 18 né colgooy xtiitzni:

• ¿Xigony ranab Jehová que ximig guitzaʼ mod nac?

 6. Ni rony Jehová por ximig

 ¿XÍ BISUIDYLO?

Jehová raniiny gaclo ximigbu né láabu sacnébu looy par labúu guibigaxlo ronoʼbu.

Repas

• ¿Ximod racné Jehová ximig?

• ¿Xigony raiby Jehová ximig que guitzaʼyibu mod nacyibu?

• Xpensarylo, ¿Jehová nigolú nanoy né ximig la? ¿Xigony ronylo pensary scú?