Ho mo agia gu fugo ni nga, “Digido zegino ima mbeda!” Ginipai ninaaye ku berãro yo? Ya mo gupai ninaaye ku berãro yo nga pa gbarasa zegino na aboro rogoho? Watadu mo naaberãpa gu gberango nika ye na vura ku rogo zegino dunduko? Berã ngbatunga apai wa gere ima rengba ka sa kura aboro i ni bakibangiriyo, na aguyo rengbe kati kina kango tipaha.

Ziazia Kekeapai naya: “Digido zegino ki da.” (Matayo 24:14, NW.) Kina gu bangisapai re a du i ayambaha nga “gu bakere rago nga ga Mbori” na “Aramegido.” (Yugoti 16:14, 16) Nirengo, dungu apambori du gayo akaragapai ni vunduvunduhe riipa gipai re, na gi gayo iraira bipai re ima maapai areme. Wa vura duhe wo, Ziazia Kekeapai nitihe nafura afura ziazia tipa pa digido zegino, na kini sakipai tipa gine nga digido zegino na gine angianga digido zegino ya. Fugo Mbori naundo rani ziazia tipa ani ini singia digido zegino ima mbeda ka da. Gu ngba angba gbe nga si nayugo wai furani rengbe ani ka bata behe. Ni bambataha, ani asadingo ka dia gu iraira bipai du aboro na ni kusayo na ki yugu guhe nga digido zegino. Nibi Ziazia Kekeapai, “digido zegino” nzunzu nga gine?

1. ANGA DIGIDO ZEGINO NGA GU BAKERE WE NIKA ZO KPOTOSENDE TE.

   Ziazia Kekeapai naya: “[Mbori] namoi amburu kpotosende ka i agbisa nga ha waragoagira ya.” (Atambuahe 104:5) Gu veresi re na agu akuraha nakido rani nga Mbori agbarasanga zegino watadu ka mbuhe tipa aboro gbarasihe te!—Batungusipai 1:4; Yesaya 45:18.

2. ANGA DIGIDO ZEGINO NGA GU MBAKADAPAI DU NI VUNDUVUNDUHE TE.

   Ziazia Kekeapai nape gupai nga digido zegino na regboho ni ringbisiringbisihe, Mbori ima ringbisa gu regbo si nika ye ti ni. Ani nagedapai nga: “Boro aina nga gu uru na gu saa wa sa te, amaraika ngbangbaturũ yo i aina nga ha te, Wiri aina nga ha a te, kina Mbori nga Ba ini he sa. Oni bánda tironi abanda, oni ngére angera ki nikpari; bambiko oni aina nga ragoho te.” (Marako 13:32, 33) Nirengo, (“Mbori nga Ba”) ima ringbisa gu ndikidi ‘rago’ ko nika ye na digido zegino ti ni.

3. ANGA ABORO NIKA YE NA DIGIDO ZEGINO TE, WATADU GU KPATAKPATA AHE NATIWA ARIYO A TE.

   Ginihe nika ye na digido zegino? Yugoti 19:11 naya: “Mi ki bi ngbangbaturũ ni zaza ha, oni ngére, pusi farasi ki du! Gu ko nasungu auru ru, i niya ti ko, Iranyaka, nga Irarengo.” Veresi 19 naya: “Mi ki bi nyarinde, na abakindo zegino, na gayo arikavura, i nidungura tiyo ka so vura kuti gu ko nasungu auru farasi na gako arikavura.” (Yugoti 19:11-21) Wa vura duhe nga gu dungu apai du rogoho narukuba kurapai, gupai ani narugatirani na ni nga: Mbori nika keda rimbasa amaraika i ye ka nyasariipa avurako.

1. SI NGA PA DIGO GA ABORO ZOGARAGO.

   Ziazia Kekeapai naya: “Mbori ngbangbaturũ amáa gu ngbi nga gu ka i agbárasa nga ha wa sa ya, ka i afú nga pa zoga ha fu kura aboro a ya. Si akúadi agi angbi re rukutu ki digisi he dunduko,  si ki nye anye kindi.” (Daniere 2:44) A wa ani nifura tipaha mbata rogo namba 3, i nika nyasa anyasa riipa “abakindo zegino, na gayo arikavura,” nga aguyo nika ‘dungura tiyo ka sovura kuti gu ko nasungu auru farasi na gako arikavura.’—Yugoti 19:19.

2. SI NGA DIGIDO VURA, ZUU, NA IRAIRA SARANGBANGA.

   “[Mbori] namanga pai, vura nyasi digida kpotosende” yo. (Atambuahe 46:9) “Ruru aboro aráka zegino, airarengo ki nye rogo ho; ono i aróga gbegberẽ aboro ku sa yo zegino, agu yo namanga pai ni biriki i amófa yo amofa zegino.” (Asanza 2:21, 22) “Oni ngére, mi nambakada ahe dunduko ni vovo ho.”—Yugoti 21:4, 5.

3. SI NGA DIGIDO AGU APAMBORI AFUNGA IRISA FU YEKOVA NA AUNDONGO ABORO YA.

   “Anebi gumba pai ni zire, aboromutomo ki nirũ ndika ni gayo rugapai; . . . ono gini pai oni ka manga ha ho digidaha ka da ni?” (Yeremaya 5:31) “‘Dungu aboro nikaya fere ni gu rago re wẽ, Gbia, Gbia, ani afuga nga pai ni rimoro, te? Ani ado nga adaimona ni rimoro, te? Ani amanga nga agu apai du na tandu ni rimoro te?’ Ono mi akúsa ha fu yo ki ya, ‘Mi aína nga roni wa sa te; oni gúari pati re, amangi irairapai.’”—Matayo 7:21-23.

4. SI NGA DIGIDO AGU ABORO NASONGA MBURU AGU APAI DU AWERE NA KINI SONGODIHE.

   “Sapangbanga nga gere, nga imarago ye ku zegino, aboro ki nikpi kina nyemu bitimo ku ba imarago; bambiko gayo apai nangia gbegberẽpai.” (Yoane 3:19) Ziazia Kekeapai nasakapai asaka tipa gu bambata gbarasahe namangi ti rago gu ruru kumba nangia Noa. “Gu zegino nadu ho mbata, ime afu afu ku auru he si ki gberẽ. Ono agu angbangbaturũ du ho awere na kpotosende si du ni igiigi he be kina gu pai re tipa we, ni bandabanda ha tipa rago sapangbanga na rago gbarasa azangasinombori.”—2 Petero 3:5-7.

Mo ini gupai nga, gu ‘rago sapangbanga na rago gbarasahe’ re, i ringbisihe kuti pa gbarasa gu “zegino” naadu ti rago Noa. Gini zegino i agbarasihe? I aagbarasanga gi gaani kpotosende re te, “azangasinombori” du i agbarasi yo, nga avura Mbori, i du i ‘agbarasi yo.’ Ti regbo gu “rago sapangbanga” re, agu aboro sia kadu ni avura Mbori i dunduko i nika gbarasa yo. Abakurea Mbori nika duadu ni bandabanda yo, a wa si adu tipa Noa na gako aborokporo.—Matayo 24:37-42.

Mo berẽnga kina wai gi zegino re nika ngba fuo Mbori nyasiriipa gbegberẽ aboro kusayo! Nirengo, gu pangbanga Ziazia Kekeapai apehe tipa digido zegino, si ni wenehe angianga ni gbegberẽhe ya. Ono wa vura duhe wo, mo ima rengba ka bakabangiro nga: ‘Ya mo Ziazia Kekeapai nape gu regbo nzunzu digido zegino nika ye ti ni? Ya mo si rengbe kadu nga si ima mbeda? Wai du rengbe mi ka bata behe?’