Mbata fu mo mangipai, mo ima rengba ka berã tipaha nga, ‘Boro gini undo mi nika gbiaha ti ni?’ Ya mo rẽnga ha boro sana ngbatunga sanahe wa gure tipa kparakpee te? Boro anga wo duhe nzunzu te. Ani naida ka ino singia wenepai ho si amangaha furani.

Rogo gu kekeapai ye mbata fu gere, ani abi agopai yo naayugo gupai nga anga kparakpee gbua nga gu kungbopai aboro-pambori amangaha dedede watadu gu kura ngbatunga ziga te. Ndikidi Mbori nadegatuko adega nzunzu kuti kparakpee. Ka ani kpari ngba ruru gene tipa ruruapai, ko nagiaha agia. Nirengo, ko nazungodi rani ani mbedi na ko. (Yakoba 4:8) Sidu, ginihe rengbe ani ka maaberã rani tipaha ka si du nga ani sa kparakpee ni papara gaani raka? Ani wisigingo gu bete aundo rengbe ani ka gbiaha.

Ho akpakarapai gbiati fudifudiapai akura ni ku rogo gamo raka yo, ya mo mo naabihe nga si ima susa omero? Ti ngbatunga aregbo wa gure, Ziazia Kekeapai nangarasa rani ka ani “pirigi nga ti kpara kpe ya” na ani ‘yúgu gaani sanahe fu Mbori.’ (1 ATesaroniko 5:17; AFiripoio 4:6) Ziazia Kekeapai nakido rani nga ka ni kpari fu Mbori, ‘gu zereda nga ga Mbori nagasi rugatinapai dunduko, si abánda kpotorani yo na gaani aberã.’ (AFiripoio 4:7) Ani rengbe ka gbia zereda berãrani yo ni kusuko ani agu apai ani abakabangirani tipaha fu gu Barani du ngbangbaturũ yo. Nirengo, ko nangarasa rani ani mangihe wo rogo Atambuahe 55:22 niya: “Mo bá ga tindiro ku auru Yekova, ko asóngoda ro.”

Badungu aboro rogo zegino dunduko nagbia gi zereda re. Hee Ran du South Korea yo aya: “Wa vura  duhe nga mi na kere akpakarapai tire, bara sa kindi mi nakpari tipaha, mi nagbia ongoda behe na kini bihe nga ome kina tire tipa ka hipai.” Cicilia du Philippines yo aya: “Wangia mi naagude, wo mi naabaka bangire tipa awire nga adegude gbiati nina adunga gene beri awere tipa ka ino re ya. Ono mbiko kparakpee, gene kina bere tipa ka manga gimi apai naʹauru dunduko zanga gunde. Mi ima inoho nga Yekova nika undo re aundo tipa mi ngerefuo yo.”

Ya mo mo ni fudifudi ro ni kerehe berãse yo, isoke mbiko kerepai namaa ga raka ngbapai watadu gu kura kerepai? Kpara fu “Mbori wasa dunduko” rengbe ka ye na bakere ongoda. Ziazia Kekeapai naya ko nafu “wasa fu rani rogo gaani gberãngbi yo dunduko.” (2 AKorindo 1:3, 4) Ni kpiapai, ti kura regbo sa ho Yesu adu ni ni fudifudi ko ni bakerehe, ‘ko  akuku ki nikpari.’ Sangbanaha angia gine? “Maraika ki ye koyo du ko ni, ki ninyakasi ko.” (Ruka 22:41, 43) Gu kura ruru kumba nangia Nemaya agbiatiko na rungo be gbegberẽ aboro nga aguyo naasada ka zako ti manga ga Mbori sunge. Ko akpari ki ya: “Awere, Ako Mbori, mo nyákasi bere awere.” Agu apai namangi fuoho nayugoho nga Mbori aima undoko nzunzu ko dibe gako gunde na kidu na diabese rogo gu sunge ko aamangaha. (Nemaya 6:9-16) Reginald du Ghana yo afura tipa gako bipai tipa kparakpee ki ya: “Ho mi akpara ni, gbe ti regbo kere akpakarapai, mi nabihe nga mi ima peka agu apai du tipa re fu gu boro du na gene beni tipa ka undo re na nakido re nga ka mi gundenga ya.” Nirengo, Mbori rengbe arengba ka fu wasa furani ho ani akpara ni fuko.

Gu kura adiaberã kinaho ani amangaha rengbe kadu na bakere ariapai kurirani nyeanye kindi gbiati agu aboro ani akpinyemu yo. Wai rengbe ani ka manga gu diaberã nga ga tatamana? Ziazia Kekeapai naya: “Ka zingo tatamana amanga gu ni dagba roni yo, ni sána Mbori, ninafu he gbe fu aboro dunduko, azinga nga fu boro ya; ko ki fu he afu fu ni.” (Yakoba 1:5) Ka ani kpari tipa tatamana, Mbori rengbe ka mangasunge na gako ziazia toro ka undo rani ani mangi ruru diaberã. Nirengo, ani rengbe arengba ka sanahe tipa ziazia toro mbiko Yesu akido rani nga Barani “na gama Ziazia Toro fu agu yo nasana ko.”—Ruka 11:13.

Zavura kina Yesu, ko aima sana Bako tipa undo ho ko aamanga nyanyaki diaberã ni. Ziazia Kekeapai naya, ho ko aaida ka sia akumba ni 12 i mangisunge ni gako amokedi, ‘ko akpari akpara fu Mbori yuru sasasa.’—Ruka 6:12.

A wa si adu tipa Yesu, badungu aboro na maabangirise ho i nabi wai Mbori akaragapai fuyo kuti gayo sanahe tipa tatamana. Regina du Philippines yo ape agu kpakaraapai ni bakiakia ri agbia tiri na ni, wa ngerafuo tiri na gari aborokporo fuo kpio kumbari, zanga sunge marã, na gu kpakarapai nga ga sonosa awiiri ue. Ginihe naundo ri tipa ri mangi ruru diaberã? Ri aya, “Mi akido kuti gu undo nga ga Yekova rogo kparakpee.” Kwabena du Ghana yo ape gupai ko asana Mbori ti ni tipa undo ki ya: “Mi azanga gu sunge mi aazio wene marã ti ni nga ga dua abambu.” Nibipa wisigo agu apai du tipa ko, ko aya: “Mi anaakpara dedede fu Yekova tipa ko ngbe fere mbatayo wa ka mi mangi ruru diaberã.” Ko ape kurapai nga: “Nirengo, mi nabihe nga Yekova aima undo re tipa mi sia gu sunge narengbe ka undo re mi ngerefuo gimi aborokporo rogo toro yo na rogo borose yo.” Mbori ima rengba ka undoro wakina gure a ka mo kpari fuko tipa agu apai rengbe ka manga ariapai na gamo pagume na ko.

Ani fura kina tipa gu bete apai rengbe kparakpee ka mangaha foro. (Ka mo aida ka ino kura akpiapai, mo bi gu sanduki nga “ Agu Aundo Ani Agbiaha ti Kparakpee.”) Ono tipa mo gbia agu aundo re, gu bambatapai si aida mo mangihe nga ka ino Mbori na gupai ko akpinyemuhe. Kangia gere nga gupai mo aidaha, ani nangarasa ro mo sana aDezire Yekova i undoro ka wisigo Ziazia Kekeapai na mo. * Gere kangia bambata diandue foro tipa mo mbedi na “gu ko ninagia kpetambuahe!”—Atambuahe 65:2.