Ani dunduko ninaaberã tipa ku mbatayo. Ani ainongo wai raka nika du furani na gaani aborokporo te. Ani naasana tirani na ngbatunga asanahe wa gere nga: ‘Ya mo awire araka rogo wene zegino? Ya mo gberango nika gbarasa gi zegino re agbarasa? Ya mo pai ho si aida mi mangihe awere tipa gi raka ngba ku mbatayo?’ Du na nyemu ka inopai tipa agi apai re nayugo gupai nga ani naida kadu na kido, rurupai, gbiati ngbabase rogo raka yo. Ka oni ini gupai nika manga ku mbatayo, oni ima rengbe ka mbakada tironi tipaha rogo borose na rogo toro yo.

Ginipai tie du tipa ga raka ku mbatayo? Ya mo boro rengbe ka inoho? Wene abawisigipai tipa agu apai du ku mbatayo aima pepai si ki mangi ono dunguhe naamanganga ya. Ono wa vura duhe wo, Mbori rengbe ka pepai tipa ku mbatayo si ki mangi kinawo. Fugoko naya: “[Mi] nataki pande pa digidapai ti tonatona rago na pa agu ahe ata manga nga ya bakuru yo.” (Yesaya 46:10) Wai du ko nidu na diabese rogo gipai re?

Tipagine si aida mo du ti ni na nyemu ka ino agu sangbaanebi Mbori apehe si ki mangi? Kangia boro ho ni gumbapai foro si ki mangi nibasa, mo kido akido kuti sangbani. Si nawira wa ka ni pepai foro tipa gupai nika manga gba, mo idihe aida. Wakina gure a, kangia mo wirikipai tipa agu apai Mbori apehe si ki mangi, mo duadu na nyemu gupai ka ko pehe tipa gamo raka ku mbatayo.

PA GBARASA BAKERE GBATA:

Ni kpiapai, ngbaro ima rengba ka zera ka si du nga boro gumbapai foro nga i nika gburuwa gu bakere gbata du na bakere ome ti ni barambeda. Gere nga gupai Mbori  apehe rogo gako nebi yo tipa pa gbarasa gu gbata nangia Nineve. (Zefania 2:13-15) Ginipai abakeke kuru pangbanga apehe tipa gipai re? Rogo saba kama agarã M.B.K., fuo susa agarã 15 fuo pe Mbori gupai nika manga Nineve ku mbatayo, aBabero na aMadio azubo Nineve na ki zihe. Kurigure, Mbori aima pehe mbata fu regbo nga Nineve nika du “ni gbarasigbarasi he, ni kungba rago wa ngbi ngume.” Ya mo gipai re amangi nzunzu? Ii, si aima manga. Wa vura duhe nga bakio gu gbata re adu wa amairo 518, agu aboro nazihe aayanga wẽ i naida ka bandaha tipa ka manga kurapai yo te. Kuba gupai nga i bandaha, i agbarasihe. Ya mo wene abawisigipai tipa poritiki ho narengbe ka pepai wa gure si ki mangi?

I AZOKODA MEME ABORO:

Da duho naarengbe ka pepai ku mbatayo mbu agarã 300 mbata fu si mangi na ki pepa gu atita gu kumba nika zo meme aboro na gu bamotumo ko nika zoho riihe kodihe na rimo gu gbata gu bamotumo re nika du rogoho? Ka gupai re mangi nirengo, gu boro re nada ni bape rengo. Gu ga Mbori nebi re aya: ‘i abatika kumbagude ni ngbatunga Dawidi, rimoko nika ngia Yosiya ko nikazo meme aboro’ rii bamotumo Betere yo. (1 Abakindo 13:1, 2) Fuo akama agarã biata, bakindo akuru rimoko angia Yosiya rogo ngbatunga Davide, nga gu rimo naangenga dagba aYisaraere ya. A wa i aima gumbaha ku mbatayo, Yosiya ‘arogo agu ameme naadu rogo amurã yo, ki zoho auru bamotumo’ Betere yo. (2 Abakindo 23:14-16) Gini boro rengbe ka pe ngbatungapai wa gure si ki mangi ka si du nga ga Mbori toro kugii ni te?

NYASARIIPA GU ZOGARA NGA GA RINGARA:

Ngbaro rengbe ka zera ka boro pepa rimo gu boro foro nika nyasariipa gu zogarago nga ga gu ringara du na bakere ome ti ni mbata fu i vungu ni na ki pepa gu birĩ ni nika mangasunge na ni tipa ka nyasariipa gu ringara re. Mbori aima fura tipa pai ku mbatayo nga, gu kumba nangia Kurese ko nika zio Babera. Si adu nga ko nika zaka aYudo be zio na ki undo sunge dua yekaru. Kurigure, Mbori aya Kurese nika ugusa di, na ngbadimo ndugu nika du ni  zazaha ka sa apai fuko taata. (Yesaya 44:27–45:2) Ya mo agi apai re dunduko adigisitihe? Abake kura apangbanga ima idaha nga Kurese aima zio gu ringara re. Ga Kurese asekere amangi nyanyaki sunge ka aria ngba gu di naadu Babera yo tipa rago ugu i si. Kurigure, agu asekere re arimi ku gbatayo rogo gu ngbadimo ndugu naadu ni zazaha. Kurese azaki aYudo na ki ya i ndu ka dua yekaru Yerusarema yo. Gere nga gupai naamanga mbata ya mbiko Kurese aangianga irisi gu Mbori nangia ga aYudo ko te. (Ezara 1:1-3) Gini boro ka rengbe na pe ngbatunga apangbanga wa gure si ki mangi?

Ani fura tipa akpiapai biata nayugo wai Mbori adu na diabese rogo pe apai ku mbatayo si ki mangi. Anga kina agu apai du biata re Mbori apehe si ki mangi te. Gu bangbembatayo fu aYudo nangia Yosua apepai nga gu aYudo naabayo aima inoho nga: “Oni dunduko ini he kpotoroni yo na mbisimoroni, ya a nga wenepai nakpa sa dagba agu apai dunduko Yekova gaoni Mbori akido pa ha fu roni te; si amangi dunduko fu roni, a nga pai sa nakpa te.” (Yosua 23:1, 2, 14) Ga Yosua aboro aarengbanga ka tikango agu akidohe na sangbaanebi nga ga Mbori naada nirengo te. Mbori naamanga gipai re wai si da ti rengo? Bakere kparakparapai kinaho ti agu agene nga ga Mbori na gu nga ga aboro. Gere nga gupai si aida mo inihe mbiko Mbori ima pepa gu nyanyaki apai nika manga ku mbatayo.

Aboro naamaa mburu agu apai i apehe tipa ku mbatayo rii agu awetekapai aboro-birĩ-inohe amangaha, watadu aguyo naya i du du na tandu ka ino agu apai du ku mbatayo. Ho aboro apepai ni tipa ku mbatayo, i nasungo ka pido ka bi gupai nika manga.—Asanza 27:1.

Ono tipa Mbori tigako, ko ima ino gu rengo du tipaha dunduko. Ko ima ino agu apai du tipa kusikusiahe na aboro wenengai; ho ko afura ni tipa ku mbatayo, ko ima ino wai gupai re nika du na ome kurii aboro. Ono Mbori ima rengba ka mangapai susi gure. Ko ima rengbe ka manga ariapai tipa gako pai da ti rengo. Ko naya: “Gimi apai nga gu nakura ngbare yo; si akáraga nga tihe fere gbua te, ono si anyása gu pai ngba ti re.” (Yesaya 55:11) Ti kura aregbo, ga Mbori sangbaanebi natingida rani na pa gupai ko nika mangaha. Ko aima du na diabese rogo agu asangbaanebi ko agumbaha.

Ya mo ba ho rengbe mo ka ngera rogoho tipa ka ino gupai du tipa ro ku mbatayo na gamo aborokporo? Kangia mo ima inoho nga kerepai naye ka manga, mo mangi gupai amanga rengbe ka batasa ro. Kina wo si aida mo mangihe tipa gu sangbaanebi nga ga Ziazia Kekeapai. Mbori ima takapandepai nga bakere ariapai gudu ho naye ka manga rogo zegino barambeda. (Oni bi gu sanduki nga “ Gupai Mbori Nayuguhe Tipa Gupai du ku Mbatayo.”) Gupai du ku mbatayo re kia ti gu nga ga agu aboro naya i du du na tandu ka ino apai ku mbatayo.

Mo ima rengbe ka berãha nga: Gu pangbanga du tipa gi zegino re kina sa. Mbiko gu sangbaanebi nga ga Ziazia Kekeapai, ani ima rengba ka ino gupai nika manga. Mbori aya: Mi “nataki pande pa digidapai ti tonatona rago, . . . niya, ‘Gi rugapai arú aru, mi amánga agu apai ngba ti re dũ.’” (Yesaya 46:10) Mo gbiati gamo aborokporo ima rengbe kadu na ngbarago ku mbatayo. Mo sana aDezire Yekova tipa agu apai Ziazia Kekeapai aya si nika manga ku mbatayo. ADezire Yekova nga agumba sangbaatoro te, na anga kparakpara tandu beyo tipa ka ino agu apai du ku mbatayo te. I nga abawiriki Ziazia Kekeapai rengbe ka yugo gu wene apai Mbori ambakadaha ku mbatayo.