1, 2. Gini ngbatunga sonakumbatayo si aida aKristano dunduko mangi ome tipaha? Oni funga kpiapai.

HO GU de-kporo du na inohe aida ka ngbe rindi-angua ni nzengu yo, ri asiakanga kina gu du ni kikindigi he watadu gu du geno ho kusende te. Kuba gure, ri nagbata agu niima zama. Ri naida na gu rindingua du ni nzinzirihe du na wene fuoho na du ni wenehe tipa kpotose. Nirengo, ri nasiaka kina agu arindingua naima nyaka.

² Tingbafuo boro mangi sonakumbatayo ki kpara gani raka fu Yekova na ki zi bapatiza, ni nasona kumbatayo kindi. Gani sasa nga kada ni gu ga Mbori moyambu naima nyaka rogo toro yo. Gu nyaka ani afura tipa ha re, anga si nga ga borose te ono ga toro. Gu mokedi nangia Pauro ake waraga fu agu aKristano naadu Efesa yo nga si naida i sono rogo toro yo. Ko angarasi yo nga i da “ti gu du sa nga ga idapase, na ga ina Wiri Mbori, sa du ni bakumba, sa rengba na sona gu hibepai nga ga Kristo.”​—Ef. 4:13.

3. Ginipai naadu rogo gu dungurati naadu Efesa yo nga gu du areme dagba ga Yekova aboro?

³ Ho Pauro ake waraga ni fu gu dungurati naadu Efesa yo, gu  dungurati re aima dia bete agarã ti gu regbo re. Badungu agu abawiriki naadu yo aima du na inohe rogo toro yo. Ono tie, bete aguyo adu kinaho kindi si aaida i mangi ome ka nyaka rogo toro yo. Agu apai du dagba aDezire Yekova areme wakina gure a. Badungu awirina nga akumba na adee ima mangasunge fu Yekova tipa dungu agarã na i ki ima nyaka rogo toro yo. Ono anga i dunduko du wo te. Ni kpiapai, akutu vovo aboro nazio bapatiza na agarã dũ, sidu, bete aguyo kindi si aida i mangi ome ka nyaka rogo toro yo. Na ginipai du tipa ro?​—Koro. 2:6, 7.

4, 5. Wai du rengbe agu aKristano naima nyaka rogo toro yo kadu kia ti akurayo, ono gini asino du tiyo dũ? (Oni bi gu sura du ti tonatonaha.)

⁴ Ho mo awisigo zamba rindi-angua ni nzengu yo, mo nabi gupai nga anga si dunduko du kina sa te. Ono wa vura duhe wo, apai kina dagbaha nayugoho nga si ima zama. Wakina gure a, agu aKristano naima nyaka rogo toro yo, gayo aringara, wai i asonosi yo, kpotoyo, garãyo, na gayo ainohe ni bakiakia. Asino yo na gu sino mangaapai nga ga ngbatunga yo rengbe kadu ni bakiakia a. Ono wa vura duhe wo, agu aboro dunduko nanyaka rogo toro yo i na asino tiyo nayugoho nga i ima nyaka. Wai duhe wo?

⁵ Gu ga Yekova moyambu naima nyaka rogo toro yo, ni napekafuo ga Yesu kpiapai rogo gani raka yo, nga gu ko namoi kpiapai furani ani “peke fuo ko.” (1 Pet. 2:21) Ginipai Yesu aya tipa ha si nga nyanyakipa pai? Ka kpinyemu Yekova na ngbaduse yo dũ, na mbisimose dũ, na berãse dũ, na ka kpinyemu amurakporo kina wai boro akpinyemu tiní. (Mt. 22:37-39) Gu Kristano naima nyaka rogo toro yo namanga ome ka raka kuti gu rugute re. Gu gene ni araka ngbaha nayugoho nga ni nabi gani pagume na Yekova na nyanyakipaha na gu nyemuse du ni na ni tipa kura aboro.

6, 7. (a) Gini asino nayugo gu Kristano naima nyaka rogo toro yo? (b) Ginipai ani ka wisigoho?

⁶ Ono tie, gupai ini anihe nga, nyemuse gbua nga papara zuzu toro sa gu Kristano naima nyaka rogo toro yo ayugoho. (Gara. 5:22, 23) Agu akura apaparaha du wa zera, zatise, na zerangbaduse na kina nyanyakipaha a. Si rengbe ka undo ni ni dibe kpakaraapai zanga ni zingi na ki sa ni ni ta hi agberarago kidu na maabangirise. Ho ni amanga gani wisigopai ni nisase, ni nagbata agu abangua-rugute rogo Ziazia Kekeapai yo rengbe ka undo ni ni ini gupai du ni ruruhe watadu irairaha. Fuo gure, ho ni adiaberã ni, ni nayugoho ayugo nga ni ima nyaka rogo toro yo. Ni kpiapai, ni nadegatuni kuti sangbakpotoniyo ni narabaha kuti Ziazia Kekeapai. Gu nyanyaki Kristano re nayugo umbasitise ni ino ni gupai nga ga Yekova agene na arugute ti aregbo dũ ngba kisusi gani. * Ni natungusa wene pangbanga zaaza na kini fubee tipa gu kodatise nga ga dungurati.

⁷ Ka si vura dunga ani ima iriso Yekova tipa dungu agarã, ani ni basasa si aida ani sana tirani nga, ‘Ya mo abangiriaba ho si aida mi wiriki Yesu rogoho, tipa kaa sona ku mbatayo kindi rogo toro yo?’

8. Ginipai rengbe ani ka gumbaha tipa gu inohe Yesu adu na ni tipa Ziazia Kekeapai na wai ko agirogoyo?

⁸ Yesu aima giarogo Fugo Mbori yo wenengai. Zavura ho garãko adu ni 12 gbua, ko aima rẽ ka saka agu apai nga ga toro na agu abayugupai naadu yekaru yo. ‘Gako rugatinapai  airiwo ti aguyo dunduko nagi pa ko na gako karagapai.’ (Rk. 2:46, 47) Kusa, ti regbo gako sunge tungusapai, ko amangisunge na Fugo Mbori ngba wene gene ka ongosa asogoko.​—Mt. 22:41-46.

9. (a) Gini ngbatunga agene wisigo Ziazia Kekeapai du na nyanyakipaha fu gu boro naida ka nyaka rogo toro yo? (b) Ndu wisigo Ziazia Kekeapai nga gine?

⁹ Nibi gu kpiapai Yesu amoi he re, gu Kristano naida ka nyaka rogo toro yo arengbanga kina be gu ngbarangbara inohe du ni na ni rogo Ziazia Kekeapai yo te. Ni nadia regbo dedede kaa wisigo agu apai du rogoho dudunguro, ki ini gupai nga “nyanyaki riahe du tipa sosono aboro.” (Eb. 5:14) Si tie ziazia nga, gu Kristano naima nyaka rogo toro yo ni naida ka “ina Wiri Mbori.” (Ef. 4:13) Ya mo mo na mbakadapai bero kaa geda Ziazia Kekeapai na aʹuru dũ? Ya mo mo napekafuo gu mbakadapai nga kaa wisigopai nisase, kini mangi ome kaa dia regbo rogo aposo dũ tipa gu irisombori nga ga aborokporo? A wa mo nikaa wisigo Fugo Mbori, mo asadi ka bi gu bangua arugute nga ga Ziazia Kekeapai rengbe ka undoro tipa mo bi ga Yekova aberãpai na abipai ziazia. Fuani, mo ki asadi ka mangapai kuti gu bangua arugute re, na kini mangisunge na ni ka manga gamo adiaberã, rogo gi gene re, mo nikaa mbeda na Yekova.

10. Wai du gu inohe nga ga gu Kristano naima nyaka rogo toro yo amaapai kurini na aʹuru dũ?

¹⁰ Gu Kristano naima nyaka rogo toro yo ima ino gupai nga anga kina inohe gbua si aida ni du na ni te. Kupati gupai ni nainihe re, si naida ni kpinyemu gupai ni nainihe tipa ga Mbori agene na gako abangua arugute. Gene sa ni ayugo gu nyemuse re ngbaha nga ka maa agu apai mbatayo rogo gani raka Mbori aidaha kuba gu nyemupai nga  ga aboro. Kurigure, gu Kristano re namanga ome ka maa kuru asinoni na mangaapai “ku sa yo.” Wa Kristano nikaa manga agu aʹariapai re, ni nika maa gu vovo asino duwa ga Kristo, du “ku sangba Mbori yo na rurupai na ziaziapai nga ga rengo.” (Oni gedi AEfeso 4:22-24.) Ga Mbori ziazia toro du naarugu agu aboro nake Ziazia Kekeapai. Sidu, ho Kristano akiiso gani inohe ni tipa agu arugute nga ga Ziazia Kekeapai na kini kpinyemuhe, ni nazaka ngbaduni na berãni ziazia toro moipai kuriihe. Si kini ye na sonakumbatayo rogo toro yo.

11. Gini apai Yesu agbiatiko na ni auru kpotosende ane nibipa avunguko na gako abawiriki?

¹¹ Ho Yesu adu ni auru kpotosende ni rengberengbe ko, aboro ingapai nake ko kirikiri. Avunguko nasonosi ko angia aboro zangarengba, na ko araki kporo dagba agumeko nangia aboro zangarengba tipa dungu agarã. Zavura mbembedi apefuoko adu na gu sino nga ga gbangbati tiyo nga gu sino naadu ti agu aboro naadu patiyo. Ni kpiapai, rogo gu yuru naadu mbata fu Yesu kpi, i ‘atona ka ti kango, ya da dagba yo du ni bakumbayo.’ (Rk. 22:24) Ono Yesu aima du na kido nga agu apefuoko nangia aboro zangarengba re nika sona asona rogo toro yo na ki koditiyo ka kusa dungurati. Ni kina gu nyemu re, Yesu akpari tipa gako amokedi du na kodatise, ko asana Bako ku ngbangbaturũ yo nga: “I du adu sa dunduko; wa kina ro, Buba, du rogo re yo, mi ki du rogo ro yo, i du rogo rani yo a, . . . i du adu sa, wa kina rani du adu sa.”​—Yo. 17:21, 22.

12, 13. (a) Wai du AEfeso 4:15, 16 anyakasapa du na kodatise rogo dungurati? (b) Wai du wirina sa adibe gako rungbura na ko ki wiriki ka mangapai tipa kodatise?

¹² Gu ga Yekova moyambu naima nyaka rogo toro yo nasonosa kodatise rogo dungurati. (Oni gedi AEfeso 4:1-6, 15, 16.) Gaani sasa du ngaha nga ga Mbori aboro du ni kodikodi yo “dunduko” kina sa na i du nagiatise dagbayo na akurayo. Ringbisihe kuti Fugo Yekova, tipa ani du na kodatise, si naida ani du na umbasitise. Gu wirina nyaki rogo toro yo namangapai na umbasitise tipa kadu na kodatise, zavura ho ni agbia tini ni na agu azangarengba nga ga kura aboro. Wai du rengbe mo ka mangapai ka wirina rogo dungurati mangi gupai angbanga ya? Watadu na ka si du nga mo du gu boro re naingi kutiro rogo dungurati? Ya mo sinoro du ningia ka maa ndugu dagbaro na gu boro ingi kutiro? Watadu mo naasada ka mbakadapai dagbaro na gu boro re? Gu Kristano nyaki rogo toro yo, ni namanga ome nirengo ka mbakadapai dagbani na kurani angianga ka me ndugu ya.

¹³ Oni bingo gu kpiapai nga ga Uwe. Mbata kusayo, ko anaambu gu zangarengba nga ga kura aboro si ni ba gberãrago tiko. Sidu, ko adiberã ka mangasunge na Ziazia Kekeapai gbiati gu buku nga Insight on the Scriptures ka wirikapai tipa gu raka nangia ga Davide. Tipagine ko asia kina ga Davide raka ti ni? Uwe aya: “Davide agbiatiko na gu gbegberẽ mangaapai nangia ga akurako aidipase. Ni kpiapai, Bakindo Saura aida ka imoko, kura aboro ki idi ka sopa ko na mbia, na zavura diako asawiako. (1 Sam. 19:9-11; 30:1-6; 2 Sam. 6:14-22) Ono Davide aambunga gu mangaapai nga ga kura aboro si zeresi gako nyemuse tipa Yekova te. Kurigure, Davide adu na gu ngbaduse nga ga inapai, nga gu sino si aaida mi sonosihe. Gupai mi awirikihe rogo gimi wisigopai yo aʹaria gimi bipai tipa gu zangarengba nga ga akuare aidipase. Mi agedanga gu ingahe nga ga kura aboro awere berewe te. Kuba gure, mi namanga ome ka fubee tipa gu kodatise nga ga  dungurati.” Ya mo gamo sasa wakina gure nga ka sonosa kodatise rogo dungurati?

14. Gini ngbatunga aboro Yesu asiayo ni abakureako?

¹⁴ Yesu Kristo adu wenengai na aboro dunduko. Ngbatunga aboro dunduko adu na ngbarago kadu patiko, akumba, adee, paranga aboro, gbinza aboro na zavura rukutu agude. Ono Yesu adu na rubangirise ka sia mbembedi abakureako. Ko aya fu gako ruru amokedi wẽ: “Ka oni amanga agu apai mi arugu roni kuti ni, abadiangbare nga oni.” (Yo. 15:14) Yesu asia gu ngbatunga abakure re dagba agu aboro yo naapeka fuoko ni ruruyo na kini mangisunge fu Yekova na ngbaduyo yo dũ. Wakina gure a, ya mo mo nasia wene abakureamo dagba agu aboro yo namangasunge fu Yekova na ngbaduyo yo dũ? Tipagine nyakipa gipai re ti ni?

15. Wai du rengbe paranga aboro ka gbia undo ti kodatise na nyanyaki aKristano?

¹⁵ Badungu ngbatunga arindingua nazama gbe ho du faa uru ni. Wakina gure a, gu fofoi nyemuse du dagba awirina ima rengba ka undo ro mo nyaki rogo toro yo. Si rengbe kadu nga mo nga paranga boro naasada ka manga diaberã tipa gini ngbatunga pai mo nika mangaha rogo gamo raka yo. Nangba wai rengbehe kadu ni pa tatamana foro ka mo akoda tiro na agu aidipase du na bakere inohe tipa iriso Yekova na nafubee tipa gu kodatise nga ga dungurati! Si rengbe kadu nga i aima gbiatiyo na kpakaraapai rogo raka yo na zavura rogo iriso Yekova yo a. Ngbatunga agu aboro re ima rengba ka undo ro mo sia wene gene raka. Wene kodatise na ngbatunga agu awirina re rengbe ka undo ro mo mangi wene adiaberã na mo nyaki rogo toro yo.​—Oni gedi AEbere 5:14.

16. Wai du sosono aboro rogo dungurati aundo kura wirina sa?

¹⁶ Ni kpiapai, wirinarani nga Helga natingida gupai nga gu garã ri aanyasa sukuru, akurari aapeka pa gayo asasa dagbatiyo. Badungu yo aabi wirikapai yunivasiti yo ni guhe nika undoyo i mangi wene sunge ku mbatayo. Helga asaki gipai re na abadiangba ri rogo dungurati. Ri ape gupai nga, “Badungu yo nangia unvuru fere, na i aima undo re ni bakerehe gbe. I angarasi re mi mangisunge tungusapai ti aregbo dũ. Fuo gure ngbutuko, mi amangi agarã bisue kuti ngba sunge nazakigene. Fuo agarã kusa, awere tie, mi na ngbarago nga mi amangisunge na parangare fu Yekova. Mi abiranga tire tipa mangaha wo te.”

17, 18. Wai du rengbe nyaka rogo toro yo ka undo rani ani mangisunge fu Yekova wenengai?

¹⁷ Peka ani fuo gu kpiapai nga ga Yesu rogo gaani raka yo rengbe ka undo rani ani sono rogo toro yo. Ani nika mbeda na Yekova, na gaani nyemupai ka mangasunge fuko na ome rani dunduko nikaa sona kina ku mbatayo. Ga Mbori moyambu rengbe ka mangasunge fuko wenengai ka si du nga ni ima nyaka rogo toro yo, ho du ni ni nga nyanyaki Kristano. Yesu angarasi apefuoko nga: “Imaroni hasi rago ahasa ku bangiri aboro i bi gaoni ruruapai, ka taasa rimo Baroni du ngbangbaturũ yo.”​—Mt. 5:16.

¹⁸ A wa bi anihe, gu Kristano naima nyaka rogo toro yo ima rengba ka undo akurani wenengai rogo dungurati. Na gu ngbatunga nyaka rogo toro yo re ni yuguyuguhe ngba gu gene ni amangasunge na sangbakpotoniyo ngbaha. Wai du rengbe sangbakpotoraniyo ka undo rani ani mangi wene adiaberã? Na wai du rengbe ani ka irisa gu diaberã awirina amangaha mbiko sangbakpotoyo yo? Ani nika wisigo agi apai re rogo gu kekeapai naye fuo gere.