1, 2. (a) Rogo gupai nga kadu ni dezire nga gine, na ginipai aboro pangbanga arengbanga namangaha fu aboro ya? (b) Tipagine Yekova akidongo ti ni kuti agu aba peka apangbanga nga ga zegino ya?

ROGO gupai nga kadu ni dezire nga gine? Gu kura buku nasakarogo afugo yo naya: “Dezire nga gu boro bi pai na ki pe gupai mangi.” Ni kpiapai, waraga apangbanga gudu ho nga The Witness (Dezire), i kusihe awere tipa agarã naima susa 160 rogo kura gbata sa South Africa yo. Gu rimoho re ima rẽ, bambiko guwaraga pangbanga re napeka kina boro agu apai nzunzu namanga rogo zegino. Gu boro natona kusaha aya gu waraga pangbanga re nikaa pe “kina rengo nabaha, gu kura he te kina rengo.”

² Si nafu kina gberarago nga, agu aba peka apangbanga nga ga zegino apekanga agu apai namanga dunduko te, zavura gu nyanyakipa apai du rogo gu pangbanga nga ga aboro. Gipai re wakina gupai Mbori Tanduapai Dũ agumbaha vurube gako nebi nangia Yezekere ki ya: “Arikaaboro aina ha ya mi nga Yekova.” (Yeze. 39:7) Ono tie, Yekova angeranga ku be agu aboro napeka apangbanga te. Ko na aDezire beko bangeyo wa amirioni muambe nafura fu rikaaboro dunduko tipa agu apai ko amangihe bakuru kusayo na gu ko amangaha awere. Gi rimbasa aDezire re nafura tipa gu weneapai ko nika mangaha ku mbatayo. Ka ani peresipa gi sunge re rogo gaani raka yo, gure nga ani namangapai ringbisihe na rimorani a wa duhe rogo  Yesaya 43:10 nga: “‘Oni nga gimi adezire,’ wo poi Yekova, ‘na gi moyambu mi asia ko.’ ”

3, 4. (a) Gini regbo Abawiriki Ziazia Kekeapai adi vovo rimo kuriyo, na gayo bipai adu wai tipaha? (Oni bi gu sura du ti tonatonaha.) (b) Gini asanahe ani ka sakapai tipaha awere?

³ Nairiwo gu momu du ani na ni nga kadu na rimo Yekova rirani nga “nyenye Bakindo” naya: “Gi nga rimore re kindi, wo i ka tingida pare fu arika ngbatunga aboro dunduko”! (1 Tim. 1:17; Gate 3:15; oni ringbisi ngaha na Batungusipai 2:16.) Rogo gu gara nangia 1931, Abawiriki Ziazia Kekeapai adi gu rimo kuriyo nga aDezire Yekova. Kusa, dunguyo ake waraga ka yugo gayo tambuahe. Dungurati sa Canada yo ake waraga ki ya: “Gu wene pangba nga ani nga ‘aDezire Yekova’ ima fu ngbarago furani, na si ima ngarasa rani ani diberã ka manga ome tipa ka rẽ na gi vovo rimo re.”

⁴ Wai rengbemo ka yugo tambuahe tipa du mo na rimo Mbori riro? Ya mo mo rengbe ka sakarogo gu veresi di yo gu rimo rogoho nga aDezire Yekova?

5, 6. (a) Gini gene agu avunguagude nangia Yisaraere adu ngbaha ni adezire fu Yekova? (b) Gini kurapai berewe si aidi agu avunguagude nangia aYisaraere mangihe, na tipagine si aida agu avunguagude du areme mangihe ti ni kinawo?

⁵ Ti rago Yesaya, aYisaraere ni basasa angia ga Yekova “adezire,” ono wa i adu ni rikaaboro i angia gako “moyambu.” (Yes. 43:10) Gu gene avunguagude anaamanga dezirepai fu awiriyo ngbaha angia yugopai fuyo tipa gupaiMbori amangihe bakuru yo fu atitayo. Ni kpiapai, ho Yekova ape gupai ni fu aYisaraere nga i nimangi Pumbo Susiri rogo agarã dunduko, ko aya fuyo wẽ: “Ho awironi ka nisana roni ni, ki ya, ‘Gini pai gi mangapai re ayugo ho?’ Oni aniyá ‘Si nga gu motumo nga ga ga Yekova susiri, bambiko ko asusi ri ga awiri aYisaraere  abambu Ezipeta yo, ho ko aimi aEzipeto ni, ki batasi gaani abambu.’ ” (Gate 12:26, 27) Si nawira wa agu avunguagude re aima saka gupai fu awiriyo nga ho Moize andu ni fuo bazogo Ezipeta nangia Faro ni bambataha ka sanahe aYisaraere ndu ka iriso Yekova ngbakungba yo, ko aya: “Da nga Yekova, ka mi gi sangbako ki idi fu aYisaraere i ndu?” (Gate 5:2) Nirengo, fuo ambusa bawe ti kurii ringara na fuo bata aYisaraere be agu abanzengere nangia ga Ezipeta yo rogo Zamba Baime, si akaragapai kuti ga Faro sanahe. Yekova nga Mbori Tanduapai Dũ nyeanye kindi. Ayisaraere aima du ni adezire gupai nga Yekova nga ndikidi Mbori na ko Nadigiso gako akidohe.

⁶ Agu aYisaraere naadu na tambuahe tipa du na rimo Yekova riyo, i aima pekapa gu weneapai ko amangihe re fu awiriyo na fu gu kungbo aboro naadu dagbayo. Si adu ni nyanyakipa pai fu aYisaraere i rugu awiriyo i niirisi gu ga Mbori arugute du tipa du ziazia. Ko aya: “Oni adú ziazia; bambiko mi nga Yekova nga gaoni Mbori du ziazia.” (Pa Mot. 19:2; Pa Rug. 6:6, 7) Si ni wene kpiapai fu agu avunguagude nga aKristano areme i raba awiriyo ngba wene gene na kini undo yo i nitaasirimo Mbori.—Oni gedi Asanza 1:8; AEfeso 6:4.

7. (a) Ho aYisaraere anidu ni ruruyo fu Yekova, sangbanaha aningia gine kurii agu aboro naadu patiyo? (b) Ginipai si aida agu aboro dunduko du na rimo Mbori riyo mangihe?

⁷ Sidu, ho aYisaraere ani nidu ni ruruyo, i anaamanga wene dezirepai tipa rimo Mbori. Ko ape gupai fuyo nga: “Aboro dunduko nga ga kpotosende yo ki bi he ya i ayambu roni ni rengo ni rimo Yekova; i ki du na gunde roni ti yo.” (Pa Rug. 28:10) Si ni pa gberarago nga, dungu agu apangbanga du tipa aYisaraere nayugo gupai nga i aadunga ni ruru yo fuko te. Dedede, wo i anaairiso kungbo ambori. Kurigure, i ada ni kere gbegberẽ sino aboro wakina ga aKanano ambori i anaairiso yo, kini fu awiriyo ni motumo, na kini rungosi rungorungo aboro. Nairiwo gu nyanyakipa pai ani awirikaha nga ani asadi dedede kadu ziaziawa ani awirikaGu Ziazia Ko du rimoko rirani!

8. Gini sunge Yekova afuhe fu Yesaya, na ga Yesaya karagapai angia gine?

⁸ Yekova aima fura tipa gu iriwopai si adu nga ko nika mangaha ka batasa aYisaraere be sunge kanga na i kingia adezirehe. (Yes. 43:19) Yesaya kapita 1-6 na dungu azahe rogoho tipa gu kerepai si adunga si nika ye kurii Yerusarema na agu abagbata naadu pati ni. Wa duhe nga Yekova ima ino agu apai du kpoto aboro yo, ko aya Yesaya fu zahe fu aboro wa si avura du vurũ nga i nika soga ko asoga. Iriwo gipai re aima ti ti Yesaya ko ki idi ka ino ga Mbori aboro nika nye zanga saberã tipa bagizo regbo wai. Ga Mbori karagapai angia gine? Ko aya: “Daho abaakporo ka du ni wa bate zanga araki rogo ho, abambu ki zanga akumba, ringara ki du wa kpatakpari dunduko.”—Oni gedi Yesaya 6:8-11.

9. (a) Gini regbo ga Yesaya sangbanebi tipa Yerusarema adigisitihe? (b) Ginipai namanga areme, na ginipai si aida ani inihe?

⁹ Yesaya agbia gi sunge re ti regbo gu zogarago nangia ga Bakindo Uziya bara rogo gu garã nangia 778 Mbata fu Batikayo Kristo. Ko amangisunge nebi tipa agarã 46 dati gu garã Bakindo Izikiya atona zogarago ti ni rogo 732 Mbata fu Batikayo Kristo. Gipai re amangi agarã 125 mbata fu gbarasayo Yerusarema rogo 607 Mbata fu Batikayo Kristo. Sidu, i aima fu zahe fu ga Mbori aboro tipa gupai naandu ka manga ku mbatayo rogo gayo ringara. Areme a, Yekova namangasunge na gako  aboro i fu zahe tipa gupai du ku mbatayo. Natona ti gu regbo i akusi bambata Ngbaõbambu Sinziri, agarã ima susa awere nga 135, na si aima digo niundo agedihe i ini gupai nga ga Satana gbegberẽ zegino nika digo barambeda na ga Yesu Kristo Zogarago Tipa Agarã Kutu ki dibaha.—Yugo. 20:1-3, 6.

10, 11. Gini ga Yesaya digisidigisi sangbanebi aYisaraere adu ni adezirehe Babera yo?

¹⁰ Dungu agu aYudo nagisangba ki fu tiyo fu aBabero, i aima bata be gu gbarasahe naye kurii Yerusarema na aBabero ki ga na yo ni akanga ku Babera yo. (Yere. 27:11, 12) Ho ga Mbori aboro adi agarã ni 70 koyo, i abi digisidigisi gu sangbanebi naya: “Ya Yekova wẽ, nga gu Ko natumo roni, nga ga Yisaraere Ziazia Ko: ‘Bambiko mbiko gaoni pai mi akéda sunge ku Babera yo, ki kuadi angbongbo dunduko.’ ”—Yes. 43:14.

¹¹ Ringbisihe kuti gu sangbanebi re, pai amangi rogo yuru sa bara ti tonatona Tanvuo 539 Mbata fu Batikayo Kristo. Baraho Bakindo Babera na gako kikindigipa aboro aambira imekakue ni rogo agu ahe i adĩ he yekaru Yerusarema yo na kini taasirimo gayo ambori, agu abanzengere nangia ga Madia na Parasa yo azi Babera. Rogo gu garã nangia 538 watadu 537Mbata fu Batikayo Kristo, gu boro nazi Babera nangia Kurese azinahe fu aYudo i ga ka dua ga Mbori yekaru berewe Yerusarema yo. Yesaya aima gumba agi apai re dunduko kodihe na pa ga Yekova kidohe ka ngerafuo gu gako aboro nasaberã na ki bandayo wa i aakaraga tiyo ku Yerusarema yo. Mbori ayambu yo “nga agu aboro mi ambakadi yo tipa re i yugu pa tambua re.” (Yes. 43:21; 44:26-28) Fuo i karagayo tiyo ku Yerusarema yo na ki dua ga Yekova yekaru berewe, i adu ni adezire Yekova mbiko ko nga gu bangisa ndikidi Mbori nadigiso sangbako dedede.

12, 13. (a) Gini aboro nakoditiyo na aYisaraere ho i akaraga iriso Yekova ni berewe? (b) Ginipai si aidaha be “kura akandoro” wa i asongoda “ga Mbori Yisaraere,” na gini maabangirise du yo na ni?

¹² Akutu agu aboro naangianga aYisaraere ya aima da ni papara gi vovo rikaaboro re, na kusa dungu aGindiria asatiyo ku rogo gu pambori nangia ga aYudo. (Eza. 2:58, 64, 65; Est. 8:17) Areme, ga Yesu “bakere rimbasa” nga ga “kura akandoro” nasongoda mbedimbedi aKristano nga “ga Mbori Yisaraere.” (Yugo. 7:9, 10; Yo. 10:16; Gara. 6:16) Kina gu rimo nga aDezire Yekova re du rii bakere rimbasa a.

¹³ Ti regbo gaKristo Zogarago Tipa Agarã Kutu, bakere rimbasa nika du na  bakere ngbarago ka sakapai fu agu aboro nika zinga be kpio tipa wai si adu fuyo ni pa momu kadu ni aDezire Yekova ti yangara arame. Ka ani nye ni ruru rani fu Mbori awere na ki asadi ka nye ni ziazia rani, si nika sa gupai nga ani mangihe wo. Na berewe a, ka ani vura manga ome amanga wai vurũ, si naida ani sana Mbori dedede tipa ko mbupai furani, na bakere momu du ngaha furani nga aboro ingapai tipa ani du na ziazia rimo Mbori rirani.—Oni gedi 1 Yoane 1:8, 9.

14. Gu rimo nga Yekova, rogoyo nga gine?

¹⁴ Ka ani aida ka kiiso gaani tambuahe tipa padu ani na rimo Mbori rirani, si adu ni wenepai ani berẽkurii gupai si ayugoho. Gu rimo Mbori nga “Yekova,” si nga gu fugo Ebere nayugopa mangapai, na i rengbe ka saha nga “ka da ni.” Sidu, gu rimo nga Yekova rogoyo nga ‘Ko Rengbe Kada ni gu Boro Ko Aida Kada Nga Ní.’ Gi rogo rimoko yo re ima rẽ na ko mbiko ko nga Bakusiahe gbiati iratatamana na ni gu boro Nadigiso gani ringbisapai. Ka Satana vura sovura wai kutiko, ko duwa ka ko sa gupai ko akpinyemuhe gbiati gako ringbisapai si digisitihe, na boro ho rengbe ka gbarasapa gupai Mbori aida ka mangaha te.

15. Ginipai rengbe ani ka wirikaha ti gupai Yekova agumbaha fu Moize tipa rimoko? (Oni bi gu Sanduki nga “ Gu Rimo du na Rogoyo Ti Ni”)

¹⁵ Ho Yekova arugu Moize ni ko ndu ka kusa gako aboro Ezipeta yo, ko ayugu dungu apai tipa rogo rimoko yo. Ziazia Kekeapai naya: “Mbori ki ya fu Mose, ‘Mo yá fu yo rimore ngaMi Nga gu NgaMi’ [watadu, “Mi Nikadu Nigu Boro Mi Nika Ida Kadu Nga Ní”].’ Ko ki ya fu ko a, ‘Mo gúmba gere fu awiri aYisaraere, ya, “Mi Nga kedi re kono du oni ni.” ’ ” (Gate 3:14) Sidu, Yekova rengbe kada ni guhe ko aida kada ngaha tipa ka digiso gako ringbisapai. Ko ada fu aYisaraere ni Batasi, ni Babanda yo, ni Bangbembatayo, na ni gu boro naangerafuo gayo azingo nga ga borose na ga toro.

16, 17. (a) Wai rengbe ani ka yugo gaani tambuahe tipa gu momu nga ga du na rimo Mbori rirani? (b) Ginipai ani ka wisigoho rogo gu kekeapai naye fuo gere?

¹⁶ Areme, Yekova namangapai kindi kuti rogo rimoko yo mbiko ko nangerafuo gaani azingo nga ga toro gbiati gu nga ga borose dunduko. Ono tie, anga rogo rimo Mbori yo sa nga ko nada ni gu boro ko aida kada nga ní te. Si nakoda gupai ko asaha si mangi nibipa gu sunge gako aDezire amangaha si digisi gako ringbisapai. Pa berã ani kurii gipai re rengbe ka ngarasa rani ani raki ringbisihe na rimorani. Wirinarani nga Kare du garãri 84 tungusipai Norway tipa agarã 70 aya: “Mi nabihe nga bakere pa iriso dungaha ka irisaYekova nga nyenye Bakindo, na kadu dagba agu aboro yo du na rimoko riyo. Si ni pa momu ka sakapai tipa gu rengo du rogo Ziazia Kekeapai yo fu aboro na ka bi wai du yo na bakere ngbarago ka giatiyo na ni. Ni kpiapai,mi nidu na bakere ngbarago ka yugo pa wai ga Kristomotumo asa apai furani taata na wai rengbe he ka undo yo i gbia nyenye unga rogo zezeredi vovo zegino.”

¹⁷ Nirengo, adagbarago kinaho duhe ni kpakarakpakaraha ka gbia agu aboro du na nyemu ka inopai tipa Mbori. Wa vura duhe wo, yamo mo naadunga na ngbarago ho mo agbia gu boro ni nadegatuni foro na mo kini yugu rimo Yekova funi wa gu duhe tipa wirinarani nga Kare te? Ono wai rengbe ani kadu ni aDezire Yekova na ki du berewe ni adezire Yesu? Ani nika wisigo gi sanahe re rogo gu kekeapai naye fuo gere.