ADezire Yekova namanga nyanyakipa sunge tipa ka undo aboro rogo aringara naima susa 200. Ono aringara gbua 35 dagba agu aringara re du na rengba kaa ngbe gayo ahe. Waigu i angerafuo agu aringara adunga bakere marã beyo ya?

 Riigbu Bipasunge nga ga aDezire Yekova nawisigopa agu azingo gbiati asunge nga ga akurayo aDezire Yekova rogo zegino dunduko. I nabanda marã na kini mangisunge na u ngba wene gene. Ka si du nga be-basunge gbia marã kisusi gu si aidaha tipa si undo na agu asunge namanga rogoho, si nakeda bete gu marã re ku rogo agu aringara adunga marã behe rengbe arengba ya. Gi mbakadapai re napekafuo gu kpiapai nangia ga agu aKristano naadu mbata, nga aguyo naundo akurayo nimangayo pai “tipa ringbisa pai” watadu tipa ahe du beyo kina sa. (2 AKorindo 8:14) I amangisunge na agu ahe naadu beyo ni bakerehe tipa ka undo agu aKristano naadunga na ahe beyo rengbe arengba ya.

 Waigu du agu awirina gbia undo be gu kura abe-basunge abi gu undo re? Ni kpiapai, i amangisunge na ngbatunga gu gamahe re tipa ka mbakada gu Bambu Kindo gu dungurati nga Mafinga aamanga adunguratise rogoho Tanzania yo, nga gu ringara badungu aboro araka ngba adorari ue rogo uru yo. Gu dungurati re akepai nga: “Wa i ambakadi gaani Bambu Kindo berewe, badungu aboro ninaaye tipa gaani adunguratise! Ani nafu bakere tambuahe fu ga Yekova riigbu gbiati agu awirinarani du rogo zegino dunduko tipa gu gayo sino nga ga gamahe nga gu sa gupai nga ani gbia ngbarago ti bawene ba irisombori wa gere.”

 Gu kura awirinarani du rogo gu ringara nga Sri Lanka ima rungo tipa zingo riahe mbiko agu apai gu ririkaza nga Korona naye na ni. Imara Fernando na tooni wiiri nga Enosh nga agu aboro du dagba agu aboro yo naima rungo tipa zingo riahe. Ono wa vura duhe wo, ani na tambuahe tipa agu agamahe naye rogo kura aringara, Imara Fernando na tooni wiiri nga Enosh ima gbia gu undo si aidaha. Rogo gu wiri waraga yo i akehe ni beyo, i aya: “Ani nafu tambuahe fu agu awirina nayugu nyemuse furani ti gi kpakarakpakara aregbo re. Ani nzunzu na ngbarago kadu ni papara gi riikporo re, na ani nikaa ndu kindi kumbatayo kaa manga kparakpee nga Yekova ninaaundo awirinarani dunduko ti gi yangara arame re.”

 Ka awirinarani vura kaa raka kina rogo gini aba vurũ, ngbaduyo yo nafõ yo afõ i gamu agu ahe du beyo. Ni kpiapai, Enosh ambakadi tooni sanduki kaa banda marã rogoyo tipa gupai nga wa ka ko rengbe a ka fu ru ni gamahe si undo agu aborokporo du na zingo. Guadalupe Álvarez ayugu kina gu ngbatunga toro nga ga gamahe re. Ri naraka rogo gu papara Mekisiko bete aboro agbia kina bete marã ni watadu i agbianga marã ni dedede ya. Ono wa vura duhe wo, ri nafu guhe afu du ri na rengba ka fuhe fu riigbu. Ri akepai nga: “Mi nafu bakere tambuahe fu Yekova tipa gako wenesino gbiati bangabanga nyemuse. Mi ima ino gupai nga i nika gbia gimi agamahe agbia kuti ga kura aboro na si nika undo agu awirinina aundo du rogo zingo.”

 Agu abe-basunge nakeda marã ku rogo agu aba du na zingo na ngbarago ka mangaha wo. Anthony Carvalho, nga gu ko namangasunge rogo Rondo nga ga Be Basunge Braziri yo aya, “Tipa dungu agarã, gu sunge naadu rogo gaani ringara aaida gupai nga kura aringara naasongoda rani asongoda na marã. Mbiko gi undo re, ani aima bi wai bakere sonakumbatayo aamanga. Awere tie, agu apai du tipa rani nibipa marã ima ariatihe, na ani na gu momu nga ga undo kura aboro. Awirinarani vuru Braziri nabi gu sunge nga ga tungusapai rogo zegino dunduko na ki bi gupai rengbe yo ka mangaha tipa ka undo.”

 Waigu rengbe aDezire Yekova gbe ka undo agu awirinayo du rogo zingo? I rengbe ka undo nifu yo gamahe tipa gu sunge namanga rogo zegino dunduko, angianga ka keda marã ku rogo agu abe-basunge du rogo kura aringara ya. I rengbe ka fu gi gamahe re rogo gayo adungurati ku rogo gu sanduki nga ga gamahe du na gu kekepai ti ni nga Gu Sunge Namanga Rogo Zegino Dũ [“Worldwide Work”] watadu rogo donate.jw.org. Ani nabi ngbatunga agu agamahe re dunduko na nyanyakipaha.