1, 2. Gini gene Yekova aafura na gako amoyambu ngbaha?

ROGO gu pangbanga nga ga Ziazia Kekeapai, Yekova anaangbembatayo fu aboro ni basasa ngba agene ni bakiakia. Yekova anaafura fu aguyo vurube amaraika, rogo yuguyugupai, watadu rogo musumo ka yugo gupai fuyo nika manga ku mbatayo. Yekova anaafu kparakpara asunge a fuyo. (Geda 7:89; Yeze. 1:1; Dan. 2:19) Agu akurayo anaagbia arugapai vurube agu aboro nanaamangasunge rogo gu ga Yekova riigbu naadu auru kpotosende. Ka si vura du nga Yekova anaafura fu gako aboro ngba gini gene, agu aboro nadegatuyo fuko aima gbia maku.

² Areme Yekova nangbembatayo fu gako aboro vurube Ziazia Kekeapai, gako ziazia toro, gbiati dungurati. (Amo. 9:31; 15:28; 2 Tim. 3:16, 17) Gu gene Yekova angbembatayo furani ngbaha, si ziazia, na si wa ka i ya ‘turani nagiapai giirani yo naya, “Gene du re, oni ndú ngba ha.”’ (Yes. 30:21) Nirengo, Yesu namangasunge na ‘ruru kangara moyambu’ tipa kaa pe afugo Yekova furani vurube dungurati. (Mt. 24:45) Si naida ani bi agu angbembatayo re gbiati agu arugapai re na kikiipaha, mbiko giasangba nika sarani ani gbia nyenye unga.—Eb. 5:9.

3. Ginihe rengbe ka gbarasapa wai ani adegaturani fu ga Yekova ngbembatayo? (Oni bi gu sura du ti tonatonaha.)

³ Satana Bakitingbanga naida ka gbarasapa gu ngbembatayo ani agbiaha be Yekova. Kurigure, ‘kpotoraniyo nangihe kisusi,’ si  ima rengbe ka gbarasapa wai ani adegaturani kuti ga Yekova arugapai. (Yere. 17:9) Sidu tie, ani wisigingo agu apai rengbe ka saha furani ni mbumbupai ani degeturani kuti fugo Mbori. Ani sakingo pai tipa wai rengbe wene fugodagbase na Yekova ka banda gaani pagume na ko apai ki vura kaa manga rani vurũ.

4. Wai Satana aˈasada ka gbarasa berã aboro?

⁴ Satana naasada ka gbarasa berã aboro na ziree apangbanga gbiati agu atakapande apai nga ziree. (Oni gedi 1 Yoane 5:19.) Kupati agu awaraga nakura, agu apangbanga nga ga radio, terevizioni, na Internet ima maapai rogo zegino kodihe na agu arago du kina boro mburu zegino yo. Wa vura duhe nga kura aregbo kinaho agi aũpangbanga re apeka agu apai ngbaangba ti aboro, si dedede naatakapande pa gu sino mangapai gbiati agu arugute andunga sa na ga Yekova arugute ya. (Yere. 2:13) Ni kpiapai, aba apangbanga gbiati agu aba nga ga aũngbarago nafura tipa gu rogatise du dagba kumba na kumba watadu dee na dee ni gupai agberãnga ya, na dungu aboro nabihe nga gupai Ziazia Kekeapai apehe tipa gipai re arunga te.—1 Kor. 6:9, 10.

5. Wai rengbe ani ka bandatirani be gu ziree nangahe nga ga Satana ka si gbarasinga rani ya?

⁵ Wai rengbe agu aboro nakpinyemu Mbori na gako rurupai ka bandatiyo ti ga Satana ziree takapande apai? Wai rengbe yo ka kparaka wenepai ti gbegberẽhe? I rengbe ka mangaha ‘ni makiapai kuti fugo Mbori.’ (Tam. 119:9) Fugo Mbori na agu arugute rogoho nasarani ani kparaka gupai nga rengo ti gu nga ziree. (Snz. 23:23) Yesu adipai rogo Ziazia Kekeapai na ki ya ‘boro nanye ni ungani mbiko agu apai dunduko naye ngba Mbori yo.’ (Mt. 4:4) Si naida ani ini wai ka mangapai kuti gu bangua arugute nga ga Ziazia Kekeapai rogo gaani raka yo. Ni kpiapai, mbata fu Yekova fu andiko fu Moize tipa bäri, gu paranga nangia Yosefa aima inoho nga gu mangapai re nga ingapai kuti Yekova. Ko aaberãnga kandara berãpa basa Yekova ti gu regbo dia Potifaro azomia ko ko mangi gbegberẽpai na ri te. (Oni gedi Bambata Pai 39:7-9.) Wa ri avura ka sosoda ko tipa gbanga regbo, ko aambunga fugori si kisi tuko yo ti gia fugo Mbori te. Si ni nyanyakipa pai ani kparaka rurupai ti irairapai tipa ka degeturani fu Yekova na ki mbu gu ga Satana takapande apai nga ziree.

6, 7. Ginipai si aida ani mangihe tipa ka bandatirani ti ga Satana gbegberẽ arugute?

⁶ Zegino ima hi be gu vunduvundu ayugopai nga ga pambori nasa aboro i nibihe nga ndupai ho tipa ka gbata ndikidi pambori te. Ono tie, Yekova nasa gako ngbembatayo si du ziazia fu agu aboro du na nyemu ka mangapai kutini. Si naida ani diberã tipa gu boro ani aida ani ka degeturani funi. Wa duhe nga si ima kpakara tipa ka degatue kuti fugo aboro ue ti bangisa regbo sa, si naida ani ‘gi fugo’ Yesu na kini degeturani fuko. Ko nga gu boro Yekova nasia ni tipa ni ni ngerekurii gako akandoro.—Oni gedi Yoane 10:3-5.

 ⁷ Yesu aya: “Oni bánda tironi ti agu apai oni agia.” (Mk. 4:24) Ga Yekova arugute ni bawenehe na ni ruruhe, ono si naida ani bandatirani na ki degeturani kutini na ki mbakadi ngbadurani yo tipa ka diaha kugume. Ka ani adunga na rubangirise ya, ani ima rengba ka tona degaturani sa ga Satana gbegberẽ arugute kuba ga Mbori wene arugute. Ka ani mbunga amanzigo, avidio, terevizioni, abuku, abakure, wirikapai, na agu aboro naya i nga abainipai i moipai kurii gaani raka ya.—Koro. 2:8.

8. (a) Wai rengbe ngbadurani ka nanga rani ani ti ku rogo ga Satana abirĩ? (b) Ginipai rengbe ka manga ka ani amaanga berãrani fuo agu apai nayugoho nga ani nandu sa kerepai ya?

⁸ Satana ima ino gupai a nga nyemu manga ingapai kina tirani, na ko naasada ka sarani ani mangipai kutini. Ho Satana asa rani ni ani mangipai wa gure, si nadu furani ni kpakarapai tipa ani kakuti gaani ruru mangapai. (Yo. 8:44-47) Wai rengbe ani ka sovura kuti gipai re na diabese? Ani kparianga gupai rengbe ka manga tipa gu boro rimisi tiní bakere gbe fuo gu ngbarago du awere na si ki sani ni mangi gu gbegberẽpai ni aaberãnga pa mangaha ya. (Rom. 7:15) Ginipai sani ni mangi gi gbegberẽpai re? Si nawira wa ni aima mbu degatuni yeye kuti fugo Yekova. Si rengbe kadu nga ni amaanga berãni sa kpia agu apai nayugo gupai nga ni nandu sa kerepai te. Ni kpiapai, si rengbe kadu nga ni aima mbu kparakpee, ki zere ti sunge tungusapai, watadu ni nakpa adunguratise. Ni yangaraha, ni mbu tiní fu gu nyemupai du tiní na ki mangi gupai du ni gbegberẽhe. Ani ima rengba ka ne ngbatunga gbegberẽpai wa gure ka si du nga ani ini agu apai rengbe ka sarani ani mangi gbegberẽpai na ki mangi ome nibasa tipa ka mbakada gupai gberẽ. Na ka ani aadegaturani kuti fugo Yekova, ani degenga turani kuti agu aberãpai nga ga abasamungu kuti ndikidi pambori te.—Snz. 11:9.

9. Tipagine ngbaha ti ni ka inopai tipa gu nyemu ­manga gbegberẽ apai du tirani mbata fu si moipai?

⁹ Ka kaza zi rani ani ki inipai tipaha niipo, ani batasi unga rani abatasa. Wakina gure a, ani ima rengba ka ne gu gbegberẽ apai rengbe ka manga rani ka si du nga ani ini agu apai rengbe ka sa rani ani rimi ku rogo asada. Ka ani taino gupai naida ka sarani ani mangihe, si adu furani ni wenepai tipa ani mangipai kuti ni niipo mbata fu Satana zi rani ani mangi “agu apai ko akpi nyemu he.” (2 Tim. 2:26) Ginipai rengbe ani ka mangaha ka si du nga ani bi gupai nga ani ima mbugene fu gaani berãpai na gu nyemuapai du tirani si di rani kusayo ti manga agu apai  Yekova akpinyemuhe? Ani mangipai kutini niipo zanga keesa, na ki umbasi tirani ka karaga tirani fuoko, ka dia gako arugute kugume, na ki degeturani fuko na ngbaduraniyo dunduko. (Yes. 44:22) Si naida ani tingidi gupai nga, ka ani mangi gu diaberã du ni mumungoho, si ima rengba ka ye na gbegberẽ sangbanaha kurirani na ki sarani ani rungo gbegberẽ rogo gi zegino re. Si angba wai ka si du nga ani namangapai niipo ka ­bandatirani ti manga gbegberẽpai na kini nehe!

10, 11. (a) Wai rengbe rukö ka yugo tihe? (b) Ginipai ani awirikaha ti ga aKora, Datana, na Abirama gbegberẽ mangapai?

¹⁰ Si naida ani tingidi gupai a nga ngbadurani ima rengba ka nanga rani. Nairiwo gu ome du gu nyemu manga ingapai du tirani na ni kurirani! Ni kpiapai, ani bingo rukö gbiati ngbaduse. Ani bingo wai agi asino re narengbe ka gbarasapa dega ani turani kuti fugo Yekova na ki sarani ani mangi gbegberẽpai. Gu boro nga irarukö nairiwosi agu apai du tipa tiní. Ni rengbe ka bi tiní nga ni na rengo beni tipa ka manga agu apai dunduko ni aidaha na boro ho du na rengo tipa ka za ni ti ni te. Ni rengbe ka bi tiní nga ni du kurii agu arugute akurani aKristano afuhe funi, abaakumba, watadu ga Mbori riigbu. Gu ngbatunga boro re nabi fugo Yekova nga si na ome ti ni te.

¹¹ Ti agu aregbo aYisaraere adu ngbakungba yo, Kora, Datana, na Abirama asamungu kuti ga Moize pagbia na Arona. Mbiko gu rukö agu asamungu re adu na ni, i amangi gayo mbakadapai ngbariyo tipa ka iriso Yekova. Ga Yekova karagapai kutini angia gine? Ko aima imo agi abasamungu re dunduko. (Geda 26:8-10) Nangba gupai ani awirikaha ti gi pangbanga re! Samungu kuti Yekova nandu sa gbegberẽpai. Si naida ani tingidi gupai nga “kiisapatise du mbata fu tigo.”—Snz. 16:18; Yes. 13:11.

12, 13. (a) Oni funga gu kpiapai nayugo wai rengbe ngbaduse ka ye na gbegberẽpai. (b) Oni ­sakingo wai rengbe ngbaduse ka sona ni kina boro ipo.

¹² Ani bingo gupai du tipa ngbaduse. Dedede, boro ngbaduse namangapai ki da na ni ti gupai si aidanga ni mangihe ya. Fuo Erisa husi ga aSurio baira abanzengere nangia Namana, ko afu agamahe fu Erisa ono ko ki kaha aka. Ono tie, ga Erisa moyambu nangia Geazi akpinyemu agu agamahe re. Geazi aya fu tiko wẽ: “Wa du Yekova ni ungako, mi nikaora fuo ko, ki rogo bete ahe beko.” Ko aoro fuo Namana na ki nangihe nga Erisa nikedi ko nga ko ‘fú taranda feda sa, na aremu ue.’ Ginipai namangi Geazi tipa gu ziree ko apehe ni rimo ga Yekova nebi re? Nirengo, gu ngbataka naadu ti Namana aziko.—2 Aba. 5:20-27.

¹³ Ngbaduse rengbe ka tona tooni tooni, ono ka boro azanga tiní behe ya, si ima rengba ka sona niipo na ki dibe ni. Gu pangbanga du rogo Ziazia Kekeapai tipa Akana nayugo gu ome du ngbaduse na ni. Ani kparianga wai gako ngbaduse asono niipo. Ko aya: ‘Ho mi abi bawene roko aBabero ni dagba agu ahe i agbuhe, gbiakuti feda wa asekere 200, na kpakawa dahabu du barõa asekere he wa agarama 820, mi ki kpinyemuhe gbe, mi ki rogoho.’ Kuba gupai nga ko ká fu gu gbegberẽ nyemupai re, ko adĩ agu ahe re na ki igihe tii gako bamburoko yo. Ho gako gbegberẽ mangapai akuru ni ku yangura, Yosua aya fuko wẽ Yekova nika ye na mbusa kurii ko. I asopodi Akana na gako aborokporo na mbia rogo gu uru re i ki kpi. (Yos. 7:11, 21, 24, 25) Ngbaduse nga gu gbegberẽpai niima rengba ka diabe rani. Sidu tie, ani bandatirani ti ‘dia ngbiti ahe.’ (Rk. 12:15) Wa duhe nga gbegberẽ aberã naaye aye ti gu kura aregbo ku rirani yo, watadu wasiwasi apai, si adu ni wenepai ani banda gaani aberã ki zanga mbu gu gbegberẽ nyemuapai du tirani si sarani ani mangi ingapai.—Oni gedi Yakoba 1:14, 15.

14. Ginipai si aida ani mangihe ka si du nga ani bi gupai nga rukö na ngbaduse tona kadu tirani?

 ¹⁴ Rukö gbiati ngbaduse rengbe ka ndu na boro sa gbegberẽpai. Ka ani berẽkurii gu surungba pai naye be gbegberẽ mangapai, si rengbe ka undo rani ka ani mbunga gene fu ngbatunga apai wa gure si gberani kusayo ti fugo Yekova ya. (Pa Rug. 32:29) Rogo Ziazia Kekeapai, ndikidi Mbori nayugo gu ruru gene si aida ani pekehe na kini sakirogo gu undo du ti ta ngba gu gene re na gu surungba pai rengbe ka gbia rani ka ani ata ngba gbegberẽ gene. Kangia ngbadurani naberãpa manga gupai rukö watadu ngbaduse asosoda rani tipa ani mangihe, si adu ni wenepai ka ani berẽkurii gu gbegberẽpai rengbe ka gbia rani ti mangaha. Si naida ani kparia wai rengbe gbegberẽ mangapai ka fuda rani, agu aboro ani akpinyemu yo, na gaani pagume na Yekova.

15. Ginipai ani awirikaha ti gu kpiapai nangia ga Yesu nibipa kparakpee?

¹⁵ Yekova naida wenepai tipa rani. (Tam. 1:1-3) Ko nafu bandahe furani ti agu aregbo ani aida na ni. (Oni gedi AEbere 4:16.) Wa Yesu avura du zanga ingapai tiko, ko anaafura na Yekova dedede rogo kparakpee yo. Yekova aundo ko na ki songodiko ngba iiriwo gene. Ko akedi amaraika i undo ko, na ki fu gako ziazia toro si undo ko, na ki undo ko tipa ko sia gako amokedi naadu 12. Aboro aima gia fugo Yekova ngbangbaturũ yo ti gu regbo ko ayugupa gako undo fu wiriko na ki idi na gako pai. (Mt. 3:17; 17:5; Mk. 1:12, 13; Rk. 6:12, 13; Yo. 12:28) A wa si adu tipa Yesu, si naida ani peke agu apai du ngbaduraniyo fu Mbori. (Tam. 62:7, 8; Eb. 5:7) Vurube kparakpee, ani rengbe kaa fura na Yekova na kini ta ngba gu gene rengbe ka ye na irisa fuko.

16. Wai rengbe Yekova ka undo rani ani gbia ome tipa ka degaturani fuko?

¹⁶ Wa vura duhe nga Yekova nafu gako arugute fu aboro dunduko, ko amanganga aboro ngbaome i mangipai kutini te. Si naida ani sanako asana tipa gako ziazia toro, na ko afuhe afu furani kpaima. (Oni gedi Ruka 11:10-13.) Ono tie, si ni nyanyakipa pai ‘ani bánda tirani ti agu apai ani agiaha.’ (Rk. 8:18) Ni kpiapai, si adu furani ni gbegberẽpai ani sana Yekova tipa ko undo rani ani dibe wasiwasi mangapai baraho ani angana agu ahe ni watadu avidio na zingisa nyemu kodaba ti boro. Si naida ani moi tirani rogo gu ba du ga Yekova toro rogoho. Ani ima inoho nga gako toro gu du rogo dungurati. Dungu ga Yekova amoyambu abanda tiyo ti gbegberẽ apai ni dega yo tuyo fu Yekova ba adunguratise yo. Ni sangbana gipai re, si aima undo yo i rugutiyo na pa gu gbegberẽ nyemuapai du kpotoyo yo na i ki ruguhe.—Tam. 73:12-17; 143:10.

17. Tipagine duhe ti ni ni gbegberẽpai ani kido kuti tirani?

¹⁷ Ani bingo gupai naadu tipa Bakindo Davide nangia bazogo aYisaraere. Ho ko adu ni kindi ni tooni paranga, ko adibe gu ga Paresitina boro ome nangia Goriata. Davide ada ni sekere, bakindo, babanda aboro, na ni gu boro naadia berã fu aYisaraere. Ho Davide akido ni kuti tiko, ngbaduko yo anangi ko ko ki mangi kere ingapai na Bataseba, na ki mangipai tipa ka imo kumbari nangia Uria. Ho i afu rugute ni fuko, ko aumbasi tiko na ki idipa gako ingapai na ki mbakadi gako pagume na Yekova.—Tam. 51:4, 6, 10, 11.

18. Ginihe rengbe ka undo rani ani degeturani fu Yekova dedede?

¹⁸ Ani degeturani kuti agu arugute du rogo 1 AKorindo 10:12 na ki zanga du na bakere kido kuti tirani. Wa duhe nga ani arengbanga ka ‘ruga gaani apai’ te, si ima rengba ka sarani ani degeturani fu Yekova watadu fu Vurako. (Yere. 10:23) Ani kparingo akpara dedede, na kini pekefuo gu ngbembatayo nga ga ziazia toro, na kini degeturani kuti fugo Yekova dedede.