Mápa mer sadopy xpaseins Jehová né gudxliogoxreʼ. Órni gacni, sanitló guirá religión falz, tipnés gudxrop sacyibu toibsi né sacalóyibu xcudx Jehová né Jehová sanitló guirá buñ mal ló Armagedón. Guirácano ma raniiny lóono gac guirá ndeʼ.

Noʼ tipnés cós ni diti nanno ni gac ló gran tribulación. Por ejemplo, diti nanno pu ór salóni. Láaca diti nanno xi razón guidudy gobierno par guicalóyibu guirá religión. ¿Balac tiemp guicaló gudxrop xcudx Jehová, né ximod gonyibu láani? ¿Né xí láani sony Jehová par guinitlóbu buñ mal ló Armagedón? Diti nanno láani.

Diti non guidzuibyno ni gac ló dzú ni sietra, portín la Biblia raiby lóono ni raquiin ganno par diti guidzuibyno. Por ejemplo, nanno que ma nabanyno ló último dzú de «dzú ni ma guidubylagaʼ» (2Ti 3:1). Nanno que Jehová «sascueʼs» ló gudxrop órni cacalóyibu religión par diti guinitló xcudxbu (Mt 24:22). Láaca nanno que Jehová salaa xcudx (2Pe 2:9). Né nanno que Jehová ma golúbu toib ni rony xinésni né nap galnadip par guinitlóbu buñ mal né guilaabu xidalguixo buñ ló Armagedón (Ap 19:11, 15, 16).

Órni gac guirá ndeʼ buñ sietgueʼel lóo por galnadzuʼpy (Lu 21:26). Per lóono yaca. Pal rolno né ronyno pensary ximod bilaa Jehová xcudx ló dzú ni see, né ni ma gochbu lóono gac ló dzú ni sietra, sapno confianz ló ni ná Lucas 21:28: «Colguisagaʼ né colguilís guicto, portín mápa mer guilaato».